ໄພແຫ້ງແລ້ງທີ່ແກ່ຍາວສົ່ງຜົນກະທົບຢ່າງໜັກໜ່ວງຕໍ່ຟິລິບປິນ
(GMT+08:00) 2010-03-23 18:11:15 cri
ຕາມຂ່າວສານຊິ່ນຮວາ: ກະຊວງກະສິກຳຟິລິບປິນອອກແຈ້ງການສະບັບຫຼ້າສຸດໂດຍກ່າວວ່າ, ໄພແຫ້ງແລ້ງທີ່ແກ່ຍາວໄດ້ສົ່ງຜົນກະທົບຕໍ່ 23 ແຂວງຂອງຟິລິບປິນ. ໄລ່ມາຮອດວັນທີ 1 ມີນານີ້, ຂໍ້ມູນສະແດງໃຫ້ເຫັນວ່າ, ໄພແຫ້ງແລ້ງໄດ້ນຳເອົາຜົນເສຍຫາຍປະມານ 245 ລ້ານໂດລາໃຫ້ແກ່ຂະແໜງການກະສິກຳຂອງຟິລິບປິນ, ບາງເຂດມີຄວາມຫຍຸ້ງຍາກໃນດ້ານການສະໜອງນ້ຳໃຊ້ໃນຊີວິດປະຈຳວັນ. ປະຈຸບັນ, ສະພາບໄພແຫ້ງແລ້ງຍັງພວມສືບຕໍ່ຢູ່.
ນັບແຕ່ເດືອນພະຈິກປີກາຍນີ້ມາຮອດປະຈຸບັນ, ຟິລິບປິນບໍ່ມີຝົນຕົກແຮງຈັກເທື່ອ. ຜູ້ຊ່ຽວຊານອຸຕຸນິຍົມຂອງຟິລິບປິນກ່າວວ່າ, ໄພແຫ້ງແລ້ງເທື່ອນີ້ແມ່ນເກີດຂຶ້ນຍ້ອນປະກົດການແອວນິນໂຍ, ປະກົດການດັ່ງກ່າວຈະສິ້ນສຸດລົງໃນເດືອນມິຖຸນາ.
ປະກົດການແອວນິນໂຍແມ່ນປະກົດການນ້ຳທະເລຢູ່ເຂດພາກຕາເວັນອອກແລະພາກກາງຂອງປາຊິຟິກເສັ້ນສູນສູດອຸ່ນຂຶ້ນຢ່າງຜິດປົກກະຕິ, ເມື່ອເກີດປະກົດການນີ້, ມັກຈະເຮັດໃຫ້ບາງເຂດເກີດມີໄພແຫ້ງແລ້ງ, ບາງເຂດຝົນຕົກຫຼາຍເກີນໄປ, ນຳເອົາຜົນເສຍຫາຍຢ່າງໜັກໜ່ວງມາສູ່ມວນມະນຸດ.
