ສັນຍາຫຼາຍຝ່າຍຂອງຂໍ້ລິເລີ່ມຊຽງໃໝ່ເລີ່ມມີຜົນບັງຄັບໃຊ້
(GMT+08:00) 2010-03-24 18:01:58 cri
ຕາມຂ່າວ CRI: ວັນທີ 24 ມີນານີ້, ທະນາຄານປະຊາຊົນຈີນເຊິ່ງເປັນທະນາຄານກາງຂອງຈີນເຜີຍໃຫ້ຮູ້ວ່າ, ມື້ດຽວກັນ, ລັດຖະມົນຕີການເງິນແລະປະທານທະນາຄານກາງຂອງອາຊຽນບວກ 3, ຄື: ຈີນ, ຍີ່ປຸ່ນແລະເກົາຫຼີ, ພ້ອມດ້ວຍຜູ້ອຳນວຍການໃຫຍ່ຂອງພະແນກຄຸ້ມຄອງການເງິນຮົງກົງຈີນຮ່ວມກັນປະກາດວ່າ, ສັນຍາຫຼາຍຝ່າຍຂອງຂໍ້ລິເລີ່ມຊຽງໃໝ່ເລີ່ມມີຜົນບັງຄັບໃຊ້ນັບແຕ່ວັນທີ 24 ມີນານີ້ເປັນຕົ້ນໄປ.
ການຫັນເປັນຫຼາຍຝ່າຍຂອງຂໍ້ລິເລີ່ມຊຽງໃໝ່ແມ່ນກົນໄກແລກປ່ຽນເງິນຕາຫຼາຍຝ່າຍທີ່ມີສະມາຊິກອາຊຽນບວກ 3 ເຂົ້າຮ່ວມທີ່ສ້າງຂຶ້ນຢູ່ບົນພື້ນຖານກົນໄກແລກປ່ຽນເງິນຕາສອງຝ່າຍຂອງຂໍ້ລິເລີ່ມຊຽງໃໝ່ທີ່ໃຊ້ໃນປະຈຸບັນ, ມີຈຸດປະສົງເພື່ອດຳເນີນການຄ້າແລກປ່ຽນເງິນຕາຢ່າງວ່ອງໄວແລະເປັນເອກະພາບກັນໂດຍຜ່ານກົນໄກຕົກລົງຮ່ວມກັນພາຍໃຕ້ສັນຍາດຽວກັນ.
ການຫັນເປັນຫຼາຍຝ່າຍຂອງຂໍ້ລິເລີ່ມຊຽງໃໝ່ໄດ້ລະດົມທຶນ 120 ຕື້ໂດລາສະຫະລັດ, ເປົ້າໝາຍຕົ້ນຕໍແມ່ນເພື່ອແກ້ໄຂຄວາມຫຍຸ້ງຍາກໃນດ້ານລາຍຮັບລາຍຈ່າຍສາກົນແລະເງິນຕາແລກປ່ຽນໃນໄລຍະສັ້ນພາຍໃນພາກພື້ນນີ້. ໃນຄັງສະສົມເງິນທີ່ມີ 120 ຕື້ໂດລາ, ຈີນ, ຍີ່ປຸ່ນແລະສ.ເກົາຫຼີອອກທຶນ 80%, 10 ປະເທດອາຊຽນ 20%.
