ປະທານສະພາແຫ່ງຊາດລາວຕ້ອນຮັບຮອງປະທານສະພາປະຊາຊົນແຫ່ງຊາດຈີນ
(GMT+08:00) 2010-03-25 18:05:09 cri
ຕາມຂ່າວສານຊິ່ນຮວາ: ວັນທີ 24 ມີນານີ້, ຢູ່ນະຄອນຫຼວງວຽງຈັນ, ທ່ານທອງສິງ ທຳມະວົງ, ປະທານສະພາແຫ່ງຊາດລາວໄດ້ຕ້ອນຮັບທ່ານນາງຢຽນຈຸ້ນຊີ, ຮອງປະທານຄະນະປະຈຳສະພາປະຊາຊົນແຫ່ງຊາດຈີນ, ສອງຝ່າຍໄດ້ສົນທະນາກັນຢ່າງສະໜິດສະໜົມ.
ທ່ານທອງສິງກ່າວວ່າ, ເມື່ອກ້າວເຂົ້າສູ່ສະຕະວັດໃໝ່ແລ້ວ, ການພົວພັນລາວຈີນພັດທະນາກ້າວໄປໜ້າຢ່າງໝັ້ນທ່ຽງ. ການໄປມາຫາສູ່ກັນລະຫວ່າງສະພາສອງປະເທດແມ່ນພາກສ່ວນໜຶ່ງທີ່ສຳຄັນຂອງການພົວພັນລະຫວ່າງສອງປະເທດ. ສະພາແຫ່ງຊາດລາວຍິນດີສືບຕໍ່ຮັກສາການໄປມາຫາສູ່ກັນຂອງກຽມນຳລະດັບສູງກັບສະພາປະຊາຊົນແຫ່ງຊາດຈີນ, ການເພີ່ມທະວີການແລກປ່ຽນບົດຮຽນໃນດ້ານການຕິດຕາມກວດກາດດ້ວຍການນິຕິບັນຍັດ, ຊຸກຍູ້ການຮ່ວມມືລະຫວ່າງສະພາສອງປະເທດກ້າວຂຶ້ນສູ່ລະດັບໃໝ່.
ທ່ານນາງຢຽນຈຸ້ນຊີກ່າວວ່າ, ການພົວພັນຈີນລາວໄດ້ຮັບຄວາມຄືບໜ້າຢ່າງໃຫຍ່ຫຼວງໃນປີມໍ່ໆມານີ້, ໄດ້ນຳເອົາຜົນປະໂຫຍດຕົວຈິງມາໃຫ້ແກ່ປະຊາຊົນສອງຊາດ. ສະພາປະຊາຊົນແຫ່ງຊາດຈີນຍິນດີດຳເນີນການແລກປ່ຽນແລະການຮ່ວມມືດ້ວຍໄມຕີຈິດມິດຕະພາບຢ່າງຮອບດ້ານ, ເພື່ອປະກອບສ່ວນໃໝ່ເຂົ້າໃນການພົວພັນຄູ່ຮ່ວມມືຍຸດທະສາດຢ່າງຮອບດ້ານລະຫວ່າງສອງປະເທດ.
ທ່ານນາງຢຽນຈຸ້ນຊີແມ່ນເລີ່ມໄປຢ້ຽມຢາມມິດຕະພາບຢູ່ລາວແຕ່ວັນທີ 24 ມີນານີ້ໂດຍຕອບສະໜອງຕາມຄຳເຊີນສະພາແຫ່ງຊາດລາວ. ຕອນບ່າຍມື້ດຽວກັນ, ທ່ານນາງຢຽນຈຸ້ນຊີໄດ້ພົບປະກັບທ່ານໄຊສົມພອນ ພົມວິຫານຮອງປະທານສະພາແຫ່ງຊາດລາວ, ໂດຍໄດ້ລົງເລິກແລກປ່ຽນຄວາມເຫັນກ່ຽວກັບການເພີ່ມທະວີການໄປມາຫາສູ່ກັນລະຫວ່າງສະພາຂອງສອງປະເທດ.
