ການເຈລະຈາລະຫວ່າງລັດຖະບານໄທ ກັບກຸ່ມເສື້ອແດງຢຸດຕິ ແຕ່ຕົກລົງກັນບໍ່ໄດ້
(GMT+08:00) 2010-03-30 12:30:38 cri
ຕາມຂ່າວCRI:ການເຈລະຈາເທື່ອທີສອງລະຫວ່າງລັດຖະບານໄທກັບກຸ່ມແນວໂຮມປະຊາທິປະໄຕຕໍ່ຕ້ານຜະເດັດການແຫ່ງຊາດໄທ ຫຼືກຸ່ມເສື້ອ ແດງ ທີ່ຈັດຂຶ້ນໃນຕອນແລງວັນທີ29 ມີນານີ້ ບໍ່ສາມາດຕົກລົງກັນໄດ້, ກຸ່ມເສື້ອແດງປະກາດວ່າ ຢຸດຕິການເຈລະຈາ ແລະຈະດຳເນີນການໂຮມຊຸມນຸມປະທ້ວງຕໍ່ໄປ. ຕອນແລງມື້ດຽວກັນ,ຜູ່ແທນຂອງລັດຖະບານ3ຄົນທີ່ນຳໂດຍທ່ານອະພິສິດ ເວດຊາຊີວະ, ນາຍົກລັດຖະມົນຕີ ກັບຄະນະນຳຂອງກຸ່ມເສື້ອແດງ 3 ຄົນໄດ້ຈັດການເຈລະຈາເທື່ອທີສອງ ຢູ່ທີ່ຄະນະກຳມະການສິດທິມະນຸດແຫ່ງຊາດທີ່ຈັງຫວັດນົນທະບູລີ,ເພື່ອສືບຕໍ່ເຈລະຈາກັນກ່ຽວກັບການຍຸບສະພາຜູ່ແທນລາດຊະດອນ. ໃນການເຈລະຈາເທື່ອນີ້,ທ່ານອະພິສິດກ່າວວ່າ, ເວລາທີ່ກຳນົດ 15 ວັນທີ່ກຸ່ມເສື້ອແດງສະເຫນີອອກມານັ້ນ ບໍ່ແມ່ນເວລາທີ່ເຫມາະສົມຕາມສະພາບຕົວຈິງ, ແລະກໍ່ບໍ່ໄດ້ຕາງຫນ້າຄວາມເຫັນຂອງປະຊາຊົນສ່ວນຫຼາຍ, ແຕ່ວ່າ, ເພື່ອແກ້ໄຂຄວາມຂັດແຍ່ງກັນລະຫວ່າງສອງຝ່າຍໂດຍໄວເທົ່າທີ່ຈະໄວໄດ້,ແລະຟື້ນຟູຄວາມເປັນລະບຽບຮຽບຮ້ອຍຂອງສັງຄົມໃຫ້ເປັນປົກກະຕິ, ລັດຖະບານຈຶ່ງເຫັນດີໃຫ້ຈັດການເລືອກຕັ້ງທົ່ວໄປຄືນໃຫມ່ໃນທ້າຍປີນີ້. ແຕ່ວ່າ, ຄະນະນຳຂອງກຸ່ມເສື້ອແດງ 3 ຄົນໄດ້ສະເຫນີຄວາມເຫັນທີ່ຕ່າງກັນ ກ່ຽວກັບບັນຫາດັດແກ້ລັດຖະທຳມະນູນໃນຂໍ້ທີສອງຂອງຂໍ້ສະເຫນີ, ແລະຄະນະນຳຂອງກຸ່ມເສື້ອແດງກໍ່ບໍ່ພໍໃຈຕໍ່ເວລາ 9 ເດືອນທີ່ລັດຖະບານສະເຫນີອອກມານັ້ນ, ໃນທີ່ສຸດ,ທ່ານຈະຕຸພອນ ພົມພັນ, ຫນຶ່ງໃນຜູ່ນຳຂອງກຸ່ມເສື້ອແດງໄດ້ປະກາດວ່າ ການເຈລະຈາເທື່ອນີ້ ກໍ່ໄດ້ຢຸດຕິລົງແລ້ວ. ຫຼັງຈາກສິ້ນສຸດການເຈລະຈາແລ້ວ, ໃນສະຖານທີ່ສຳຄັນຂອງການໂຮມຊຸມນຸມ, ທ່ານນັດທະວຸດ ໃສເກື້ອ, ຫນຶ່ງໃນຜູ່ນຳຂອງກຸ່ມເສື້ອແດງ ໄດ້ປະກາດວ່າຈະດຳເນີນການໂຮມຊຸມນຸມປະທ້ວງອີກຕໍ່ໄປ. ໃນເວລາທ່ານ ນາຍົກລັດຖະມົນຕີອະພິສິດ ໃຫ້ສຳພາດຕໍ່ນັກຂ່າວ, ທ່ານກໍ່ໄດ້ສະແດງຄວາມເສຍດາຍຕໍ່ຜົນການເຈລະຈາດັ່ງກ່າວ.
