ລັດຖະມົນຕີກະຊວງກະລາໂຫມໄທກ່າວວ່າ ມາດຕະການປ້ອງກັນຄວາມປອດໄພຂອງກອງປະຊຸມສຸດຍອດແມ່ນ້ຳຂອງໄດ້ກຽມພ້ອມແລ້ວ
(GMT+08:00) 2010-04-03 18:27:02 cri
ຕາມຂ່າວCRI: ວັນທີ2ເມສານີ້, ພົນເອກປະະວິດ ວົງສຸວັນ, ລັດຖະມົນຕີວ່າການກະຊວງປ້ອງກັນປະເທດໄທປະກາດວ່າ, ມາດຕະການປ້ອງກັນຄວາມປອດໄພຂອງກອງປະຊຸມສຸດຍອດແມ່ນ້ຳຂອງຄັ້ງທຳອິດໄດ້ກຽມພ້ອມແລ້ວ, ມີທະຫານແລະຕຳຫຼວດຫຼາຍກວ່າ8000ຄົນຈະຮັກສາຄວາມປອດໄພໃນກອງປະ ຊຸມເທື່ອນີ້.
ຍ້ອນກຸ່ມເສື້ອແດງຍັງຈັດການປະທ້ວງຕ້ານລັດຖະບານຢູ່ບັງກອກ, ບັນຫາການຮັກສາຄວາມປອດໄພຂອງກອງປະຊຸມສຸດຍອດແມ່ນ້ຳຂອງຄັ້ງທຳອິດແມ່ນຈຸດສຸມທີ່ພາຍນອກສົນໃຈ. ທ່ານປະວິດກ່າວວ່າ, ເພື່ອເລື່ອງນີ້, ໄທໄດ້ປະຕິບັດພະລາຊະບັນຍັດວ່າດ້ວຍຄວາມປອດໄພພາຍໃນປະເທດຢູ່ບ່ອນຈັດກອງປະຊຸມ ຄືເມືອງຫົວຫິນທີ່ເປັນເມືອງແຄມທະເລຢູ່ພາກກາງຂອງໄທແລະເຂດອ້ອມຂ້າງ. ກ່ອນໜ້ານີ້, ພູ້ນຳກຸ່ມເສື້ອແດງເຄີຍກ່າວວ່າຈະບໍ່ລົບກວນການຈັດກອງປະຊຸມສຸດຍອດແມ່ນ້ຳຂອງ.
ກອງປະຊຸມສຸດຍອດແມ່ນ້ຳຂອງຄັ້ງທຳອິດຈະຈັດຂຶ້ນຢູ່ເມືອງຫົວຫິນໃນວັນທີ5ເມສານີ້ຢ່າງເປັນທາງການ. ຜູ້ນຳຂອງ4ປະເທດສະມາຊິກໃນຄະນະກຳ ມະການແມ່ນ້ຳຂອງ ຄືໄທ, ຫວຽດນາມ, ລາວແລະກຳປູເຈຍຈະເຂົ້າຮ່ວມກອງປະຊຸມເທື່ອນີ້. ໃນຖານະເປັນປະເທດສັງເກດການ, ຈີນແລະມຽນມາຈະສົ່ງຜູ້ຕາງໜ້າໄປເຂົ້າຮ່ວມກອງປະຊຸມ. ກອງປະຊຸມຈະປຶກສາຫາລືບັນຫາກ່ຽວກັບລະດັບນ້ຳຂອງແມ່ນ້ຳຂອງຫຼຸດລົງຢ່າງຫຼວງຫຼາຍໃນຫວ່າງມໍ່ໆມານີ້, ໄພແຫ້ງແລ້ງອັນໜັກໜ່ວງທີ່ເກີດຂຶ້ນຢູ່ເຂດລ້ອງແມ່ນ້ຳຂອງແລະອື່ນໆ.