ຈີນເອົາໃຈໃສ່ໃນລະດັບສູງແລະຕັ້ງໜ້າເຂົ້າຮ່ວມການຮ່ວມມືໃນອະນຸພາກພື້ນ
(GMT+08:00) 2010-04-05 17:05:14 cri
ຕາມຂ່າວCRI:ວັນທີ 5 ເມສານີ້,ທ່ານຊົ້ງທ່າວ,ລັດຖະມົນຕີຊ່ວຍວ່າການກະຊວງການຕ່າງປະເທດຈີນກ່າວວ່າ,ຈີນເອົາໃຈໃສ່ໃນລະດັບສູງແລະຕັ້ງໜ້າເຂົ້າຮ່ວມການຮ່ວມມືໃນອະນຸພາກພື້ນແມ່ນ້ຳຂອງ.
ກອງປະຊຸມສຸດຍອດຄະນະກຳມາທິການແມ່ນ້ຳຂອງຄັ້ງປະຖົມມະເລີກໄດ້ໄຂຂຶ້ນຢູ່ຫົວຫີນຂອງໄທ,ຫົວໜ້າລັດຖະບານຂອງ 4 ປະເທດສະມາຊິກຄືໄທ ກຳປູເຈຍ ລາວແລະຫວຽດນາມໄດ້ເຂົ້າຮ່ວມກອງປະຊຸມເທື່ອນີ້,ທ່ານຊົ້ງທ່າວ,ລັດຖະມົນຕີຊ່ວຍວ່າການກະຊວງການຕ່າງປະເທດຈີນແລະທ່ານອຸຍະເວະ,ລັດຖະມົນຕີວ່າການກະຊວງການຕ່າງປະເທດມຽນມາກໍ່ໄດ້ຮ່ວມປະຊຸມໃນນາມເປັນຜູ້ແທນຂອງປະເທດສັງເກດການ.
ໃນເວລາກ່າວຄຳປາໄສໃນກອງປະຊຸມ,ທ່ານຊົ້ງທ່າວຊີ້ອອກວ່າ,ໃນນາມເປັນປະເທດບ້ານໃກ້ເຮືອນຄຽງທີ່ດີຕໍ່ກັນແລະຄູ່ຮ່ວມມືຂອງປະເທດອະນຸພາກພື້ນແມ່ນ້ຳຂອງ,ຈີນເອົາໃຈໃສ່ສູງແລະຕັ້ງໜ້າເຂົ້າຮ່ວມການຮ່ວມມືອະນຸພາກພື້ນ.ແມ່ນ້ຳລ້ານຂ້າງ-ແມ່ນ້ຳຂອງແມ່ນສິ່ງລ້ຳຄ່າຂອງປະເທດຕ່າງໆໃນອະນຸພາກພື້ນ.ໃນການພັດທະນາແລະນຳໃຊ້ພະລັງງານນ້ຳຂອງແມ່ນ້ຳລ້ານຊ້າງ,ລັດຖະບານຈີນຍຶດໝັ້ນປະຕິບັດຍຸດທະສາດພັດທະນາແບບຍືນຍົງ,ຍຶດໝັ້ນເຮັດໃຫ້ການພັດທະນາກັບການອະນຸລັກສະເໝີພາບກັນ,ຍຶດໝັ້ນເຮັດໃຫ້ຜົນປະໂຫຍດຂອງຕົນກັບຜົນປະໂຫຍດຂອງປະເທດຕ່າງໆລຸ່ມແມ່ນ້ຳຂອງເປັນເອກະພາບກັນ.
