ພາກຕາເວັນຕົກອິນໂດເນເຊຍ ເກີດແຜ່ນດິນໄຫວຮຸນແຮງ
(GMT+08:00) 2010-04-07 11:17:02 cri
ຕາມຂ່າວcri:ຕອນເຊົ້າວັນທີ 7ເມສານີ້,ຢູ່ບໍລິເວນເຂດບໍລິຫານພິເສດອາເຈະ ພາກຕາເວັນຕົກຂອງອິນໂດເນເຊຍ ໄດ້ເກີດແຜ່ນດິນໄຫວທີ່ວັດແຮງສັ່ນສະເທືອນໄດ້7,2 ຣິກເຕີ. ຫັຼງຈາກເກີດແຜ່ນດິນໄຫວ, ອິນໂດເນເຊຍແລະໄທ ກໍ່ໄດ້ປະກາດ ເຕືອນໄພຄຶ້ນຊຶນາມີໃນທັນທີ. ອົງການອຸຕຸນິຍົມ ແລະທໍລະນີຟີຊິກຂອງອິນໂດເນເຊຍ ໄດ້ເຜີຍແຜ່ຂໍ້ມູນໂດຍກ່າວວ່າ,ແຜ່ນດິນໄຫວເທື່ອນີ້ໄດ້ເກີດຂຶ້ນໃນເວລາປະມານ 5 ໂມງ15 ນາທີວັນທີ 7 ເມສານີ້ຕາມເວລາທ້ອງຖິ່ນ, ຈຸດສູນກາງແຜ່ນດິນໄຫວ ຕັ້ງຢູ່ແຫ່ງທີ່ຫ່າງຈາກເມືອງຊີນາບັງຂອງເຂດບໍລິຫານພິເສດອາເຈະ ໄປທາງທິດຕາເວັນອອກສຽງໃຕ້ 75 ກິໂລແມັດ, ຄວາມເລິກຂອງສູນກາງແຜ່ນດິນໄຫວແມ່ນ 34 ກິໂລແມັດ. ຫຼັງຈາກເກີດແຜ່ນດິນໄຫວແລ້ວ, ຢູ່ບໍລິເວນຂອງເຂດບໍລິຫານພິເສດອາເຈະ ກໍ່ໄດ້ເກີດແຮງສັ່ນສະເທືອນຕາມມາອີກ 3 ເທື່ອລຽນຕິດ. ຮອດປະຈຸບັນ,ຍັງບໍ່ມີລາຍງານກ່ຽວກັບຜູ່ເສຍຊີວິດແລະບາດເຈັບແລະຄວາມເສຍຫາຍດ້ານຊັບສິນຢ່າງຫຼວງຫຼາຍ. ສື່ມວນຊົນທ້ອງຖິ່ນລາຍງານວ່າ, ເຂດບໍລິຫານພິເສດອາເຈະແລະເມືອງເມດັນ,ເທດສະບານແຂວງຊູມາຕຣາເຫນືອທີ່ຢູ່ໃກ້ນັ້ນ ລ້ວນແຕ່ໄດ້ມີຄວາມຮູ້ສືກເຖິງແຮງສັ່ນສະເທືອນ ຢ່າງຈະແຈ້ງ, ບາງເຂດຢູ່ອາເຈະ ກໍ່ໄດ້ຂາດໄຟຟ້າແລ້ວ.
ຫຼັງຈາກເກີດແຜ່ນດິນໄຫວ, ສູນເຕືອນໄພພິບັດທຳມະຊາດແຫ່ງຊາດໄທ ໄດ້ປະກາດເຕືອນໄພຄຶ້ນຊຶນາມີ ຕໍ່ປະຊາຊົນທີ່ດຳລົງຊີວິດຢູ່ໃກ້ກັບເຂດທະເລອັນດາມັນ, ເພື່ອຮຽກຮ້ອງໃຫ້ປະຊາຊົນທ້ອງຖິ່ນ ກຽມພ້ອມຍ້າຍໄປສູ່ບ່ອນປອດໄພ.
