ສື່ມວນຊົນອິນໂດເນເຊຍກ່າວວ່າການພົວພັນຄູ່ຮ່ວມມືຍຸດທະສາດລະຫວ່າງອິນໂດເນເຊຍກັບຈີນມີເນື້ອໃນອຸດົມສົມບູນ
(GMT+08:00) 2010-04-14 18:05:01 cri
ຕາມຂ່າວສານຊິນຮວາ,ເນື່ອງໃນໂອກາດທີ່ຈີນກັບອິນໂດເນເຊຍສ້າງການພົວພັນການທູດຄົບຮອບ60ປີແລະທ່ານເວິ່ນເຈ່ຍປາວນາຍົກລັດຖະມົນຕີຈີນຈະຢ້ຽມຢາມອິນໂດເນເຊຍໃນໄວໆນີ້,ສື່ມວນຊົນອິນໂດເນເຊຍໄດ້ພິມບົດວິຈານຫຼືບົດຄວາມຕີລາຄາຢ່າງສູງຕໍ່ຄວາມສຳຄັນຂອງການພົວພັນລະຫວ່າງສອງປະເທດ,ຮຽກຮ້ອງໃຫ້ລົງເລິການຮ່ວມມືທີ່ຕ່າງຝ່າຍຕ່າງມີຜົນປະໂຫຍດ,ເພີ່ມເນື້ອໃນການພົວພັນຄູ່ຮ່ວມມືຍຸດທະສາດລະຫວ່າງສອງປະເທດໃຫ້ອຸດົມສົມບູນຂຶ້ນ.
ໜັງສືພິມຄອມປາສຂອງອິນໂດເນເຊຍໄດ້ພິມບົດວິຈານໂດຍຂຽນວ່າ,ການພົວພັນຄູ່ຮ່ວມມືຍຸດທະສາດອິນໂດເນເຊຍກັບຈີນມີເນື້ອໃນອຸດົມສົມບູນ,ແຕ່ບໍ່ແມ່ນມີແຕ່ຄຳເວົ້າທາງການທູດເທົ່ານັ້ນ.ລະຫວ່າງສອງປະເທດນອກຈາກການຄ້າແລະການລົງທຶນແລ້ວ,ຍັງມີຫຼາຍຂົງເຂດຮ່ວມມືທີ່ຕ່າງຝ່າຍຕ່າງມີຜົນປະໂຫຍດທີ່ມີຄວາມໝາຍດ້ານຍຸດທະສາດເຊັ່ນພະລັງງານແລະພື້ນຖານໂຄ່ງລາງເປັນຕົ້ນ.ການຮ່ວມມືຊະນິດນີ້ຄວນເປີດກວ້າງອອກຕື່ມອີກ,ນອກຈາກການຮ່ວມມືສອງຝ່າຍແລ້ວຍັງຄວນມີການຮ່ວມມືໃນພາກພື້ນແລະໃນທົ່ວໂລກ.
ໜັງສືພິມຈາກາກຕາພົສທ໌ ເຊິ່ງເປັນໜັງສືພິມພາສາອັງກິດທີ່ມີຊື່ສຽງກວ່າໝູ່ຂອງອິນໂດເນເຊຍໄດ້ລົງພິມບົດຄວາມຂອງຮອງປະທານຄະນະບໍລິຫານງານມູນນິທິສູນຄົ້ນຄວ້າຍຸດທະສາດແລະບັນຫາສາກົນຂອງອິນໂດເນເຊຍໂດຍຂຽນວ່າ,ຈີນມີຄວາມສຳຄັນຕໍ່ອິນໂດເນເຊຍ,ອິນໂດເນເຊຍກັບປະເທດອາຊີຕາເວັນອອກສຽງໃຕ້ອື່ນໆໄດ້ຮັບຜົນປະໂຫຍດຈາກການພົວພັນເສດຖະກິດກັບຈີນແລ້ວ.ໃນຖານເປັນປະເທດທີ່ໃຫຍ່ທີ່ສຸດໃນອາຊີຕາເວັນອອກສຽງໃຕ້,ອິນໂດເນເຊຍກໍ່ມີຄວາມສຳຄັນຫຼາຍຕໍ່ຈີນ.
