ຕາມຂ່າວCRI: ງານວາງສະແດງໂລກຊຽງໄຮໄດ້ໄຂຂຶ້ນໃນຕອນຄ່ຳວັນທີ 30 ເມສາແລ້ວນີ້,ສື່ມວນຊົນສຳຄັນຂອງປະເທດອາຊີອາຄະເນເອົາໃຈໃສ່ນຳເລື່ອງນີ້ໃນລະດັບສູງ, ໄດ້ລາຍງານຂ່າວຫຼວງຫຼາຍ.
ໜັງສືພິມລຽນເຮີຈາວປ້າວຂອງສິງກະໂປໄດ້ຈັດໜ້າພິເສດ ແລະ ຄໍລຳພິເສດລາຍງານງານວາງສະແດງໂລກຊຽງໄຮຈາກດ້ານຕ່າງໆ. ວັນທີ 1 ພຶດສະພານີ້, ໜັງສືພິມລຽນເຮີຈາວປ້າວໄດ້ລົງພິມບົດນຳທີ່ພາດຫົວເລື່ອງວ່າ"ງານວາງສະແດງໂລກສ້າງເວທີສາກົນໃຫ້ຊຽງໄຮ". ບົດນຳເຫັນວ່າ, ງານວາງສະແດງໂລກບໍ່ພຽງແຕ່ແມ່ນໂຄງການສ້າງໃບໜ້າຂອງນະຄອນຊຽງໄຮເທົ່ານັ້ນ,ຍັງມີຜົນດີຕໍ່ການຍົກສູງລະດັບພື້ນຖານໂຄງລ່າງ,ລະດັບການຄຸ້ມຄອງ ແລະ ຄຸນນະທາດປະຊາຊົນຂອງນະຄອນຊຽງໄຮ.
ວັນທີ 1 ພຶດສະພານີ້, ໜັງສືພິມສະເຊດແທມສ໌ຂອງສິງກະໂປໄດ້ລາຍງານຂ່າວທີ່ກ່ຽວຂ້ອງຂອງງານວາງສະແດງໂລກໃນມື້ທຳອິດ. ບົດຄວາມຂຽນວ່າ,ງານວາງສະແດງໂລກຊຽງໄຮທີ່ເປັນເວລາ 6 ເດືອນແມ່ນເວທີສະແດງກຳລັງເສດຖະກິດຂອງຈີນທີ່ນັບມື້ນັບແຂງແຮງຂຶ້ນ. ເຖິງວ່າໃນມື້ທຳອິດ, ຢູ່ໜ້າປະຕູຫໍວາງສະແດງຕ່າງໆກໍ່ມີນັກທ່ອງທ່ຽວຫຼາຍໆຄົນລຽນແຖວລໍຖ້າຢ່າງຍາວຢຽດ,ແຕ່ຄວາມກະຕືລືລົ້ນຂອງຄົນທັງຫຼາຍບໍ່ໄດ້ຫຼຸດລົງຈັກເມັດ.
ວັນທີ 30 ເມສາແລ້ວນີ້, ໜັງສືພິມມະເລເຊຍໂປສ໌ ໄດ້ພິມບົດຄວາມຂຽນວ່າ,ທົ່ວນະຄອນຊຽງໄຮໄດ້ມີການປ່ຽນແປງໃໝ່ໝົດ, ສິ່ງກໍ່ສ້າງຄົມມະນາຄົມຕ່າງໆ ເຊັ່ນ,ລົດໄຟໃຕ້ດິນ ແລະ ສະໜາມບິນເປັນຕົ້ນໄດ້ດຳເນີນງານຢ່າງມີລະບຽບ, ນີ້ສະແດງໃຫ້ເຫັນປະເທດຈີນທີ່ທັນສະໄໝ ແລະ ອຸດົມຮັ່ງມີຢ່າງເຕັມທີ່. ງານວາງສະແດງໂລກກໍ່ສະແດງໃຫ້ເຫັນຖານະສາກົນທີ່ນັບມື້ນັບສູງຂຶ້ນຂອງຈີນ.
