ຕາມຂ່າວສານຊິນຮວາ: ຕອນບ່າຍວັນທີ21ຕຸລານີ້ຢູ່ທີ່ນະຄອນຫລວງວຽງຈັນ, ທ່ານຈູມມະລີໄຊຍະສອນ, ເລຂາທິການໃຫຍ່ຄະນະບໍລິຫານງານສູນກາງພັກປະຊາຊົນປະຕິວັດລາວ, ປະທານປະເທດລາວໄດ້ຕ້ອນຮັບການເຂົ້າຢ້ຽມຄໍ່ານັບຂອງທ່ານລິວຢຸນຊ່ານ, ກຳມະການກົມການເມືອງ, ເລຂາຄະນະເລຂາສູນກາງພັກ, ຫົວຫນ້າຄະນະໂຄສະນາສູນກາງພັກກອມມຸຍນິດຈີນໃນໂອກາດທີ່ທ່ານລິວຢຸນຊ່ານຢ້ຽມຢາມລາວແລະເຂົ້າຮ່ວມກອງປະຊຸມສໍາມະນາທິດສະດີສອງພັກລາວ-ຈີນ.
ກ່ອນອື່ນ, ທ່ານລິວຢຸນຊານໄດ້ສົ່ງຄວາມຢື້ຢາມຖາມຂ່າວຂອງທ່ານຫູຈີນທາວ,ເລຂາທິການໃຫຍ່ສູນກາງພັກກອມມຸຍນິດຈີນ, ປະທານປະເທດຈີນໄປຍັງທ່ານຈູມມະລີໄຊຍະສອນ. ທ່ານລິວຢຸນຊ່ານກ່າວວ່າ, ພັກແລະລັດຖະບານຈີນຍາມໃດກໍຖືສຳຄັນຕໍ່ສາຍພົວພັນລາວ-ຈີນໃນລະດັບຍຸດທະສາດ, ພັດທະນາສາຍພົວພັນຄູ່ຮ່ວມມືຍຸດທະສາດຮອບດ້ານລະຫວ່າງລາວ-ຈີນຢ່າງເດັດດ່ຽວຫນຽວແຫນ້ນ, ສືບຕໍ່ໃຫ້ການສະຫນັບສະຫນູນແລະຊ່ວຍເຫລືອແກ່ພາລະກິດປ່ຽນແປງໃຫມ່ແລະການສ້າງສາປະເທດຊາດຂອງລາວຕາມຄວາມສາມາດຂອງຕົນ.
ທ່ານຈູມມະລີໄຊຍະສອນໄດ້ຕີລາຄາສູງຕໍ່ຜົນສຳເລັດອັນໃຫຍ່ຫລວງທີ່ປະຊາຊົນຈີນຍາດມາໄດ້ໃນການຮັບມືກັບວິກິດການການເງິນສາກົນແລະໄພທຳມະຊາດຕ່າງໆພາຍໃຕ້ການນຳພາຂອງພັກກອມມຸຍນິດຈີນ, ແລະຊົມເຊີຍຜົນສຳເລັດຂອງກອງປະຊຸມຄົບຄະນະຄັ້ງທີ5ຊຸດທີ17 ຂອງພັກກອມມຸຍນິດຈີນ. ທ່ານກ່າວວ່າ, ພັກ, ລັດຖະບານແລະປະຊາຊົນລາວຈະສືບຕໍ່ຊຸກຍູ້ສາຍພົວພັນຄູ່ຮ່ວມມືຍຸດທະສາດຮອບ ດ້ານລາວ-ຈີນໃຫ້ຂະຫຍາຍຕົວໄປເລື້ອຍໆ, ສົ່ງເສີມມິດຕະພາບລາວ-ຈີນໃຫ້ຫມັ້ນຄົງຖະຫນົງແກ່ນຕະຫລອດໄປ.
