ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ງານວາງສະແດງສິນຄ້ານຳເຂົ້າສາກົນຈີນຄັ້ງທຳອິດ ໄດ້ຈັດຂຶ້ນຢູ່ກຳແພງນະຄອນຊຽງໄຮໃນວັນທີ 5 ພະຈິກຜ່ານມາ, ຄຳປາໄສຂອງທ່ານ ສີຈິ້ນຜິງ ປະທານປະເທດຈີນທີ່ກ່າວໃນພິທີໄຂງານ ໄດ້ຮັບຄວາມສົນໃຈຢ່າງກວ້າງຂວາງແລະໄດ້ຮັບການຕີລາຄາສູງຈາກປະຊາຄົມໂລກ.
ໜັງສືພິມດີແວວທ໌ຂອງເຢຍລະມັນ ໄດ້ລົງພິມບົດຄວາມທີ່ພາດຫົວເລື່ອງວ່າ “ປະທານປະເທດຈີນໃຫ້ຄຳໝັ້ນສັນຍາວ່າຈະເປີດປະຕູປະເທດຕົນຕື່ມອີກ”, ໂດຍລະບຸວ່າ, ໃນງານວາງສະແດງສິນຄ້ານຳເຂົ້າ, ທ່ານປະທານ ສີຈິ້ນຜິງ ໄດ້ໃຫ້ຄຳໝັ້ນສັນຍາວ່າ ຈະເປີດປະຕູເສດຖະກິດຂອງຈີນຕື່ມອີກ, ຫຼຸດຜ່ອນກຳແພງດ້ານການຄ້າແລະການລົງທຶນຕໍ່ບໍລິສັດຕ່າງປະເທດ ແລະ ຊຸກຍູ້ການບໍລິໂພກສິນຄ້ານຳເຂົ້າ. ໜັງສືພິມດັ່ງກ່າວຕີລາຄາວ່າ: ລັດຖະບານຈີນຫວັງຢາກສ້າງສະພາບແວດລ້ອມເສດຖະກິດລະດັບໂລກໂດຍຜ່ານມາດຕະການເຫຼົ່ານີ້.
ທ່ານ ຊາເມີ ອາວານ ອະດີດທີ່ປຶກສາດ້ານວິທະຍາສາດເຕັກນິກຂອງສະຖານທູດປາກິສະຖານປະຈຳຈີນ, ຮອງຫົວໜ້າສູນຄົ້ນຄວ້າຈີນວິທະຍາຂອງມະຫາວິທະຍາໄລວິທະຍາສາດເຕັກນິກແຫ່ງຊາດຄົນປັດຈຸບັນ ໄດ້ສຳພາດຕໍ່ນັກຂ່າວວ່າ: ໃນເວລາກ່າວປາໄສໃນພິທີໄຂງານວາງສະແດງສິນຄ້ານຳເຂົ້າ, ທ່ານປະທານ ສີຈິ້ນຜິງ ໄດ້ເນັ້ນໜັກວ່າຈະເປີດປະຕູຕະຫຼາດຂອງຈີນຕື່ມອີກ, ຜ່ອນຄາຍການອະນຸມັດເຂົ້າຕະຫຼາດຢ່າງຕໍ່ເນື່ອງ, ນີ້ເປັນການສະໜັບສະໜູນເສດຖະກິດໂລກາພິວັດຢ່າງແຂງແຮງທີ່ສຸດ.
ທ່ານ ໂມເຊັນ ຊາເຣຍຕີເນຍ ຜູ້ຊ່ວຍສາສະດາຈານຂອງສະຖາບັນຄົ້ນຄວ້າບັນຫາພາກພື້ນມະຫາວິທະຍາໄລຊາຮິດ ເບເຮຊີຕີອີຣານ ໄດ້ໃຫ້ສຳພາດຕໍ່ນັກຂ່າວໃນວັນທີ 5 ພະຈິກຜ່ານມານີ້ວ່າ: ໃນເວລາກ່າວປາໄສໃນພິທີໄຂງານວາງສະແດງສິນຄ້ານຳເຂົ້າໃນວັນທີ 5 ພະຈິກຜ່ານມາ, ຄຳປາໄສຂອງທ່ານປະທານ ສີຈິ້ນຜິງ ກ່ຽວກັບເສດຖະກິດຈີນແມ່ນທະເລກວ້າງໃຫຍ່ນັ້ນ ໄດ້ສ້າງພາບປະທັບໃຈຢ່າງເລິກເຊິ່ງຕໍ່ຕົນເອງ. ທ່ານກ່າວຕື່ມວ່າ, ໃນໄລຍະ 40 ປີຜ່ານມາ, ຈີນໄດ້ເພີ່ມທະວີການປະຕິຮູບແລະເປີດປະຕູສູ່ພາຍນອກຢ່າງບໍ່ຢຸດຢັ້ງ, ນັບມື້ນັບເປີດປະຕູຕໍ່ເສດຖະກິດໂລກ, ນີ້ເປັນການພິສູດໃຫ້ເຫັນເຖິງຄວາມກວ້າງໃຫຍ່ຂອງທະເລດັ່ງກ່າວ.
ຄຳເຫັນ
0