ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ໃນຮູບຖ່າຍກ່ຽວກັບຄອບຄົວຂອງທ່ານປະທານສີສິ້ນຜິງທີ່ມີຢູ່ບໍ່ຫຼາຍແລະໄດ້ຮັບການເປີດເຜີຍນັ້ນ, ມີສອງໃບທີ່ສະແດງໃຫ້ເຫັນຄວາມຮັກແພງກັນອັນເຂັ້ມຂຸ້ນລະຫວ່າງທ່ານກັບພໍ່ແມ່ ຄື ໃບໜຶ່ງແມ່ນທ່ານສີຈິ້ນຜິງຮ່ວມກັບຄອບຄົວຍູ້ລໍ້ທີ່ພໍ່ນັ່ງ, ອີກໃບໜຶ່ງແມ່ນທ່ານຈັບມືຂອງແມ່ທີ່ຜົມຫງອກເພື່ອພາແມ່ຍ່າງເລາະ. ຈາກຄອບຄົວນ້ອຍໄປຫາຄອບຄົວໃຫຍ່, ຈາກພໍ່ແມ່ຂອງຕົນໄປຫາຜູ້ເຖົ້າທົ່ວປະເທດຈີນ. ໃນຍຸກປະຈຸບັນທີ່ສັງຄົມຈີນກຳລັງຜະເຊີນໜ້າກັບບັນຫາທີ່ມີຈຳນວນຜູ້ເຖົ້າຫຼາຍຂຶ້ນ, ເຮັດແນວໃດຈຶ່ງສາມາດໃຫ້ຜູ້ເຖົ້າທຸກຄົນຂອງຈີນໃຊ້ຊີວິດເຖົ້າແກ່ຊະລາຢ່າງມີຄວາມສຸກນັ້ນແມ່ນວຽກທີ່ທ່ານສີຈິ້ນຜິງເປັນຫ່ວງຫຼາຍມາໂດຍຕະຫຼອດ. ມື້ນີ້ກໍເຊີນທ່ານຟັງ“ເລື່ອງເລົ່າຈາກທ່ານສີຈິ້ນຜິງກ່ຽວກັບຊີວິດການເປັນຢູ່ຂອງປະຊາຊົນ”ພາກທີ 3 ທີ່ມີຫົວຂໍ້ວ່າ“ຄວາມເວົ້າທີ່ອົບອຸ່ນຂອງທ່ານສີຈິ້ນຜິງທີ່ມີຕໍ່ຜູ້ເຖົ້າ”.
ຜູ້ເຖົ້າ:“ພວກເຮົາມີຄວາມສຸກຍ້ອນທ່ານປະທານໃຫ້ຄວາມສົນໃຈ!”
ທ່ານສີຈິ້ນຜິງ: “ການມີສຸຂະພາບເຂັ້ມແຂງແລະອາຍຸໝັ້ນຍືນແມ່ນຄວາມປາຖະໜາຮ່ວມຂອງພວກເຮົາ, ຂໍໃຫ້ບັນດາທ່ານມີຄວາມມ່ວນຊື່ນທຸກມື້ ແລະມ່ວນຊື່ນຕະຫຼອດໄປ!”
ນີ້ແມ່ນການໂອ້ລົມກັນລະຫວ່າງຜູ້ເຖົ້າທຳມະດາຜູ້ໜຶ່ງຂອງນະຄອນຊຽງໄຮ້ກັບທ່ານປະທານປະເທດຈີນທີ່ໄປຢາມ. ຈຳນວນຜູ້ເຖົ້າກວມປະຊາກອນຫຼາຍຂຶ້ນແມ່ນບັນຫາສັງຄົມທີ່ສຳຄັນທີ່ສຸດຂອງຈີນໃນປະຈຸບັນ. ຄາດວ່າ, ເມື່ອຮອດປີ 2050, ປະຊາກອນຜູ້ທີ່ມີອາຍຸສູງຂອງຈີນຈະບັນລຸເຖິງລະດັບສູງສຸດຄື 487 ລ້ານຄົນ, ກວມປະຊາກອນທັງໝົດຂອງຈີນ 34,9%.
ນະຄອນຊຽງໄຮ້ແມ່ນນະຄອນໃຫຍ່ຂອງຈີນທີ່ເຂົ້າສູ່ສັງຄົມທີ່ມີຜູ້ເຖົ້າຫຼາຍກ່ອນກວ່າເມືອງອື່ນໆຂອງຈີນ, ຢູ່ເມືອງຮົງໂຂຂອງນະຄອນນີ້, ຜູ້ເຖົ້າອາຍຸ 60 ປີຂຶ້ນໄປທີ່ມີສຳມະໂນຄົວຢູ່ເມືອງນີ້ໄດ້ກວມ 40% ຂອງປະຊາກອນທັງໝົດໃນເມືອງນີ້. ວັນທີ 6 ພະຈິກປີ 2018, ທ່ານສີຈິ້ນຜິງໄດ້ລົງໄປຢາມສະໂມສອນປະຊາຊົນທີ່ຖະໜົນເຈ່ຍຊີ່ງ ເມືອງຮົງໂຂຂອງນະຄອນຊຽງໄຮ້. ຢູ່ສູນເບິ່ງແຍງຜູ້ເຖົ້າໃນຍາມກາງເວັນຂອງສະໂມສອນດັ່ງກ່າວ, ທ່ານສີຈິ້ນຜິງໄດ້ສະແດງຄວາມເປັນຫ່ວງຕໍ່ຜູ້ເຖົ້າທັງຫຼາຍ:
“ບັນຫາຈຳນວນຜູ້ເຖົ້າຫຼາຍຂຶ້ນແມ່ນບັນຫາໜຶ່ງທີ່ສູນກາງເອົາໃຈໃສ່ທີ່ສຸດ. ຈີນໄດ້ເຂົ້າສູ່ສັງຄົມທີ່ມີຜູ້ເຖົ້າກວມສ່ວນຫຼາຍແລ້ວ, ຊີວິດການເປັນຢູ່ທີ່ມີຄວາມສຸກຂອງປະຊາຊົນ, ມີປັດໄຈສຳຄັນອັນໜຶ່ງກໍຄືຄວາມສຸກຂອງຜູ້ເຖົ້າ ຜູ້ເຖົ້າມີບ່ອນເພິ່ງພາອາໄສແລະໄດ້ຮັບການລ້ຽງດູແລຫຼືບໍ? ສຸຂະພາບເປັນແນວໃດ? ສະນັ້ນ, ວຽກທີ່ສູນນີ້ເຮັດແມ່ນມີຄວາມໝາຍຫຼາຍ, ຂ້າພະເຈົ້າເຫັນວ່າຜູ້ເຖົ້າຢູ່ແຫ່ງນີ້ດີໃຈທຸກຄົນ. ຂໍອວຍພອນໃຫ້ຜູ້ເຖົ້າທັງຫຼາຍຈົ່ງມີຄວາມເບີກບານມ່ວນຊື່ນແລະຍິ້ມແຍ້ມແຈ່ມໃສຕະຫຼອດໄປ!”
ການທີ່ເຮັດແນວໃດເພື່ອປະຕິບັດນະໂຍບາຍລ້ຽງດູແລຜູ້ເຖົ້າໃຫ້ດີ ແລະສ້າງຜົນປະໂຫຍດໃຫ້ແກ່ຜູ້ເຖົ້າຫຼາຍກວ່າເກົ່າ ແມ່ນບັນຫາທີ່ຜູ້ນຳສູງສຸດຂອງຈີນຜູ້ນີ້ໃຫ້ຄວາມສຳຄັນໃນທຸກເວລາ. ປະຈຸບັນ, ເມືອງຮົງໂຂນະຄອນຊຽງໄຮ້ໄດ້ເຜີຍແຜ່ແຜນດຳເນີນງານ 3 ປີກ່ຽວກັບການຍົກລະດັບການບໍລິການລ້ຽງດູແລຜູ້ເຖົ້າໃຫ້ສູງຂຶ້ນ, ຄາດວ່າ ເມື່ອຮອດທ້າຍປີ 2021, ສູນເບິ່ງແຍງຜູ້ເຖົ້າໃນຍາມກາງເວັນຈະເພີ່ມຂຶ້ນເຖິງ 60 ແຫ່ງ, ຮ້ານອາຫານທີ່ຮັບໃຊ້ຜູ້ເຖົ້າຈະເພີ່ມຂຶ້ນເຖິງ 100 ແຫ່ງ, ຈຳນວນຄົນທີ່ຢູ່ໃນຖັນແຖວຜູ້ຊ່ວຍລ້ຽງຜູ້ເຖົ້າຈະບັນລຸ 500 ຄົນ. ທ່ານເຊິນເຢວ້ປີ່ນ ຫົວໜ້າພະແນກວຽກງານຜູ້ເຖົ້າຂອງພາກສ່ວນການປົກຄອງແລະປະຊາສົງເຄາະນະຄອນຊຽງໄຮ້ ໃຫ້ຮູ້ວ່າ:
“ໃນເວລາ 3 ຫາ 4 ປີຕໍ່ໜ້ານີ້, ພວກເຮົາຈະເພີ່ມສິ່ງກໍ່ສ້າງບໍລິການລ້ຽງດູແລຜູ້ເຖົ້າໃຫ້ຫຼາຍຂຶ້ນເປັນເທົ່າ. ຕໍ່ໄປບໍ່ພຽງແຕ່ຈະເພີ່ມຈຳນວນເທົ່ານັ້ນ, ສິ່ງທີ່ສຳຄັນກວ່າແມ່ນຕ້ອງຍົກສູງຄຸນນະພາບ, ເຮັດໃຫ້ຜູ້ເຖົ້າຮູ້ສຶກມີສິ່ງທີ່ໄດ້ຮັບແລະມີຄວາມສຸກເພີ່ມຂຶ້ນ.”
ບໍ່ພຽງແຕ່ຢູ່ນະຄອນໃຫຍ່ທາງພາກຕາເວັນອອກຂອງຈີນ, ຢູ່ບາງແຂວງແລະນະຄອນທາງພາກຕາເວັນຕົກຂອງຈີນກໍກຳລັງຄົ້ນຄວ້າການສະໜອງການບໍລິການລ້ຽງດູແລຜູ້ເຖົ້າດ້ວຍຫຼາຍຮູບການ. ວັນທີ 4 ກຸມພາປີ 2013, ທ່ານສີຈິ້ນຜິງໄດ້ລົງສຳຫຼວດວຽກງານຢູ່ຮ້ານອາຫານຂອງໂຮງລ້ຽງຜູ້ເຖົ້າເມືອງເຊິງກ່ວນນະຄອນລານໂຈ່ວແຂວງກ່ານຊູ້ຂອງຈີນ, ແລະໄດ້ສົ່ງອາຫານໃຫ້ຜູ້ເຖົ້າດ້ວຍຕົນເອງ. ທ່ານຟູ້ລຽນຮົງ ເຈົ້າຂອງຮ້ານອາຫານ ນັກທຸລະກິດຄົນພິການຫວນຄືນວ່າ:
“ຂ້ອຍເປັນຜູ້ສຸດທ້າຍ, ເມື່ອທ່ານສີຈິ້ນຜິງຍ່າງໃກ້ເຂົ້າມາ, ເພິ່ນໄດ້ຈັບມືຂ້ອຍແລະເວົ້າວ່າ, ເຖິງວ່າເຈົ້າເປັນຄົນພິການ, ແຕ່ຍັງໄດ້ປະກອບສ່ວນເຂົ້າໃນສັງຄົມ, ພັກແລະລັດຖະບານຂອບໃຈເຈົ້າຫຼາຍໆ. ບັນຍາກາດໃນເວລານັ້ນຈົນຮອດປະຈຸບັນຂ້ອຍຍັງຈົດຈຳໄວ້ບໍ່ລືມຈັກເທື່ອ, ຂ້ອຍຄິດວ່າ, ຕ້ອງຈັດໂຮງລ້ຽງຜູ້ເຖົ້າແຫ່ງນີ້ໃຫ້ດີກວ່າເກົ່າ!”
ໃນຫຼາຍປີມານີ້, ທ່ານຟູ້ລຽນຮົງໄດ້ຫ້າງຫາທຶນຢ່າງຕັ້ງໜ້າ, ນອກຈາກໄດ້ຍ້າຍບ່ອນແລະຂະຫຍາຍສ້າງຮ້ານອາຫານລ້ຽງຜູ້ເຖົ້າແລ້ວ, ຍັງໄດ້ສ້າງສູນລ້ຽງຜູ້ເຖົ້າແລະສູນເບິ່ງແຍງຜູ້ເຖົ້າໃນຍາມກາງເວັນອີກ.
ການໂອ້ລົມກັນຕອນໜຶ່ງລະຫວ່າງທ່ານສີຈິ້ນຜິງກັບແມ່ເຖົ້າຊືພາຈ່ວນໄດ້ຮັບຄວາມສົນໃຈຫຼາຍພາຍຫຼັງໄດ້ຮັບການລາຍງານ. ແມ່ເຖົ້າຊືພາຈ່ວນແມ່ນປະຊາຊົນຜູ້ທຸກຍາກທີ່ດຳລົງຊີວິດຢູ່ບ້ານຊືປ່າຕຸ້ງ ກິ່ງເຂດປົກຄອງຕົນເອງເຜົ່າຖູເຈ່ຍເຜົ່າມົ້ງທີ່ພາກຕາເວັນຕົກຂອງແຂວງຫູນານຈີນ. ໃນການລົງສຳຫຼວດເທື່ອໜຶ່ງເມື່ອປີ 2013, ທ່ານສີຈິ້ນຜິງໄດ້ຍ່າງຕາມເສັ້ນທາງພູດອຍທີ່ຄົດລ້ຽວແລະຄັບແຄບໄປຮອດເຮືອນແມ່ເຖົ້າຜູ້ນີ້. ຢູ່ໃນຫ້ອງທີ່ມືດມົນ, ທຳອິດແມ່ເຖົ້າບໍ່ຮູ້ວ່າແມ່ນຜູ້ໃດມາ. ພະນັກງານບ້ານແນະນຳໃຫ້ແມ່ເຖົ້າວ່າ, ນີ້ແມ່ນທ່ານເລຂາທິການໃຫຍ່ທີ່ມາແຕ່ປັກກິ່ງ, ເພິ່ນມາຢາມແມ່ເຖົ້າແລ້ວ! ແລະຕໍ່ມາ, ລະຫວ່າງທ່ານສີຈິ້ນຜິງແລະແມ່ເຖົ້າຜູ້ນີ້ກໍໄດ້ມີການລົມກັນຕອນໜຶ່ງຄືດັ່ງນີ້:
ທ່ານສີຈິ້ນຜິງ:“ນີ້ຄືເອື້ອຍໃຫຍ່ຂອງຂ້າພະເຈົ້າ, ຂ້າພະເຈົ້າຍິນດີທີ່ມີໂອກາດມາຢາມເອື້ອຍ. ເພິ່ນອາຍຸ 64 ປີ, ຂ້າພະເຈົ້າ 60 ປີ, ມື້ໜ້າພວກເຮົາພະຍາຍາດໃຫ້ພົບກັນເລື້ອຍໆເດີ້.”
ແມ່ເຖົ້າຊືພາຈ່ວນ:“ມື້ນີ້ໄດ້ເຫັນທ່ານມາຢາມ, ທ່ານເປັນຜູ້ນຳສູງ, ແມ່ນຜູ້ນຳທີ່ເອົາໃຈໃສ່ພວກເຮົາ, ເອົາໃຈໃສ່ປະຊາຊົນທົ່ວໄປຄືພວກເຮົາ.”
ທ່ານສີຈິ້ນຜິງ:“ຂ້າພະເຈົ້າເປັນຜູ້ຮັບໃຊ້ປະຊາຊົນ.”
ຄຳເຫັນ
0