黄理春

ຕາລາງລາຍການ FM93Mhz

ດາວໂຫຼດ App CRI-FM93 ລະບົບ IOS

ດາວໂຫຼດ App CRI-FM93 ລະບົບ Android

FM93
ຄໍ​ລຳ
壮丽七十年奋斗新时代_fororder_760x250banner
  • ​​ຮູບພາບ
  • ​ວີ​ດີ​ໂອ

ຜູ້​ນຳ​ປະ​ເທດ​ອາ​ຊຽນ​ຕີ​ລາ​ຄາ​ສູງ​ຕໍ່​ອະ​ນາ​ຄົດ​ການ​ຮ່ວມ​ມື “ໜຶ່ງ​ແລວ​ໜຶ່ງ​ເສັ້ນ​ທາງ”

2019-04-28 15:26:35 cri

ຕາມ​ຂ່າວCRI: ກອງ​ປະ​ຊຸມ​​ສຸດຍອດເວ​ທີ​ປຶກ​ສາ​ຫາ​ລື​ການ​ຮ່ວມ​ມື​ສາ​ກົນ “ໜຶ່ງ​ແລວ​ໜຶ່ງ​ເສັ້ນ​ທາງ”ຄັ້ງ​ທີ 2 ​ທີ່​ໄຂ​ຂຶ້ນ​ຢູ່​ປັກ​ກິ່ງ​​ໄດ້​ປິດ​ລົງໃນ​ວັນ​ທີ 27 ເມ​ສານີ້. ຜູ້​ນຳ​ຂອງ 10 ປະ​ເທດ​ອາ​ຊຽນ​ໄດ້​ເຂົ້າ​ຮ່ວມກອງ​ປະ​ຊຸມ​ຄັ້ງ​ນີ້, ​ແລະ​ໄດ້​ຕີ​ລາ​ຄາ​ສູງ​ຕໍ່​ການ​ຮ່ວມ​ມື “ໜຶ່ງ​ແລວ​ໜຶ່ງ​ເສັ້ນ​ທາງ” ​ເຊິ່ງ​ເປັນ​ການ​ສ່ອງ​ແສງ​ໃຫ້​ເຫັນ​ທ່າ​ທີ​ທີ່​ຕິດ​ແທດ​ຕົວ​ຈິງ​ຕໍ່​ອະ​ນາ​ຄົດ.

ທ່ານ​ບຸນ​ຍັງ ວໍ​ລະ​ຈິດ, ປະ​ທານ​ປະ​ເທດ​ລາວ​ກ່າວ​ວ່າ, ຝ່າຍ​ລາວໄດ້​ໃຫ້​ຄວາມ​ສຳ​ຄັນ​​ຢ່າງສູງ​ແລະ​ຕັ້ງ​ໜ້າ​ໃນ​ການ​ເຂົ້າ​ຮ່ວມ​ຂໍ້​ລິ​ເລີ່ມ “ໜຶ່ງ​ແລວ​ໜຶ່ງ​ເສັ້ນ​ທາງ”, ​ຂ້າ​ພ​ະ​ເຈົ້າ​ມີ​ຄວາມ​ປິ​ຕິ​ຊົມ​ຊື່ນ​ທີ່​ໄດ້​ເຫັນ​ໂຄງ​ການ​ສຳ​ຄັນ​ຕ່າງໆ​ເຊັ່ນ:​ ​ທາງ​ລົດ​ໄຟ​ລາວ-ຈີນ​ໄດ້ຮັບ​ຄວາມ​ຄືບ​ໜ້າ​ຢ່າງ​ໜັກ​ແໜ້ນ.

​ໃນ​ເວ​ລາທ່ານ​ມາ​ຮາ​ເ​ທຍ ບິນ ໂມ​ຮາ​ເມັດ, ນາ​ຍົກ​ລັດ​ຖະ​ມົນ​ຕີ​ມາ​ເລ​ເຊຍ​ເຂົ້າ​ຢ້ຽມ​​ຄຳ​ນັບ​ທ່ານ​ປະ​ທານ​ສີ​ຈິ້ນ​ຜິງ, ທ່ານ​ກ່າວ​ວ່າ: ການ​ຮ່ວມ​ກັນ​ສ້າງ “ໜຶ່ງ​ແລວ​ໜຶ່ງ​ເສັ້ນ​ທາງ” ບໍ່​ພຽງ​ແຕ່​ສາ​ມາດ​ແກ້​ໄຂຂໍ້​ຈຳ​ກັດ​​ຂອງບັນ​ດາ​ປະ​ເທດ​ເພື່ອ​ພັດ​ທະ​ນາ​ພື້ນ​ຖານ​ໂຄງ​ລ່າງ​ແລະ​ການ​ຂົນ​ສົ່ງ​ຄົມ​ມະ​ນາ​ຄົມເທົ່າ​ນັ້ນ, ຍັງ​ສາ​ມາດ​ແກ້​ໄຂ​ຄວາມບໍ່​ດຸນ​ດ່ຽງ​​ກັນໃນ​ການ​ພັດ​ທະ​ນາ​ລະ​ຫວ່າງ​​ປະ​ເທດ, ຊຸກ​ຍູ້​ການ​ແລກ​ປ່ຽນ​ແລະ​ການ​ສົນ​ທະ​ນາ​​ດ້ານອະ​ລິ​ຍະ​ທຳ, ມີ​ຜົນ​ດີ​ຕໍ່​ການ​ຈຳ​ກັດບັນ​ຫາ​ຕ່າງໆ​ເຊັ່ນ​: ຄວາມບໍ່​ສະ​ຫງົບ, ລັດ​ທິ​ຫົວ​ຮຸນ​ແຮງ, ລັດ​ທິ​ກໍ່​ການ​ຮ້າຍ ແລະ​ອື່ນໆ​ທີ່ມວນ​ມະ​ນຸດ​ພວມປະ​ເຊີນ​ຢູ່​ນັ້ນ​​ໄດ້​ຢ່າງ​ເຖິງ​ຖອງ.

ທ່ານ​ໂຣດ​ຣິ​ໂກ ດູ​ເຕີ​ເຕ ປະ​ທານ​າ​ທິ​ບໍ​ດີ​ຟິ​ລິບ​ປິນ​ກ່າວ​ວ່າ, ຟິ​ລິບ​ປິນ​ພວມ​ດຳ​ເນີນ​ການ​ກໍ່​ສ້າງ​ປະ​ເທດ​ຢ່າງ​ຂະ​ໜາດ​ໃຫຍ່, ຍິນ​ດີ​ຕ້ອນ​ຮັບ​ວິ​ສາ​ຫະ​ກິດ​ຈີນ​ເພີ່ມ​ການ​ລົງ​ທຶນ​ຢູ່​ຟິ​ລິບ​ປິນ.ທ່ານ​ໂ​ຈ​ເຊ ຊັນ​ຕີ​ອາ​ໂກ, ເອ​ກ​ອັກ​ຄະ​ລັດ​ຖະ​ທູດ​ຟິ​ລິບ​ປິນ​ປະ​ຈຳ​ຈີນ​ກ່າວ​ວ່າ, ຟິ​ລິບ​ປິນ​ເຂົ້າ​ຮ່ວມ​ການ​ສ້າງ​ “ໜຶ່ງ​ແລວ​ໜຶ່ງ​ເສັ້ນ​ທາງ”​ແມ່ນ​ບົນ​ພື້ນ​ຖານ​ທີ່​ພິ​ຈາ​ລະ​ນາ​ເຖິງ​ຜົນ​ປະ​ໂຫຍດ​ຂອງ​ປະ​ເທດ​ຕົນ.

ທ່ານຫຼີ​ຊຽນ​​ລົງ, ນາ​ຍົກ​ລັດ​ຖະ​ມົນ​ຕີ​ສິງ​ກະ​ໂປ​ກ່າວ​ວ່າ, “ໜຶ່ງ​ແລວ​ໜຶ່ງ​ເສັ້ນ​ທາງ”​ເປັນ​ໂຄງ​ການ​ຂະ​ໜາດ​ໃຫຍ່​ທີ່​ຕ້ອງ​ການ​ໃຊ້​ເວ​ລາຫຼາຍ​ປີ​ໃນ​ການ​ຈັດ​ຕັ້ງ​ປະ​ຕິ​ບັດ​ແຕ່​ລະ​ໄລ​ຍະ ແລະອາດ​ຈະ​ບໍ່​ມີມື້​ສິ້ນ​ສຸດ​ເລີຍ. ສິງ​ກະ​ໂປ​ຫວັງ​ວ່າ​ຈະ​ໄດ້​ເສີມ​ຂະ​ຫຍາຍ​ບົດ​ບາດ​ສ້າງ​ສັນ​ໃນ​ດ້ານ​ການ​ບໍ​ລິ​ການ​ການ​ທະ​ນາ​ຄານ ການ​ລົງ​ທຶນ​ຂອງ​ປະ​ເທດ​ທີ​ສາມ ແລະ​ການ​ພັດ​ທະ​ນາ​ຊັບ​ພະ​ຍາ​ກອນ​ມະ​ນຸດ​ໃນ​ຂອບ​ຂໍ້​ລິ​ເລີ່ມ“ໜຶ່ງ​ແລວ​ໜຶ່ງ​ເສັ້ນ​ທາງ”.

ທ່ານລູ​ຮັດ ບິນ​ຊາ ປັນ​ຈາຍ​ຕັນ, ລັດ​ຖະ​ມົນ​ຕີ​ກະ​ຊວງ​ວຽກ​ງານ​ທາງ​ທະ​ເລ ແລະ​ການ​ປະ​ມົງ​ອິນ​ໂດ​ເນ​ເຊຍ​ເຫັນ​ວ່າ, ໃນ​ການ​ຮ່ວມ​ມື “ໜຶ່ງ​ແລວ​ໜຶ່ງ​ເສັ້ນ​ທາງ”, ເຖິງວ່າ​ການ​ກໍ່​ສ້າງ​ພື້ນ​ຖານ​ໂຄງ​ລ່າງ​ໄດ້​ໃຊ້​ເວ​ລາຫຼາຍ, ແຕ່​ມີ​ຜົນ​ດີ​ຕໍ່​ການ​ພັດ​ທະ​ນາ​ເສດ​ຖະ​ກິດ​ແຫ່ງ​ຊາດ. ອິນ​ໂດ​ເນ​ເຊຍ​ໄດ້​ເລີ່ມ​ຊົມ​ໃຊ້​ໝາກ​ຜົນ​ຂອງການ​ຮ່ວມ​ມື “ໜຶ່ງ​ແລວ​ໜຶ່ງ​ເສັ້ນ​ທາງ”​ແລ້ວ.

ທ່ານ​ປະ​ຍຸດ ຈັນ​ໂອ​ຊາ, ນາ​ຍົກ​ລັດ​ຖະ​ມົນ​ຕີ​ໄທ​ກ່າວ​ວ່າ, ນັບແຕ່​ການ​ສະ​ເໜີ​ຂໍ້​ລິ​ເລີ່ມ “ໜຶ່ງ​ແລວ​ໜຶ່ງ​ເສັ້ນ​ທາງ”ເປັນ​ເວ​ລາ 6 ປີ​ມາ​ນີ້, ໄດ້​ຮັບ​ຜົ​ນ​ສຳ​ເລັດ​ອັນ​ໃຫຍ່ຫຼວງ, ໄທ​ກໍ​ໄດ້​ຮັບ​ຜົນ​ປະ​ໂຫຍດຫຼາຍ​ຈາກ​ການ​ກໍ່​ສ້າງ​ພື້ນ​ຖານ​ໂຄງ​ລ່າງ ແລະ ​ການແລກ​ປ່ຽນ ການ​ເຊື່ອມ​ຕໍ່​ຂໍ້​ມູນ​ຂ່າວ​ສານ, ໄທ​ຈະ​ສືບ​ຕໍ່​ສະ​ໜັບ​ສະ​ໜູນ ແລະ ຕັ້ງ​ໜ້າ​ເຂົ້າ​ຮ່ວມ​ການ​ຮ່ວມ​ມື “ໜຶ່ງ​ແລວ​ໜຶ່ງ​ເສັ້ນ​ທາງ”.

ທ່ານ​ຮຸນ​ແຊນ ນາ​ຍົກ​ລັດ​ຖະ​ມົນ​ຕີ​ກຳ​ປູ​ເຈຍ​ກ່າວ​ວ່າ, ຂໍ້​ລິ​ເລີ່ມ “ໜຶ່ງ​ແລວ​ໜຶ່ງ​ເສັ້ນ​ທາງ” ໄດ້​ສ້າງ​ພະ​ລັງ​ຊີ​ວິດ​ໃຫ້​ແກ່​ປະ​ເທດ​ດ້ອຍ​ພັດ​ທະ​ນາ​ແລະ​ມີ​ຄວາມ​ປາດ​ຖະ​ໜາ​ໄດ້​ຮັບ​ການ​ລົງ​ທຶນ​ຈາກ​ຕ່າງ​ປະ​ເທດ, ເຮັດ​ໃຫ້​ເສດ​ຖະ​ກິດ​ຂອງ​ປະ​ເທດ​ເຫຼົ່າ​ນີ້​ສາ​ມາດ​ເຊື່ອມ​ຕໍ່​ກັບ​ກຸ່ມ​ເສດ​ຖ​ະ​ກິດ​ອື່ນໆ​ທີ່​ເຂັ້ມ​ແຂງໃນໂລກ.

ທ່ານ​ນາງ ອອງ​ຊານ​ຊູ​ຈີ ທີ່​ປຶ​ກ​ສາ​ແຫ່ງ​ລັດ​ມຽນ​ມາກ່າວ​ວ່າ, ເຊື່ອ​ວ່າ​ການ​ຮ່ວມ​ກັນ​ສ້າງ “ໜຶ່ງ​ແລວ​ໜຶ່ງ​ເສັ້ນ​ທາງ” ຈະ​ສ້າງ​ຄວາມ​ຜາ​ສຸກກ​ໃຫ້​ແກ່​ທົ່ວ​ໂລກ​ກໍ​ຄື​ພາກ​ພື້ນ, ທັງ​ຈະ​ລົງ​ເລິກ ການ​ຮ່ວມ​ມື​​ບົນ​ຈິດ​ໃຈ​ມິດ​ຕະ​ພາບລະ​ຫວ່າງ​ມຽນ​ມາ​ກັບ​ຈີນ, ສ້າງ​ຜົນ​ປະ​ໂຫຍດ​ຢ່າງ​ແທ້​ຈິງ​ໃຫ້​ແກ່​ປະ​ຊາ​ຊົນ​ທັງ​ສອງ​ປະ​ເທດ.

ປະ​ເທດ​ອາ​ຊຽນ​ຕັ້ງ​ຢູ່​ເຂ​ດ​ເຊື່ອມ​ຕໍ່​ທາງ​ບົກ​ແລະ​​ທາງ​ທະ​ເລ​ຂອງ “ໜຶ່ງ​ແລວ​ໜຶ່ງ​ເສັ້ນ​ທາງ”, ແມ່ນ​ຄູ່​ຮ່ວມ​ມື​ສຳ​ຄັນ​ແລະ​​ແມ່ນທິດ​ທາງ​ບູ​ລິ​ມະ​ສິດ​ຂອງ​ຈີນ​ທີ່​ຊຸກ​ຍູ້​ການ​ສ້າງ “ໜຶ່ງ​ແລວ​ໜຶ່ງ​ເສັ້ນ​ທາງ”. ໃນກອງ​ປະ​ຊຸມ​ເວ​ທີ​ປຶກ​ສາ​ຫາ​ລື​ຄັ້ງ​ນີ້, ​ບັນ​ດາຜູ້​ນຳ​ທີ່​ເຂົ້າ​ຮ່ວມກອງປະ​ຊຸມ​ລວມ​ທັງ​ຜູ້​​ນຳ​ບັນ​ດາ​ປະ​ເທດອາ​ຊຽນ​ໄດ້​ຜ່ານ​​ການຮັບ​ຮອງ​ຖະ​ແຫຼງ​ການ​ຮ່ວມ, ​ເຊິ່ງຄວາມ​ເຫັນ​ເປັນ​ເອ​ກ​ກະ​ພາບ​ກັນ​ທີ່​ນັບ​ມື້​ນັບ​ກວ້າງ​ຂວາງກວ່າ​ເກົ່າ, ຈະ​ຊຸກ​ຍູ້​ໃຫ້​ການ​ຮ່ວມ​ມື​ “ໜຶ່ງ​ແລວ​ໜຶ່ງ​ເສັ້ນ​ທາງ” ກ້າວ​ໄປ​ສູ່​ການ​ພັດ​ທະ​ນາ​ທີ່​ມີ​​ຄຸນ​ນະ​ພາບ​ສູງ, ​ເພື່ອສ້າງ​ຜົນ​ປະ​ໂຫຍດ​ໃຫ້​ແກ່​ຊີ​ວິດ​ການ​ເປັນ​ຢູ່​ຂອງ​ປະ​ຊາ​ຊົນ​ແລະ​ບັນ​ລຸ​ເປົ້າ​ໝາຍ​​ການ​ພັດ​ທະ​ນາ​ແບບ​ຍືນ​ຍົງ.

ຄຳ​ເຫັນ

0