ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ໂດຍແນໃສ່ກໍລະນີທີ່ກະຊວງການເງິນອາເມຣິກາເປີດເຜີຍບົດລາຍງານກ່ຽວກັບນະໂຍບາຍອັດຕາແລກປ່ຽນໃນໄລຍະເຄິ່ງປີໃນຫວ່າງກ່ອນນີ້ບໍ່ດົນ, ທ່ານ ລູ້ຄ່າງ ໂຄສົກກະຊວງການຕ່າງປະເທດຈີນໄດ້ກ່າວໃນກອງປະຊຸມຖະແຫຼງຂ່າວເມື່ອວັນທີ 29 ພຶດສະພານີ້ວ່າ: ຫວັງວ່າອາເມຣິກາຈະໃຫ້ການເຄົາລົບສະພາບຄວາມເປັນຈິງ, ເຄົາລົບກົດເກນຕະຫຼາດ, ແລະບໍ່ຄວນເຮັດໃຫ້ບັນຫາອັດຕາແລກປ່ຽນຫັນເປັນເລື່ອງການເມືອງ. ຂະນະດຽວກັນ, ຈີນໄດ້ສະເໜີຫຼາຍເທື່ອແລ້ວໃຫ້ອາເມຣິກາປະຕິບັດຕາມກະຕິກາສາກົນຫຼາຍຝ່າຍທີ່ກ່ຽວຂ້ອງ, ບໍ່ຄວນປະເມີນອັດຕາແລກປ່ຽນຂອງປະເທດອື່ນແຕ່ຝ່າຍດຽວ. ການທີ່ປະເທດໃດໜຶ່ງໄດ້ຄອບງຳອັດຕາແລກປ່ຽນຫຼືບໍ່ນັ້ນ ບໍ່ແມ່ນອາເມຣິກາຈະເປັນຜູ້ຕັດສິນ, ເພາະວ່າອົງການສາກົນຫຼາຍຝ່າຍທີ່ກ່ຽວຂ້ອງ ໄດ້ມີການປະເມີນທີ່ຊົງອິດທິພົນຕໍ່ອັດຕາແລກປ່ຽນຂອງບັນດາປະເທດມາໂດຍຕະຫຼອດ.
ທ່ານ ລູ້ຄ່າງ ກ່າວຕື່ມວ່າ: ເວົ້າສຳລັບຈີນແລ້ວ, ພວກເຮົາຈະລົງເລິກປະຕິຮູບອັດຕາແລກປ່ຽນຕາມກົນໄກຕະຫຼາດຢ່າງເດັດດ່ຽວໜຽວແໜ້ນ, ເພື່ອຮັກສາອັດຕາແລກປ່ຽນຂອງເງິນຢວນຈີນໃຫ້ມີຄວາມໝັ້ນທ່ຽງໃນຂັ້ນພື້ນຖານໃນລະດັບທີ່ສົມເຫດສົມຜົນແລະກ້ຳເກິ່ງກັນ.
ວັນທີ 28 ພຶດສະພານີ້, ກະຊວງການເງິນອາເມຣິກາໄດ້ເປີດເຜີຍ “ບົດລາຍງານກ່ຽວກັບນະໂຍບາຍເສດຖະກິດແລະອັດຕາແລກປ່ຽນສາກົນ” ທີ່ແນໃສ່ຄູ່ການຄ້າຕົ້ນຕໍ ໂດຍເຫັນວ່າ, ຄູ່ການຄ້າຕົ້ນຕໍຂອງອາເມຣິກາ ລ້ວນແຕ່ບໍ່ໄດ້ຄອບງຳອັດຕາແລກປ່ຽນ, ແຕ່ໄດ້ຈັດເອົາ 9 ປະເທດຄື: ຈີນ, ເຢຍລະມັນ, ອຽກລັງ, ອີຕາລີ, ຍີ່ປຸ່ນ, ສ.ເກົາຫຼີ, ມາເລເຊຍ, ສິງກະໂປ ແລະຫວຽດນາມ ເຂົ້າໃນບັນຊີທີ່ຈະຕິດຕາມນະໂຍບາຍດ້ານການເງິນ.
ຄຳເຫັນ
0