CRI ລາຍ​ງານ​ວ່າ: ວັນ​ທີ 25 ສິງ​ຫາ​ນີ້, ​ຢູ່ເຂດ​ຜະ​ລິດ​ໝາກ​ກີ​ວີ​ຂອງໝູ່​ບ້ານ​​ຊືປ່າ​ຕຸ້ງ​ຕາ​ແສ​ງ​ຊ່ວງ​ລົງ​ເມືອງ​ຮ​​ວ່າ​ຢວນ​ກິ່ງ​ແຂວງ​ປົກ​ຄອງ​ຕົນ​ເອງ​ເຜົ່າ​ຖູ​ເຈ່ຍ​ເຜົ່າ​ມົ້ງ​ຊຽງ​ຊີ່​ແຂວງ​ຮູ​ນານ ສ​ປ ຈີນ, ​ຊາວ​ກະ​ສິ​ກອນ​ທັງຫຼາຍ​ກຳ​ລັງ​ແຍກ​ແລະ​ເອົາ​ໝາກ​ກີ​ວີ​ໃສ່​ແກັດ​ຢ່າງ​ເຄັ່ງ​ຮ້ອນ. ໝູ່​ບ້ານ​ຊືປ່າ​ຕຸ້ງ​ໃນ​ເມື່ອ​ກ່ອນ, ​ມີເນື້ອ​ທີ່​ການ​ຜະ​ລິດ​ກະ​ສິ​ກຳ​ສະ​ເລ່ຍ​ຕໍ່​ຫົວ​ຄົນ​ ​ພຽງປະ​ມານ 0,06 ເຮັກ​ຕາ​ເທົ່າ​ນັ້ນ, ໃນ​ບ້ານ​ມີອຸດ​ສາ​ຫະ​ກຳ​ໜ້ອຍແຫ່ງ. ນັບ​ແຕ່​ປະ​ຕິ​ບັດ​ນະ​ໂຍ​ບາຍ “ລົບ​ລ້າງ​ຄວາມ​ທຸກ​ຍາກ​ໃຫ້​ຖືກ​ເປົ້າ​ໝາຍ”​ມາ​ນີ້, ຊາວ​ບ້ານ​ໄດ້​ພັດ​ທະ​ນາ​ອຸດ​ສາ​ຫະ​ກຳ​ເສົາ​ຄ້ຳ​ໂດຍ​ອີງ​ຕາມ​ເງື່ອນ​ໄຂ​ເອື້ອ​ອຳ​ນວຍ​ຂອງ​ຕົນ​ໂດຍສ້າງ​ໃຫ້​ເປັນ​ລະ​ບົບ​ອຸດ​ສາ​ຫະ​ກຳ​ແບບ “ການ​ທ່ອງ​ທ່ຽວ+”​ທ່ອງທ່ຽວ​ຊົນ​ນະ​ບົດ, ສົ່ງ​ແຮງ​ງານ​ໄປ​ຕ່າງ​ຖິ່ນ​ແລະ​ອື່ນໆ. ໃນ​ນີ້, ຜະ​ລິດ​ຕະ​ພັນ​ໃນ​ເຂດ​ຜະ​ລິດ​ໝາກ​ກີ​ວີ​ພັນ​ດີ ກວມ​ເນື້ອ​ທີ່​ປະ​ມານ 67 ເຮັກ​ຕາ​ແລະ​ຖືກ​ຮັບ​ຮອງ​ຕາມ​ມາດ​ຕະ​​ຖານ​ສິນ​ຄ້າ​ສົ່ງ​ອອກ ແລະ​ສາ​ມາດ​ສົ່ງ​ຂາຍ​ໄປ​ຮົງ​ກົງ​,ມາ​ກາວ​ໂດຍ​ກົງ​ແລະ​ຈຳ​ໜ່າຍ​ທາງ​ອິນ​ເຕີ​ເນັດ, ສະ​ເພາະ​ແຕ່​ອຸດ​ສາ​ຫະ​ກຳ​ດ້ານ​ນີ້​ເທົ່າ​ນັ້ນ, ​ກໍ​ສາ​ມາດ​ສ້າງລາຍ​ຮັບ​​ໃຫ້​ຊາວ​ບ້ານ​ໃນ​ປີ 2018 ເພີ່ມ​ຂຶ້ນ​ສະ​ເລ່ຍ 1200 ຢວນ​ຕໍ່​ຄົນ.