ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ຕາມຂ່າວCRI：ໃນເວລາ 10 ໂມງຕອນເຊົ້າຂອງວັນທີ 29 ກັນຍານີ້, ພິທີມອບຫຼຽນໄຊແຫ່ງຊາດແລະນາມະຍົດແຫ່ງຊາດຂອງສາທາລະນະລັດປະຊາຊົນຈີນໄດ້ຈັດຂຶ້ນຢູ່ຫໍສະພາປະຊາຊົນທີ່ນະຄອນຫຼວງປັກກິ່ງຂອງຈີນ. ທ່ານສີຈິ້ນຜີງ, ເລຂາທິການໃຫຍ່ຄະນະກຳມະການສູນກາງພັກກອມມູນິດຈີນ, ປະທານປະເທດ, ປະທານຄະນະກຳມະການການທະຫານສູນກາງຈີນໄດ້ໃຫ້ກຽດປະດັບ “ຫຼຽນໄຊແຫ່ງຊາດ” “ຫຼຽນໄຊມິດຕະພາບ”ແລະຫຼຽນໄຊນາມະຍົດແຫ່ງຊາດໃຫ້ແກ່ບຸກຄົນທີ່ດີເດັ່ນ ແລະໄດ້ກ່າວຄຳປາໄສທີ່ສຳຄັນ.
ທ່ານສີຈິ້ນຜີງໄດ້ຕາງໜ້າໃຫ້ສູນກາງພັກ, ສະພາປະຊາຊົນແຫ່ງຊາດ, ຄະນະລັດຖະບານແລະຄະນະກຳມະການການທະຫານສູນກາງ, ສະແດງຄວາມຍ້ອງຍໍຊົມເຊີຍຢ່າງຈິງໃຈ ແລະ ສະແດງຄວາມເຄົາລົບນັບຖືຢ່າງສູງສົ່ງຕໍ່ວີລະຊົນແບບຢ່າງທີ່ໄດ້ຮັບ “ຫຼຽນໄຊແຫ່ງຊາດ”ແລະນາມະຍົດແຫ່ງຊາດ, ແລະບຸກຄົນທີ່ເປັນເພື່ອນມິດໃນສາກົນທີ່ໄດ້ຮັບ “ຫຼຽນໄຊມິດຕະພາບ” ໃນຄັ້ງນີ້.
ທ່ານສີຈິ້ນຜີງກ່າວວ່າ: ແຕ່ໃດໆມາ, ພັກແລະລັດໄດ້ໃຫ້ຄວາມສຳຄັນຢ່າງສູງຕໍ່ການຍ້ອງຍໍຊົມເຊີຍວິລະຊົນແບບຢ່າງ. ມື້ນີ້ພວກເຮົາຈັດພິທີຍ້ອງຍໍຊົມເຊີຍວິລະຊົນແບບຢ່າງດ້ວຍການມອບຫຼຽນໄຊລະດັບສູງສຸດ, ກໍເພື່ອສົ່ງເສີມຄວາມຈົງຮັກພັກດີແລະຄຸນນະທຳຂອງເຂົາເຈົ້າທີ່ດຸ່ໝັ່ນຂະຫຍັນພຽນໃນໜ້າທີ່ວຽກງານທັງດຳລົງຊີວິດແບບລຽບງ່າຍ. ວິລະຊົນແບບຢ່າງໄດ້ສະແດງໃຫ້ເຫັນອີກຄັ້ງໃໝ່ດ້ວຍການກະທຳຂອງຕົນວ່າ, ຄວາມຍິ່ງໃຫຍ່ມາຈາກຄວາມທຳມະດາສາມັນ, ທຳມະດາສາມັນສາມາດບົ່ມສ້າງຄວາມຍິ່ງໃຫຍ່. ຂໍພຽງແຕ່ມີອຸດົມການແລະສັດທາອັນແຮງກ້າ, ມີນ້ຳໃຈສູ້ຊົນຢ່າງບໍ່ລົດລະ ແລະ ເຮັດວຽກທຳມະດາໃຫ້ສຳເລັດຜົນ, ຄົນທຳມະດາສາມັນທຸກທຸກຄົນກໍສາມາດສ້າງຊີວິດຂອງຕົນເປັນທີ່ເຫຼືອມໃສໄດ້, ວຽກງານທຳມະດາທຸກວຽກກໍສາມາດສ້າງຜົນງານທີ່ໜ້າເຫຼືອມໄສໄດ້ເຊັ່ນກັນ.
ຫວັງວ່າບັນດາທ່ານທີ່ໄດ້ຮັບຫຼຽນຕ່າງໆໃນຄັ້ງນີ້ຈົ່ງທະນຸຖະໜອມກຽດສັກສີຂອງຕົນ, ສືບຕໍ່ພະຍາຍາມຢ່າງຕໍ່ເນື່ອງ ເພື່ອເປັນແບບຢ່າງໃຫ້ຄົນທັງຫຼາຍ ດ້ວຍຄວາມເຊື່ອ, ຄວາມໝັ້ນໃຈແລະສັດທາອັນແຮງກ້າ. ຜົນສຳເລັດອັນຍິ່ງໃຫຍ່ລ້ວນແຕ່ແມ່ນໝາກຜົນທີ່ໄດ້ມາຈາກຄວາມສູ້ຊົນຜ່ານຜ່າຢ່າງບໍ່ຮູ້ອິດເມື່ອຍແລະຕໍ່ເນື່ອງ, ພາລະກິດທີ່ຍິ່ງໃຫຍ່ທຸກຢ່າງລ້ວນແຕ່ຕ້ອງມີການຊຸກຍູ້ສົ່ງເສີມສືບທອດຈາກອັນທີ່ມີຢູ່ແລ້ວແລະເສີມຂະຫຍາຍໄປສູ່ອັນໃໝ່. ໃນຍຸກໃໝ່ຍ່ອມຈະເປັນຍຸກສະໄໝທີ່ມີອະນາຄົດກວ້າງຂວາງແລະສາມາດເສີມຂະຫຍາຍບົດບາດອັນຍິ່ງໃຫຍ່. ທົ່ວພັກແລະປະຊາຊົນບັນດາເຜົ່າໃນທົ່ວປະເທດຕ້ອງມີຄວາມໜັກແໜ້ນ, ມີຄວາມອົດທົນ ແລະ ສູ້ຊົນຜ່ານຜ່າເໝືອນດັ່ງວິລະຊົນແບບຢ່າງ ເພື່ອຮ່ວມກັນແຕ່ງເພງແກ່ງໄຊຊະນະອັນຍິ່ງໃຫຍ່ມອບໃຫ້ສາທາລະນະລັດປະຊາຊົນຈີນໃນສະໄໝໃໝ່.
ຄຳເຫັນ
0