PreviousNext
ພີ່ນ້ອງຮ່ວມຊາດທົ່ວປະເທດ,
ສະຫາຍທັງຫຼາຍ, ເພື່ອນທັງຫຼາຍ:
ມື້ນີ້, ພວກເຮົາເຕົ້າໂຮມກັນຢ່າງຄຶກຄື້ນ, ເພື່ອສະເຫຼີມສະຫຼອງວັນສະຖາປະນາສາທາລະນະລັດປະຊາຊົນຈີນຄົບຮອບ 70 ປີ. ໃນຂະນະນີ້, ປະຊາຊົນບັນດາເຜົ່າໃນທົ່ວປະເທດ, ລູກຫຼານປະຊາຊາດຢູ່ພາຍໃນຈີນແລະຢູ່ຕ່າງປະເທດ, ລ້ວນແຕ່ປິຕິຊົມຊື່ນທີ່ສຸດແລະຮູ້ສຶກພາກພູມໃຈຍ້ອນປະເທດຊາດອັນຍິ່ງໃຫຍ່ຂອງພວກເຮົາ, ແລະອວຍພອນຢ່າງຈິງໃຈຕໍ່ປະເທດຊາດອັນຍິ່ງໃຫຍ່ຂອງພວກເຮົາ.
ຢູ່ທີ່ນີ້, ຂ້າພະເຈົ້າຂໍຕາງໜ້າສູນກາງພັກກອມມູນິດຈີນ, ສະພາປະຊາຊົນແຫ່ງຊາດຈີນ, ລັດຖະບານຈີນ, ສະພາປຶກສາການເມືອງປະຊາຊົນແຫ່ງຊາດຈີນແລະຄະນະກຳມະການການທະຫານສູນກາງຈີນ, ສະແດງຄວາມຄິດເຖິງຕໍ່ບັນພະບຸລຸແລະຜູ້ເສຍສະຫຼະຊີວິດທຸກຄົນທີ່ສ້າງຄຸນງາມຄວາມດີທີ່ບໍ່ມີວັນເສົ້າສູນເພື່ອຄວາມເປັນເອກະລາດຂອງປະຊາຊາດ, ການປົດປ່ອຍຂອງປະຊາຊົນ, ຄວາມຈະເລີນຮັ່ງມີຂອງຊາດແລະຄວາມຜາສຸກຂອງປະຊາຊົນ! ສະແດງຄວາມອວຍພອນຢ່າງອົບອຸ່ນຕໍ່ປະຊາຊົນບັນດາເຜົ່າໃນຂອງທົ່ວປະເທດແລະພີ່ນ້ອງຮ່ວມຊາດ ທີ່ຮັກຊາດ! ແລະສະແດງຄວາມຂອບອົກຂອບໃຈຢ່າງຈິງໃຈຕໍ່ເພື່ອນມິດຂອງປະເທດຕ່າງໆທີ່ເອົາໃຈໃສ່ແລະສະໜັບສະໜູນການພັດທະນາຂອງຈີນ.
ວັນທີ 1 ຕຸລາປີ 1949 ຢູ່ບ່ອນນີ້, ສະຫາຍເໝົາເຈີຕຸງໄດ້ປະກາດການສະຖາປະນາສາທາລະນະລັດປະຊາຊົນຈີນ ຂຶ້ນຕໍ່ທົ່ວໂລກ, ເລີ່ມແຕ່ມື້ນັ້ນເປັນຕົ້ນມາ, ປະຊາຊົນຈີນໄດ້ຢືນຂຶ້ນແລ້ວ. ເຫດການຍິ່ງໃຫຍ່ດັ່ງກ່າວໄດ້ປ່ຽນແປງໂສມໜ້າເກົ່າຂອງຈີນທີ່ເຄີຍທຸກຍາກແລະອ່ອນແອນັບແຕ່ປີ 1840 ມານີ້, ປະຊາຊາດຈີນໄດ້ກ້າວໄປສູ່ເສັ້ນທາງກວ້າງໃຫຍ່ໄພສານທີ່ເຮັດທີ່ໃຫ້ປະເທດຈີນບັນລຸການຟື້ນຟູຄວາມຈະເລີນຮຸ່ງເຮືອງອັນຍິ່ງໃຫຍ່.
ໃນໄລຍະ 70 ປີຜ່ານມານີ້, ປະຊາຊົນຈີນບັນດາເຜົ່າໄດ້ຮ່ວມຈິດຮ່ວມໃຈ, ສູ້ຊົນຢ່າງຫ້າວຫັນ, ແລະໄດ້ຮັບຜົນງານອັນຍິ່ງໃຫຍ່ທີ່ປະຈັກຕາຕໍ່ຊາວໂລກ. ມື້ນີ້, ສາທາລະນະລັດປະຊາຊົນຈີນສັງຄົມນິຍົມຍັງຢືນຢູ່ພາກຕາເວັນອອກຂອງໂລກ, ບໍ່ມີພະລັງໃດໆສາມາດປ່ຽນແປງຖານະຂອງຈີນ, ບໍ່ມີພະລັງໃດໆສາມາດສະກັດກັ້ນບາດກ້າວໄປໜ້າຂອງປະຊາຊົນແລະປະຊາຊາດຈີນ.
ສະຫາຍທັງຫຼາຍ, ເພື່ອນທັງຫຼາຍ!
ໃນຂະບວນການກ້າວໄປໜ້າ, ຈີນຕ້ອງຍຶດໝັ້ນການນຳພາຂອງພັກກອມມູນິດຈີນ, ຍຶດໝັ້ນຖານະຂອງປະຊາຊົນເປັນຫຼັກ, ຍຶດໝັ້ນເສັ້ນທາງສັງຄົມນິຍົມທີ່ມີສີສັນພິເສດຂອງຈີນ, ຜັນຂະຫຍາຍປະຕິບັດທິດສະດີພື້ນຖານ,ແນວທາງພື້ນຖານ ແລະຍຸດທະສາດພື້ນຖານຂອງພັກກອມມູນິດຈີນຢ່າງຮອບດ້ານ, ຕອບສະໜອງຄວາມປາຖະໜາຂອງປະຊາຊົນຕໍ່ຊີວິດການເປັນຢູ່ທີ່ດີງາມຢ່າງບໍ່ຢຸດຢັ້ງ, ປະດິດສ້າງພາລະກິດອັນຍິ່ງໃຫຍ່ທີ່ໃໝ່ອ່ຽມໃນປະຫວັດສາດ.
ໃນຂະບວນການກ້າວໄປຂ້າງໜ້າ, ຈີນຕ້ອງຍຶດໝັ້ນທິດທາງ “ເຕົ້າໂຮມປະເທດຊາດເປັນເອກະພາບກັນໂດຍສັນຕິ, ປະເທດດຽວສອງລະບອບ”, ເຮັດໃຫ້ເຂດພິເສດຮົງກົງແລະມາກາວຮັກສາຄວາມຈະເລີນຮຸ່ງເຮືອງແລະໝັ້ນຄົງເປັນໄລຍະຍາວ, ຊຸກຍູ້ການພົວພັນລະຫວ່າງສອງຝັ່ງຊ່ອງແຄບໄຕ້ຫວັນໃຫ້ຂະຫຍາຍຕົວໂດຍສັນຕິ. ທ່ານຮຽກຮ້ອງໃຫ້ລູກຫຼານປະຊາຊາດທົ່ວປະເທດຈີນຈົ່ງສາມັກຄີກັນ, ສືບຕໍ່ສູ້ຊົນເພື່ອໃຫ້ປະເທດຊາດບັນລຸການເຕົ້າໂຮມເປັນເອກພາບກັນຢ່າງເຖິງຖອງ.
ໃນຂະບວນການກ້າວໄປໜ້າ, ຈີນຕ້ອງຍຶດໝັ້ນເສັ້ນທາງພັດທະນາໂດຍສັນຕິ, ປະຕິບັດຕາມຍຸດທະສາດເປີດປະຕູສູ່ພາຍນອກທີ່ຕ່າງຝ່າຍຕ່າງມີຜົນປະໂຫຍດ, ສືບຕໍ່ຮ່ວມກັບປະຊາຊົນບັນດາປະເທດໃນໂລກພ້ອມກັນຊຸກຍູ້ສ້າງສາປະຊາຄົມຮ່ວມຊາຕາກຳຈຂອງມວນມະນຸດ.
ກອງທັບປົດປ່ອຍປະຊາຊົນຈີນແລະກອງຕຳຫຼວດປະກອບອາວຸດຈີນຕ້ອງຮັກສາລັກສະນະແລະວັດຖຸປະສົງທີ່ເປັນກອງທັບຂອງປະຊາຊົນຕະຫຼອດໄປ, ປົກປັກຮັກສາອະທິປະໄຕ, ຄວາມໝັ້ນຄົງແລະຜົນປະໂຫຍດການພັດທະນາຂອງຊາດຢ່າງເດັດດ່ຽວ, ຮັກສາສັນຕິພາບຂອງໂລກຢ່າງເດັດດ່ຽວ.
ສະຫາຍທັງຫຼາຍ, ເພື່ອນທັງຫຼາຍ!
ມື້ຜ່ານມາຂອງຈີນໄດ້ບັນທຶກຢູ່ປຶ້ມມວນມະນຸດແລ້ວ, ມື້ນີ້ຂອງຈີນແມ່ນປະຊາຊົນທົ່ວປະເທດຈີນພວມສ້າງຂຶ້ນ, ອະນາຄົດຂອງຈີນຈະງົດງາມກວ່າເກົ່າຢ່າງແນ່ນອນ. ສະມາຊິກທົ່ວພັກ ທົ່ວກອງທັບ ແລະ ປະຊາຊົນບັນດາເຜົ່າໃນທົ່ວປະເທດຈົ່ງສາມັກຄີກັນຢ່າງແໜ້ນແຟ້ນກວ່າເກົ່າ, ສືບຕໍ່ປັບປຸງແລະພັດທະນາສາທາລະນະລັດປະຊາຊົນຈີນໃຫ້ດີ, ສືບຕໍ່ບາກບັ່ນສູ້ຊົນເພື່ອບັນລຸເປົ້າໝາຍສູ້ຊົນຮ້ອຍປີ 2 ເຫດການ ແລະບັນລຸຄວາມໄຝ່ຝັນຈີນທີ່ຟື້ນຟູຄວາມຈະເລີນຮຸ່ງເຮືອງອັນຍິ່ງໃຫຍ່ຂອງປະຊາຊາດຈີນ.
ສາທາລະນະລັດປະຊາຊົນຈີນອັນຍິ່ງໃຫຍ່ໝັ້ນຍືນ!
ພັກກອມມູນິດຈີນອັນຍິ່ງໃຫຍ່ໝັ້ນຍືນ!
ປະຊາຊົນຈີນອັນຍິ່ງໃຫຍ່ໝັ້ນຍືນ!
ຄຳເຫັນ
0