ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ໃນໄລຍະພັກວັນຊາດຈີນປີນີ້, ຕະຫຼາດບໍລິໂພກມີຄວາມຄຶກຄັກຫຼາຍ. ການບໍລິໂພກແບບດັ້ງເດີມເຊັ່ນ: ການຊື້ເຄື່ອງ, ແລະການກິນດື່ມເປັນຕົ້ນຂາຍດີຫຼາຍ, ການບໍລິໂພກແບບຈະເລີນໃໝ່ເຊັ່ນ: ການທ່ອງທ່ຽວແລະວັດທະນະທຳເປັນຕົ້ນກໍ່ຄຶກຄັກເຊັ່ນກັນ, ສະແດງໃຫ້ເຫັນເຖິງພະລັງແຮງດ້ານການບໍລິໂພກເຂັ້ມແຂງຂຶ້ນ.
ຕາມການຕິດຕາມຈາກກະຊວງການຄ້າຈີນ, ແຕ່ວັນທີ 1 ຫາວັນທີ 7 ຕຸລານີ້, ວິສາຫະກິດຂາຍຍ່ອຍແລະຮ້ານກິນດື່ມໃນທົ່ວປະເທດຈີນໄດ້ບັນລຸຍອດການຈຳໜ່າຍ 1520 ຕື້ຢວນ, ເພີ່ມຂຶ້ນຫຼາຍກວ່າໄລຍະດຽວກັນຂອງປີກາຍ 8,5%.
ອົງປະກອບການບໍລິໂພກໃນຍາມພັກວັນຊາດປີນີ້ກໍ່ເພີ່ມຂຶ້ນຢ່າງຕໍ່ເນື່ອງ, ປະຊາຊົນໄດ້ສຳຜັດແລະຊົມໃຊ້ໃນການບໍລິໂພກແບບໃໝ່ ແລະຂະແໜງການໃໝ່. ຂໍ້ມູນສະແດງໃຫ້ເຫັນວ່າ, ໃນການຄ້າຂາຍທາງອິນເຕີເນັດ, ປະລິມານການຈຳໜ່າຍແອເຢັນ, ເຄື່ອງກັ່ນກອງອາກາດ, ແລະກະແຈອະສະລິຍະລ້ວນແຕ່ໄດ້ເພີ່ມຂຶ້ນໜຶ່ງເທົ່າຂຶ້ນໄປ.
ຂະນະດຽວກັນ, ການພັກວັນບຸນໃນຮູບແບບຕ່າງໆເຊັ່ນ: ການທ່ອງທ່ຽວ, ການເບິ່ງຮູບເງົາ, ຊົມງານວາງສະແດງ, ຫຼີ້ນກິລາ, ແລະອ່ານໜັງສືເປັນຕົ້ນກໍ່ໄດ້ຮັບຄວາມນິຍົມຈາກປະຊາຊົນຈີນນັບມື້ນັບຫຼາຍຂຶ້ນ, ເຊິ່ງການບໍລິໂພກໃນຫຼາຍປະການໄດ້ສ້າງສະຖິຕິສູງໃໝ່ອີກຄັ້ງໃໝ່ໃນໄລຍະພັກວັນຊາດຈີນປີນີ້.
ຕາມຂໍ້ມູນຫຼ້າສຸດຂອງຕະຫຼາດຮູບເງົາຈີນສະແດງໃຫ້ເຫັນວ່າ, ນັບມາຮອດວັນທີ 8 ຕຸລານີ້, ການຂາຍປີ້ຮູບເງົາໃນຍາມພັກວັນຊາດຈີນບັນລຸເຖິງ 5,05 ຕື້ຢວນ, ຜູ້ຊົມຮູບເງົາມີເຖິງ 135 ລ້ານເທື່ອຄົນ, ລ້ວນແຕ່ສ້າງສະຖິຕິໃໝ່ໃນປະຫວັດສາດ.
ປີນີ້ແມ່ນປີແຫ່ງການສະຖາປະນາ ສປ ຈີນຄົບຮອບ 70 ປີ, ຕົວເມືອງທ່ອງທ່ຽວປະຕິວັດເຊັ່ນ: ປັກກິ່ງ, ເຈ່ຍຊີ້ງ, ໜານຊ່າງ, ຈິງກ່າງຊ່ານ, ຈຸ່ນອີ້, ຢຽນອ່ານເປັນຕົ້ນໄດ້ຮັບຄວາມນິຍົມຈາກນັກທ່ອງທ່ຽວຢ່າງຫຼວງຫຼາຍ.
ແຕ່ວັນທີ 1 ຫາວັນທີ 7 ຕຸລານີ້, ລາຍໄດ້ຈາກການທ່ອງທ່ຽວພາຍໃນປະເທດຈີນບັນລຸເຖິງ 649,71 ຕື້ຢວນ, ເພີ່ມຂຶ້ນຫຼາຍກວ່າໄລຍະດຽວກັນຂອງປີກາຍ 8,47%.
ໃນດ້ານການທ່ຽວຕ່າງປະເທດ, ນັກທ່ອງທ່ຽວຈີນທີ່ເຂົ້າອອກດ່ານບັນລຸເຖິງ 1,98 ລ້ານເທື່ອຄົນຕໍ່ມື້, ນັບລວມແລ້ວ 7 ມື້ມີນັກທ່ອງທ່ຽວອອກໄປທ່ຽວຕ່າງປະເທດຫຼາຍກວ່າ 7 ລ້ານເທື່ອຄົນ.
ຜູ້ຊ່ຽວຊານຢືນຢັນວ່າ, ຂໍ້ມູນບໍລິໂພກທີ່ຈະແຈ້ງເຫຼົ່ານີ້ໃນຍາມພັກວັນຊາດຈີນໄດ້ສະແດງໃຫ້ເຫັນອີກເທື່ອໜຶ່ງວ່າ, ເສດຖະກິດຈີນມີພະລັງແຮງພາຍໃນອັນແຂງແກ່ນ.
ຄຳເຫັນ
0