ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ນ້ຳສ້າງໄວໜຸ່ມປັນຍາຊົນ
ຍັງມີອີກເລື່ອງໜຶ່ງທີ່ເຮັດໃຫ້ຊາວບ້ານຫຼຽງເຈ່ຍເຫີຈື່ຈຳໂດຍບໍ່ມີວັນລືມ,ຄື ທ່ານສີຈິ້ນຜິງໄດ້ນຳພາຊາວບ້ານຂຸດນ້ຳສ້າງໜ່ວຍໜຶ່ງ.
ຢູ່ຊົນນະບົດເຂດພາກເໜືອສ້ານຊີ່, ຕາມທຳມະດາແລ້ວ, ປະຊາຊົນໄດ້ຂຸດຂຸມແຄມນ້ຳເພື່ອເປັນແຫຼ່ງນ້ຳໃຊ້ນ້ຳກິນ. ແຕ່ວ່າ ຂຸມນ້ຳແບບນີ້ເປັນແຫຼ່ງນ້ຳກິນຮ່ວມກັນທັງຄົນແລະສັດຕ່າງໆ, ຈິ່ງບໍ່ມີຄວາມສະອາດຫຼາຍ. ຮ້າຍແຮງກວ່ານັ້ນຄື ເມື່ອເກີດນ້ຳປ່າໄຫຼຫຼາກ, ຂຸມນ້ຳດັ່ງກ່າວຈະຖືກຂີ້ຕົມຖົມ, ຊາວບ້ານບໍ່ມີນ້ຳກິນ. ສະນັ້ນ ທ່ານສີຈິ້ນຜິງກໍປຶກສານຳຊາວບ້ານທັງຫຼາຍວ່າ ຈະຂຸດສ້າງໜ່ວຍໜຶ່ງຢູ່ບ່ອນອ່າວສູງໃນໃຈກາງບ້ານ.
ຊາວບ້ານຫຼຽງເຈ່ຍເຫີຫວນຄືນວ່າ: ໃນເວລາຂຸດສ້າງເມື່ອຂຸດເລິກເຖິງ 1 ແມັດ ກໍຕ້ອງມີຄົນລົງໄປຂຸດຕໍ່, ທຸກເທື່ອ ທ່ານສີຈິ້ນຜິງກໍຍາດໄປຂຸດໂດຍຢືນຢູ່ໃນນ້ຳເຢັນຂຸດດິນແລະຫີນ, ກ່ອນຂຸດສ້າງໃຫ້ສຳເລັດ, ເຄື່ອງນຸ່ງຂອງເພິ່ນບໍ່ເຄີຍສະອາດຈັກເທື່ອ.
ນ້ຳປະປາທີ່ຊາວບ້ານຫຼຽງເຈ່ຍເຫີທຸກໆຄອບຄົວໃຊ້ໃນປັດຈຸບັນແມ່ນມາຈາກນ້ຳສ້າງໜ່ວຍນີ້.
ອູຮຸ່ຍ ຊາວບ້ານຫຼຽງເຈ່ຍເຫີກ່າວວ່າ: “ຈິ້ງຜິງເຮັດຫຍັງກໍເຮັດດ້ວຍຄວາມຕັດສິນໃຈແລະຄວາມອົດທົນ, ບໍ່ໃຫ້ຄຳໝັ້ນສັນຍາແບບງ່າຍດາຍ,ແຕ່ຖ້າຫາກໄດ້ເວົ້າແລ້ວ, ຂໍແຕ່ເປັນສິ່ງທີ່ຕັດສິນໃຈເຮັດ,ເພິ່ນກໍຍຶດໝັ້ນເຮັດຈົນໃຫ້ໄດ້. ເພິ່ນມາຫຼຽງເຈ່ຍເຫີນຳພາຊາວບ້ານພວກເຮົາສ້າງຄັນຄູ, ພັດທະນາແກັສຊີວະພາບ, ສ້າງຮ້ານຄ້າຕົວແທນຈຳໜ່າຍເຊິ່ງລັດເປັນຜູ້ຄຸ້ມຄອງ, ສ້າງສະຫະກອນຕີເຫຼັກແລະອື່ນໆ, ເຮັດສິ່ງໃດກໍເຮັດໃຫ້ສຳເລັດສິ່ງນັ້ນ,ບໍ່ມີສິ່ງໃດທີ່ເຮັດແບບເຄິ່ງໆກາງໆແລ້ວບໍ່ເຮັດເລີຍ, ບໍ່ວ່າຈະປະສົບຄວາມຫຍຸ້ງຍາກໃດແບບກໍຕາມ, ເພິ່ນກໍຕ້ອງຊອກວິທີແກ້ໄຂໃຫ້ໄດ້.”
ໃນສາຍຕາຂອງຄົນອ້ອມໂຕ, ລິວຢົງຢ້າວເປັນຜູ້ມີຄວາມສາມາດ, ສະຫຼາດ,ຫົວໄວ. ລາວເອງກໍຮູ້ສຶກພາກພູມໃຈໃນຄຳຍ້ອງຍໍດັ່ງກ່າວ. ລິວຢົງຢ້າວບອກວ່າ: ຕອນໄວໜຸ່ມ, ຜູ້ທີ່ລາວເຄົາລົບນັບຖືນັ້ນມີໜ້ອຍທີ່ສຸດ. ແຕ່ວ່າ ທ່ານສີຈິ້ນຜິງມີສາຍຕາເບິ່ງກວ້າງມອງໄກ,ມັກຄົ້ນຄວ້າເລິກເຊິ່ງ,ມີຫຼາຍວິທີ, ເຊິ່ງລາວຍອມຮັບແລະເຄົາລົບນັບຖືເພິ່ນທີ່ສຸດ.
ເດືອນຈຽງຕາມຈັນທະຄະຕິຈີນປີ 1974, ລິວຢົງຢ້າວຖືກຊັບຊ້ອນແຕ່ງຕັ້ງໃຫ້ເປັນຜູ້ອຳນວຍການໂຮງຮຽນປະຖົມຫຼຽງເຈ່ຍເຫີ. ເວລານັ້ນ, ທ່ານສີຈິ້ນຜິງເປັນເລຂາຄະນະພັກບ້ານຫຼຽງເຈ່ຍເຫີ. ລິວຢົງຢ້າວຈື້ໄດ້ວ່າ: ໂຮງຮຽນປະຖົມຫຼຽງເຈ່ຍເຫີມີຄູທັງໝົດ 4 ຄົນເຊິ່ງໄດ້ລວມເຖິງລາວເອງ. ເວລາເປີດສົກຮຽນໃໝ່, ທ່ານສີຈິ້ນຜິງກໍຮຽກໂຮມເຂົາເຈົ້າ 4 ຄົນມາລວມກັນ, ໃນການລວມກັນນັ້ນ, ຢວນຊູ້ເຊິງເປັນໜຶ່ງໃນຈຳນວນຄູ 4 ຄົນສະເໜີວ່າ: ເຂົາເຈົ້າມາຈາກຕ່າງຖິ່ນ, ມີຄວາມຫຍຸ້ງຍາກດ້ານການກິນຜັກພືດຕ່າງໆ, ຂໍໃຫ້ທາງບ້ານແບ່ງດິນຕອນໜຶ່ງເພື່ອໃຫ້ຄູທັງຫຼາຍປູກຜັກດ້ວຍຕົນເອງ. ມື້ຕໍ່ມາ, ທ່ານສີຈິ້ນຜິງກໍໄດ້ແບ່ງເອົາດິນຕອນໜຶ່ງຢູ່ຫາດພຽງແຄມນ້ຳທີ່ຢູ່ນອກໂຮງຮຽນໃຫ້ພວກຄູທັງຫຼາຍ. ຄູທັງຫຼາຍຮູ້ສຶກຕື້ນຕັນໃຈຫຼາຍ, ເຂົາເຈົ້າບໍ່ນຶກເລີຍວ່າ ເລຂາຄະນະພັກບ້ານທີ່ເປັນຜູ້ບ່າວອາຍຸ 20 ປີໄດ້ປະຕິບັດງານຢ່າງມີປະສິດທິພາບສູງປານນີ້.
ຍັງມີອີກເລື່ອງໜຶ່ງທີ່ເຮັດໃຫ້ລິວຢົງຢ້າວຈື່ບໍ່ລືມ.
ຕອນນັ້ນ, ທ່ານສີຈິ້ນຜິງກຳລັງກະກຽມສ້າງອ່າງແກັສຊີວະພາບໃນບ້ານ, ສຳລັບສິ່ງໃໝ່ໆແບບນີ້, ຊາວບ້ານທັງຫຼາຍບໍ່ກ້າຄິດເລີຍ, ແນ່ນອນກໍຍາກທີ່ຈະຮັບເອົາໄດ້. ມື້ໜຶ່ງ, ທ່ານສີຈິ້ນຜິງເວົ້າເຖິງຄວາມບໍ່ສະດວກໃນການສ້າງອ່າງແກັສຊີວະພາບນຳລິວຢົງຢ້າວວ່າ: ເພິ່ນພຽງແຕ່ຢາກພັດທະນາແກັສຊີວະພາບເພື່ອແກ້ໄຂບັນຫາຂາດຟືນໃຫ້ຊາວບ້ານ, ແລ້ວເອົານ້ຳໃນອ່າງແກັສຊີວະພາບເປັນຝຸ່ນເພື່ອປັບປຸງຄຸນນະພາບດິນປູກຝັງໃຫ້ສູງຂຶ້ນເຊິ່ງຈະສາມາດເພີ່ມຜົນຜະລິດພືດພັນທັນຍາຫານ.
ທ່ານສີຈິ້ນຜິງຍັງໄດ້ເວົ້າຄຳໜຶ່ງທີ່ເຮັດໃຫ້ລິວຢົງຢ້າວຮູ້ສຶກງຶດງໍ້ຫຼາຍ, ເພິ່ນວ່າ: “ຄົນເຮົາເກີດມາເປັນຄົນໃນໂລກນີ້ກໍຕ້ອງເຮັດເລື່ອງທີ່ດີເພື່ອມະນຸດ.”
ຈົນມາເຖິງສູ່ມື້ນີ້, ທ່ານສີຈິ້ນຜິງຍັງຍຶດໝັ້ນອຸດົມການແຕ່ຫົວທີຄື ເຮັດສິ່ງທີ່ດີເພື່ອມະນຸດ ເຮັດສິ່ງທີ່ເປັນປະໂຫຍດເພື່ອປະຊາຊົນຢ່າງແທ້ຈິງ.
ຄຳເຫັນ
0