ຕາມ​ຂ່າວCRI：ວັນ​ທີ 5 ພະ​ຈິກ​ນີ້, ກອງ​ປະ​ຊຸມ​ຂັ້ນ​ລັດ​ຖະ​ມົນ​ຕີ​ຂະ​ໜາດ​ນ້ອຍ​ຂອງ​ອົງ​ການ​ການ​ຄ້າ​ໂລກຫຼື WTO  ​ໄດ້​ຈັດ​ຂຶ້ນ​ຢູ່​ນະ​ຄອນ​ຊຽງ​ໄຮ້. ລັດ​ຖະ​ມົນ​ຕີ​ປະ​ເທດ​ຕ່າງໆ​ທີ່​ມາ​ຈ​າກລາວ,ສະ​ຫະ​ພາບ​ເອີ​ຣົບ, ຣັດ​ເຊຍ, ອິນ​ເດຍ ​ປະ​ເທດ​ສະ​ມາ​ຊິກ 33 ປະ​ເທດ​ພ້ອມ​ດ້ວຍ​ທ່ານ ໂຣ​ເບີ​ໂຕ ອາ​ເຊ​ເວ​ໂດ, ຜູ້​ອຳ​ນວຍການ​ໃຫຍ່ WTO ແລະ​ທ່ານ​ອື່ນໆ​ທັງ​ໝົດ​ 200 ກວ່າ​ທ່ານໄດ້​ເຂົ້າ​ຮ່ວມກອງ​ປະ​ຊຸມ​​ຕາມ​ຄຳ​ເຊີນເຊີນ. ນີ້​ແມ່ນ​ຈີນ​ເປັນ​ເຈົ້າ​ພາບ​ຈັດ​ກອງ​ປະ​ຊຸມຂັ້ນ​ລັດ​ຖະ​ມົນ​ຕີ​ຂະ​ໜາດ​ນ້ອຍ​ຄັ້ງ​ທີ 2 ນັບ​ແຕ່​ຈີນ​ໄດ້​ເຂົ້າ​ຮ່ວມ​ WTO ໃນ​ປີ 2001 ເປັນ​ຕົ້ນ​ມາ.

  ທ່ານ​ໂຈ່ງ ຊ່ານ, ລັດ​ຖະ​ມົນ​ຕີ​ກະ​ຊວງ​ການ​ຄ້າ​ຈີນ​ກ່າວ​ຄຳ​ປາ​ໄສ​ໃນ​ພິ​ທີ​ໄຂກອງ​ປະ​ຊຸມວ່າ, ປັດ​ຈຸ​ບັນ​ນີ້, ລັດ​ທິ​ຝ່າຍ​ດຽວ​ແລະ​ລັດ​ທິ​ປົກ​ປ້ອງ​ມີ​ທ່າ​ອ່ຽງ​ປະ​ກົດ​ຕົວ​ເພີ່ມ​ຂຶ້ນ, ບົດ​ບາດ​ແລະ​ອິດ​ທິ​ພົນ​ຂອງ​ WTO ​ພວມ​ປະ​ເຊີນ​ກັບ​ຄວາມທ້າ​ທາຍ. ກອງ​ປະ​ຊຸມ​ຂັ້ນລັດ​ຖະ​ມົນ​ຕີຂະ​ໜາດ​ນ້ອຍ​ທີ່​ຈັດ​ຂຶ້ນ​ໂດຍ​ຝ່າຍ​ຈີນ, ມີ​ຈຸດ​ປະ​ສົງ​ເພື່ອ​ສ້າງ​ໂອ​ກາດ​ການ​ແລກ​ປ່ຽນແລະສົນ​ທະ​ນາ​ກັນ​ຂອງ​ບັນ​ດາ​ຝ່າຍ, ​ຮ່ວມ​ກັນ​ປຶກ​ສາ​ຫາ​ລື​ກ່ຽວ​ກັບ​ອະ​ນາ​ຄົດ​​ວ່າ​ດ້ວຍ​ລະ​ບຽບ​ການການ​ຄ້າ​ຫຼາຍ​ຝ່າຍ. ຈີນ​ຮຽກ​ຮ້ອງ​ໃຫ້​ແຕ່​ລະ​ຝ່າ​ຍ​ເດັດ​ດ່ຽວ​ສະ​ໜັບ​ສະ​ໜູນ​​ລະ​ບ​ຽບ​ການ​ຄ້າ​ຫຼາຍ​ຝ່າຍ, ເດັດ​ດ່ຽວ​ຄັດ​ຄ້ານ​ລັດ​ທິ​ຝ່າຍ​ດຽວ​ແລະ​ລັດ​ທິ​ປົກ​ປ້ອງ, ຕັ້ງ​ໜ້າ​ເຂົ້າ​ຮ່ວມ​ການ​ປະ​ຕິ​ຮູບ​ທີ່​ມີ​ຄວາມ​ຈຳ​ເປັນ​ຂອງ WTO, ປົກ​ປ້ອງ​​ອິດ​ທິ​ພົນ​ຂອງ WTO, ເພີ່ມ​ທະ​ວີ​ຄວາມ​ເຊື່ອ​ໝັ້ນຂອງວົງ​ການ​ຕ່າງ​ໆຕໍ່ WTO.