ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ການສະໜອງສະບຽງອາຫານ ບໍ່ພຽງແຕ່ພົວພັນເຖິງຊີວິດການເປັນຢູ່ຂອງປະຊາຊົນເທົ່ານັ້ນ ຍິ່ງພົວພັນເຖິງປະສິດທິຜົນໃນການປ້ອງກັນແລະຄວບຄຸມພະຍາດ. ພາຍໃຕ້ສະພາວະແບບນີ້,ທ່ານສີຈິ້ນຜິງໄດ້ເອົາໃຈໃສ່ຕໍ່ລາຄາກໍຄືສະພາບການສະໜອງສະບຽງອາຫານ,ຜັກໝາກໄມ້ແລະເຄື່ອງໃຊ້ປະຈຳວັນ, ນີ້ສະແດງໃຫ້ເຫັນນ້ຳໃຈຮັກແພງປະຊາຊົນຢ່າງເຕັມປ່ຽມ ຍິ່ງເປັນການເພີ່ມຄວາມໝັ້ນໃຈແລະກຳລັງໃຈໃຫ້ແກ່ປະຊາຊົນໃນການຕ້ານພະຍາດ.
ເມື່ອຫວນຄືນເຖິງສະພາບການສຳຫຼວດກວດເບິ່ງເຂດຊຸມຊົນຂອງທ່ານສີຈິ້ນຜິງ, ທ່ານໂຮປີ່ງ, ເລຂາຄະນະພັກເຂດຊຸມຊົນກ່າວວ່າ: ທ່ານສີຈິ້ນຜິງໄດ້ຕັ້ງໃຈຮັບຟັງການລາຍງານສະພາບທີ່ກ່ຽວຂ້ອງ, ທັງສອບຖາມລາຍລະອຽດຈຳນວນໜຶ່ງອີກດ້ວຍ, ຕົວຢ່າງວ່າ ບັດເຂົ້າອອກເຂດຊຸມຊົນແຈກກັນແນວໃດແລະໃຊ້ແນວໃດ? ເຂດຊຸມຊົນໄດ້ລະດົມຂົນຂວາຍສະມາຊິກພັກແນວໃດ? ປະຊາຊົນໃຫ້ການຮ່ວມມືໃນການກວດກາແລະຊອກຫາຜູ້ຕິດເຊື້ອພະຍາດຫຼືບໍ?ເມື່ອໄດ້ຮັບຊາບການລາຍງານວ່າຄະນະກຳມະການຊຸມຊົນໄດ້ຈັດຕັ້ງໜ່ວຍງານ 4 ໜ່ວຍໃນການຮັບຜິດຊອບວຽກງານການບໍລິການຄຸ້ມຄອງ,ປ້ອງກັນແລະຄວບຄຸມພະຍາດໃນເຂດຊຸມຊົນ,ປຸກລະດົມຂົນຂວາຍປະຊາຊົນ ດ້ວຍການໂຄສະນາ,ເຂົ້າເຖິງທຸກໆຄອບຄົວເພື່ອກວດກາ, ທ່ານສີຈິ້ນຜິງຍັງຖາມເຖິງລາຍລະອຽດການແບ່ງໜ້າວຽກຂອງແຕ່ລະໜ່ວຍງານອີກດ້ວຍ.
ທ່ານໂຮປີ່ງບອກວ່າ: ເມື່ອຂ້າພະເຈົ້າຊີ້ໃສ່ເສັ້ນປາລາໂບນທີ່ສະແດງເຖິງສະພາບການປ່ຽນແປງ ຂອງຈຳນວນຜູ້ຕິດຕາມອາການຢູ່ໃນເຮືອນຕົນເອງແລ້ວໄດ້ລາຍງານຕໍ່ທ່ານສີຈິ້ນຜິງວ່າ: ຈຳນວນຜູ້ຕິດຕາມອາການຢູ່ໃນເຮືອນຕົນເອງໄດ້ຫຼຸດໜ້ອຍລົງຕະຫຼອດມາ, ທ່ານສີຈິ້ນຜິງໄດ້ງຶກຫົວສະແດງຄວາມໂລ່ງໃຈທັງເວົ້າວ່າ: ພະນັກງານເຂດຊຸມຊົນໄດ້ປະຕິບັດໜ້າທີ່ວຽກງານປ້ອງກັນແລະຄວບຄຸມພະຍາດມາຕັ້ງແຕ່ວັນທີ 24 ມັງກອນຜ່ານມາໂດຍເຮັດວຽກທັງເວັນທັງຄືນຈົນບໍ່ຮູ້ວ່າມື້ໃດເປັນວັນໃດ. ພະນັກງານເຂດຊຸມຊົນຂັ້ນຮາກຖານເປັນຜູ້ທີ່ເຮັດວຽກຢ່າງລຳບາກທີ່ສຸດ,ທົ່ວສັງຄົມລ້ວນແຕ່ຄວນເອົາໃຈໃສ່ຮັກແພງເຂົາເຈົ້າ. ເມື່ອຄົນທັງຫຼາຍໄດ້ຍິນທ່ານເລຂາທິການໃຫຍ່ສີຈິ້ນຜິງເວົ້າແນວນີ້, ພວກເຮົາຫຼາຍຄົນຮູ້ສຶກຕື້ນຕັນໃຈເກືອບນ້ຳຕາໄຫຼອອກ.
ຢູ່ສູນຕິດຕາມຄວບຄຸມທີ່ຊັ້ນໜຶ່ງຂອງອາຄານກວດກາເຂດນອກໂຮງໝໍຕີ້ຖານ, ທ່ານສີຈິ້ນຜິງໄດ້ກວດເບິ່ງຜ່ານຈາກວິດີໂອກ່ຽວກັບສະພາບການກວດກາ,ບົ່ງມະຕິແລະປິ່ນປົວຄົນເຈັບ ທັງໄດ້ສົນທະນາທາງວີດີໂອກັບພະນັກງານແພດໝໍທີ່ກຳລັງປະຕິບັດໜ້າທີ່ຢູ່ຫ້ອງນອນຄົນເຈັບ
ນັບແຕ່ວັນທີ 12 ມັງກອນເປັນຕົ້ນມາ, ໂຮງໝໍຕີ້ຖານປັກກິ່ງທີ່ຂຶ້ນກັບມະຫາວິທະຍາໄລແພດສາດນະຄອນຫຼວງປັກກິ່ງໄດ້ຮັບຜິດຊອບໜ້າທີ່ປິ່ນປົວ,ກວດກາບົ່ງມະຕິແລະແຍກຄົນເຈັບທີ່ເປັນພະຍາດອັກເສບປອດຈາກໄວຣັສໂຄໂຣນາສາຍພັນໃໝ່ໄວ້ຕ່າງຫາກ, ທາງໂຮງໝໍໄດ້ຮອງຮັບແລະປິ່ນປົວຜູ້ຖືກຢັ້ງຢືນວ່າເປັນພະຍາດກໍລະນີທຳອິດຢູ່ນະຄອນຫຼວງປັກກິ່ງ. ຢູ່ສູນຕິດຕາມຄວບຄຸມທີ່ຊັ້ນໜຶ່ງຂອງອາຄານກວດກາເຂດນອກໂຮງໝໍຕີ້ຖານ, ທ່ານສີຈິ້ນຜິງໄດ້ກວດເບິ່ງຜ່ານຈາກວິດີໂອກ່ຽວກັບສະພາບການກວດກາ,ບົ່ງມະຕິແລະປິ່ນປົວຄົນເຈັບ ທັງໄດ້ສົນທະນາທາງວີດີໂອກັບພະນັກງານແພດໝໍທີ່ກຳລັງປະຕິບັດໜ້າທີ່ຢູ່ຫ້ອງນອນຄົນເຈັບ ໂດຍໃຫ້ກຳລັງໃຈແກ່ເຂົາເຈົ້າສືບຕໍ່ປັບປຸງແຜນການປິ່ນປົວໃຫ້ມີປະສິດທິຜົນຫຼາຍຂຶ້ນ,ສືບຕໍ່ອອກແຮງຈົນສຸດຄວາມສາມາດເພື່ອປິ່ນປົວຜູ້ເປັນພະຍາດ,ສຸມທຸກຄວາມພະຍາຍາມຍົກສູງອັດຕາປິ່ນປົວຄົນເຈັບແລະອັດຕາການປິ່ນປົວໃຫ້ຫາຍ ຈາກພະຍາດ, ຫຼຸດອັດຕາຕິດເຊື້ອແລະອັດຕາການເສຍຊີວິດຈາກພະຍາດ ທັງເຕືອນໃຫ້ເຂົາເຈົ້າຕ້ອງມີສະຕິລະວັງຕົວໃນການປ້ອງກັນຕົວເອງຈາກພະຍາດ.
ທ່ານຫຼີວຈິງຢວນ ຫົວໜ້າພະແນກມໍລະສຸມໂຮງໝໍຕີ້ຖານປັກກິ່ງບອກວ່າ: ທ່ານເລຂາທິການໃຫຍ່ໄດ້ໂບກມືທັກຖາຍກັບພວກເຮົາທັງໃຫ້ກຳລັງໃຈແກ່ພວກເຮົາວ່າ ຕ້ອງໄດ້ຮັບໄຊຊະນະແນ່ນອນ! ນີ້ໄດ້ເຮັດໃຫ້ພວກເຮົາຮູ້ສຶກມີກຳລັງໃຈຫຼາຍຂຶ້ນແລະມີຄວາມໝັ້ນໃຈຫຼາຍຂຶ້ນໃນການເອົາຊະນະບັ້ນຕ້ານພະຍາດຄັ້ງນີ້.
ທ່ານສີຈິ້ນຜິງໃຫ້ກຳລັງໃຈແກ່ພະນັກງານແພດໝໍທີ່ກຳລັງປະຕິບັດໜ້າທີ່ຢູ່ໂຮງໝໍຕີ້ຖານ
ທ່ານຈ່າງໄຫເສຍ ພະນັກງານພະຍາບານຫຼັກແຫຼ່ງທີ່ເຄີຍໄປປະຕິບັດໜ້າທີ່ຕ້ານພະຍາດໂຣກລະບາດຢູ່ປະເທດມາດາກາສກາ ຢູ່ອາຟຣິກການັ້ນໄດ້ຫວນຄືນເຖິງເຫດການສຳຄັນທີ່ທ່ານສີຈິ້ນຜິງມາຢ້ຽມຢາມໂຮງໝໍໃນຕອນບ່າຍວັນທີ 10 ກຸມພານີ້, ນາງເວົ້າດ້ວຍສຽງແຫ່ງຄວາມຕື້ນຕັນໃຈວ່າ: ທ່ານສີຈິ້ນຜິງເຕືອນໃຫ້ພວກເຮົາຕ້ອງປ້ອງກັນຕົວເອງໃຫ້ດີ,ພັກຜ່ອນໃຫ້ດີ,ເພື່ອຮັບປະກັນຕົນເອງບໍ່ໃຫ້ຕິດເຊື້ອພະຍາດ.ໃນເວລາທີ່ພະຍາດແຜ່ລະບາດຢ່າງຮຸນແຮງທີ່ສຸດ, ທ່ານເລຂາທິການໃຫຍ່ຍັງມາຢ້ຽມຢາມໂຮງໝໍທີ່ເປັນແນວໜ້າການຕ້ານພະຍາດ ທັງໄດ້ໃຫ້ທິດຊີ້ນຳແລະຄຳແນະນຳດ້ວຍຄວາມເປັນຫ່ວງ,,, ເຮັດໃຫ້ພວກເຮົາຮູ້ສຶກອົບອຸ່ນໃຈຫຼາຍແລະມີກຳລັງໃຈເພີ່ມຂຶ້ນຢ່າງຫຼວງຫຼາຍ, ເມື່ອຜະເຊີນໜ້າກັບການແຜ່ລະບາດຂອງພະຍາດ, ພວກເຮົາມີໜ້າທີ່ຮັບຜິດຊອບທີ່ປັດປ່າຍບໍ່ໄດ້.
ໃນບັ້ນຕໍ່ຕ້ານແລະສະກັດກັ້ນການແຜ່ລະບາດຂອງພະຍາດຄັ້ງນີ້, ໂຮງໝໍຄືສະໜາມຮົບ, ພະນັກງານແພດໝໍເປັນນັກຮົບ.ໃນສະຖານະການການປ້ອງກັນແລະຄວບຄຸມການແຜ່ລະບາດຂອງພະຍາດຢ່າງຂ້ຽວຂາດໃນລັກສະນະນີ້, ການມາຢ້ຽມຢາມຂອງທ່ານສີຈິ້ນຜິງໄດ້ເຮັດໃຫ້ພະນັກງານແພດໝໍທີ່ສູ້ຊົນຢູ່ແນວໜ້າໃນການປ້ອງກັນແລະຄວບຄຸມພະຍາດນັ້ນຮູ້ສຶກອົບອຸ່ນໃຈຫຼາຍແລະມີກຳລັງແຮງໃຈເພີ່ມຂຶ້ນຢ່າງຫຼວງຫຼາຍ.
ຈຸດທົດສອບການຜ່ານຜ່າຈາກການແຜ່ລະບາດຂອງພະຍາດ, ຈຸດສຳຄັນຕົ້ນຕໍແມ່ນຂື້ນຢູ່ນຳຂັ້ນຮາກຖານ,ຂໍ້ຫຍຸ້ງຍາກຢູ່ນຳຂັ້ນຮາກຖານ. ທ່ານສີຈິ້ນຜິງເດີນທາງຢ້ຽມຢາມຂັ້ນຮາກຖານເທື່ອນີ້ໄດ້ເຈາະຈົງເນັ້ນໜັກບົດບາດສຳຄັນຂອງເຂດຊຸມຊົນໃນສະພາບການລວມຂອງການປ້ອງກັນແລະຄວບຄຸມການແຜ່ລະບາດຂອງພະຍາດ ທັງໄດ້ສະແດງຄວາມຊົມເຊີຍແລະຄວາມເອົາໃຈໃສ່ຕໍ່ພະນັກງານຂັ້ນຮາກຖານ, ຄວາມເວົ້າທີ່ອົບອຸ່ນຂອງທ່ານໄດ້ເຊີດຊູກຳລັງໃຈໃຫ້ແກ່ຄົນທັງຫລາຍທີ່ສູ້ຊົນຢູ່ແນວໜ້າໃນການປ້ອງກັນແລະຄວບຄຸມພະຍາດກໍຄືໃນທຸກຂົງເຂດວຽກງານຢ່າງຫຼວງຫຼາຍ.
ຄືດັ່ງທີ່ຄົນທັງຫຼາຍໄດ້ເວົ້າວ່າ: ພາຍໃຕ້ການເອົາໃຈໃສ່ແລະຊີ້ນຳຈາກທ່ານສີຈິ້ນຜິງ, ພວກເຮົາມີຄວາມໝັ້ນໃຈຢ່າງເດັດດ່ຽວໜຽວແໜ້ນ, ຮ່ວມແຮງຮ່ວມໃຈກັນເພື່ອຜ່ານຜ່າຄວາມຫຍຸ້ງຍາກ ໃນທີ່ສຸດກໍຈະສາມາດຍາດເອົາໄຊຊະນະໃນບັ້ນປ້ອງກັນແລະຄວບຄຸມພະຍາດຄັ້ງນີ້ໄດ້ຢ່າງແນ່ນອນ.
ຄຳເຫັນ
0