ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ນັບແຕ່ປີ 2012 ຈົນມາຮອດປັດຈຸບັນ, ແຕ່ລະປີ, ທ່ານສີຈິ້ນຜິງກໍໄດ້ໄປສຳຫຼວດຄົ້ນຄວ້າຢູ່ຫຼາຍໆທ້ອງຖິ່ນ, ໃນນັ້ນ ບ່ອນທີ່ທ່ານໄປຫຼາຍທີ່ສຸດກໍແມ່ນເຂດພູດອຍ. ທ່ານເຄີຍເດີນທາງທີ່ຄົດລ້ຽວກ້ຽວກອດໄປຕາມສາຍພູຈົນເຖິງນະຄອນຕິ້ງຊີ່, ກິ່ງແຂວງລິນເຊ້ຍ ຂອງແຂວງກ່ານຊູ້ທີ່ຕັ້ງຢູ່ເຂດຮ່ອມພູໃຫຍ່ທີ່ມີເສັ້ນທາງທຸລະກັນດານ ເພື່ອຢ້ຽມຢາມປະຊາຊົນຜູ້ທຸກຍາກ, ທ່ານຍັງເຄີຍຜ່ານຜ່າອາກາດ ໜາວພີລຶກໃນລະດູໜາວເພື່ອເດີນທາງຂຶ້ນພູຈິງກ່າງເພື່ອໄປຢ້ຽມຊົມ ຕຶກປ່າຈ່ຽວ ຮ່ອງຮອຍສະຖານທີ່ເກົ່າແກ່ປະຕິວັດ. ໃນຫຼາຍປີຜ່ານມາ, ທ່ານສີຈິ້ນຜິງໄດ້ໄປຮອດໄປເຖິງເຂດທຸກຍາກພິເສດ 14 ແຫ່ງຂອງຈີນ ເຊິ່ງເຂດທຸກຍາກເຫຼົ່ານີ້ສ່ວນຫຼາຍຕັ້ງຢູ່ເຂດພູດອຍ. ຢູ່ໃນໃຈຂອງທ່ານສີຈິ້ນຜິງມີຄວາມເປັນຫວ່ງເປັນໃຍ ພູໃຫຍ່ທີ່ທຸກຍາກຫລາຍແຫ່ງຂອງປະເທດຊາດ. ພູໃຫຍ່ເຫຼົ່ານີ້ກໍປຽບເໝືອນປ້ອມຮົບທີ່ຕ້ອງບຸກຍຶດໃຫ້ໄດ້ໃນບັ້ນລຶບລ້າງຄວາມທຸກຍາກ.
ວັນທີ 29 ທັນວາ 2012, ທ່ານສີຈິ້ນຜິງໄດ້ຢ້ຽມຢາມປະຊາຊົນຜູ້ທຸກຍາກຢູ່ເມືອງຟູຜິງ
ວັນທີ 29 ທັນວາ 2012, ທ່ານສີຈິ້ນຜິງໄດ້ຜ່ານຜ່າອາກາດໜາວພີລຶກທີ່ອຸນຫະພູມລົບ 10 ປາຍອົງສາ ດ້ວຍການຂີ່ລົດເດີນທາງ300ກວ່າກິໂລແມັດໄປເຖິງ ເມືອງຟູຜິງ ເມືອງທຸກຍາກຈຸດສຸມລະດັບຊາດທີ່ຢູ່ສ່ວນເລິກຂອງເຂດພູໄທ້ຫາງ. ນີ້ເປັນເທື່ອທຳອິດທີ່ທ່ານສີຈິ້ນຜິງໄດ້ເດີນທາງໄປສຳຫຼວດຄົ້ນຄວ້າວຽກງານລຶບລ້າງຄວາມທຸກຍາກ ຫຼັງຈາກກອງປະຊຸມໃຫຍ່ຄັ້ງທີ 18 ຂອງພັກກອມມູນິດຈີນ.
ເດືອນພະຈິກປີ 2013, ທ່ານສີຈິ້ນຜິງໄດ້ເດີນທາງໄປຢ້ຽມຢາມບ້ານ18ຖ້ຳ ກິ່ງແຂວງຊ່ຽງຊີ່ແຂວງຫູນານ. ຫຼັງຈາກນັ້ນມີໂອກາດສຳຄັນເທື່ອໜຶ່ງ, ທ່ານສີຈິ້ນຜິງໄດ້ຫວນຄືນເຖິງເຫດການຄັ້ງນັ້ນວ່າ: “ໃນການຢ້ຽມຢາມບ້ານ18ຖ້ຳຊ່ຽງຊີ່ໃນເທື່ອນັ້ນ, ຂ້າພະເຈົ້າມີຄວາມຮູ້ສຶກປະທັບໃຈຢ່າງເລິກເຊິ່ງຫຼາຍ, ພວກເຮົາໄດ້ປີນພູດົນເຕີບຈິ່ງໄປເຖິງບ້ານແຫ່ງນັ້ນ ເຊິ່ງບໍ່ແມ່ນເລື່ອງງ່າຍດາຍ, ເມື່ອເຂົ້າໄປໃນບ້ານແລ້ວ, ມີແມ່ເຖົ້າຜູ້ໜຶ່ງຖາມຂ້າພະເຈົ້າວ່າ ຂໍຖາມແດ່ ທ່ານຊື່ຫຍັງ, ທ່ານມາຈາກໃສ? ແມ່ເຖົ້າບໍ່ຮູ້ຈັກຂ້າພະເຈົ້າ, ເພາະວ່າບ້ານນັ້ນເປັນສະຖານທີ່ທີ່ຕັ້ງຢູ່ບ່ອນຫ່າງໄກສອກຫຼີກ, ເພິ່ນບໍ່ມັກເບິ່ງໂທລະພາບ, ຮູ້ໜັງສືໜ້ອຍດຽວ ຢາກເຮັດໂຄງການອຸດສາຫະກຳຢູ່ໃນປ່າດົງໃຫຍ່ຂອງເຂດຫ່າງໄກສອກຫຼີກແບບນີ້, ບໍ່ມີຜູ້ມີຄວາມຮູ້ຄວາມສາມາດ,ບໍ່ມີຕະຫຼາດ ທັງຕ້ອງການຕົ້ນທຶນສູງ, ຈິ່ງຍາກທີ່ຈະພັດທະນາໄດ້. ”
ໃນເງື່ອນໄຂຂອງບ້ານທີ່ຢູ່ຫ່າງໄກສອກຫຼີກແຫ່ງນີ້, ທ່ານສີຈິ້ນຜິງໄດ້ສະເໜີແນວຄວາມຄິດ “ລຶບລ້າງຄວາມທຸກຍາກຢ່າງຖືກຕ້ອງຕາມເປົ້າໝາຍທີ່ແນ່ນອນ”ເປັນເທື່ອທຳອິດ. ທ່ານກ່າວເນັ້ນວ່າ: ການລຶບລ້າງຄວາມທຸກຍາກແມ່ນຕ້ອງແກ້ໄຂບັນຫາຄວາມທຸກຍາກຢ່າງແທ້ຈິງ, ນີ້ຄືຄວາມໝາຍທີ່ແທ້ຈິງຂອງການລຶບລ້າງວຄວາມທຸກຍາກຢ່າງຖືກຕ້ອງຕາມເປົ້າໝາຍທີ່ແນ່ນອນ.
ເດືອນມິຖຸນາປີ 2017, ທ່ານສີຈິ້ນຜິງໄດ້ຢ້ຽມຢາມປະຊາຊົນຜູ້ທຸກຍາກຢູ່ບ້ານຈ້າວເຈ່ຍວ່າ
ເດືອນມິຖຸນາປີ 2017, ທ່ານສີຈິ້ນຜິງທີ່ເດີນທາງໄປສຳຫຼວດຄົ້ນຄວ້າວຽກງານຢູ່ແຂວງຊ່ານຊີ່ໄດ້ຂີ່ລົດຊົ່ວໂມງປາຍໄປເຖິງ ບ້ານຈ້າວເຈ່ຍວ່າ ເມືອງເຂີ້ລານ ຢູ່ເຂດພູລວີລຽງ, ບ້ານແຫ່ງນີ້ປະສົບກັບບັນຫາທີ່ທຸກຍາກທີ່ສຸດບວກກັບສິ່ງແວດລ້ອມທຳມະຊາດຊຸດໂຊມ, ເປັນເຂດທຸກຍາກທີ່ສຸດແລະມີຄວາມຫຍຸ້ງຍາກທີ່ສຸດໃນການລຶບລ້າງຄວາມທຸກຍາກ.
ເດືອນກຸມພາ ປີ 2018, ທ່ານສີຈິ້ນຜິງ ໄດ້ຢ້ຽມຢາມປະຊາຊົນຜູ້ທຸກຍາກຂອງບ້ານຊ່ານເຫີທີ່ຢູ່ພາກກາງຂອງເຂດພູຕ້າລຽງ.
ເດືອນກຸມພາ ປີ 2018, ທ່ານສີຈິ້ນຜິງ ໄດ້ຂີ່ລົດເດີນທາງເລາະລ້ຽວກ້ຽວກອດໄປຕາມພູ ໄປກັບປະມານ 4 ຊົ່ວໂມງເພື່ອໄປຢ້ຽມຢາມປະຊາຊົນຜູ້ທຸກຍາກຢູ່ບ້ານໂຮຜູຕາແສງເຈຍຟ້າງແລະບ້ານຊ່ານເຫີ ຕາແສງຊ່ານຊ້າເຫີເມືອງຈ່າວເຈ ທີ່ຢູ່ພາກກາງຂອງເຂດພູຕ້າລຽງ.
ກໍເປັນແບບນີ້ຫຼະ, ຢູ່ໃນໃຈຂອງທ່ານສີຈິ້ນຜິງມີແຕ່ເປັນຫ່ວງເປັນໃຍເຖິງປະຊາຊົນໃນເຂດພູດອຍຫຼາຍໆແຫ່ງເຊັ່ນ: ພູຕ້າລຽງ, ພູລວີລຽງ, ຫຼາຍປີມານີ້, ທ່ານໄດ້ບັນຊາການແລະວາງແຜນງານດ້ວຍຕົນເອງ,ນຳພາປະຊາຊົນທົ່ວປະເທດບຸກບືນສູ້ຊົນແກ້ໄຂບັນຫາຄວາມທຸກຍາກຢູ່ເຂດພູໃຫຍ່ແຕ່ລະແຫ່ງ, ເຊິ່ງການລຶບລ້າງຄວາມທຸກຍາກໄດ້ປະສົບຜົນສຳເລັດຢ່າງໃຫຍ່ຫຼວງແບບບໍ່ເຄີຍມີມາກ່ອນ.
ປະຊາຊົນຜູ້ທຸກຍາກຂອງຈີນຈາກ98,99ລ້ານຄົນໃນທ້າຍປີ2012ໄດ້ຫຼຸດລົງເຫຼືອ5,51ລ້ານຄົນໃນທ້າຍປີ2019, ອັດຕາການເກີດຄວາມທຸກຍາກຈາກ10.2% ຫຼຸດລົງເຫຼືອ0.6%. ຈຳນວນປະຊາກອນຜູ້ທຸກຍາກໄດ້ຫຼຸດລົງຫຼາຍກວ່າ 10 ລ້ານຄົນຕໍ່ປີເປັນ7 ປີລຽນຕິດ. ບັນຫາຫຍຸ້ງຍາກຕ່າງໆທີ່ປະຊາຊົນເຂດທຸກຍາກເຄີຍປະສົບໃນ ການເດີນທາງ,ການໃຊ້ໄຟຟ້າ, ການໄປໂຮງຮຽນຂອງເດັກນ້ອຍ, ການປິ່ນປົວພະຍາດ, ການສື່ສານໂທລະຄົມ ແລະບັນຫາອື່ນໆທີ່ເປັນບັນຫາຄົງຄ້າງມາເປັນເວລາຍາວນານນັ້ນກໍໄດ້ຮັບການແກ້ໄຂໂດຍທົ່ວໄປ. ການສຶກສາພາກບັງຄັບ, ການປິ່ນປົວຂັ້ນພື້ນຖານ, ຄວາມປອດໄພດ້ານທີ່ຢູ່ອາໄສໄດ້ມີການຮັບປະກັນ. ເຂດພູດອຍທີ່ທຸກຍາກ ເຊິ່ງທ່ານສີຈິ້ນຜິ້ງໄດ້ເປັນຫວ່ງເປັນໃຍຢູ່ຕະຫຼອດນັ້ນກຳລັງໄດ້ປ່ຽນໂສມໜ້າໃໝ່ຕາມລຳດັບ.
ໃນກອງປະຊຸມສຳມະນາກ່ຽວກັບວຽກງານຍາດເອົາໄຊຊະນະຂັ້ນສຸດທ້າຍໃນການລຶບລ້າງຄວາມທຸກຍາກທີ່ຈັດຂຶ້ນໃນ ວັນທີ 6 ມີນາ 2020, ທ່ານສີຈິ້ນຜິງກ່າວວ່າ: ໃນບໍ່ເທົ່າໃດປີຜ່ານມາ, ຂ້າພະເຈົ້າໄດ້ໄປບ້ານທຸກຍາກຈຳນວນໜຶ່ງອີກຄັ້ງໃໝ່ ແລະ ກໍໄດ້ເຫັນເຖິງການປ່ຽນແປງທີ່ແທ້ຈິງ, ເສັ້ນທາງຮາບພຽງດີ, ເຮືອນຊານຫຼັງໃໝ່ໄດ້ປຸກສ້າງຂື້ນເປັນຄຸ້ມ, ການກິນອິ່ມນຸ່ງອຸ່ນຂອງປະຊາຊົນຜູ້ທຸກຍາກແມ່ນບໍ່ມີບັນຫາແລ້ວ. ເມື່ອໄດ້ເຫັນໃບໜ້າທີ່ຍີ້ມແຍ້ມແຈ່ມໃສດ້ວຍຄວາມດີໃຈຂອງປະຊາຊົນ, ຂ້າພະເຈົ້າກໍຮູ້ສຶກດີໃຈທີ່ສຸດ.
ທ່ານຜູ້ຟັງ, ຈີນມີເນື້ອທີ່ເຂດພູດອຍທີ່ກວ້າງໃຫຍ່ໄພສານ, ພູຜາປ່າໄມ້ເປັນພາກສ່ວນທີ່ມີສີສັນສົດໃສຂອງດິນແດນເມືອງຈີນທີ່ສວຍງາມ. ເຂດພູດອຍໄດ້ຫຼໍ່ລ້ຽງປະຊາຊົນຈີນ ໄດ້ເປັນແຫຼ່ງກຳເນີດຂອງອາລິຍະທຳຈີນ, ແຕ່ກໍໄດ້ນຳເອົາຄວາມຫຍຸ້ງຍາກອັນໃຫຍ່ຫຼວງມາໃຫ້ວຽກງານລຶບລ້າງຄວາມທຸກຍາກຂອງປະຊາຊົນເຂດພູດອຍ.
ທ່ານສີຈິ້ນຜິງໄດ້ເດີນທາງໄປສຳຫຼວດຄົ້ນຄວ້າຢູ່ເຂດພູດອຍທີ່ທຸກຍາກເປັນຫຼາຍໆຄັ້ງ, ໂດຍໄດ້ແນະນຳທິດທາງໃນການລຶບລ້າງຄວາມທຸກຍາກໂດຍອີງຕາມສະພາບຕົວຈິງຂອງແຕ່ລະທ້ອງຖິ່ນ. ໃນເວລາສຳຫຼວດຄົ້ນຄວ້າວຽກງານນັ້ນ,ທ່ານຍັງໄດ້ເປັນປະທານຈັດກອງປະຊຸມສຳມະນາລະຫວ່າງເຂດແຂວງໃນຫຼາຍຄັ້ງ, ໂດຍໄດ້ວາງແຜນຢ່າງລະອຽດແລະຖືກຕ້ອງແມ່ນຢຳໃນການລຶບລ້າງຄວາມທຸກຍາກໃຫ້ແກ່ເຂດພູດອຍ. ທ່ານໄດ້ຢືນຢັນຢ່າງເດັດດ່ຽວໜຽວແໜ້ນວ່າ: ໜ້າທີ່ອັນໜັກໜ່ວງ ແລະ ຫຍຸ້ງຍາກລຳບາກທີ່ສຸດໃນການສ້າງສັງຄົມທີ່ອິ່ມໜຳສຳລານໃຫ້ສຳເລັດຮອບດ້ານແມ່ນຂື້ນຢູ່ນຳເຂດທຸກຍາກ, ໂດຍສະເພາະແມ່ນເຂດທຸກຍາກທີ່ສຸດ, ບໍ່ວ່າວຽກງານອັນນີ້ຈະຫຍຸ້ງຍາກຫລາຍປານໃດກໍຕ້ອງບຸກບືນສູ້ຊົນເຮັດໃຫ້ໄດ້, ບໍ່ວ່າບັ້ນຮົບລຶບລ້າງຄວາມທຸກຍາກຄັ້ງນີ້ຈະຫຍຸ້ງຍາກລຳບາກປານໃດກໍຕ້ອງເອົາຊະນະໃຫ້ໄດ້.
ຄຳເຫັນ
0