ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ທ່ານສາສະດາຈານຣານາ ມິດເຕີ, ນັກວິຊາການຜູ້ຊື່ສຽງຂອງອັງກິດທີ່ຄົ້ນຄວ້າປະຫວັດສາດແລະການເມືອງຂອງຈີນໃນສະໄໝໃໝ່,ທັງເປັນຫົວໜ້າສູນປະເທດຈີນຂອງມະຫາວິທະຍາໄລອອກສະຟອດໄດ້ມີຄວາມສົນໃຈຕໍ່ກອງປະຊຸມ“ສອງສະພາ”ຂອງຈີນໃນຫຼາຍປີມານີ້. ສຳລັບກອງປະຊຸມສອງສະພາຂອງຈີນ2020ທີ່ຫາກໍ່ອັດລົງໃນຫວ່າງກ່ອນນີ້ບໍ່ດົນ, ທ່ານສາສະດາຈານຣານາ ມິດເຕີກ່າວວ່າ,ນະໂຍບາຍແລະບົດຮຽນຂອງຈີນໃນການລຶບລ້າງຄວາມທຸກຍາກ ໂລກສົມຄວນຖອດຖອນຮ່ຳຮຽນນຳ, ເນື້ອໃນກ່ຽວກັບນະໂຍບາຍເສດຖະກິດທີ່ຜ່ານຕໍ່ກອງປະຊຸມສອງສະພາໄດ້ດຶງດູດຄວາມສົນໃຈຈາກທົ່ວໂລກ, ສ່ວນສະພາບພະຍາດໂຄວິດ-19ຈະຊຸກຍູ້ເສດຖະກິດຈີນໃຫ້ພັດທະນາໄປສູ່ຂົງເຂດທີ່ມີມູນຄ່າເພີ່ມສູງ,ຍັງຈະຊຸກຍູ້ໃຫ້ວິທະຍາສາດເຕັກນິກແລະ ເສດຖະກິດສັງຄົມເຊື່ອມໂຍງເຂົ້າກັນແລະພັດທະນາຕື່ມອີກ.
ທ່ານຣານາ ມິດເຕີກ່າວວ່າ: ປີ2020ແມ່ນປີທີ່ຈີນສູ້ຊົນຍາດເອົາໄຊຊະນະໃນໄລຍະສຸດທ້າຍຂອງຂັ້ນລຶບລ້າງຄວາມທຸກຍາກ,ເມື່ອເບິ່ງຈາກນະໂຍບາຍການລຶບລ້າງຄວາມທຸກຍາກທີ່ວາງອອກໃນກອງປະຊຸມສອງສະພາແລ້ວສາມາດເຫັນໄດ້ວ່າ,ໜ້າທີ່ຫຼຸດຜ່ອນຄວາມທຸກຍາກໃນໄລຍະຕໍ່ໜ້າຂອງຈີນ ແມ່ນຈະສຸມກຳລັງເຂົ້າໃນການແກ້ໄຂບັນຫາການບໍ່ດຸນດ່ຽງກັນໃນການພັດທະນາໃນເຂດແຄວ້ນຕ່າງໆ.
ທ່ານໄດ້ຊີ້ໃຫ້ເຫັນຕື່ມອີກວ່າ: ບົດຮຽນຂອງຈີນໃນການລຶບລ້າງຄວາມທຸກຍາກແລະຫຼຸດຜ່ອນຄວາມທຸກຍາກ ໄດ້ສະໜອງບົດຮຽນທີ່ສົມຄວນຖອດຖອນຮ່ຳຮຽນນຳໃຫ້ແກ່ໂລກ,ໃນນັ້ນມີບົດຮຽນຈຳນວນໜຶ່ງສາມາດສະໜອງໃຫ້ປະເທດທີ່ເສດຖະກິດພັດທະນາແລ້ວ.
“ບົດຮຽນຫຼາຍຂໍ້ຂອງຈີນສາມາດເປັນຕົວຢ່າງເພື່ອຖອດຖອນໃຫ້ແກ່ເຂດອື່ນໆໃນໂລກ,ໃນນັ້ນມີຕົວຢ່າງອັນໜຶ່ງກໍແມ່ນການທົດລອງສ້າງເຂດເສດຖະກິດພິເສດ,ເຊິ່ງໄດ້ເລີ່ມດຳເນີນພາຍໃຕ້ການນຳພາຂອງທ່ານເຕີ້ງສຽວຜິງໃນຊຸມປີ1980. ຂ້າພະເຈົ້າເຫັນວ່າ,ສິ່ງສຳຄັນອີກອັນໜຶ່ງ ແມ່ນການລົງທຶນໃນການຄົ້ນຄວ້າວິທະຍາສາດເຕັກນິກແລະການສ້າງພື້ນຖານໂຄງລ່າງ. ມີສາເຫດຫຼາຍຢ່າງທີ່ຈີນສາມາດນຳໜ້າໃນການພັດທະນາວິທະຍາສາດເຕັກນິກ,ເວົ້າໃຫ້ເປັນທຳແລ້ວ, ຈຸດໜຶ່ງກໍແມ່ນການລົງທຶນຈຳນວນມະຫາສານຢ່າງຕໍ່ເນື່ອງໃນການຄົ້ນຄວ້າວິທະຍາສາດເຕັກນິກທີ່ມີລະດັບສູງ. ສິ່ງເຫຼົ່ານີ້ ປະເທດທີ່ພັດທະນາແລ້ວກໍຄວນຮ່ຳຮຽນຖອດຖອນເອົາໄດ້. ເພາະວ່າປະເທດເຫຼົ່ານີ້ບໍ່ໄດ້ລົງທຶນຢ່າງພຽງພໍໃຫ້ການຄົ້ນຄວ້າວິທະຍາສາດເຕັກນິກ,ທັງບໍ່ສົນໃຈປານໃດຕໍ່ການຄົ້ນຄວ້າວິທະຍາສາດເຕັກນິກອີກ. ສະນັ້ນ,ຈຸດນີ້ຂອງຈີນແມ່ນມີຜົນປະໂຫຍດຫຼາຍຕໍ່ປະຊາຄົມໂລກ.”
ຄຳເຫັນ
0