ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ທີ່ນີ້ວິທະຍຸສາກົນແຫ່ງປະເທດຈີນ! ທ່ານຜູ້ຟັງທີ່ຮັກແພງ, ຍິນດີຕ້ອນຮັບທ່ານເຂົ້າສູ່ລາຍການ “ເປີດປະຕູສູ່ເມືອງຈີນ.” ໃນລາຍການມື້ນີ້, ດວງພະຈັນຈະພາທ່ານຊອກຮູ້ຄວາມປ່ຽນແປງຂອງສັງຄົມຈີນຍ້ອນການອະນຸລັກສິ່ງແວດລ້ອມ. ຕໍ່ໄປ, ພວກເຮົາມາຟັງເພງນຳກັນກ່ອນ, ແລ້ວມາຟັງເລື່ອງລາວກ່ຽວກັບການອະນຸລັກສິ່ງແວດລ້ອມຢູ່ຈີນຮ່ວມກັນ.
ເຟືອງກາຍເປັນສິ່ງທີ່ໄດ້ຮັບຄວາມນິຍົມຈາກຄົນທັງຫຼາຍ
“ຂ້ອຍເຮັດໄຮ່ໄຖນາມາຕະຫຼອດຊີວິດ, ແຕ່ກໍຄິດບໍ່ເຖິງວ່າ, ເຟືອງກໍສາມາດກາຍເປັນສິ່ງທີ່ມີຄ່າ.” ຢູ່ບໍລິສັດເມັດວັດຖຸຊີວະພາບເຊິ້ງເຫີຈຳກັດຢູ່ຕາແສງຊ່ານຊີງໂຂວເມືອງຊິງຫຼົງແຂວງເຫີເປີຍ, ລຸງຢີ້ປາວຫຼີ ກ່າວວ່າ. ປີນີ້ເພິ່ນອາຍຸໄດ້ 69 ປີແລ້ວ, ສອງມືເພິ່ນຈັບຖົງອັນໜຶ່ງ, ເພື່ອຮັບເອົາເຟືອງທີ່ຖືກອັດເປັນເມັດທີ່ສົ່ງອອກຈາກເຄື່ອງຈັກຢ່າງສະໝ່ຳສະເໝີ, ແລ້ວປິດຖົງຢ່າງລະດ້ວຍຄວາມແລະຊຳນິຊຳນານ. ການຊຳລະເຟືອງເຫຼົ່ານີ້, ເພິ່ນສາມາດໄດ້ເງິນ 100 ຢວນຕໍ່ມື້, ແຕ່ໃນເມື່ອກ່ອນ, ເຟືອງຕ່າງໆຈະຖືກຊາວບ້ານນຳເອົາໄປຈູດຖີ້ມຢ່າງລັບໆ.
ເມືອງຊິງຫຼົງຕັ້ງຢູ່ບ່ອນເລິກຂອງສາຍພູຢ່ຽນຊ່ານ, ອັດຕາປົກຫຸ້ມປ່າໄມ້ໃນບໍລິເວນເມືອງມີເຖິງ 71.01%, ແມ່ນເຂດອະນຸລັກຊັບພະຍາກອນປ່າໄມ້ສຳຄັນຂອງແຂວງເຫີເປີຍກໍຄືຂອງປະເທດຈີນ. ຄວາມຊິນເຄີຍໃນການຈູດເຟືອງໃນເມື່ອກ່ອນ, ເຮັດໃຫ້ເຈົ້າໜ້າທີ່ທຸກຂັ້ນຂອງທ້ອງຖິ່ນຮູ້ສຶກເປັນຫ່ວງແລະຢ້ານເກີດໄຟອັນຕະລາຍ.
ທ່ານຫຼິວໂກວ໋ມິນ ເລຂາພັກບ້ານຕົ່ງຈວນເສິງຮ້າວກ່າວວ່າ: “ໃນເມື່ອກ່ອນເຈົ້າໜ້າທີ່ບ້ານໄດ້ພາກັນລາດຕະເວນໃນທຸກມື້ຈົນຮອດກາງຄືນເພື່ສະກັດກັ້ນການຈູດເຟືອງ, ແຕ່ວ່າຊາວບ້ານໄດ້ຫຼົບຫຼີກເຈົ້າໜ້າທີ່ລາດຕະເວນ. ເມື່ອເຈົ້າໜ້າທີ່ຜ່ານກາຍໄປແລ້ວ, ຊາວບ້ານກໍອອກມາຈູດເຟືອງຢ່າງລັບໆອີກ, ເຊິ່ງບໍ່ພຽງແຕ່ໄດ້ສ້າງຄວາມສ່ຽງທີ່ຈະເກີດອັກຄີໄພເທົ່ານັ້ນ, ແຕ່ຍັງໄດ້ທຳລາຍສິ່ງແວດລ້ອມອີກດ້ວຍ.”
ຮອດປີ 2019, ສະພາບການດັ່ງກ່າວກໍໄດ້ປ່ຽນແປງໄປໃນທິດທາງທີ່ດີຂຶ້ນ. ເມືອງຊິງຫຼົງໄດ້ດຳເນີນການທົດລອງນຳໃຊ້ເຟືອງແບບສັງລວມຈາກ 3 ດ້ານຄື: ການສ້າງລະບົບເກັບແລະສະສົມເຟືອງ, ການຫັນປ່ຽນເຟືອງໃຫ້ເປັນຫົວອາຫານສັດແລະການໃຊ້ເຟືອງຜະລິດພະລັງງານ, ສົ່ງເສີມວິສາຫະກິດຕ່າງໆຊື້ເຟືອງມາປຸງແຕ່ງແລະນຳໃຊ້ໃຫ້ເປັນປະໂຫຍດ, ປ່ຽນເຟືອງໃຫ້ເປັນສິ່ງທີ່ມີມູນຄ່າ. ເຟືອງທີ່ໄດ້ຮັບການຊຳລະຈະກາຍເປັນເຊື້ອໄຟຊີວະພາບ, ແລະໃຊ້ແທນຖ່ານຫີນເພື່ອສ້າງຄວາມອົບອຸ່ນໃຫ້ຟາມລ້ຽງສັດແລະອື່ນໆພາຍໃນເມືອງຊິງຫຼົງ.
ບໍລິສັດເມັດວັດຖຸຊີວະພາບເຊີ້ງເຫີຈຳກັດກໍແມ່ນບໍລິສັດແຫ່ງໜຶ່ງທີ່ເອົາເຟືອງໄປເປັນແຫຼ່ງພະລັງງານ, ບໍລິສັດນີ້ສາມາດປຸງແຕ່ງເຟືອງເປັນເມັດໆໄດ້ເຖິງ 1000 ໂຕນຕໍ່ປີແລະນຳໃຊ້ເປັນພະລັງງານ, ໂດຍອາໄສດິນປູກຝັງກວ່າ 93 ເຮັກຕາຂອງບ້ານຕຸ່ງຈວນເສີງຮ້າວ, ການຂາຍເຟືອງຢ່າງດຽວກໍສາມາດສ້າງລາຍຮັບໂດຍກົງໃຫ້ແກ່ຊາວບ້ານໄດ້ຫຼາຍກວ່າ 4 ໝື່ນຢວນ.
ໃນເວລາປຸງແຕ່ງເຟືອງ, ວິສາຫະກິດຍັງໄດ້ຈ້າງຊາວບ້ານໄປເຮັດວຽກນຳ, ແລະຈະໃຫ້ບຸລິມະສິດຈ້າງຜູ້ທຸກຍາກ, ໃນໄລຍະທີ່ມີວຽກງານປຸງແຕ່ງຫຼາຍ, ບໍລິສັດເຊີ້ງເຫີຍັງໄດ້ຈ້າງຊາວບ້ານ 20 ກວ່າຄົນໄປເຮັດວຽກນຳ.
ປັດຈຸບັນ, ເຟືອງຕ່າງໆບໍ່ພຽງແຕ່ບໍ່ແມ່ນສິ່ງທີ່ຊາວບ້ານຕ້ອງເປັນຫ່ວງອີກຕໍ່ໄປ, ກົງກັນຂ້າມຍັງເປັນສິ່ງທີ່ເພີ່ມລາຍຮັບໃຫ້ຊາວບ້ານ, ຊາວບ້ານທັງຫຼາຍສະໜັບສະໜູນວຽກງານຫ້າມບໍ່ໃຫ້ຈູດເຟືອງດ້ວຍຄວາມເປັນເຈົ້າການ. ທ່ານຫຼິວໂກວມິນກ່າວວ່າ: “ປັດຈຸບັນບໍ່ມີໃຜລັກໄປຈູດເຟືອງອີກແລ້ວເພາະມີຄວາມສ່ຽງທີ່ຈະຖືກຈັບໃນເວລາຈູດເຟືອງ.”
ມາຮອດປັດຈຸບັນ, ເມືອງຊິງຫຼົງລວມມີວິສາຫະກິດປຸງແຕ່ງແລະນຳໃຊ້ເຟືອງສັງລວມ 13 ແຫ່ງ. ໂດຍຜ່ານການປະຕິບັດໂຄງການໃຊ້ເຟືອງເປັນຫົວອາຫານສັດແລະໃຊ້ເຟືອງເປັນແຫຼ່ງຜະລິດພະລັງງານ, ໃນທົ່ວເມືອງສາມາດເກັບເຟືອງແລະນຳໃຊ້ເຟືອງໄດ້ທັງໝົດ 1,32 ແສນໂຕນ, ອັດຕາການນຳໃຊ້ເຟືອງສັງລວມບັນລຸເຖິງ 96% ຂຶ້ນໄປ.
ເລື່ອງກ່ຽວກັບດອກໄມ້ຢູ່ເມືອງຊີນິງ
ທຽບກັບແຂວງແລະນະຄອນອື່ນໆຢູ່ເຂດທີ່ໄກກັບຊາຍຝັ່ງທະເລຂອງຈີນ, ນະຄອນຊີນິງເຊິ່ງເປັນເມືອງບູຮານຢູ່ເຂດພູພຽງໄດ້ຕ້ອນຮັບມາລະດູບານໃໝ່ຊ້າກວ່າເມືອງອື່ນໆ. ໃນລະດູທີ່ມີດອກໄມ້ເບັ່ງບານຢ່າງຫຼວງຫຼາຍ, ຢູ່ນະຄອນຊີ່ນິງແມ່ນເດືອນພຶດສະພາເຊິ່ງຖືກຄົນທັງຫຼາຍເອີ້ນວ່າ “ລະດູການທີ່ສວຍງາມທີ່ສຸດ.”
ໃນເວລາຍ່າງເຂົ້າສູ່ສວນສາທາລະນະປະຊາຊົນຊີ່ນິງ, ດອກທິວລິບຕ່າງໆທີ່ມີຄວາມສູງຕ່າງກັນ, ມີໄລຍະບັ່ງບານຕ່າງກັນແລະສີຕ່າງກັນໄດ້ບັ່ງບານຢູ່ລະຫວ່າງຕົ້ນໄມ້ແລະເດິ່ນຫຍ້າ, ດອກທິວລິບທຸກດອກປະດັບເອ້ຄວາມສວຍງາມ, ປະສົມປະສານກັບດອກໄມ້ອື່ນໆແລ້ວກາຍເປັນພາບທີ່ສວຍງາມຕະກອນຕາ.
ດອກທິວລິບເປັນດອກໄມ້ທີ່ທົນຄວາມໜາວດີ, ມັກອາກາດເຢັນ, ບໍ່ມັກຄວາມຮ້ອນ. ນະຄອນຊີ່ນິງສູງກວ່າລະດັບໜ້ານ້ຳທະເລ 2.295 ແມັດ, ອາກາດທີ່ເຢັນດີເໝາະກັບການເຕີບໃຫຍ່ຂອງດອກທິວລິບທີ່ສຸດ. ປີນີ້, ສວນສາທາລະນະປະຊາຊົນຊີ່ນິງໄດ້ນຳເຂົ້າດອກທິວລິບໃໝ່ 5 ຊະນິດ, ປັດຈຸບັນໃນສວນດັ່ງກ່າວໄດ້ປູກດອກທິວລິບ 28 ຊະນິດ, ເນື້ອທີ່ປູກດອກທິວລິບບັນລຸເຖິງ 7 ພັນຕາແມັດ.
ນອກຈາກດອກທິວລິບແລ້ວ, ດອກເຜິ້ງ, ດອກລຽນສຽວ, ດອກຢິງຊຸນແລະດອກໄມ້ອື່ນໆພາກັນເບັ່ງບານ, ໄດ້ດຶງດູດຊາວເມືອງພາກັນມາຖ່າຍຮູບຢ່າງຫຼວງຫຼາຍ.
ສວນພຶກສາຊາດຊີ່ນິງຕັ້ງຢູ່ຕີນພູຊີ່ຊ່ານນະຄອນຊີ່ນິງ, ແມ່ນສວນສາທາລະນະທຳມະຊາດແຫ່ງໜຶ່ງ. ປີ 2019, ສວນດັ່ງກ່າວໄດ້ປູກດອກໄມ້ 60 ກວ່າຊະນິດ.
ນາງຟ້ານຢີ້ສິນ ຫົວໜ້າສວນພຶກສາຊາດຊີ່ນິງກ່າວວ່າ, ປັດຈຸບັນ, ສວນຕົນພວມເຜີຍແຜ່ປູກພືດທຳມະຊາດ 9 ຊະນິດທີ່ແຈກຢາຍຢູ່ທົ່ວແຂວງຊິງໄຫໃຫ້ທົ່ວເຖິງໃນຕົວເມືອງຕ່າງໆທົ່ວແຂວງ, ປັດຈຸບັນໄດ້ປູກພືດດັ່ງກ່າວຫຼາຍກວ່າ 1 ລ້ານຕົ້ນແລ້ວ. ພືດເຫຼົ່ານີ້ມີລັກສະນະເຕີບໃຫຍ່ແຕກຕ່າງກັນຕາມທຳມະຊາດ , ໄລຍະເບັ່ງບານຕ່າງກັນ, ສາມາດປ່ຽນສີແລະອື່ນໆ, ເຮັດໃຫ້ຕົວເມືອງຕ່າງໆມີສະພາບຄວາມສວຍງາມທີ່ມີລັກສະນະພິເສດໃນລະດູຕ່າງໆ.
ໃນລະດູທີ່ດອກໄມ້ເບັ່ງບານ, ໃນເຮືອນແລະຢູ່ນອກເຮືອນລ້ວນແຕ່ເຕັມໄປດ້ວຍກິ່ນຫອມຂອງດອກໄມ້, ມີແນວພັນດອກໄມ້ຂອງສວນສາທາລະນະໄດ້ນຳໄປປູກຢູ່ແຫ່ງຕ່າງໆພາຍໃນຕົວເມືອງເພື່ອປະດັບເອ້ຂອງຕົວເມືອງໃຫ້ຂຽວງາມ.
ດອກໄມ້ໃນເດືອນພຶດສະພາແມ່ນຂອງຂວັນຈາກທຳມະຊາດ, ທັງແມ່ນໝາກຜົນຂອງປະຊາຊົນທີ່ປະຕິບັດຕາມແນວຄວາມຄິດການພັດທະນາແບບສີຂຽວແລະການສ້າງບ້ານແປງເມືອງໃຫ້ສວຍງາມ. ປີ 2019, ນະຄອນຊີ່ນິງສະເໜີວ່າຈະອອກແຮງປະຕິບັດ 8 ໂຄງການໃຫຍ່ເພື່ອ “ສ້າງນະຄອນຊີ່ນິງໃຫ້ເປັນເມືອງທີ່ມີຄວາມຜາສຸກ·ແລະມີຊີວິດຄຸນນະພາບສູງ”, ໃນນັ້ນມີໂຄງການໜຶ່ງກໍແມ່ນການປະຕິບັດໂຄງການເພີ່ມຄວາມຂຽວແລະຄຸນນະພາບໃຫ້ຕົວເມືອງທີ່ເປັນສວນດອກໄມ້. ພາຍຫຼັງປະຕິບັດໂຄງການດັ່ງກ່າວຕະຫຼອດມາ, ນະຄອນຊີ່ນິງສາມາດເພີ່ມເນື້ອທີ່ສີຂຽວໄດ້ 83 ເຮັກຕາ, ໄດ້ເພີ່ມພື້ນທີ່ສີຂຽວໃຫ້ຖະໜົນໄດ້ 18 ແຫ່ງ, ສ້າງຖະໜົນດອກໄມ້, ຂົວດອກໄມ້ແລະທັດສະນິຍະພາບດອກໄມ້ 90 ແຫ່ງ, ສ້າງຖະໜົນທີ່ມີດອກໄມ້ສົດ 13 ແຫ່ງແລະກຳແພງອກໄມ້ 11 ແຫ່ງ, ລວມແລ້ວໄດ້ປູກດອກໄມ້ຊະນິດຕ່າງໆເຖິງ 5,385 ລ້ານຕົ້ນ.
ເມື່ອຂັບລົດຈາກທາງດ່ວນສະໜາມບິນເຂົ້າສູ່ຕົວເມືອງ, ຈະເຫັນວ່າຢູ່ຕາມແຄມທາງໄດ້ປູກດອກໄມ້ຊະນິດຕ່າງໆ, ໃນຍາມທີ່ເກີດມີສະພາບລົດຕິດໃນໄລຍະພັກວັນກຳມະກອນສາກົນເມື່ອເອົາແວ່ນລົດລົງກໍຈະສາມາດໄດ້ກິ່ນຫອມດອກໄມ້. ຢູ່ເທິງເຈີ້ຍພູແຄມທາງດ່ວນສາມາດເຫັນດອກຈັກກະວານ, ດອກຕາເວັນແລະດອກອື່ນໆເໜັງຕີງອຽງເອນໄປຕາມກະແສລົມ.
ກິ່ນຫອມຂອງດອກໄມ້ຜັດໂຊຍໄປທົ່ວເມືອງ, ແມ່ນຂອງຂວັນດີທີ່ສຸດທີ່ມອບໃຫ້ແກ່ຜູ້ກໍ່ສ້າງຕົວເມືອງສວນດອກໄມ້ແລະຄົນທັງຫຼາຍຜູ້ຜ່ານໄປມາໃນ “ລະດູໜາວ.”
ທ່ານຜູ້ຟັງທີ່ຮັກແພງ, ລາຍການທີ່ທ່ານກຳລັງຮັບຟັງຢູ່ນີ້ແມ່ນລາຍການ “ເປີດປະຕູສູ່ເມືອງຈີນ” ຂອງ CRI-FM93Mhz, ດວງພະຈັນໄດ້ແນະນຳເລື່ອງກ່ຽວກັບເຟືອງກາຍເປັນສິ່ງທີ່ໄດ້ຮັບຄວາມນິຍົມຈາກຄົນທັງຫຼາຍ, ແລະເລື່ອງກ່ຽວກັບດອກໄມ້ຢູ່ນະຄອນຊີ່ນິງແລ້ວ, ຕໍ່ໄປດວງພະຈັນຈະແນະນຳການປ່ຽນແປງຂອງດິນທາມໃນອ່າວສວນເໝີນນະຄອນຢີ້ຫວນແຂວງເຈີ້ຈ່ຽງ.
ຈາກຫາດແຄມທະເລທີ່ຮົກເຮື້ອກາຍເປັນ “ບ້ານຂອງນົກຍ້າຍຖິ່ນ”
ຂຶ້ນຈຸດຊົມວີວເບິ່ງທຳມະຊາດຂອງສວນດິນທາມແຫ່ງຊາດອ່າວສວນເໝີນນະຄອນຢີ້ຫວນແຂວງເຈີ້ຈ່ຽງ, ສາມາດເບິ່ງເຫັນອ່າວທະເລທີ່ນ້ຳທະເລສີຟ້າຖືກໂຍກຍູ້ເປັນຄື້ນຟອງໄປເມືອນໆ, ພືດທຳມະຊາດສີຂຽວແລະຝູງນົກບິນເຈີດໄປມາຢ່າງຫຼວງຫຼາຍ. ນັກທ່ອງທ່ຽວມາຈາກນະຄອນຫາງໂຈ່ວກ່າວວ່າ: “ຄືວ່າເທື່ອນີ້ໄດ້ມາທ່ຽວຫຼິ້ນຢູ່ສວນດອກໄມ້ເທິງທະເລ.”
ບ່ອນນີ້ເຄີຍເປັນຫາດແຄມທະເລທີ່ຮົກເຮື້ອ. ທ່ານຊູ່ຮວນ ຫົວໜ້າຄະນະກຳມະການຄຸ້ມຄອງ ເຂດພັດທະນາເສດຖະກິດຢີ້ຫວນກ່າວວ່າ: “ໃນຫຼາຍສິບປີຜ່ານມາ, ຄົນທັງຫຼາຍໄດ້ປ່ຽນແປງສິ່ງແວດລ້ອມບ່ອນຢູ່ອາໄສດ້ວຍມືຂອງຕົນ.”
ການພັດທະນາແບບບໍ່ເປັນທີ່ເປັນທາງໃນເມື່ອກ່ອນໄດ້ເຮັດໃຫ້ສິ່ງແວດລ້ອມທຳມະຊາດຖືກທຳລາຍ, ເພື່ອປ່ຽນແປງສະພາບການດັ່ງກ່າວ, ສວນດິນທາມແຫ່ງຊາດອ່າວສວນເໝີນໄດ້ຮັບການອະນຸຍາດໃຫ້ສ້າງຕັ້ງຂຶ້ນເມື່ອປີ 2011, ໄດ້ເລັ່ງລັດການຄົ້ນຄວ້າເພື່ອຊອກຫາວິທີນຳໃຊ້ທັງສາມາດອະນຸລັກດິນທາມ. ແລະເລີ່ມນຳໃຊ້ວິທີແກ້ໄຂທີ່ຊ່ວຍໃຫ້ດິນທາມສາມາດຟື້ນຟູລະບົບນິເວດໄດ້ດັ້ງເດີມ.
ໃນຫຼາຍປີມານີ້, ໂດຍອີງໃສ່ແຜນການເຄື່ອນໄຫວຕ່າງໆເຊັ່ນ: “ໂຄງການສ້າງບ້ານແບບຢ່າງພັນບ້ານແລະປັບປຸງໝື່ນບ້ານ”, “ປັບປຸງແມ່ນ້ຳ 5 ສາຍຮ່ວມກັນ” ແລະການເຄື່ອນໄຫວສ້າງຄວາມສະອາດໃຫ້ບ້ານເຮືອນແລະອື່ນໆ, ວິສາຫະກິດ 102 ແຫ່ງໃນນະຄອນຍີ້ຫວນໄດ້ຮັບການປັບປຸງ, ໄດ້ບັນລຸເປົ້າໝາຍບໍ່ລະບາຍນ້ຳເປື້ອນຈາກການຜະລິດໂດຍກົງ. ທ່ານຊູຮ່ວນກ່າວວ່າ: “ພວກເຮົາຕັ້ງໜ້າຊຸກຍູ້ມາດຕະການຕ່າງໆເຊັ່ນ: ຖອນບ່ອນລ້ຽງປາໃຫ້ກັບກາຍເປັນໜອງທຳມະຊາດຄືນໃໝ່, ປັບປ່ຽນອ່າງນ້ຳໃຫ້ກາຍເປັນດິນທາມຄືນໃໝ່, ຂຸດຂີ້ຕົມທີ່ອັດຕັນຊ່ອງທາງນ້ຳໄຫຼ, ແລະສ້າງຕາຝັ່ງຄືນໃໝ່, ເຮັດໃຫ້ດິນທາມແຫ່ງນີ້ກາຍເປັນແດນສະຫວັນຂອງສັດແລະພືດ.”
ຫວ່າງມໍ່ໆມານີ້, ທ່ານຈ້າວຫົງ ຫົວໜ້າຫ້ອງການຄຸ້ມຄອງສວນດິນທາມມີວຽກງານຫຼາຍທີ່ສຸດ, ທ່ານກ່າວວ່າ: “ພວກເຮົາກຳລັງວາງ ‘ແຜນການໃໝ່ເພື່ອຕ້ອນຮັບແຂກທີ່ມາຈາກທາງໄກກໍຄືນົກຍ້າຍຖິ່ນຫັ້ນແຫຼະ.”
ໃນຖານະເປັນສະຖານທີ່ພັກຜ່ອນຕາມເສັ້ນທາງອົບພະຍົບຂອງນົກຈາກອາຊີຕາເວັນອອກຫາອົສຕຼາລີເຊິ່ງ, ມີນົກຍ້າຍຖິ່ນຫຼາຍສິບພັນໂຕໄດ້ແວ່ຜັກຜ່ອນຢູ່ອ່າວສວນເໝີນໃນແຕ່ລະປີ. ປີ 2017, ນະຄອນຢີ້ຫວນເລີ່ມປະຕິບັດໂຄງການ “ປັບປຸງເຂດທີ່ຢູ່ອາໄສຂອງນົກນ້ຳ” ຢູ່ໃຈກາງເຂດອະນຸລັກ, ໂດຍຜ່ານການສ້າງສະພາບແວດລ້ອມສຳລັບການດຳລົງຊີວິດຂອງນົກ, ສ້າງແລວນ້ຳໄຫຼຜ່ານທີ່ຢູ່ອາໄສຂອງນົກ, ສ້າງແລວທາງຜ່ານທີ່ບໍ່ເປີດເຜີຍຂອງນົກແລະອື່ນໆ, ຍົກສູງຄຸນນະພາບສະພາບແວດລ້ອມນິເວດທີ່ຢູ່ອາໄສຂອງນົກ.
“ໂຄງການໃໝ່ເລີ່ມປະຕິບັດໃນທ້າຍເດືອນພຶດສະພາ, ຈະສ້າງສິ່ງແວດລ້ອມໃຫ້ດີກວ່າເກົ່າເພື່ອໃຫ້ນົກໄດ້ຢູ່ອາໄສ, ປົກປັກຮັກສາຊີວະນາໆພັນ.” ທ່ານຈ້າວຫົງ ກ່າວວ່າ.
ນິເວດທີ່ເໝາະກັບການຢູ່ອາໄສໄດ້ດຶງດູດນົກຢ່າງຫຼວງຫຼາຍ. ນົກທີ່ສັງເກດໄດ້ຢູ່ເຂດດິນທາມ, ຈາກ 125 ຊະນິດເມື່ອປີ 2011 ເພີ່ມຂຶ້ນເປັນ 186 ຊະນິດໃນປີນີ້, ໃນນັ້ນມີນົກສະຫງວນລະດັບແຂວງ 31 ຊະນິດ.
ດິນທາມແບບທຳມະຊາດໄດ້ກາຍເປັນຊັບພະຍາກອນທ່ອງທ່ຽວ, ປະຊາຊົນທ້ອງຖິ່ນມີຄວາມຮູ້ສຶກຢ່າງດູດດື່ມຫຼາຍ. ລຸງເສີນ, ຜູ້ຂັບເຮືອທ່ອງທ່ຽວອາຍຸ 68 ປີກ່າວວ່າ: “ຂ້ອຍໄດ້ອາໄສຢູ່ບໍລິເວນອ່າວສວນເໝີນມາຕັ້ງແຕ່ນ້ອຍຈົນເຖິງປັດຈຸບັນ, ໄດ້ເປັນພະຍານໃຫ້ແກ່ການປ່ຽນແປງຂອງບໍລິເວນນີ້. ປັດຈຸບັນມີນັກທ່ອງທ່ຽວເພີ່ມຂຶ້ນຢ່າງຫຼວງຫຼາຍ, ບາງມື້ຂ້ອຍຕ້ອງຂັບເຮືອ 12 ຖ້ຽວ, ເຖິງວ່າວຽກງານຫຍຸ້ງຫຼາຍແຕ່ຂ້ອຍກໍຮູ້ສຶກດີໃຈຫຼາຍ!” ໃນເຮືອຂອງລຸງເສີນມີບັນຍາກາດຂອງຄວາມມວນຊື່ນຢ່າງເຕັມທີ່, ເຮັດໃຫ້ລຸງຮູ້ສຶກມີຄວາມສຸກຫຼາຍ.
ຜົນປະໂຫຍດຈາກການພັດທະນາແບບສີຂຽວພວມເພີ່ມຂຶ້ນຢ່າງບໍ່ຢຸດຢັ້ງ. ເລີ່ມແຕ່ປີ 2018 ຮອດປັດຈຸບັນ, ນັກທ່ອງທ່ຽວໄປທ່ຽວອ່າວສວນເໝີນຫຼາຍກວ່າ 1.3 ລ້ານເທື່ອຄົນ, ສ້າງລາຍຮັບໂດຍລວມໄດ້ປະມານ 25 ລ້ານຢວນ. ສ່ວນນະຄອນຢີ້ຫວນໃໝ່ທີ່ຕັ້ງຢູ່ຝັ່ງກົງກັນຂ້າມຂອງສວນດິນທາມ, ໂດຍອາໄສ “ອານິສົງ” ທີ່ມີສະພາບແວດລ້ອມນິເວດທີ່ດີກໍໄດ້ດຶງດູດນັກທຸລະກິດມາດຳເນີນທຸລະກິດນັບມື້ນັບຫຼາຍຂຶ້ນ.
ນະຄອນເຊີນເຈິ້ນໄດ້ປັບປຸງແຫຼ່ງນ້ຳຢ່າງສະຫຼາດ, ຮ່ວມກັນສ້າງຂີດໝາຍທີ່ສຳຄັນໃນການແກ້ໄຂບັນຫາມົນລະພິດ
ແມ່ນ້ຳຜິງຊ່ານຕັ້ງຢູ່ພາກຕາເວັນອອກຂອງເຂດພັດທະນາກວາງຕຸ້ງ-ຮົງກົງ-ມາກາວ, ໄຫຼຜ່ານເຂດຜີງຊ່ານນະຄອນເຊີນເຈິ້ນ, ແມ່ນຍ່ານເໜືອຂອງແມ່ນ້ຳຕົ່ງຈ່ຽງ. ໃນຖານະເປັນເຂດອຸດສາຫະກຳສຳຄັນຂອງນະຄອນເຊີນເຈິ້ນ, ເຂດຜິງຊ່ານກໍເຄີຍມີບັນຫາມົນລະພິດຍ່າງໜັກໜ່ວງໃນເວລາທີ່ເສດຖະກິດພັດທະນາຢ່າງວ່ອງໄວ, ບັນຫາມົນລະພິດທາງນ້ຳນັບຊຸດໂຊມ.
ປີ 2016, ເຂດຜິງຊ່ານນະຄອນເຊີນເຈີ້ນໄດ້ເລີ່ມບັ້ນຮົບ “ປ້ອງກັນແລະແກ້ໄຂບັນຫາມົນລະພິດທາງນ້ຳ” ທີ່ບໍ່ມີສຽງປື້ນແຕກ.
ການແກ້ໄຂບັນຫາມົນລະພິດທາງນ້ຳຂອງເຂດຜິງຊ່ານໄດ້ປະຖິ້ມແຜນການແບບເກົ່າ, ໄດ້ປະດິດສ້າງໃໝ່ແລະສະເໜີແນວຄວາມຄິດຂອງການອອກແບບໃໝ່ຊຸດໜຶ່ງ “ເພື່ອກັກເກັບນ້ຳເປື້ອນຢ່າງຖືກຕ້ອງຕາມເປົ້າໝາຍ, ສະສົມແລະຊຳລະນ້ຳເປື້ອນຢູ່ຫຼາຍບ່ອນ, ການຜະລິດຄືນແລະນຳໃຊ້ນ້ຳທີ່ໄດ້ຮັບການຊຳລະຕາມສະຖານທີ່ໃກ້ຄຽງ”.
ການກັກເກັບນ້ຳເປື້ອນຢ່າງຖືກຕ້ອງຕາມເປົ້າໝາຍໄດ້ສະເໜີອອກເປັນຄັ້ງທຳອິດໃນໂຄງການບົວລະບັດຮັກສາແມ່ນ້ຳຜີງຊ່ານ, ແລະໄດ້ຮັບຄວາມເຫັນດີເຫັນພ້ອມຈາກວົງການທີ່ກ່ຽວຂ້ອງ. ທ່ານມາຢົງຈື້ ຜູ້ຮັບຜິດຊອບບໍລິສັດອະນຸລັກສິ່ງແວດລ້ອມທາງນ້ຳຈົ່ງຈ້ຽນຈຳກັດສາຂາພາກໃຕ້ຂອງຈີນເຊິ່ງເປັນຝ່າຍຮັບເໝົາກໍ່ສ້າງໂຄງການກ່າວວ່າ: ໂດຍຜ່ານການສ້າງອ່າງກັກເກັບນ້ຳເປື້ອນອັດສະລິຍະ, ສາມາດກັກເກັບນ້ຳຝົນໄລຍະຕົ້ນທີ່ມີນ້ຳເປື້ອນບົນຢູ່ກັນຢ່າງຫຼວງຫຼາຍ, ໃນເວລາເຄື່ອງວັດແທກຄຸນນະພາບນ້ຳກວດພົບເຫັນລະດັບຄວາມເຂັ້ມຂຸ້ນຂອງນ້ຳເປື້ອນຕ່ຳກວ່າຄ່າທີ່ຕັ້ງໄວ້, ອ່າງກັກເກັບນ້ຳເປື້ອນກໍຈະປິດລົງໂດຍອັດຕະໂນມັດ, ຫຼັງຈາກນັ້ນນ້ຳຝົນທີ່ບໍ່ມີນ້ຳເປື້ອນປົນຢູ່ນ້ຳແລະສະອາດກໍສາມາດໄຫຼລົງສູ່ແມ່ນ້ຳ, ການເຮັດແບບນີ້ທັງສາມາດຍົກສູງສະມັດຕະພາບການຊຳລະນ້ຳເປື້ອນ, ທັງສາມາດເພີ່ມປະລິມານນ້ຳທາງນິເວດໃຫ້ແມ່ນ້ຳ.
ທ່ານມາຢຸງຈື້ກ່າວວ່າ: ໃນໂຄງການບົວລະບັດຮັກສາແມ່ນ້ຳຜິງຊ່ານ, ໄດ້ປະຕິບັດໂຄງການກັກເກັບນ້ຳຢູ່ຫຼາຍບ່ອນ, ພວກເຮົາໄດ້ສ້າງອ່າງກັກເກັບນ້ຳ 7 ແຫ່ງຢູ່ຕາມແມ່ນ້ຳແລະປາກນ້ຳສາຂາແມ່ນ້ຳ, ການເຮັດແບບນີ້ດ້ານໜຶ່ງແມ່ນສາມາດປັບປະລິມານນ້ຳເປື້ອນໃນສາຂາແມ່ນ້ຳ, ຫຼຸດແຮງກົດດັນໃຫ້ສະຖານທີ່ບຳບັດນ້ຳເປື້ອນທີ່ຢູ່ຍ່ານໃຕ້, ອີກດ້ານໜຶ່ງແມ່ນສາມາດຫຼຸດການນຳໃຊ້ທີ່ດິນແລະປະຢັດການລົງທຶນ.
ໃນໂຄງການບົວລະບັດຮັກສາແມ່ນ້ຳຜິງຊ່ານ, ຢູ່ຍ່ານເໜືອແລະຍ່ານກາງຕ່າງໄດ້ສ້າງສະຖານີບຳບັດນ້ຳເປື້ອນ, ປະສົມປະສານກັບສະຖານີບຳລັດນ້ຳເປື້ອນທີ່ຕັ້ງຢູ່ຍ່ານໃຕ້ໄດ້ສ້າງສະພາບການທີ່ດຸນດ່ຽງ, ນ້ຳເປື້ອນທີ່ໄດ້ກັກເກັບໄວ້ຈະຖືກສົ່ງໄປໃຫ້ສະຖານີບຳບັດນ້ຳເປື້ອນທີ່ຢູ່ໃກ້ທີ່ສຸດເພື່ອບຳບັດໃຫ້ເປັນນ້ຳສະອາດ, ຫຼີກເວັ້ນບໍ່ໃຫ້ບຳບັດນ້ຳເປື້ອນຮ່ວມກັນຢູ່ດ້ານລຸ່ມຂອງແມ່ນ້ຳ, ເພື່ອຫຼຸດແຮງກົດດັນໃຫ້ສະຖານີບຳບັດນ້ຳເປື້ອທີ່ຢູ່ຍ່ານໃຕ້.
ພ້ອມກັນນັ້ນ, ຢູ່ຕາມແຄມຝັ່ງແມ່ນ້ຳຜີງຊ່ານຍັງໄດ້ສ້າງດິນທາມທຽມ 8 ແຫ່ງ, ນ້ຳເປື້ອນທີ່ບຳບັດໂດຍສະຖານີບຳບັດນ້ຳເປື້ອນແລະບຳບັດຕື່ມຢູ່ດິນທາມທຽມ, ໃຫ້ໄດ້ຕາມມາດຕະຖານແລ້ວກໍເທລົງສູ່ແມ່ນ້ຳ, ເພື່ອເພີ່ມປະລິມານນ້ຳໃນແມ່ນ້ຳແລະປັບປຸງລະບົບນິເວດ, ຫຼີກເວັ້ນບໍ່ໃຫ້ສົ່ງນ້ຳຕອນລ່າງຂຶ້ນໄປຍ່ານເໜືອ, ໄດ້ປະຢັດພະລັງງານແລະການລົງທຶນ.
ທ່ານຫວາງຮ້າວ, ສະມາຊິກສະຖາບັນວິສະວະກຳແຫ່ງຊາດຈີນກ່າວວ່າ: “ການປະດິດສ້າງໃໝ່ຫຼາຍຢ່າງໃນດ້ານເຕັກນິກແລະແນວຄວາມຄິດເພື່ອປັບປຸງເຂດລ້ອງແມ່ນ້ຳ, ເຮັດໃຫ້ໂຄງການປັບປຸງແມ່ນ້ຳຜີງຊ່ານໄດ້ຢືນຢູ່ແຖວໜ້າຂອງທົ່ວປະເທດ.” ທ່ານກ່າວວ່າ: ແນວຄວາມຄິດການບົວລະບັກຮັກສາແມ່ນ້ຳຜີງຊ່ນໄດ້ສ້າງຮູບແບບໃໝ່ໃນດ້ານການບົວລະບັດຮັກສາແມ່ນ້ຳແບບສັງລວມ, ໄດ້ບັນລຸຫຼາຍເປົ້າໝາຍເຊັ່ນ: ລ່ວງຄອງເໝືອງປັບປຸງຄຸນນະພາບນ້ຳ, ຟື້ນຟູນິເວດ, ລະບາຍນ້ຳແລະປ້ອງກັຫນນ້ຳຖ້ວມ, ສ້າງສະຖານທີ່ທ່ອງທ່ຽວແລະອື່ນໆ, ມີຄວາມໝາຍສຳຄັນທີ່ເປັນຂີດໝາຍໃນຂົງເຂດປັບປຸງເຂດລ້ອງແມ່ນ້ຳໃນທົ່ວປະເທດ.
ຂ່າວແຈ້ງວ່າ, ໂຄງການບົວລະບັດຮັກສາແມ່ນ້ຳຜີງຊ່ານທີ່ມີລະດັບການອອກແບບຂັ້ນສູງນັ້ນ, ແມ່ນໜຶ່ງໃນໂຄງການສຳຄັນຂອງແຜນການປະຕິບັດງານເພື່ອລ່ວງຄອງເໝືອງແລະຍົກສູງຄຸນນະພາບນ້ຳຂອງນະຄອນເຊີນເຈິ້ນ, ທັງເປັນໂຄງການປັບປຸງນິເວດໃນທົ່ວເຂດລ້ອງແມ່ນ້ຳຂະໜາດໃຫຍ່ແຫ່ງທຳອິດຂອງປະເທດຈີນທີ່ຖືເອົາການມອບຮັບຄຸນນະພາບນ້ຳທີ່ເປັນຂັ້ນເປັນຕອນແລະຕ້ອງໄດ້ຕາມມາດຕະຖານ, ມາດຕະຖານການອອກແບບສາມາດປ້ອງກັນນ້ຳຖ້ວມຂະໜາດໃຫຍ່ທີ່ຮ້ອຍປີຈຶ່ງອາດຈະເກີດຂຶ້ນເທື່ອໜຶ່ງ.
ຢູ່ເຂດລ້ອງແມ່ນ້ຳຜີງຊ່ານ, ມີລະບົບຕິດຕາມສາມາມິຕິຄືຈາກທາງນ້ຳ, ທາງບົກແລະທາງອາກາດກຳລັງເຝົ້າຮັກສາຄວາມປອດໄພດ້ານຄຸນນະພາບຂອງທົ່ວລ້ອງແມ່ນ້ຳຢູ່ທຸກເວລາ.
ທ່ານເສີນຊົງ ຜູ້ຮັບຜິດຊອບເຕັກນິກການອອກແບບຂອງບໍລິສັດອະນຸລັກສິ່ງແວດລ້ອມທາງນ້ຳຈົ່ງຈ້ຽນຈຳກັດສາຂາພາກໃຕ້ຂອງຈີນກ່າວວ່າ: ສາຂາແມ່ນ້ຳສຳຄັນ, ບ່ອນຕິດຈອດກັນ, ປາກແມ່ນ້ຳໄຫຼເຊື່ອມຈອດກັນແລະອື່ນໆຂອງແມ່ນ້ຳຜີງຊ່ານໄດ້ສ້າງຈຸດຕິດຕາມວັດແທກ 58 ແຫ່ງ, ເພື່ອຕິດຕາມວັດແທກຕໍ່ການປ່ຽນແປງດ້ານປະລິມານນ້ຳແລະຄຸນນະພາບນ້ຳຕາມສະພາບການປ່ຽນແປງຕົວຈິງ. ນອກນັ້ນ, ເຮືອບິນທີ່ບໍ່ມີຄົນຂັບກໍໄດ້ເຂົ້າປະຈຳການທີ່ເປັນນັກສັງເກດການທາງອາກາດເພື່ອລາດຕະເວນແລະປ້ອງກັນແມ່ນ້ຳດ້ວຍວິທະຍາສາດເຕັກນິກ. ຕິດຕາມຄວບຄຸມທາງອາກາດຕໍ່ການປ່ຽນແປງຢ່າງຜິດປົກກະຕິຂອງນ້ຳ, ສິ່ງທີ່ຟູຢູ່ເທິງນ້ຳ, ການລະບາຍນ້ຳເປື້ອນໂດຍກົງ, ການລ່ວງລ້ຳບຽດຍຶດເອົາສາຍນ້ຳແລະການລ້ຽງປາທີ່ຜິດກົດໝາຍຢ່າງທັນເວລາ.
ຕົວເລກຕິດຕາມຂອງ “ຜູ້ລາດຕະເວນທາງນ້ຳ, ທາງບົກແລະທາງອາກາດ” ທັງໝົດຈະຖືກສົ່ງໃຫ້ “ສູນຕິດຕາມລວມ” ທີ່ຕັ້ງຢູ່ຍ່ານກາງແມ່ນ້ຳຜີງຊ່ານໄດ້ທັນເວລາເພື່ອຄວບຄຸມທາງໄກແບບອັດຕະໂນມັດ. ທ່ານເສີນຊົງ ກ່າວວ່າ: “ຖ້າວ່າພົບພໍ້ສະພາບການຜິດປົກກະຕິ, ລະບົບດັ່ງກ່າວຈະເຕືອນໄພໂດຍອັດຕະໂນມັດ, ແລະປະຕິບັດມາດຕະການແກ້ໄຂທີ່ກຳນົດໄວ້ລ່ວງໜ້າດ້ວຍຕົນເອງ, ບໍ່ຈຳເປັນຕ້ອງໃຊ້ຄົນ.”
ຜູ້ຮັບຜິດຊອບທີ່ກ່ຽວຂ້ອງຫ້ອງການວຽກງານດ້ານນ້ຳເຂດຜີງຊ່ານກ່າວວ່າ: “ໂດຍຜ່ານເຊີບເວີອິນເຕີເນັດກໍສາມາດສົ່ງຂໍ້ມູນຫຼືສັນຍານເຕືອນໄພໃຫ້ລະບົບຕິດຕາມຄຸ້ມຄອງທາງຄອມພິວເຕີແລະທາງໂທລະສັບມືຖືໄດ້ຢ່າງຕໍ່ເນື່ອງຕະຫຼອດ 24 ຊົ່ວໂມງ, ພວກເຮົາໄດ້ບັນລຸການປະສານສົມທົບລະຫວ່າງ ‘ເຕັກນິກກັບຜູ້ລາດຕະເວນ’, ເຮັດໃຫ້ການປັບປຸງແລະລາດຕະເວນສາມາດກວດເອົາທົ່ວເຂດລ້ອງແມ່ນ້ຳ, ບໍ່ມີບ່ອນໃດເຫຼືອຄ້າງ, ການແກ້ໄຂບັນຫາສິ່ງແວດລ້ອມທາງນ້ຳສາມາດເວົ້າໄດ້ວ່າໄດ້ຮັບຜົນສຳເລັດໃນເບື້ອງຕົ້ນແລ້ວ.”
ພາຍໃຕ້ການປົກປັກຮັກສາຂອງທົ່ວປວງຊົນ, ແມ່ນ້ຳຜີງຊ່ານໄດ້ປະກົດເຫັນພາບສວຍງາມທີ່ມີນ້ຳໃສສະອາດແລະມີນົກອາໄສຢູ່ຢ່າງຫຼວງຫຼາຍຄືເມື່ອກ່ອນອີກ. ການປະດິດສ້າງໃໝ່ຮ່ວມກັນດ້ານແນວຄວາມຄິດ, ເຕັກນິກແລະກົນໄກໃນການບົວລະບັດຮັກສາແມ່ນ້ຳ, ບໍ່ພຽງແຕ່ໄດ້ຟື້ນຟູລະບົບນິເວດທີ່ໝູນວຽນດີຂອງແມ່ນ້ຳໃນເມື່ອກ່ອນ, ສິ່ງທີ່ສຳຄັນກວ່ານັ້ນກໍຄື, ແລວທາງນິເວດຂອງແມ່ນ້ຳຜິງຊ່ານໄດ້ປ່ຽນໂສມໜ້າໃໝ່, ເຊິ່ງເປັນການສ້າງພື້ນທີ່ການດຳລົງຊີວິດພາຍໃນຕົວເມືອງທີ່ມີພູແລະນ້ຳເຊື່ອມຈອດກັນ.
ທີ່ນີ້ວິທະຍຸສາກົນແຫ່ງປະເທດຈີນ! ທ່ານຜູ້ຟັງທີ່ຮັກແພງ, ໃນລາຍການ “ເປີດປະຕູສູ່ເມືອງຈີນ” ມື້ນີ້, ດວງພະຈັນໄດ້ແນະນຳເລື່ອງກ່ຽວການອະນຸລັກສິ່ງແວດລ້ອມແລະການປ່ຽນແປງຂອງສະພາບແວດລ້ອມຂອງຈີນ. ເລື່ອງເຫຼົ່ານີ້ໄດ້ເຮັດໃຫ້ທ່ານຮູ້ສຶກປະທັບໃຈບໍ່? ຍິນດີຕ້ອນຮັບທ່ານຕິດຕໍ່ພົວພັນກັບພວກເຮົາ, ທ່ານສາມາດເຂົ້າເບິ່ງເວັບໄຊຂອງພວກເຮົາຄື: laos.cri.cn, ຫຼືຕິດຕາມ FB ຂອງພວກເຮົາຄື: CRI-FM93, ທ່ານຍັງສາມາດສົ່ງ E-mail ເຖິງພວກເຮົາຕາມທີ່ຢູ່ laos@cri.com.cn, ຂອບໃຈທີ່ທ່ານໃຫ້ຄວາມສົນໃຈຮັບຟັງລາຍການຂອງພວກເຮົາ, ພົບກັນໃໝ່ໃນອາທິດໜ້າ, ສະບາຍດີ.
ຄຳເຫັນ
0