ທ່ານ​ຜູ້​ຟັງ, ເມືອງ​​ປົກ​ຄອງ​ຕົນ​ເອງ​ບັນ​ດາ​ຊົນ​ເຜົ່າລົງ​ເຊິ້ງ​ເຂດ​ປົກ​ຄອງ​ຕົນ​ເອງ​ເຜົ່າ​ຈ້ວງກວາງ​ຊີ​ຕັ້ງ​ຢູ່​ເຂດ​ພູ​ດອຍ, ​ເອີ້ນ​ວ່າ​ເປັນ​ພື້ນ​ທີ່​ທີ່​ມີ​ພູ 90%, ນ້ຳ 5% ແລະ ດິນນາ 5%, “ນາ​ຂັ້ນ​ໄດ​ລົງ​ເຊິ້ງ” ທີ່​ມີ​ຊື່​ສຽງ​ກໍ​ແມ່ນ​ຕັ້ງ​ຢູ່​ໃນ​ເມືອງ​ລົງ​ເຊິ້ງ​​ແຫ່ງນີ້​ ເຊິ່ງ​ໄດ້​ດຶງ​ດູດ​ນັກ​ທ່ອງ​ທ່ຽວ​ທັງ​ພາຍ​ໃນ​ແລະ​ຕ່າງ​ປະ​ເທດ​ເຂົ້າ​ມາ​ທ່ອງ​ທ່ຽວ​ເປັນ​ຈຳ​ນວນຫຼວງຫຼາຍ. ແຕ່​ບັນ​ດາ​ທ່ານ​ອາດ​ຈະ​ບໍ່​ຮູ້​ວ່າ: ເມືອງ​ລົງ​ເຊິ້ງ​ເຄີຍ​ເປັນ​ເມືອງ​ທຸກ​ຍາກ​ລະ​ດັບ​ຊາດ​ຂອງ​ຈີນ​ມາ​ກ່ອນ.

ຕົວ​ເລກ​ສະ​ຖິ​ຕິ​ສະ​ແດງ​ໃຫ້​ເຫັນ​ວ່າ: ປະ​ຊາ​ກອນ​ຜູ້​ທຸກ​ຍາກ​ຂອງ​ຈີນ​ມີ​ເກືອບ​ເຄິ່ງ​ໜຶ່ງ​ຕົກ​ທຸກ​ໄດ້​ຍາກ​ຍ້ອນ​ເປັນ​ພະ​ຍາດ, ຢູ່​ເມືອງ​ລົງ​ເຊິ້ງ​ກໍ​ເປັນ​ແບບ​ນີ້​ຄື​ກັນ. ທ່ານຫຼີ​ຈື້​ຈຸ່ນ​ແມ່ນ​ຊາວ​ນາ​​ຂອງຕາ​ແສງ​ມາ​ຖີ​ເມືອງ​ລົງ​ເຊິ້ງ, ຄອບ​ຄົວ​ຂອງ​ເພິ່ນ​ມີ 4 ຄົນ, ລູກ​ຊາຍ​ກົກ​​ພວມ​ຮຽນ​ຢູ່​ຊັ້ນ​ມັດ​ທະ​ຍົມ​ປາຍ ແລະ ລູກ​ຊາຍຫຼ້າ​ພວມ​ຮຽນ​ຢູ່​ຊັ້ນ​ປະ​ຖົມ. ຍ້ອນ​ວ່າ​ເປັນ​ຄອບ​ຄົວ​ທຸກ​ຍາກ, ແຕ່​ລະ​ປີ, ລູກ​ສອງ​ຄົນ​ຈະ​ໄດ້​ຮັບ​ເງິນ​ອຸດ​ໜູນ​ການ​​ສຶກ​ສາ​ສຳ​ລັບ​ລູກຫຼານ​ຄອບ​ຄົວ​ທຸກ​ຍາກ 3000 ຢວນ, ສະ​ນັ້ນ, ຄ່າ​ຮຽນ​ຂອງ​ລູກ​ຈະ​ບໍ່​ໄດ້​ສ້າງ​ຄວາມ​​ຫຍຸ້ງ​ຍາກ​ທາງ​ການ​ເງິນ​ໃຫ້​ກັບ​ຄອບ​ຄົວ. ແຕ່​ວ່າ: ​ໃນປີ 2019, ໃນ​ເວ​ລາ​ເຮັດ​ໄຮ່, ທ່ານຫຼີ​ຈື້​ຈຸ່ນ​ໄດ້​​ສະຫຼົບ​ແບບ​ບັງ​ເອີນ, ເມື່ອ​ສົ່ງ​ໄປ​ໂຮງ​ໝໍ​ແລ້ວ, ທ່ານ​ໝໍ​ໄດ້​ບົ່ງ​ມະ​ຕິ​​ວ່າ​ເປັນ​ພະ​ຍາດ​ເສັ້ນ​ເລືອດ​ສະໝອງ​​ຕີບຕັນ, ທຸກ​ມື້, ​ເວ​ລາ​ຕື່ນນອນ​ຂຶ້ນ​ມາ​ກໍ​ມັກ​ວິນ​ຫົວ, ເຮັດ​ໄຮ່​ບໍ່​ໄດ້​ອີກ. ຫຼັງ​ຈາກ​ນັ້ນ​ບໍ່​ດົນ, ເມຍ​ຂອງ​ເພິ່ນ​ກໍ​ເກີດ​ມີ​ອາ​ການ​ຊີ້ນ​ປົ່ງ​ຢູ່​ຕາມ​ແຂນ​ເບື້ອ​ງ​ຊ້າຍ, ກໍ​ເຮັດ​ວຽກໄຮ່​ການ​ນາ​ບໍ່​ໄດ້​ອີກ​ຄື​ກັນ. ສະ​ພາບ​​ພະ​ຍາດ​ທີ່​ເກີດ​ຂຶ້ນ​ກະ​ທັນ​ຫັນ​ໄດ້​ເຮັດ​ໃຫ້​ຄອບ​ຄົວ​ທຸກ​ຍາກ​ດັ່ງ​ກ່າວ​ເກືອບ​ທົນ​ຕໍ່​ຊີ​ວິດ​ລຳ​ບາກ​ນີ້​ບໍ່​ໄດ້.

ທ່ານ​ຫຼີ​ຈື້​ຈຸ່ນ​ກ່າວ​ວ່າ: ແຕ່​ກ່ອນ, ​ຕອນ​ທີ່​ສຸ​ຂະ​ພາບ​ແຂງ​ແຮງ​ໄດ້ເຮັດ​ນາ, ລ້ຽງ​ແບ້, ລ້ຽງ​ໄກ່, ລ້ຽງ​ເປັດ, ໄປ​ອອກ​ແຮງ​ງານ​ຢູ່​ໂຮງ​ງານ​ເປັນ​ບາງ​ຄັ້ງ​ຄາວ, ປີ​ໜຶ່ງ, ມີ​ລາຍ​ຮັບຫຼາຍ​ພັນ​ຢວນ​​ບາງ​ເທື່ອຮອດ​ໝື່ນຢວນ, ແຕ່​ຖ້າ​ຢາກ​ປິ່ນ​ປົວ​ພະ​ຍາດ​ແບບ​ນີ້, ລາຍ​ຮັບ​ປີ​ໜຶ່ງ​ຍັງ​ບໍ່​ພໍ​ຄ່າ​​ໃຊ້​ຈ່າຍປິ່ນ​ປົວ, ຂອບ​ໃຈ​ນະ​ໂຍ​ບາຍ 198 ຂອງ​ອຳ​ນາດ​ການ​ປົກ​ຄອງ​ທ້ອງ​ຖິ່ນ, ​ກໍຍ້ອນ​ນະ​ໂຍ​ບາຍ​ນີ້​ໄດ້​ໃຫ້​ຊີ​ວິດ​ໃໝ່ແກ່​ຂ້ອຍ.

ນະ​ໂຍ​ບາຍ 198 ທີ່​ທ່ານຫຼີ​ຈື້​ຈຸ່ນ​ເວົ້າ​ເຖິງ​ນັ້ນ​ກໍ​ແມ່ນ​ວິ​ທີ​ແກ້​ໄຂ​ບັນ​ຫາ​ຕົກ​ທຸກ​ໄດ້​ຍາກ​ຍ້ອນ​ເປັນ​ພະ​ຍາດ​ຂອງ​ເມືອງ​ລົງ​ເຊິ້ງ, 198 ມີ​ຄື​ດັ່ງ​ນີ້: 1 ໝາຍ​ຄວາມ​ວ່າ​ການ​ເງິນ​ເມືອງ​​ຈະຈ່າຍ​ຄ່າ​ປະ​ກັນ​ໄພ​ສຸ​ຂະ​ພາບ​ໃຫ້​ແກ່​ຄອບ​ຄົວ​ທຸ​ກ​ຍາກ 100%, 9 ແມ່ນ​​​ລະ​ບົບ​ປະ​ກັນ​ສຸ​ຂະ​ພາບ​ຈະ​ຈ່າຍ​​ຄ່າ​ປິ່ນ​ປົວ​ໃນ​ເວ​ລາ​ນອນ​ໂຮງ​ໝໍ​ໃຫ້​ຄອບ​ຄົວ​ທຸກ​ຍາກ 90%, 8 ແມ່ນ​​​ລະ​ບົບປະ​ກັນ​​ສຸ​ຂະ​ພາບ​ຈະຈ່າຍ​ຄ່າ​ປິ່ນ​ປົວ​ພະ​ຍາດ​ຊຳ​ເຮື້ອ​ໃຫ້​ຄອບ​ຄົວ​ທຸກ​ຍາກ 80%. ນອກ​​ຈາກນີ້, ຄອບ​ຄົວ​ທຸກ​ຍາກ​ຍັງ​ບໍ່​ຕ້ອງ​ຈ່າຍ​ເງິນ​ມັດ​ຈຳ​ເວ​ລາ​ນອນ​ໂຮງ​ໝໍ, ​ເວ​ລາຈ່າຍ​ເງິນ​ກໍໄດ້​ເງິນ​ຄືນ​ຈາກ​ລະ​ບົບ​​ປະ​ກັນ​ສຸ​ຂະ​ພາບ​ຂອງ​ລັດ​ບາດ​ດຽວ​ເລີຍ.

ພາຍ​ໃຕ້​​ຜົນ​ປະ​ໂຫຍດ​ຈາກ​ນະ​ໂຍ​ບາຍ 198, ຄ່າ​ປິ່ນ​ປົວ​ໝື່ນກວ່າ​ຢວນ​ນັ້ນ, ທ່ານ​ຫຼີ​ຈື້​ຈຸ່ນ​ເອງ​​ໄດ້​ຈ່າຍ​ພຽງຫຼາຍ​ຮ້ອຍຢວນ​ເທົ່າ​ນັ້ນ, ສ່ວນ​​ທີ່ເຫຼືອ​ແມ່ນ​ລະ​ບົບປະ​ກັນ​​ສຸ​ຂະ​ພາບ​ຈ່າຍ​​ໃຫ້. ທ່ານ​ເວີຍ​ຢາງ​ກາວ ​ຜູ້ອຳ​ນວຍ​ການ​ໃຫຍ່ໂຮງ​ໝໍ​ຕາ​ແສງ​ມາ​ຖີ​ເມືອງ​ລົງ​ເຊິ້ງ ທີ່​ເຄີຍ​ບົ່ງ​ມະ​ຕິ​ພະ​ຍາດ​ໃຫ້​ແກ່​ທ່ານຫຼີ​ຈື້​ຈຸ່ນ​ເປັນ​ຄັ້ງ​ທຳ​ອິດ​ກ່າວ​ວ່າ: “ຂໍ​ພຽງ​ແຕ່​ແມ່ນ​ຄອບ​ຄົວ​ທຸກ​ຍາກ​ຢູ່​ຕາ​ແສງ​ເຮົາ​ມາ​ປິ່ນ​ປົວ​ຢູ່​ໂຮງ​ໝໍ​​ພວກເຮົາ, ​ກໍລ້ວນ​ແຕ່​ຈະ​​ໄດ້​ຮັບນະ​ໂຍ​ບາຍ 198. ທຸກ​ເດືອນ​ຈະ​ມີ​ຄົນ​ເຈັບ 500 ຫາ 600 ຄົນ​ມາ​ປິ່ນ​ປົວ​ຢູ່​ໂຮງ​ໝໍ​​ພວກເຮົາ, ໃນ​ນັ້ນ, ຈະ​ມີ​ປະ​ມານ 200 ກວ່າ​ຄົນ​ແມ່ນ​ຄອບ​ຄົວ​ທຸກ​ຍາກ ເຊິ່ງລ້ວນ​ແຕ່​ຈະ​ໄດ້​ຮັບ​ຜົນ​ປະ​ໂຫຍດ​ຈາກ​ນະ​ໂຍ​ບາຍ 198.

ທ່ານ​ເວີຍ​ຢາງ​ກ່າວ​ກ່າວ​ວ່າ: ຍ້ອນ​ວ່າ​ໂຮງ​ໝໍ​ຕາ​ແສງ​ແມ່ນ​ໂຮງ​ໝໍ​ຂັ້ນ​ພື້ນ​ຖານ​ຂອງ​ຈີນ, ເຖິງວ່າ​ຈະ​ມີ​ອຸ​ປະ​ກອນ​ການ​ປິ່ນ​ປົວ​ຕ່າງໆ​ຄົບ​ຊຸດ, ແຕ່ທ່ານ​ໝໍ​ໃນ​ໂຮງ​ໝໍ​ຕາ​ແສງ​ຍັງ​ບໍ່​​ມີ​ຄວາມ​ສາ​ມາດ​ບົ່ງ​ມະ​ຕິ​ອາ​ການ​ພະ​ຍາດ​​ຍາກໆ​ປະ​ເພດ​ຕ່າງໆ​ໄດ້. ສະ​ນັ້ນ, ໂຮງ​ໝໍ​ຕາ​ແສງ​​ຈຳ​ເປັນ​ຕ້ອງ​ສົ່ງ​ຮູບ​ຖ່າຍ CT ​ຂອງ​ຄົນ​ເຈັບໄປ​ໃຫ້​ໂຮງ​ໝໍ​ເມືອງ ຫຼື​ໂຮງ​ໝໍ​ໜານ​ຊີ​ຊານ ທີ່​ເປັນໂຮງ​ໝໍ​ລະ​ດັບ 3A ຂັ້ນ​ແຂວງ ໂດຍ​ຜ່ານ​ລະ​ບົບ​ອິນ​ເຕີ​ເນັດ​ພິ​ເສດ​ຂອງ​ຕົນ, ເພື່ອ​ໃຫ້​ທ່ານ​ໝໍ​ທາງ​ນັ້ນ​ຊ່ວຍ​ບົ່ງ​ມະ​ຕິ​ພະ​ຍາດ​ໃຫ້​ແກ່​ຄົນ​ເຈັບ.

ລະ​ບົບ​ທີ່​ທ່ານ​ເວີຍ​ຢາງ​ກາວ​ແນະ​ນຳ​ນັ້ນກໍ​ແມ່ນ​ສະ​ຫະ​ພັນ​ໂຮງ​ໝໍ​​ເຂດ​ນັ້ນ​ເອງ ​ຄື: ໃນ​ເຂດ​ໜຶ່ງ, ຈະ​ມີ​ການ​ປະ​ສານ​ສົມ​ທົບ​ລະ​ຫວ່າງ​ໂຮງ​ໝໍ​ຂັ້ນ​ຕ່າງໆ, ໃນ​ຖາ​ນະ​ເປັນ​ໂຮງ​ໝໍ​ຫົວ​ຈັກຫຼັກ​ແຫຼ່ງ​​ຂອງ​ສະ​ຫະ​ພັນ​ໂຮງ​ໝໍ​ເຂດ, ​ແຕ່​ລະ​ປີ, ໂຮງ​ໝໍ​ໜາ​ນ​ຊີ​ຊານ​ຂອງ​ນະ​ຄອນ​ກຸ້ຍ​ລິ້ນ​ເຂດກວາງ​ຊີ​ຈະສົ່ງ​ທ່ານ​ໝໍ 2 ຫາ 3 ຄົນ​ໄປ​ປະ​ຈຳ​ການ​ຢູ່​ໂຮງ​ໝໍ​ຂັ້ນ​ເມືອງ ເພື່ອ​ປະ​ສານ​ສົມ​ທົບ​ການ​ບໍ​ລິ​ການ​ປິ່ນ​ປົວ​ຂອງ​ໂຮງ​ໝໍ​ເມືອງ. ​ເຖິງວ່າ​ຊາວ​ບ້ານ​ທັງຫຼາຍ​​ແມ່ນໄປ​ປິ່ນ​ປົວ​ພະ​ຍາດ​ຢູ່​ໂຮງ​ໝໍ​ເມືອງ, ​ກໍ​ຈະແມ່ນ​ທ່​ານ​ໝໍ​ທີ່​ມີ​ລະ​ດັບ​ວິ​ຊາ​ການ​ຂັ້ນ​ແຂວງ​ເປັນ​ຜູ້​ບົ່ງ​ມະ​ຕິ. ທ່ານ​ໂຫ​ສີ​ຢວນ ​ຮອງ​ຜູ້​ອຳ​ນວຍ​ການ​ໃຫຍ່​ໂຮງ​ໝໍ​ປະ​ຊາ​ຊົນ​ເມືອງ​ລົງ​ເຊິ້ງ​ກ່າວ​ວ່າ: ໂຮງ​ໝໍ​ພວກ​ເຮົາ​ໄດ້​ສ້າງ​ສະ​ຫະ​ພັນ​ໂຮງ​ໝໍ​ກັບ​ໂຮງ​ໝໍ​ໜານ​ຊີ​ຊານ ທີ່​ເປັນ​ໂຮງ​ໝໍ​ລະ​ດັບ​ແຂວງ​ໃນ​ປີ 2017, ເມື່ອ​ປີ 2018, ໂຮງ​ໝໍ​ພວກເຮົາ​ໄດ້​ສ້າງ​ສະ​ຫະ​ພັນ​ໂຮງ​ໝໍ​ກັບ​ໂຮງ​ໝໍ​ລະ​ດັບ​ຕາ​ແສງ​ຕື່ມ​ອີກ. ໂດຍ​ຜ່ານ​ການ​ປ​ະ​ຕິ​ບັດ​ມາ​ເປັນ​ເວ​ລາ​ສອງ​ປີ​ປາຍ, ໄດ້​ຮັບ​ຜົນ​ດີຫຼາຍ​ຢ່າງ. ​ເພື່ອແກ້​ໄຂ​ບັນ​ຫາ​​ຄວາມ​ຫຍຸ້ງ​ຍາກ​ໃນ​ການ​ຫາ​ໝໍໃຫ້​ແກ່​ຄອບ​ຄົວ​ທຸກ​ຍາກ​ຢູ່​ເຂດ​ພູ​ດອຍ​ທີ່​ຫ່າງ​ໄກ​ສອກຫຼີກ, ​ພວກ​ເຮົາ​ໄດ້​ສ້າງ​ລະ​ບົບ​ບົ່ງ​ມະ​ຕິ​ພະ​ຍາ​ດ​ລະ​ຫວ່າງໂຮງ​ໝໍ​ຂັ້ນ​ເທິງ​ແລະໂຮງ​ໝໍ​ຂັ້ນ​ລຸ່ມ, ພະ​ຍາ​ຍາມ​ເຮັ​ດ​ໃຫ້​ການ​ປິ່ນ​ປົວ​ພະ​ຍາດ​ທີ່​ມີ​ອາ​ການ​ເບົາ​ແມ່ນ​ຢູ່​ຕາມ​ໂຮງ​ໝໍ​ຕາ​ແສງ, ​ສ່ວນ​ປິ່ນປົວ​ພະ​ຍາດອາ​ການ​ໜັກ​ແມ່ນຢູ່​ໂຮງ​ໝໍ​ເມືອງ, ​ດັ່ງ​ນັ້ນ, ​ຄົນ​ເຈັບ 90% ແມ່ນ​ປິ່ນ​ປົວຢູ່​ໃນ​ໂຮງ​ໝໍ​ເມືອງ​​ກໍ​ພໍ, ບໍ່​ຈຳ​ເປັນ​ຈະ​ໄປ​ປິ່ນ​ປົວ​ຢູ່​ໂຮງ​ໝໍ​ລະ​ດັບ​ແຂວງ.

ເມື່ອ​ເວົ້າ​ເຖິງ​ປະ​ສິດ​ທິ​ຜົນ​​ທາງ​ສັງ​ຄົມຂອງ​ນະ​ໂຍ​ບາຍ 198 ແລະ ສະ​ຫະ​ພັນ​ໂຮງ​ໝໍ​ເຂດ, ທ່ານ​ຕູ້​ເຈິ້ນ​ຈົ່ງ ຮອງ​ຫົວ​ໜ້າ​ຄະ​ນະ​ກຳ​ມະ​ການ​ສາ​ທາ​ລະ​ນະ​ສຸ​ກ​ເຂດ​ປົກ​ຄອງ​ຕົນ​ເອງ​ເຜົ່າ​ຈ້ວງກວາງ​ຊີ​ຈີນ​ກ່າວ​ວ່າ: ເລີ່ມ​ແຕ່​ວັນ​ທີ 1 ມັງ​ກອນ​ປີ 2018 ເປັນ​ຕົ້ນ​ມາ, ທົ່ວ​ເຂດກວາງ​ຊີ​ໄດ້​ປະ​ຕິ​ບັດ​ນະ​ໂຍ​ບາຍ 198 ສຳ​ລັບ​ປະ​ຊາ​ກອນ​ຜູ້​ທຸກ​ຍາກ ເຊິ່ງ​ເຮັດ​ໃຫ້​ປະ​ຊາ​ກອນ​ຜູ້​ທຸກ​ຍາກ​ທີ່​ໄດ້​ລົງ​ທະ​ບຽນ 6,35 ລ້ານ​ຄົນ​ໄດ້​ຊື້​ປະ​ກັ​ນ​​ສຸ​ຂະ​ພາບ​ຂັ້ນ​ພື້ນ​ຖານ 100%, ​​ສະ​ນັ້ນ, ທາງ​ປະ​ກັນ​​ສຸ​ຂະ​ພາບ​ຈິ່ງ​ຕ້ອງ​ຈ່າຍ​ຄ່າ​ນອນ​ໂຮງ​ໝໍ ແລະ ​ຄ່າ​ປິ່ນ​ປົວ​ພະ​ຍາດ​ຊຳ​ເຮື້ອ​ໃຫ້​ແກ່​ປະ​ຊາ​ກອນ​ຜູ້​ທຸກ​ຍາກ​ເຫຼົ່າ​ນີ້​ໃຫ້​ໄດ້ 90% ແລະ 80% ຕາມ​ຂໍ້​ກຳ​ນົດ​ດ້ານ​ປະ​ກັນ​ສຸ​ຂະ​ພາບ ເຊິ່ງ​ໄດ້ຫຼຸດ​ຄ່າ​ປິ່ນ​ປົວ​​ສຳ​ລັບປະ​ຊາ​ກອນ​ຜູ້​ທຸກ​ຍາກ​ໃຫ້​ຕ່ຳ​ລົງ​ໄດ້​ຢ່າງຫຼວງຫຼາຍ, ບັນ​ລຸ​ເປົ້າ​ໝາຍ​ທີ່ເຮັດ​ໃຫ້​ປະ​ຊາ​ກອນ​ຜູ້​ທຸກ​ຍາກ​ສາ​ມາດ​ປິ່​ນ​ປົວ​ພະ​ຍາດ​ໄດ້​ ແລະ ຢູ່​ສະ​ພາບ​ຄວາມ​ຫຍຸ້ງ​ຍາກ​ຄືນ​ອີກ.