ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ວັນທີ 2 ພຶດສະພານີ້, ບໍລິສັດວິທະຍຸກະຈາຍສຽງອັງກິດຫຼື BBC ໄດ້ພິມບົດຄວາມທີ່ພາດຫົວຂໍ້ວ່າ: “ເປັນຫຍັງປະເທດອາຟຣິກາຈຶ່ງສະໜັບສະໜູນຈີນແຕ່ຄັດຄ້ານປະເທດຕາເວັນຕົກກ່ຽວກັບບັນຫາສິດທິມະນຸດ?” ໃນດ້ານໜຶ່ງ, ບົດຄວາມໄດ້ຍອມຮັບວ່າປະເທດຈີນແລະບັນດາປະເທດອາຟຣິກາໄດ້ສ້າງສາຍພົວພັນນຳກັນຢ່າງໃກ້ຊິດເປັນເວລາຫຼາຍສິບປີຜ່ານມາແລ້ວ, ປັດຈຸບັນສອງຝ່າຍຍັງໄດ້ດຳເນີນການຮ່ວມມືໃນຂົງເຂດການລົງທຶນແລະວັກຊີນ, ບົດຄວາມຍັງໄດ້ນຳເອົາທັດສະນະແລະທ່າທີທີ່ຕັ້ງໜ້າຂອງເຈົ້າໜ້າທີ່ການທູດຂອງບັນດາປະເທດອາຟຣິກາຈຳນວນໜຶ່ງມາສະໜັບສະໜູນບົດຄວາມ. ແຕ່ອີກດ້ານໜຶ່ງ, ບົດຄວາມໄດ້ຈົງໃຈສ້າງເລື່ອງດ້ວຍການວິເຄາະໃນເລື່ອງທີ່ຈີນຊ່ວຍເຫຼືອປະເທດອາຟຣິກາສ້າງພື້ນຖານໂຄງລ່າງ, ໃຊ້ຖ້ອຍຄວາມອັນທີ່ເອີ້ນວ່າ: “ກັບດັກໜີ້ສິນ”, “ກົນອຸບາຍ” ເພື່ອໃສ່ຮ້າຍປ້າຍສີປະເທດຈີນຈົນສຸດຄວາມສາມາດຂອງຕົນ.
ແຕ່ວ່າສິ່ງເຫຼົ່ານີ້ລ້ວນແຕ່ແມ່ນການກະກຽມເພື່ອກໍ່ໃຫ້ເກີດຄວາມສົງໃສໃນທີ່ສຸດຄື: ເປັນຫຍັງຈີນ “ມີບັນຫາສິດທິມະນຸດຢ່າງໜັກໜ່ວງ”, ແຕ່ບັນດາປະເທດອາຟຣິກາພັດໃຫ້ການສະໜັບສະໜູນຈີນນັບມື້ນັບຫຼາຍຂຶ້ນ, ຈົນເຖິງຂັ້ນມີຄວາມເຫັນເປັນປໍລະປັກກັບປະເທດຕາເວັນຕົກ?
ອ່ານບົດຄວາມດັ່ງກ່າວແລ້ວ, ເບິ່ງຄືວ່າ BBC ບໍ່ເຂົ້າໃນເລີຍເພາະວ່າໃນທັດສະນະຂອງເຂົານັ້ນ, ປະເທດຈີນເປັນປະເທດໃຊ້ອຳນາດບາດໃຫຍ່ແບບນີ້, ເປັນຫຍັງປະເທດອາຟຣິກາຍັງເຂົ້າຂ້າງຈີນ?
ແຕ່ວ່າພາຍຫຼັງບົດຄວາມດັ່ງກ່າວລົງພິມໄດ້ບໍ່ດົນປານໃດ, BBC ກໍໄດ້ພົບເຫັນຄຳຕອບຈາກຊາວເນັດທັງຫຼາຍ. ເມື່ອໄດ້ເຫັນຄວາມສົງໃສຂອງ BBC ແລ້ວ, ຊາວເນັດທັງຫຼາຍກໍໄດ້ໃຫ້ຄຳຕອບແກ່ BBC ຢ່າງ “ກົງໄປກົງມາ.”
ໃນຂໍ້ຄວາມໜຶ່ງຢູ່ລຸ່ມບົດຄວາມດັ່ງກ່າວທີ່ມີການກົດໄລຫຼາຍທີ່ສຸດ, ຊາວເນັດຜິວດຳຄົນໜຶ່ງໄດ້ພົສຮູບພາບຂາວດຳເກົ່າຫຼາຍໃບ, ຮູບພາບເຫຼົ່ານີ້ໄດ້ບັນທຶກພາບທີ່ປະຊາຊົນອາຟຣິກາຖືກພວກລ່າເມືອງຂຶ້ນອັງກິດລົງໂທດຢ່າງໂຫດຮ້າຍດ້ວຍການຕັດມືໃນຕົ້ນສະຕະວັດທີ 20 ແລະກ່າວວ່າ: “ພາບແຜ່ນດຽວກໍດີກວ່າຄຳອະທິບາຍຫຼາຍເທົ່າ, ຮູບຖ່າຍເຫຼົ່ານີ້ໄດ້ອະທິບາຍແຈ້ງແລ້ວວ່າ: ເປັນຫຍັງປະຊາຊົນອາຟຣິກາຮູ້ສຶກປວດຮາກທີ່ປະເທດຕາເວັນຕົກຂີ້ຄຸຍຂີ້ໂມ້ວ່າປະເທດຕົນເຄົາລົບນັບຖືສິດທິມະນຸດ.”
ນອກນີ້ຍັງມີຊາວເນັດເວົ້າໂດຍກົງວ່າ: “ພວກເຮົາບໍ່ເປັນກັງວົນນຳຄົນຈີນ, ເຂົາເຈົ້າມາດຳເນີນທຸລະກິດຢູ່ອາຟຣິກາ, ຖ້າວ່າພວກເຮົາປະຕິເສດບໍ່ຍອມຮັບຄົນຈີນເຂົາເຈົ້າກໍຈະອອກໄປເອງ. ແຕ່ຖ້າພວກເຮົາປະຕິເສດບໍ່ຍອມຮັບປະເທດຕາເວັນຕົກ, ເຂົາເຈົ້າກໍຈະໃຊ້ວິທີລອບສັງຫານ, ຮຸກຮານແລະໃຊ້ບໍລິສັດຂ້າມຊາດລັກເອົາຊັບພະຍາກອນຂອງພວກເຮົາ.”
ເປັນເວລາດົນນານມາແລ້ວ, ຈີນໄດ້ຕອບໂຕ້ຂ່າວລືແລະການໃສ່ຮ້າຍປ້າຍສີຈີນທີ່ບິດເບືອນຄວາມຈິງແລະບໍ່ໜ້າເຊື່ອຖືທີ່ຄ້າຍຄືກັບບົດຄວາມຂອງ BBC, ໃນເວລາຢ້ຽມຢາມ 5 ປະເທດອາຟຣິກາເຊັ່ນ: ນີເຊຣີແລະປະເທດອື່ນໆໃນຕົ້ນປີນີ້ຕາມຄຳເຊີນ, ທ່ານຫວາງຢີ້ ທີ່ປຶກສາແຫ່ງລັດທັງເປັນລັດຖະມົນຕີກະຊວງການຕ່າງປະເທດຈີນໄດ້ຕອບໂຕ້ສື່ປະເທດຕາເວັນຕົກອີກຄັ້ງໜຶ່ງຕາມຄວາມເປັນຈິງວ່າ: ນັບມາຮອດປັດຈຸບັນ, ຈີນໄດ້ໃຫ້ການຊ່ວຍເຫຼືອບັນດາປະເທດອາຟຣິກາສ້າງທາງລົດໄຟຍາວກວ່າ 6.000 ກິໂລແມັດແລະທາງຫຼວງຍາວກວ່າ 6.000 ກິໂລແມັດ, ໄດ້ສ້າງທ່າກ່ຳປັ່ນປະມານ 20 ແຫ່ງ, ສ້າງຖານຜະລິດກະແສໄຟຟ້າຂະໜາດໃຫຍ່ 80 ກວ່າແຫ່ງ, ໄດ້ຊ່ວຍສ້າງສິ່ງອຳນວຍຄວາມສະດວກໃນການປິ່ນປົວພະຍາດ 130 ກວ່າແຫ່ງ, ສະໜາມກິລາ 45 ແຫ່ງແລະໂຮງຮຽນ 170 ກວ່າແຫ່ງ, ໄດ້ສົ່ງທິມງານຜູ້ຊ່ຽວຊານໄປປິ່ນປົວພະຍາດ 21 ພັນເທື່ອຄົນຢູ່ 48 ປະເທດອາຟຣິກາ, ແລະໄດ້ປິ່ນປົວຄົນເຈັບຊາວອາຟຣິກາຫຼາຍກວ່າ 220 ລ້ານເທື່ອຄົນ.
ແນວຄິດຜູ້ຮ້າຍອ້າຍໂຈນຂອງປະເທດຕາເວັນຕົກທີ່ຖືໂຕເອງສຳຄັນຄືເກົ່າຍັງຄືກັບກ່ອນໜ້ານີ້ຫຼາຍຮ້ອຍປີ, ເຂົາເຈົ້າຍັງບໍ່ຍອມຮັບປະເທດຈີນທີ່ພວມພັດທະນາກ້າວກະໂດດ, ຖ້າວ່າພຽງແຕ່ຮູ້ເບິ່ງປະເທດຈີນດ້ວຍສາຍຕາທີ່ລຳອຽງຂອງຕົນ, ກໍຈະບໍ່ສາມາດເຂົ້າໃຈການກະທຳຂອງຈີນໄດ້ຈົນເທົ່າໃດໆ. ປະເທດອາຟຣິກາມີຄວາມໄວ້ເນື້ອເຊື່ອໃຈແລະສະໜັບສະໜູນປະເທດຈີນກໍໄດ້ພິສູດໃຫ້ເຫັນສັດຈະທຳທີ່ວ່າ: ຜູ້ຍຶດຖືຄວາມເປັນທຳຈະໄດ້ໃຈຄົນ, ຜູ້ອະທຳຜູ້ຄົນຈະແໜງໜ່າຍ.
ຄຳເຫັນ
0