ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ຫວ່າງມໍ່ໆມານີ້, ສື່ມວນຊົນອາເມຣິກາລາຍງານວ່າ: ທ້າຍເດືອນເມສາປີນີ້, ປະຊາຊົນເມືອງໄມອາມີ-ເດດ ລັດຟລໍຣີດາຂອງອາເມຣິກາໄປຖິ້ມຂີ້ເຫຍື້ອ, ໄດ້ພົບເຫັນເຄື່ອງຊ່ວຍຫາຍໃຈໃໝ່ອ່ຽມ ທີ່ມີມູນຄ່າຫຼາຍລ້ານໂດລາສະຫະລັດ ຖືກຖິ້ມໄວ້ໃນກອງຂີ້ເຫຍື້ອ. ຍ້ອນວ່າຂີ້ເຫຍື້ອໃນສະໜາມຂີ້ເຫຍື້ອ ຈະຖືກຊຳລະພາຍໃນມື້ໜຶ່ງ. ຈັ່ງຊັ້ນໃນປັດຈຸບັນນີ້, ເຄື່ອງຊ່ວຍຫາຍໃຈງວດນີ້ໄດ້ຫາຍສາບສູນໄປແລ້ວ. ສ່ວນສາຍເຫດທີ່ຖິ້ມເຄື່ອງຊ່ວຍຫາຍໃຈເຫຼົ່ານີ້ເຂົ້າໃນກອງຂີ້ເຫຍື້ອ ກໍເປັນສາຍເຫດທີ່ເຫຼືອເຊື່ອ, ນັ້ນກໍຄື: ຖ້າຖິ້ມໃສ່ກອງຂີ້ເຫຍື້ອ ຈະໃຊ້ຄ່າຊຳລະໜ້ອຍກວ່າຄ່າຂົນສົ່ງໄປປະເທດພວມພັດທະນາທີ່ຕ້ອງການດ່ວນ.
ເລື່ອງນີ້ໄດ້ເຮັດໃຫ້ພວກເຮົາຄິດເຖິງເລື່ອງທີ່ເກີດຂຶ້ນໃນເດືອນພຶດສະພາຜ່ານມານີ້, ພາຍຫຼັງພະຍາດໂຄວິດ-19 ໄດ້ແຜ່ລະບາດຢູ່ອິນເດຍຢ່າງຮ້າຍແຮງແລ້ວ, ຜູ້ຖືກບົ່ງມະຕິເປັນພະຍາດຈົນນັບບໍ່ຖ້ວນ ໄດ້ສູ້ກັບພະຍາດເພື່ອເອົາຕົວລອດ ແລະ ຕ້ອງການເຄື່ອງຊ່ວຍຫາຍໃຈເປັນພິເສດ, ແຕ່ອາເມຣິກາພັດມີທ່າທີເສີຍເມີຍ ຕໍ່ການຮ້ອງຂໍຄວາມຊ່ວຍເຫຼືອຈາກ “ພັນທະມິດທີ່ສະໜິດແໜ້ຄືອິນເດຍ”, ແຕ່ເລືອກຖິ້ມເຄື່ອງຊ່ວຍຫາຍໃຈເຂົ້າກອງຂີ້ເຫຍື້ອ. ສຸດທ້າຍ, ອາເມຣິກາພຽງແຕ່ໄດ້ຂົນສົ່ງຜ້າປິດປາກຫຼາຍແສນອັນ ແລະ ບັ້ງອົກຊີເປົ່າ 440 ບັ່ງ ໄປໃຫ້ອິນເດຍເທົ່ານັ້ນ. ເງິນຄຳຢູ່ເໜືອຊີວິດຂອງຄົນ, ທ່າທີແບບນີ້ຂອງອາເມຣິກາ ເຮັດໃຫ້ພວກເຮົາໄດ້ເຫັນທາດແທ້ຂອງອາເມຣິກາ.
ເດືອນພຶດສະພາປີກາຍນີ້, ໜັງສືພິມ “ອາເມຣິກາວັນນີ້” ເຄີຍໄດ້ດຳເນີນການສຳຫຼວດສະພາບການແຜ່ລະບາດຂອງພະຍາດໂຄວິດ-19 ຢູ່ອາເມຣິກາທີ່ນັບມື້ນັບຮ້າຍແຮງ ແຕ່ແພດໝໍແລະພະຍາບານອາເມຣິກາ ພັດຂາດເຂີນອຸປະກອນການແພດຫຼາຍ. ຜົນການສຳຫຼວດສະແດງໃຫ້ເຫັນວ່າ: ເດືອນມີນາປີຜ່ານມາ, ອາເມຣິກາໄດ້ສົ່ງອອກຜ້າປິດປາກ N95 ທີ່ເປັນຜ້າປິດປາກທີ່ມີຕ້ອງການດ່ວນທາງການແພດໄປຕ່າງປະເທດ ທີ່ເປັນມູນຄ່າ 80 ລ້ານກວ່າໂດລາສະຫະລັດ ເຊິ່ງເປັນສະຖິຕິສູງສຸດໃນການສົ່ງອອກຜ້າປິດປາກໃນຮອບ 10 ປີ. ດ້ານໜຶ່ງແມ່ນແພດໝໍແລະພະຍາບານອາເມຣິກາໃສ່ຜ້າປິດປາກອັນດຽວຫຼາຍມື້ ເຊິ່ງເປັນຄວາມສ່ຽງສູງທີ່ຈະຕິດເຊື້ອພະຍາດໂຄວິດ-19, ອີກດ້ານໜຶ່ງ ແມ່ນນັກທຸລະກິດອາເມຣິກາ ສົ່ງອອກຜ້າປິດປາກດ້ວຍລາຄາສູງໄປຕ່າງປະເທດ ເພື່ອສະແຫວງຫາຜົນກຳໄລສູງ. ນີ້ກໍເປັນສະພາບການທີ່ເຫຼືອເຊື່ອ ໃນການຕ້ານກັບການແຜ່ລະບາດຂອງພະຍາດຂອງອາເມຣິກາ.
ກໍແມ່ນຢູ່ອາເມຣິກາເຊັ່ນກັນ, ພາຍຫຼັງວັກຊິນໂຄວິດ-19 ໄດ້ຖືກນຳໃຊ້ແລ້ວ, ໂຮງໝໍຫຼາຍແຫ່ງຂອງອາເມຣິກາ ໄດ້ພາກັນສັກວັກຊິນໃຫ້ຄົນໃກ້ຊິດຂອງຕົນເປັນບູລິມະສິດ. “ໜັງສືພິມຊີແອັດໂທທາມສ໌” ຂອງອາເມຣິກາ ເຄີຍໄດ້ເປີດເຜີຍໃນເດືອນມັງກອນປີນີ້ວ່າ: ໂຮງໝໍແຫ່ງໜຶ່ງຂອງນະຄອນຊີແອັດໂທໄດ້ສົ່ງອີເມວຢ່າງລັບໆ ໃຫ້ “ຜູ້ໃຫ້ເງິນອຸດໜູນ” ທີ່ມີວົງເງິນຫຼາຍກວ່າ 1 ໝື່ນໂດລາສະຫະລັດແກ່ໂຮງໝໍຕົນ ຈຳນວນ 100 ກວ່າຄົນວ່າ: ເຂົາເຈົ້າສາມາດມາຈອງສັກວັກຊິນໃນໂຮງໝໍຕົນໄດ້. ແຕ່ຂະນະດຽວກັນ, ປະຊາຊົນທຳມະດາສາມັນທີ່ໄປຈອງສັກວັກຊິນຢູ່ໂຮງໝໍແຫ່ງດັ່ງກ່າວ ຕ້ອງໄດ້ລຽນແຖວໄປເຖິງທ້າຍເດືອນມີນາປີນີ້. ການກະທຳແບບນີ້ຂອງໂຮງໝໍດັ່ງກ່າວ ໄດ້ເຮັດໃຫ້ຄົນທັງຫຼາຍຮູ້ດີຕໍ່ເລື່ອງຈິງຢູ່ອາເມຣິກາອີກຄັ້ງໜຶ່ງ ຄື “ເງິນຄຳຢູ່ເໜືອການຕ້ານກັບການແຜ່ລະບາດຂອງພະຍາດ”.
ພາຍຫຼັງພະຍາດໂຄວິດ-19 ແຜ່ລະບາດຢູ່ອາເມຣິກາຢ່າງຮ້າຍແຮງແລ້ວ, ເພື່ອຮັກສາການພັດທະນາດ້ານເສດຖະກິດ, ລັດຖະບານອາເມຣິກາໄດ້ເລືອກໂດຍເບິ່ງຂ້າມການແຜ່ລະບາດຂອງເຊື້ອພະຍາດ, ຈົນເຖິງຂັ້ນມີເຈົ້າໜ້າທີ່ອາເມຣິກາຮຽກຮ້ອງໃຫ້ຟື້ນຟູການພັດທະນາເສດຖະກິດແບບເປີດປະຕູ ໃນຂະນະທີ່ອາເມຣິກາຈຳກັດການເດີນທາງ ຍ້ອນພະຍາດໄດ້ແຜ່ລະບາດຢ່າງຮ້າຍແຮງ. ທ່າທີແບບນີ້ເຮັດໃຫ້ອາເມຣິກາມີ 34 ລ້ານກວ່າຄົນຕິດເຊື້ອພະຍາດໂຄວິດ-19 ແລະ 6 ແສນກວ່າຄົນເສຍຊີວິດຍ້ອນເປັນພະຍາດດັ່ງກ່າວ.
ທ່າທີ “ເງິນຄຳຢູ່ເໜືອທຸກສິ່ງທຸກຢ່າງ” ຂອງອາເມຣິກາ ໃນການຮັບມືກັບການແຜ່ລະບາດຂອງພະຍາດ, ທາດແທ້ກໍຄືລັດທິສະແຫວງຫາຜົນປະໂຫຍດສ່ວນຕົວແບບອາເມຣິກາ. “ການສະແຫວງຫາເງິນຄຳ ແຕ່ເຮັດເສີຍເມີຍຕໍ່ຊີວິດແລະສຸຂະພາບ” ແບບນີ້ຂອງອາເມຣິກາ ໄດ້ເຮັດໃຫ້ອາເມຣິກາປະສົບກັບຄວາມຫຼົ້ມເຫຼວໃນການຮັບມືກັບການແຜ່ລະບາດຂອງພະຍາດ ແລະ ໃນການພັດທະນາເສດຖະກິດໄປພ້ອມກັນ. ແຕ່ໃນຂະນະດຽວກັນນັ້ນ, ກໍໄດ້ສ້າງຄວາມຫຍຸ້ງຍາກ ໃຫ້ແກ່ການຕ້ານກັບການແຜ່ລະບາດຂອງພະຍາດຂອງສາກົນໄປອີກດ້ວຍເຊັ່ນກັນ.
ຄຳເຫັນ
0