ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ບົດອວຍພອນປີໃໝ່ 2022
ໂດຍ: ທ່ານ ສີຈິ້ນຜິງ
ວັນທີ 31 ທັນວາ 2021
ບັນດາສະຫາຍ ເພື່ອນມິດທີ່ເຄົາລົບ, ທ່ານຍິງແລະທ່ານຊາຍທີ່ຮັກແພງ
ສະບາຍດີ ທຸກທ່ານ. ປີ 2022 ໃກ້ຈະໝູນວຽນມາເຖິງນີ້. ຂ້າພະເຈົ້າຢູ່ນະຄອນຫຼວງປັກກິ່ງ ຂໍສົ່ງພອນໄຊອັນປະເສີດໃນຍາມປີໃໝ່ມາຍັງບັນດາທ່ານ.
ເມື່ອຫວນຄືນປີທີ່ຜ່ານມາ ຖືວ່າເປັນປີໜຶ່ງທີ່ມີຄວາມໝາຍບໍ່ທຳມະດາ. ພວກເຮົາໄດ້ເປັນສັກຂີພິຍານໃຫ້ກັບຫຼາຍເຫດການເດັ່ນໆ ທີ່ມີຄວາມໝາຍເປັນຫຼັກໝາຍໃນປະຫວັດສາດຂອງພັກ ແລະ ປະເທດຊາດ. ພວກເຮົາໄດ້ເຮັດສຳເລັດເປົ້າໝາຍສູ້ຊົນຄົບຮອບ 100 ປີ ເຫດການທີໜຶ່ງ ແລະ ພວມກ້າວໄປສູ່ເປົ້າໝາຍສູ້ຊົນຄົບຮອບ 100 ປີເຫດການທີ 2, ພວກເຮົາໄດ້ເລີ່ມການເດີນທາງຄັ້ງໃໝ່ແຫ່ງການສ້າງສາປະເທດສັງຄົມນິຍົມທີ່ທັນສະໄໝຢ່າງຮອບດ້ານ, ແລະພວມກ້າວເດີນໄປຂ້າງໜ້າບົນເສັ້ນທາງແຫ່ງການຟື້ນຟູຄວາມຈະເລີນຮຸ່ງເຮືອງອັນຍິ່ງໃຫຍ່ຂອງປະຊາຊາດຈີນຢ່າງຂະຫຍັນຫ້າວຫັນ.
ນັບຈາກຕົ້ນປີມາຮອດທ້າຍປີນີ້, ປະຊາຊົນຈີນທັງຫຼາຍໄດ້ເຮັດວຽກຢ່າງຫ້າວຫັນຢູ່ຕາມໜ້າທີ່ຕຳແໜ່ງຂອງຕົນຄື: ຢູ່ຕາມນາສວນ, ຢູ່ໃນວິສາຫະກິດ, ຢູ່ເຂດຊຸມຊົນ, ຢູ່ໂຮງຮຽນ, ໂຮງໝໍ, ຄ້າຍທະຫານ, ສະຖາບັນຄົ້ນຄວ້າວິທະຍາສາດ ແລະອື່ນໆ…ທຸກຄົນໄດ້ທຸ້ມເຫື່ອເທແຮງ ມີການປະກອບສ່ວນ ແລະກໍໄດ້ຮັບຜົນງານເຊັ່ນກັນ. ໃນການເວລາທີ່ຜ່ານພົ້ນໄປຢ່າງວ່ອງໄວ, ພວກເຮົາໄດ້ເຫັນ ແລະໄດ້ສຳຜັດເຖິງປະເທດຈີນ ທີ່ມີຄວາມມານະອົດທົນ ແລະມີຄວາມຮຸ່ງເຮືອງເຫຼືອງເຫຼື້ອມ. ເຊິ່ງຢູ່ໃນປະເທດຈີນນີ້ ມີປະຊາຊົນທີ່ໜ້າເຄົາລົບຮັກ, ມີການພັດທະນາທີ່ວ່ອງໄວ ແລະມີພາລະກິດທີ່ສືບທອດມາແຕ່ປະຫວັດສາດ.
ວັນທີ 1 ກໍລະກົດ ພວກເຮົາໄດ້ສະເຫຼີມສະຫຼອງການສ້າງຕັ້ງພັກກອມມູນິດຈີນຄົບຮອບ 100 ປີ. ເມື່ອຢືນຢູ່ເທິງຫໍໄຊທຽນອ່ານເມີນ ຂ້າພະເຈົ້າມີຄວາມຮູ້ສຶກຢ່າງເລິກເຊິ່ງວ່າ, ປະຫວັດສາດທີ່ຜ່ານມາ ແມ່ນເຕັມໄປດ້ວຍຄວາມລະອິດລະອ້ຽວ, ແຕ່ພັກກອມມູນິດຈີນໄດ້ນຳພາປະຊາຊົນນັບເປັນຫຼາຍຮ້ອຍລ້ານຄົນ ຜ່ານຜ່າຄວາມທຸກຍາກຕ່າງໆນານາ, ເຖິງຈະພົບອຸປະສັກຫຼາຍຢ່າງກໍບໍ່ທໍ້ຖອຍ, ເຖິງຈະພົບຄວາມອັນຕະລາຍນັບເປັນໝື່ນຢ່າງກໍບໍ່ປ່ຽນອຸດົມການແຕ່ຫົວທີ, ແລ້ວຈຶ່ງສາມາດປະສົບຜົນສຳເລັດໄດ້ໃນການສ້າງພັກໃຫຍ່ທີ່ສະຫງ່າຜ່າເຜີຍ. ເມື່ອບໍ່ລືມອຸດົມການແຕ່ຫົວທີ, ຈິ່ງຈະປະສົບຜົນສຳເລັດໄດ້ໃນທີ່ສຸດ. ພວກເຮົາມີແຕ່ບຸກບືນສູ້ຊົນຢ່າງຫ້າວຫັນ, ມີແຕ່ມານະພະຍາຍາມຢ່າງບໍ່ຮູ້ອິດຮູ້ເມື່ອຍເທົ່ານັ້ນ, ຈິ່ງສາມາດບໍ່ໃຫ້ປະຫວັດສາດຜິດຫວັງ, ບໍ່ໃຫ້ຍຸກສະໄໝຜິດຫວັງ ແລະບໍ່ໃຫ້ປະຊາຊົນຜິດຫວັງ.
ກອງປະຊຸມຄົບຄະນະຄັ້ງທີ 6 ຂອງຄະນະກຳມະການສູນກາງພັກກອມມູນິດຈີນສະໄໝທີ 19 ໄດ້ຮັບຮອງເອົາມະຕິຄັ້ງປະຫວັດສາດຂອງພັກສະບັບທີສາມ. ຜົນງານທີ່ໄດ້ຮັບໃນຮອບຮ້ອຍປີຜ່ານມາ ເຮັດໃຫ້ພວກເຮົາຮູ້ສຶກກະຕຸ້ນໃຈ, ບົດຮຽນທີ່ໄດ້ຮັບໃນຮອບຮ້ອຍປີນັ້ນໄດ້ກາຍເປັນແຮງບັນດານໃຈໃຫ້ແກ່ຄົນທັງຫຼາຍ. ຂ້າພະເຈົ້າເຄີຍກ່າວເຖິງການໂອ້ລົມກັນລະຫວ່າງ ປະທານ ເໝົາເຈີຕຸ່ງ ກັບ ທ່ານ ຮວງຢຽນເພີຍຢູ່ໃນເຮືອນແບບຖ້ຳຂອງພູພຽງດິນເຫຼືອງໃນສະໄໝກ່ອນ ໂດຍກ່າວວ່າ ພວກເຮົາມີແຕ່ກ້າປະຕິວັດໂດຍຕົນເອງເທົ່ານັ້ນ ຈຶ່ງຈະສາມາດກຳໄດ້ຄວາມເປັນເຈົ້າການຄັ້ງປະຫວັດສາດ. ການຟື້ນຟູຄວາມຈະເລີນຮຸ່ງເຮືອງອັນຍິ່ງໃຫຍ່ຂອງປະຊາຊາດຈີນ ບໍ່ແມ່ນເລື່ອງທີ່ສາມາດປາກົດຜົນເປັນຈິງໄດ້ຢ່າງງ່າຍດາຍ, ແລະກໍບໍ່ສາມາດປະສົບຜົນສຳເລັດໄດ້ໃນມື້ໜຶ່ງຍາມດຽວ. ພວກເຮົາຕ້ອງຄິດເຖິງໄລຍະເວລາອັນຍາວໄກ, ມີຄວາມຫ່ວງໃຍເຖິງຄວາມສ່ຽງທີ່ແຝງຊ້ອນຢູ່ໃນຍາມທີ່ພວກເຮົາພວມຢູ່ເຢັນເປັນສຸກ, ຕ້ອງຮັກສາຄວາມໝັ້ນໜຽວທາງຍຸດທະສາດ ແລະ ຄວາມມານະອົດທົນຕັ້ງເປົ້າໝາຍທີ່ຍິ່ງໃຫຍ່ ແຕ່ກໍຄວນສຸມໃສ່ແກ້ໄຂບັນຫາທີ່ລະອຽດ.
ໃນເມື່ອເປັນປະເທດໃຫຍ່ນັ້ນ ກໍ່ຕ້ອງມີບັນຫາທີ່ສຳຄັນຂອງຕົນ. ຄວາມຫຍຸ້ງຍາກຕ່າງໆທີ່ສະຫຼັບຊັບຊ້ອນ ເວົ້າເຖິງກົກເຖິງຮາກແລ້ວ ກໍ່ແມ່ນຄວາມຫຍຸ້ງຍາກຂອງປະຊາຊົນທຸກຄົນ. ຂ້າພະເຈົ້າໄດ້ໄປສຳຫຼວດຢູ່ຫຼາຍບ່ອນ, ໄດ້ເຫັນ ແລະ ໄດ້ຍິນສະພາບການບໍ່ໜ້ອຍ, ເຮັດໃຫ້ຂ້າພະເຈົ້າໄດ້ຮັບຮູ້ເຖິງຫຼາຍສິ່ງຢ່າງຫຼາຍ. ທຸກເທື່ອທີ່ໄປຢາມປະຊາຊົນຢູ່ເຮືອນ, ຂ້າພະເຈົ້າມັກຈະຖາມເຖິງຄວາມຫຍຸ້ງຍາກຂອງເຂົາເຈົ້າ, ຄຳຕອບຂອງພໍ່ແມ່ປະຊາຊົນ ຂ້າພະເຈົ້າໄດ້ຈື່ໄວ້ໃນໃຈ.
ເລື່ອງທີ່ປະຊາຊົນຫ່ວງໃຍນັ້ນ ຂ້າພະເຈົ້າຕ້ອງຫ່ວງໃຍເຊັ່ນກັນ; ເລື່ອງທີ່ປະຊາຊົນມຸ້ງຫວັງນັ້ນ ຂ້າພະເຈົ້າກໍ່ຕ້ອງມີການກະທຳ. ຂ້າພະເຈົ້າມາຈາກຊົນນະບົດເຊັ່ນກັນ, ມີຄວາມຮູ້ສຶກອັນເລິກເຊິ່ງເຖິງຄວາມທຸກຍາກ. ໂດຍຜ່ານຄວາມພະຍາຍາມຂອງຫຼາຍເຊັ່ນຄົນຢ່າງຕໍ່ເນື່ອງ, ປະຊາຊົນຜູູ້ທຸກຍາກໃນເມື່ອກ່ອນ ດຽວນີ້ໄດ້ກິນອີ່ມນຸ່ງອຸ່ນແລ້ວ, ເຂົາເຈົ້າໄດ້ເຂົ້າໂຮງຮຽນ, ມີເຮືອນຢູ່, ພ້ອມທັງມີປະກັນໄພດ້ານການປິ່ນປົວພະຍາດ. ການສ້າງສັງຄົມທີ່ອີ່ມໜຳສຳລານຢ່າງຮອບດ້ານໃຫ້ສຳເລັດ ແລະຫຼຸດພົ້ນອອກຈາກຄວາມທຸກຍາກ ແມ່ນຄຳຕອບຂອງພວກເຮົາທີ່ມີຕໍ່ປະຊາຊົນ ແລະກໍ່ເປັນການປະກອບສ່ວນຂອງພວກເຮົາທີ່ມີຕໍ່ໂລກ. ໃນດ້ານການເຮັດໃຫ້ປະຊາຊົນມີຊີວິດການເປັນຢູ່ທີ່ດີຂຶ້ນກວ່າເກົ່າ, ພວກເຮົາບໍ່ຄວນເພິ່ງພໍໃຈຕໍ່ຜົນງານທີ່ໄດ້ຮັບໃນປັດຈຸບັນ, ພວກເຮົາຍັງຕ້ອງເດີນທາງອີກຍາວໄກ.
ຄວາມໃສສະອາດຂອງແມ່ນ້ຳເຫຼືອງ ເປັນຄວາມປາດຖະໜາຂອງລູກຫຼານປະຊາຊາດຈີນໃນຫຼາຍພັນປີຜ່ານມາ. ໃນຊຸມປີມໍ່ໆມານີ້, ຂ້າພະເຈົ້າໄດ້ເດີນທາງໄປທັງໝົດ 9 ແຂວງ ແລະ ເຂດປົກຄອງຕົນເອງທີ່ຢູ່ຍ່ານເໜືອ, ຍ່ານກາງ ແລະ ຍ່າງໃຕ້ຂອງແມ່ນ້ຳເຫຼືອງ. ບໍ່ວ່າຈະເປັນແມ່ນ້ຳເຫຼືອງ ແລະ ແມ່ນ້ຳຢາງຊີກຽງ ທີ່ຖືວ່າເປັນແມ່ນ້ຳທີ່ຫຼໍ່ລ້ຽງປະຊາຊາດຈີນກໍຕາມ, ຫຼືວ່າ ໜອງຊິ່ງໄຫທີ່ໃສສະອາດ, ແມ່ນ້ຳຢາລູຈັງໂປທີ່ສະຫງ່າງາມ; ບໍ່ວ່າຈະເປັນໂຄງການສົ່ງນ້ຳຈາກພາກໃຕ້ໄປສູ່ພາກເໜືອ ທີ່ ຖືວ່າເປັນໂຄງການທີ່ມີຄວາມໝາຍໃນສະຕະວັດ, ຫຼືວ່າຈະເປັນ “ແຜນທີ່ສີຂຽວ” ຂອງນິຄົມປ່າໄມ້ໄຊຫັນປາ; ບໍ່ວ່າຈະເປັນເຫດການທີ່ຝູງຊ້າງຂອງແຂວງຢູນນານເຄື່ອນຍ້າຍໄປພາກເໜືອ ແລ້ວກັບຄືນສູ່ພາກໃຕ້,ຫຼືວ່າຈະເປັນເຫດການທີ່ເຍືອງຕິເບດເຄື່ອນຍ້າຍໄປບ່ອນ ອື່ນເພື່ອແຜ່ພັນ...ທັງໝົດເຫຼົ່ານີ້ ລ້ວນແຕ່ສະທ້ອນໃຫ້້ເຫັນວ່າ, ຖ້າມະນຸດເຮົາບໍ່ທຳລາຍພູຂຽວ, ພູຂຽວຍ່ອມຈະນຳເອົາຜົນປະໂຫຍດມາສູ່ຄົນເຮົາຢ່າງແນ່ນອນ.
ໃນປີທີ່ຜ່ານມາ, ຍັງມີສຽງຂອງຈີນ, ເຫດການໃນພິບຕາດຽວຂອງຈີນ ແລະ ເລື່ອງລາວຂອງຈີນທີ່ເຮັດໃຫ້ຄົນລືມຍາກຢ່າງຫຼວງຫຼາຍ. ຄຳປະຕິຍານຕົວຂອງຊາວໜຸ່ມທີ່ວ່າ “ຂໍໃຫ້ພັກໄວ້ວາງໃຈ, ໃນຂະບວນການສ້າງຊາດໃຫ້ເຂັ້ມແຂງນັ້ນຈະມີຂ້ອຍ”, ການບອກເລົ່າດ້ວຍຄວາມດູດດື່ມທີ່ວ່າ “ຄວາມຮັກທີ່ໂປ່ງໃສ ເພື່ອປະເທດຈີນເທົ່ານັ້ນ”; ຍານອະວະກາດ “ຈູ້ຢົງ” ໄປສຳຫຼວດດາວອັງຄານ, ຍານດາວທຽມ “ຊີ່ເຮີ” ໄປສຳຫຼວດດວງອາທິດ ແລະ ສະຖານີອະວະກາດ “ທ່ຽນເຮີ”; ນັກກິລາທັງຫຼາຍບຸກບືນສູ້ຊົນຢ່າງຫ້າວຫັນ;ນັບແຕ່ຂັ້ນເທິງຮອດຂັ້ນລຸ່ມໃນທົ່ວປະ ເທດໄດ້ດຳເນີນການປ້ອງກັນ ແລະ ຄວບຄຸມພະຍາດໂຄວິດ 19 ຢ່າງເດັດດ່ຽວ ແລະ ແຂງແຮງ; ປະຊາຊົນຜູ້ປະສົບໄພທຳມະຊາດ ໄດ້ຊ່ວຍເຫຼືອເຊິ່ງກັນແລະກັນ ແລະ ໄດ້ສ້າງບ້ານແປງເມືອງຄືນໃໝ່; ນາຍ ແລະ ພົນທະຫານຂອງກອງທັບປົດປ່ອຍປະຊາຊົນ ແລະ ກອງຕຳຫຼວດປະກອບອາວຸດ ໄດ້ຝຶກຊ້ອມຢ່າງທໍລະຫົດອົດທົນເພື່ອສ້າງກອງທັບ ແລະ ກອງຕຳຫຼວດໃຫ້ເຂັ້ມແຂງແລະປ້ອງກັນປະເທດຊາດ.....ວິລະຊົນທຳມະດານັບບໍ່ ຖ້ວນໄດ້ບຸກບືນສູ້ຊົນ ເຊິ່ງໄດ້ເຕົ້າໂຮມກັນກາຍເປັນພະລັງແຮງຫຼັກແຫຼ່ງແຫ່ງການກ້າວເດີນໄປຂ້າງໜ້າຢ່າງອົງອາດກ້າຫານຂອງຈີນໃນຍຸກໃໝ່.
ຍາມໃດ, ແຜ່ນດິນໃຫຍ່ປະເທດຊາດ ກໍໄດ້ເອົາໃຈໃສ່ຄວາມຈະເລີນຮຸ່ງເຮືອງ ແລະ ສະຖຽນລະພາບຂອງຮົງກົງ ແລະ ມາເກົ໊າ ຕະຫຼອດມາ. ມີພຽງແຕ່ຮ່ວມມື ແລະ ພະຍາຍາມຮ່ວມກັນເທົ່ານັ້ນ, ທິດທາງ “ປະເທດດຽວສອງລະບອບ” ຈຶ່ງຈະໄດ້ຮັບການປະຕິບັດຢ່າງໝັ້ນທ່ຽງ ແລະ ຍາວນານ. ການບັນລຸການທ້ອນໂຮມປະເທດຊາດເຂົ້າເປັນເອກະພາບກັນຢ່າງສົມບູນ ແມ່ນຄວາມປາດຖະໜາຮ່ວມກັນຂອງພີ່ນ້ອງຮ່ວມຊາດສອງຝັ່ງຊ່ອງແຄບ. ມີຄວາມປາດຖະໜາຢ່າງຈິງໃຈໃຫ້ລູກຫຼານປະຊາຊາດຈີນທຸກຖ້ວນໜ້າຈົ່ງເກາະ ແຂນກັນກ້າວໄປໜ້າ, ຮ່ວມກັນສ້າງອະນາຄົດອັນສົດໃສສວຍງາມຂອງປະຊາຊາດຈີນ.
ໃນເວລາຂ້າພະເຈົ້າພົບປະກັບຜູ້ນຳຕ່າງປະເທດ ແລະ ຜູ້ຮັບຜິດຊອບຂອງອົງການຈັດຕັ້ງສາກົນຜ່ານທາງໂທລະສັບ ຫຼື ວິດີໂອ, ພວກເພິ່ນໄດ້ຍ້ອງຍໍສັນລະເສີນຫຼາຍເທື່ອຕໍ່ປະເທດຈີນ ທີ່ໄດ້ປະກອບສ່ວນເພື່ອ ຕໍ່ຕ້ານການແຜ່ລະບາດຂອງພະຍາດໂຄວິດ 19 ເພື່ອການປ້ອງກັນ ແລະ ຄວບຄຸມພະຍາດດັ່ງກ່າວໃນທົ່ວໂລກ. ມາຮອດປັດຈຸບັນ, ລວມທັງໝົດແລ້ວ ຈີນໄດ້ສະໜອງວັກຊີນຕ້ານໂຄວິດ 19 ໃນຈຳນວນ 2 ຕື້ຫຼອດໃຫ້ແກ່ 120 ກວ່າປະເທດ ແລະ ເຂດແຄວ້ນໃນໂລກ. ມີແຕ່ບັນດາປະເທດໃນໂລກຮ່ວມກັນຜ່ານຜ່າຟ້າຝົນລົມແດງ, ສາມັກຄີຮ່ວມມືກັນເທົ່ານັ້ນ ຈຶ່ງຈະສາມາດຂຽນໜ້າປະຫວັດສາດໃໝ່ຂອງປະຊາຄົມຮ່ວມຊາຕາກຳຂອງມວນມະນຸດໄດ້.
ຍັງອີກໜຶ່ງເດືອນປາຍເທົ່ານັ້ນ, ງານມະຫາກຳກິລາໂອລິມປິກລະດູໜາວ ແລະ ງານມະຫາກຳກິລາໂອລິມປິກຄົນພິການລະດູໜາວປັກກິ່ງ ກໍຈະໄຂຂຶ້ນ. ການທີ່ເຮັດໃຫ້ຄົນຫຼາຍກວ່າເກົ່າເຂົ້າຮ່ວມກິລານ້ຳກ້າມແລະຫິມະ ແມ່ນຄວາມໝາຍຂອງກິລາໂອລິມປິກ. ພວກເຮົາຈະທຳຄວາມພະຍາມຢ່າງສຸດຂີດເພື່ອຈັດງານກິລາໂອລິມປິກທີ່ໜ້າຊົມຄັ້ງໜຶ່ງ. ໂລກມີຄວາມຫວັງຕໍ່ປະເທດຈີນ, ປະເທດຈີນໄດ້ກຽມພ້ອມແລ້ວ.
ສຽງລະຄັງປີໃໝ່ໃກ້ຈະດັງຂຶ້ນ. ນັກບິນອະວະກາດຂອງປະເທດພວກເຮົາພວມເຮັດວຽກຢູ່ເທິງອະວະກາດ, ພີ່ນ້ອງຮ່ວມຊາດທີ່ຢູ່ພົ້ນທະເລ ຍັງພວມເຮັດວຽກຢ່າງຫ້າວຫັນຢູ່, ພະນັກງານຂອງສະຖານທູດ, ສະຖານກົງສຸນ ແລະ ວິສາຫະກິດຂອງຈີນປະຈຳຕ່າງປະເທດ ແລະ ນັກສຶກສາຈີນຈຳນວນມະຫາສານທີ່ີຮຽນຢູ່ຕ່າງປະເທດຍັງພວມຍຶດໝັ້ນຢ່າງກ້າຫານຢູ່, ຜູ້ໄລ່ຕາມຄວາມຝັນນັບບໍ່ຖ້ວນຍັງພວມບຸກບືນສູ້ຊົນຢູ່. ຂ້າພະເຈົ້າຂໍສະແດງຄວາມອວຍພອນປີໃໝ່ດ້ວຍຄວາມຈິງໃຈມາຍັງບັນດາທ່ານ.
ພວກເຮົາຈົ່ງຮ່ວມກັນກ້າວໄປສູ່ອະນາຄົດ! ຂໍອວຍພອນໃຫ້ປະເທດຊາດຈົ່ງມີຄວາມສະຫງົບ ປະຊາຊົນຢູ່ເຢັນເປັນສຸກ!
ຄຳເຫັນ
0