ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ພາຍຫຼັງເຊື້ອພະຍາໂຄວິດ-19 ກາຍພັນໂອມິຄຣອນໄດ້ແຜ່ລະບາດຢ່າງກວ້າງຂວາງຢູ່ທົ່ວໂລກແລ້ວ, ການຕັດສິນໃຈຂອງປະຊາຄົມໂລກໃນການປ້ອງກັນ ແລະຄວບຄຸມເຊື້ອພະຍາດສາຍພັນນີ້ ໄດ້ຫຼຸດລົງຢ່າງຫຼວງຫຼາຍ. ບົດລາຍງານຂອງອາເມຣິກາໄດ້ພັນລະນາວ່າມັນເປັນເຊື້ອພະຍາດທີ່ “ບໍ່ສະແດງອາການ” ຫຼື “ມີອາການເບົາ”. ວັນທີ 11 ມັງກອນນີ້, ເວັບໄຊ MedRxiv ທີ່ເປັນເວັບໄຊເຜີຍແຜ່ບົດວິທະຍານິພົນດ້ານແພດສາດຂອງອາເມຣິກາ ໄດ້ລົງບົດຄວາມ ໂດຍລະບຸວ່າ: ອັດຕາອາການໜັກຂອງຜູ້ຕິດເຊື້ອກາຍພັນໂອມິຄຣອນເທົ່າກັບ 1/4 ຂອງອາການຜູ້ຕິດເຊື້ອກາຍພັນເດວຕາເທົ່ານັ້ນ ແລະອັດຕາເສຍຊີວິດກໍປະມານ 1/10 ຂອງອັດຕາຜູ້ເສຍຊີວິດຂອງເຊື້ອກາຍພັນເດວຕາເທົ່ານັ້ນ. ວັນທີ 13 ມັງກອນນີ້, ທ່ານນາງງໂຣເຊນ ວາເລັນສະກີ, ຫົວໜ້າສູນປ້ອງກັນ ແລະຄວບຄຸມພະຍາດອາເມຣິກາ ໄດ້ເປີດເຜີຍຜົນການຄົ້ນຄວ້າສະບັບຫຼ້າສຸດ ໂດຍສະແດງໃຫ້ເຫັນວ່າ: ເມື່ອທຽບກັບຜູ້ຕິດເຊື້ອກາຍພັນເດວຕາ, ຄວາມສ່ຽງເສຍຊີວິດຂອງຜູ້ຕິດເຊື້ອກາຍພັນໂອມິຄຣອນໄດ້ຫຼຸດລົງ 91%.
ຍ້ອນສາເຫດດັ່ງກ່າວ, ຜູ້ຊ່ຽວຊານດ້ານການແພດຈຳນວນໜຶ່ງຂອງເອີຣົບ ແລະອາເມຣິກາ ຈຶ່ງເກີດມີຄວາມຫວັງ ຄື: ເຊື້ອກາຍພັນໂອມິຄຣອນອາດຈະເປັນ“ເຊື້ອພະຍາດໂຄວິດ-19 ສຸດທ້າຍ” ເຊິ່ງຈະເຮັດໃຫ້ເຊື້ອພະຍາດໂຄວິດ-19 ກາຍເປັນເຊື້ອທີ່ເກືອບບໍ່ມີຜົນຮ້າຍຫຍັງເລີຍ ພ້ອມທັງກ່າວວ່າ: “ໃນປີ 2022, ການແຜ່ລະບາດຂອງພະຍາດໂຄວິດ-19 ຈະສິ້ນສຸດລົງ”. ຍິ່ງໄປກວ່ານັ້ນ, ອາເມຣິກາຍັງຕັດສິນໃຈຈະຢຸດຕິການເກັບກຳສະຖິຕິຈຳນວນຜູ້ຕິດເຊື້ອພະຍາດໂຄວິດ-19 ແລະຈຳນວນຜູ້ເສຍຊີວິດຍ້ອນຕິດເຊື້ອພະຍາດດັ່ງກ່າວໃນທົ່ວປະເທດອາເມຣິກາ ນັບແຕ່ວັນທີ 2 ກຸມພາປີນີ້ເປັນຕົ້ນໄປ.
ຄວາມຈິງແລ້ວ, ເຊື້ອກາຍພັນໂອມິຄຣອນຈະເປັນ“ເຊື້ອພະຍາດໂຄວິດ-19 ສຸດທ້າຍ” ແທ້ບໍ? ຈົນມາຮອດປັດຈຸບັນນີ້, ຍັງບໍ່ທັນມີຂໍ້ມູນຄວາມຈິງດ້ານວິທະຍາສາດທີ່ໜ້າເຊື່ອຖືໄດ້ ທີ່ສາມາດເອົາມາເປັນຂໍ້ຢັ້ງຢືນເພື່ອສະໜັບສະໜູນຄວາມເຫັນແບບນີ້ ກໍເພາະວ່າ:
ກ່ອນອື່ນ, ຜູ້ຕິດເຊື້ອໂອມີຄຣອນໄດ້ເກີດມີອາການດັງບໍ່ຮູ້ກິ່ນ ແລະປອດມີຈຸດດ່າງດຳ ເຊິ່ງເປັນການຢຶນຢັນແລ້ວວ່າ: ຜົນກະທົບຂອງເຊື້ອໂອມິຄຣອນບໍ່ໄດ້ຫຼຸດລົງໃຫ້ຢູ່ໃນລະດັບທີ່ສາມາດຖືເບົາໄດ້ ດັ່ງທີ່ອາເມຣິກາກ່າວອ້າງ.
ສອງ, ຕາມຜົນການຄົ້ນຄວ້າຂອງອາເມຣິກາ, ອັດຕາເສຍຊີວິດຂອງຜູ້ຕິດເຊື້ອໂອມິຄຣອນແມ່ນຕ່ຳກວ່າຜູ້ຕິດເຊື້ອເດວຕາ, ແຕ່ນັກຄົ້ນຄວ້າບໍ່ໄດ້ພິຈາລະນາເຖິງປັດໄຈການສັກວັກຊີນຂອງຜູ້ຕິດເຊື້ອໂອມິຄຣອນ. ເຖິງວ່າການສັກວັກຊີນບາງເທື່ອບໍ່ສາມາດປ້ອງກັນໃຫ້ຄົນຕິດເຊື້ອພະຍາດໄດ້ກໍຕາມ, ແຕ່ມັນກໍສາມາດເຮັດໃຫ້ອັດຕາອາການໜັກ ແລະອັດຕາເສຍຊີວິດຫຼຸດລົງຢ່າງຫຼວງຫຼາຍ. ນອກຈາກນີ້, ເມື່ອທຽບກັບໄລຍະເບື້ອງຕົ້ນຂອງການແຜ່ລະບາດຂອງພະຍາດ ໂຄວິດ-19 ແລ້ວ, ປັດຈຸບັນນີ້, ວົງການການແພດໄດ້ສະສົມປະສົບການປິ່ນປົວຢ່າງພຽງພໍ ເຊິ່ງສາມາດບົ່ງມະຕິ ແລະປິ່ນປົວພະຍາດໄດ້ຢ່າງວ່ອງໄວ, ນີ້ກໍຄືສາເຫດທີ່ສຳຄັນທີ່ເຮັດໃຫ້ຜູ້ເປັນອາການໜັກ ແລະຜູ້ເສຍຊີວິດຫຼຸດລົງ.
ສາມ, ການປ່ອຍປະລະເລີຍໃຫ້ເຊື້ອໂອມິຄຣອນແຜ່ລະບາດ ແລະບໍ່ໃຊ້ມາດຕະການປ້ອງກັນ ແລະຄວບຄຸມຫຍັງເລີຍ ກໍອາດຈະເຮັດໃຫ້ເກີດມີເຊື້ອພະຍາດໂຄວິດ-19 ກາຍພັນຊະນິດໃໝ່ ທີ່ທັງມີຄວາມສາມາດແຜ່ລະບາດໄດ້ຢ່າງວ່ອງໄວຄືເຊື້ອໂອມິຄຣອນ ທັງມີພິດຮ້າຍແຮງຄືເຊື້ອເດວຕາ ກໍອາດເປັນໄປໄດ້.
ຕາມສະຖິຕິຫຼ້າສຸດ, ອັດຕາເສຍຊີວິດຂອງຜູ້ຕິດເຊື້ອພະຍາດໂຄວິດ-19 ຢູ່ອາເມຣິກາແມ່ນ 0,24%. ຫຼັງຈາກສັກວັກຊີນປ້ອງກັນເປັນຈຳນວນຫຼວງຫຼາຍແລ້ວ ແຕ່ກໍຍັງມີອັດຕາເສຍຊີວິດຫຼວງຫຼາຍຢູ່ ເຊິ່ງສູງກວ່າອັດຕາເສຍຊີວິດຈາກໄຂ້ຫວັດໃຫຍ່ 2,4 ເທົ່າ. ຖ້າວ່າພວກເຮົາຖືເບົາການແຜ່ລະບາດຂອງເຊື້ອໂອມິຄຣອນ, ກໍອາດຈະໄດ້ຮັບຜົນກະທົບທີ່ຮ້າຍແຮງທີ່ສຸດ.
ການແຜ່ລະບາດຂອງເຊື້ອພະຍາດໂຄວິດ-19 ຈະສິ້ນສຸດລົງຫຼືບໍ ຍັງຕ້ອງມີຂໍ້ມູນອ້າງອີງດ້ານວິທະຍາສາດທີ່ພຽງພໍ. ຖ້າວ່າມີຫຼັກຖານທາງວິທະຍາສາດທີ່ພຽງພໍທີ່ສາມາດຢືນຢັນໄດ້ວ່າ: ເຊື້ອພະຍາດໂຄວິດ-19 ທີ່ມີພິດຮ້າຍແຮງນັ້ນ ໄດ້ຖືກດັບສູນໄປຈາກໂລກນີ້ແລ້ວ, ພ້ອມດຽວກັນນັ້ນ, ມວນມະນຸດໄດ້ມີຢາປິ່ນປົວທີ່ມີປະສິດທິຜົນແລ້ວ ແລະສາມາດສ້າງພູມຕ້ານທານໄລຍະຍາວໄດ້ແລ້ວ, ພວກເຮົາຈຶ່ງສາມາດເວົ້າໄດ້ຢ່າງເຕັມຢາກເຕັມຄຳວ່າ: ການແຜ່ລະບາດຂອງພະຍາດໂຄວິດ-19 ໄດ້ສິ້ນສຸດລົງແລ້ວ.
ທີ່ຈິງແລ້ວ, ການຖືເອົາເຊື້ອໂອມິຄຣອນເປັນ “ເຊື້ອພະຍາດໂຄວິດ-19 ສຸດທ້າຍ” ເປັນພຽງແຕ່ຄວາມປາຖະໜາທີ່ດີງາມເທົ່ານັ້ນ !
ຄຳເຫັນ
0