ເພງຕາມຄຳຂໍ

(GMT+08:00) 2009-11-18 14:20:41 cri

ຊ: ສະບາຍດີ ມິດລາຍການທີ່ຮັກແພງ!

ຂ: ສະບາຍດີ ທ່ານຜູ້ຟັງທີ່ເຄົາລົບ!

ຊ: ວັນເສົາສຸດທ້າຍແລະມື້ສຸດທ້າຍຂອງເດືອນພຶດສະພານີ້ ໜຸ່ມໃຫຍ່ອາລົມດີກັບໄຊຊະນະ ກໍນຳເອົາລາຍການເພງຕາມຄຳຂໍກັບມາພົບກັບທ່ານອີກຕາມເຄີຍ ຫຼັງຈາກຄືນວັນເສົາແລ້ວນີ້ບໍ່ໄດ້ພົບກັນ.

ຂ: ເຈົ້າ ເພາະວ່າວັນເສົາແລ້ວນີ້ເປັນລາຍການພິເສດກ່ຽວກັບການກູ້ໄພແຜ່ນດິນໄຫວຢູ່ເມືອງເວີ້ນຊ່ວນ,ແຂວງເສສວນຂອງຈີນ. ພວກເຮົາຢາກສ່ອງແສງໃຫ້ມິດລາຍການຮູ້ວ່າ ສະພາບການກູ້ໄພມີເລື່ອງລາວຕ່າງໆທີ່ສະເທືອນໃຈ,ສະທ້ອນໃຈ,ຕື້ນຕັນໃຈແລະປະທັບໃຈແນວໃດແດ່, ວັນເສົາແລ້ວນີ້ ກໍເລີຍເຮັດເປັນລາຍການພິເສດ.

ຊ: ເຈົ້າ, ນັບແຕ່ເຫດການແຜ່ນດິນໄຫວຮຸນແຮງໃນຮອບ 32 ປີເກີດຂຶ້ນໃນວັນທີ 12 ເດືອນນີ້, ລາຍການຕ່າງໆຂອງ CRI ທັງລະບົບ AMແລະ FM ກໍມີການສັບຊ້ອນໃໝ່ຈຳນວນໜຶ່ງເພື່ອໃຫ້ເຂົ້າກັບບັນຍາກາດທີ່ທົ່ວປະເທດຈີນພວມທຸກໂສກແລະສະແດງຄວາມເສົ້າເສຍໃຈຕໍ່ຜູ້ໄດ້ຮັບເຄາະຮ້າຍ.

ຂ: ເຈົ້າ, ດຽວນີ້ ສະພາບການກູ້ໄພຊ່ອຍເຫຼືອປະຊາຊົນ ກໍເຮັດໄປໄດ້ຫຼາຍແລະມີປະສິດທິພາບສູງຫຼາຍ, ລາຍການຕ່າງໆຂອງ CRI ກໍເລີ່ມເຂົ້າສູ່ສະພາບປົກກະຕິ, ແຕ່ວ່າ ການລາຍງານກ່ຽວກັບການກູ້ໄພດ້ານຕ່າງໆກໍຈະສືບຕໍ່ໄປເປັນໄລຍະໄລຍະ. ລາຍການພວກເຮົາຄືນນີ້ ກໍຍັງຈະນຳເອົາບາງເລື່ອງທີ່ໜ້າຕື້ນຕັນໃຈຂອງຄວາມມີນ້ຳໃຈຂອງຄົນຈີນທີ່ຊ່ອຍເຫຼືອກັນໃນຍາມອັດຕະຄັດຂັດສົນມາເວົ້າສູ່ຟັງ ແລະເລື່ອງອື່ນໆອີກທີ່ໜ້າສົນໃຈສະຫຼັບສັບປ່ຽນກັນໄປກັບການຕອບກຳລັງແຮງໃຈຈາກມິດລາຍການແລະຈັດເພງໃຫ້ພ້ອມ ຖືກໃຈແດ່ບໍ່ຖືກໃຈແດ່ ກໍອົດສາຟັງໄປກ່ອນສຳລັບຄືນວັນເສົານີ້.

ຊ: ມາເລີ່ມຕົ້ນລາຍການຄືນນີ້ດ້ວຍເພງຈີນທີ່ມີຊື່ວ່າ:: (ເພງ)

ຂ: ຂໍຂອບໃຈມິດລາຍການລາວທີ່ຢູ່ນະຄອນຫຼວງວຽງຈັນກໍຄືແຂວງຕ່າງໆໃນທົ່ວປະເທດທີ່ເປັນກຳລັງໃຈໃຫ້ຜູ້ຈັດລາຍການຕ່າງໆຂອງ CRI . ຢາກມີຄຳເຫັນແນວໃດ? ຢາກຟັງເພງຫຍັງ? ຮ໋ວມກັບໃຜ? ສົ່ງຂໍ້ຄວາມສັ້ນໄປຫາພວກເຮົາໄດ້ທີ່ໝາຍເລກ 2430000.

ຊ: ເຈົ້າ ນັບແຕ່ເຫດການແຜ່ນດິນໄຫວເກີດຂຶ້ນຈົນມາຮອດມື້ນີ້ ກໍມີມິດລາຍການລາວຫຼາຍສິບທ່ານສົ່ງຂໍ້ຄວາມສັ້ນໄປຫາພວກເຮົາເພື່ອສະແດງຄວາມໂສກເສົ້າເສຍໃຈແລະເປັນກຳລັງໃຈໃຫ້ປະຊາຊົນຈີນຜູ້ໄດ້ຮັບເຄາະຮ້າຍ ແລະທັງຊົມເຊີຍການເຮັດວຽກກູ້ໄພຂອງຜູ້ນຳພັກລັດແລະເຈົ້າໜ້າທີ່ກູ້ໄພພາກສ່ວນຕ່າງໆຂອງຈີນທີ່ມີຄວາມສະດຸ້ງໄວຫຼາຍໃນການຊ່ອຍເຫຼືອປະຊາຊົນ. ພວກເຮົາກໍນຳເອົາຄຳເຫັນຂອງມິດລາຍການລາວບາງທ່ານມາອ່ານສູ່ຟັງ….(ເພງ)

ຊ: ທ່ານຜູ້ຟັງທີ່ຮັກແພງ! ໄລ່ມາຮອດມື້ນີ້ ເຫດການແຜ່ນດິນໄຫວຮ້າຍແຮງຢູ່ແຂວງເສສວນຂອງຈີນກໍຜ່ານໄປ 20 ມື້ພໍດີເລີຍ, ແຕ່ວ່າການກູ້ໄພກໍຍັງສືບຕໍ່ໄປ ໂດຍສະເພາະແມ່ນເນັ້ນໃສ່ການປິ່ນປົວຜູ້ໄດ້ຮັບບາດເຈັບ,ຍົກຍ້າຍຈັດສັນບ່ອນຢູ່ຊົ່ວຄາວໃຫ້ຜູ້ປະສົບໄພ,ໃຫ້ຄວາມອົບອຸ່ນດ້ານຈິດໃຈ,ເລີ່ມທຳຄວາມສະອາດຊຳລະສະສາງເຂດປະສົບໄພ,ທັງປ້ອງກັນບໍ່ໃຫ້ມີພະຍາດລະບາດທັງຄົນແລະສັດແລະວຽກອື່ນໆ.

ຂ: ການກູ້ໄພເທື່ອນີ້ ຜູ້ນຳພັກລັດກໍເອົາໃຈໃສ່ສຸດຂີດ,ທັງເບີກຈ່າຍງົບສຸກເສີນໄປແລ້ວ 19 ຕື້ກວ່າຢວນດທັງປ່ຽນກັນລົງໄປບັນຊາຊີ້ນຳການກູ້ໄພຊ່ອຍເຫຼືອປະຊາຊົນດ້ວຍຕົນເອງ; ນີ້ກໍຄືຄວາມເປັນຫ່ວງເປັນໃຍທີ່ແທ້ຈິງຂອງພັກ ລັດຖະບານຈີນ ຈົນໄດ້ຮັບການຍ້ອງຍໍສັນລະເສີນໄປທົ່ວໂລກວ່າ,ການຊ່ອຍເຫຼືອປະຊາຊົນເທື່ອນີ້ ການນຳຂອງຈີນສະດຸ້ງໄວຫຼາຍແບບທີ່ຫຼາຍປະເທດກໍຄົງຈະເຮັດໄດ້ຍາກ.

ຊ: ເຈົ້າ, ອັນນີ້ກໍຄືຄວາມເຂັ້ມແຂງແລະຄວາມພ້ອມຂອງຈີນໃນການຮັບມືກັບໄພທຳມະຊາດທີ່ເກີດຂຶ້ນແບບກະທັນຫັນ. ເຫດການເກີດແຜ່ນດິນໄຫວເທື່ອນີ້ ກໍເປັນການພິສູດໃຫ້ເຫັນຈິດໃຈຊາດ,ສະຕິຊາດຂອງປະຊາຊົນຈີນທີ່ມີສູງຫຼາຍອີກເທື່ອໜຶ່ງ. ພາຍຫຼັງເຫດການເກີດຂຶ້ນ ທຸກຄົນເປັນນ້ຳໜຶ່ງໃຈດຽວກັນ ທັງບໍລິຈາກເງິນ, ເຄື່ອງຂອງ, ເລືອດຫຼືອາສາສະໝັກ ໄປຊ່ວຍຢ່າງລົ້ນຫຼາຍ, ສາງເກັບເລືອດ(ທະນາຄານເລືອດ)ກໍຈົນເຕັມ, ຖືວ່າການສະໜອງເລືອດໃຫ້ຄົນເຈັບຢູ່ບ່ອນປະສົບໄພ ບໍ່ມີບັນຫາເລີຍ.

ຂ: CRI ເຮົາກໍບໍລິຈາກເງິນ 6 ລ້ານຢວນພຸ້ນໄດ໋ໄຊຊະນະ, ອັນນີ້ແມ່ນເງິນລວມຂອງ CRI , ແຕ່ວ່າເງິນບໍລິຈາກຂອງສ່ວນຕົວ ໄລ່ມາຮອດຕອນເຊົ້າວານນີ້ ຂຶ້ນຮອດ 5 ແສນ 7 ໝື່ນກວ່າຢວນແລ້ວໄດ໋, ແລະກໍຍັງມີຜູ້ສືບຕໍ່ບໍລິຈາກຕໍ່ໄປ ຫຼືບໍລິຈາກຕື່ມອີກກໍຍັງມີຢູ່.

ຊ: ເວົ້າເຖິງເລື່ອງການບໍລິຈາກເງິນແລ້ວ ໄຊຊະນະອ່ານພໍ້ຂ່າວໜຶ່ງ, ອ່ານແລ້ວກໍຮູ້ສຶກຕື້ນຕັນໃຈໃນນ້ຳໃຈຂອງຄົນຈີນຫຼາຍ. ຟັງເພງແລ້ວຈະເວົ້າສູ່ຟັງ. (ເພງ)

ຂ: 2 ເພງຈາກລາຍການຜ່ານໄປ. ຂອບໃຈມິດລາຍການລາວທຸກທ່ານທີ່ສົ່ງຂໍ້ຄວາມສັ້ນໄປໃຫ້ກຳລັງໃຈແກ່ປະຊາຊົນຈີນທີ່ພວມປະສົບໄພແຜ່ນດິນໄຫວຢູ່ແຂວງເສສວນ, ເມື່ອກີ້ນີ້ ໄຊຊະນະວ່າຈະເວົ້າເລື່ອງການບໍລິຈາກເງິນທີ່ໜ້າສະເທືອນໃຈໃຫ້ຟັງຊັ້ນຫວະ?

ຊ: ເຈົ້າ, ເວົ້າເຖິງການບໍລິຈາກເງິນກໍຄືເຄື່ອງຂອງຂອງຄົນຈີນ ໄລ່ມາຮອດເຊົ້າວານນີ້ ມີ 16 ຕື້ກວ່າຢວນແລ້ວໄດ໋ໜຸ່ມໃຫຍ່. ເລື່ອງທີ່ໄຊຊະນະຢາກເວົ້າສູ່ຟັງທີ່ອ່ານພໍ້ໃນຂ່າວສານຊິນຮວາ ກໍແມ່ນມີຄົນຂໍທານຜູ້ໜຶ່ງ ອາຍຸ 60 ກວ່າປີ ເຮືອນຢູ່ກໍບໍ່ມີ, ລາວຊື່ວ່າ xu chao ລາວທ່ຽວຂໍທານຢູ່ເມືອງນານກິ່ງແຂວງຈ່ຽງຊູ່. ໃນຕອນເຊົ້າວັນເສົາທີ 17 ຜ່ານມານີ້ ລາວເອົາເງິນໄປບໍລິຈາກຢູ່ສູນຮັບບໍລິຈາກ 5 ຢວນ ແລ້ວກໍໄປຂໍທານຕໍ່, ແລ້ວກໍເອົາມາບໍລິຈາກອີກ. ໃນຕອນບ່າຍເພີ່ມຂຶ້ນເປັນ 100 ຢວນ. ສື່ມວນຊົນທ້ອງຖິ່ນຮູ້ຂ່າວ ກໍລາຍງານຂ່າວນີ້, ປະຊາຊົນທົ່ວໄປກໍຮູ້ສຶກກະຕຸ້ນໃຈຕໍ່ການກະທຳຂອງລາວຫຼາຍ, ຫຼາຍຄົນກໍໄປພົບລາວຢູ່ແຄມຖະໜົນ ຍ້ອງຍໍການມີນ້ຳໃຈຂອງລາວ. ລາວເວົ້າວ່າ"ຂ້ອຍທຸກຍາກຊ່ຳນີ້ ແຕ່ຜູ້ປະສົບໄພຢູ່ເສສວນຍັງທຸກຍາກກວ່າຂ້ອຍອີກ, ຂ້ອຍຈຶ່ງຢາກຊ່ອຍຕາມຄວາມສາມາດທີ່ຂ້ອຍມີ", ສຸດທ້າຍ ມື້ນັ້ນ ລາວກໍທ່ຽວໄປຂໍທານມາບໍລິຈາກໄດ້ຕັ້ງວ່າ 340 ຢວນພຸ້ນໄດ໋ ໄລ່ເປັນເງິນກີບກໍປະມານ 4 ແສນກີບນີ້ລະ.

ຂ: ອື່! ຟັງແລ້ວ ເຖິງວ່າມັນເປັນເງິນບໍ່ຫຼາຍປານໃດສຳລັບຄົນທົ່ວໄປ, ແຕ່ສຳລັບຄົນຂໍທານແລ້ວ ມັນບໍ່ແມ່ນເລື່ອງທຳມະດາເລີຍໄດ໋ໄຊຊະນະ! ຄົນອື່ນໆກໍຍັງຊື້ງໃນນ້ຳໃຈຂອງລາວເນາະ.
ຊ: ເຈົ້າ,ມີອີກຜູ້ໜຶ່ງໄດ໋ໜຸ່ມໃຫຍ່ທີ່ໄຊຊະນະຢາກເວົ້າສູ່ຟັງ!

ຂ: ເປັນຄົນຂໍທານຫວະ?

ຊ: ບໍ່ແມ່ນ, ເປັນຄົນນັ່ງຜັດເກີບຢູ່ແຄມທາງ.

ຂ: ເລື່ອງເປັນແນວໃດເວົ້າສູ່ຟັງເບິ່ງ?

ຊ: ຜູ້ນີ້ແມ່ນຜູ້ຍິງໄວກາງຄົນນີ້ລະ, ອາຊີບລາວແມ່ນນັ່ງຜັດເກີບໃຫ້ຄົນຢູ່ແຄມຖະໜົນຂອງເມືອງຊ່ວງເຟີງຂອງແຂວງຫູນານ. ໃນວັນຈັນແລ້ວນີ້ ລາວບໍລິຈາກລາຍໄດ້ທີ່ລາວຫາໄດ້ໝົດມື້ນັ້ນ 182 ຢວນ. ເຈົ້າໜ້າທີ່ຮັບບໍລິຈາກຂອງເມືອງບອກວ່າ,"ຂ້ອຍເຫັນຜູ້ຍິງຄົນນີ້ມາປ່ອນເງິນເຂົ້າຕູ້ບໍລິຈາກຢ່າງຕ່ຳບໍ່ຫຼຸດ 10 ເທື່ອໃນມື້ນັ້ນ"

ຂ: ລາວຜັດເກີບໃຫ້ຄົນຄູ່ໜຶ່ງໄດ້ຈັກຢວນໄຊຊະນະ?

ຊ: ໄດ້ 1 ຫຼືວ່າ 2 ຢວນເທົ່ານັ້ນນ່າໜຸ່ມໃຫຍ່.

ຂ: ປັດໂທ! ເຊື່ອລາວຊິໄດ້ເງິນຮອດ 182 ຢວນ ລາວກໍຕ້ອງເຮັດວຽກໜັກແທ້ໆແລ້ວໃນມື້ນັ້ນ ຈຶ່ງຈະໄດ້ເງິນຊ່ຳນີ້.

ຊ: ແມ່ນແນວນັ້ນແລ້ວ; ເຈົ້າໜ້າທີ່ສັງເກດເຫັນວ່າຕັ້ງແຕ່ເຊົ້າລາວທຽວມາລຽນແຖວເພື່ອບໍລິຈາກເງິນເທື່ອລະ 20 ຢວນ, ແລ້ວກໍໄປຜັດເກີບຕໍ່, ໄດ້ເງິນແລ້ວ ກໍມາລຽນແຖວ, ເຮັດແນວນີ້ຈົນຮອດຄ່ຳ.

ຂ: ອື່,ຊື້ງໃນນ້ຳໃຈຂອງລາວອີ່ຫຼີ. ນີ້ລະ ຍາມຍາກຍາມອັດຕະຄັດຂັດສົນ ພີ່ນ້ອງຮ່ວມຊາດບໍ່ເຄີຍປະຖິ້ມກັນ, ເຖິງຕົນເອງຈະທຸກຍາກ ແຕ່ກໍພະຍາຍາມເຮັດທຸກຢ່າງຕາມຄວາມສາມາດຂອງຕົນ ເພື່ອຊ່ອຍເຫຼືອພີ່ນ້ອງຮ່ວມຊາດດຽວກັນ.

ມີເລື່ອງຫຍັງທີ່ໜ້າປະທັບໃຈອີກບໍ່ໄຊຊະນະ?

ຊ: ຍັງອີກເລື່ອງໜຶ່ງ,ຟັງເພງແລ້ວຈະເວົ້າສູ່ຟັງ. (ເພງ)

ຂ: ຢ່າລືມທ່ານຜູ້ຟັງ! ຢາກຟັງເພງໃດ? ຈາກລາຍການໃດ? ຮ່ວມກັບໃຜ? ມີຄຳເຫັນແນວໃດຕໍ່ລາຍການພວກເຮົາ ຫຼືຢາກສົ່ງກຳລັງໃຈໄປເຖິງປະຊາຊົນທີ່ປະສົບໄພແຜ່ນດິນໄຫວຢູ່ເສສວນ,ທ່ານສາມາດສົ່ງຂໍ້ຄວາມສັ້ນຜ່ານມືຖືໝາຍເລກ 2430000 ຫຼື ອີເມວກໍແມ່ນ: laocri@yahoo.com.cn

ຂ່າວ-ບົດທີ່ກ່ຽວຂ້ອງ

ຄຳເຫັນ

ເພງ​ຕາມ​ຄຳ​ຂໍ

ເພງຕາມຄຳຂໍ