ການສ້າງເຂດການຄ້າເສລີຈີນ-ອາຊຽນຢ່າງສຳເລັດຜົນຈະເຮັດໃຫ້ເສດຖະກິດພາກພື້ນຮັບຜົນປະໂຫຍດທັງສອງຝ່າຍ

(GMT+08:00) 2009-11-18 17:01:32 cri

ທີ່ນີ້ວິທະຍຸສາກົນແຫ່ງປະເທດຈີນ！ ທ່ານຜູ້ຟັງທີ່ເຄົາລົບ, ໃນທ້າຍເດືອນຕຸລານີ້, ກອງປະຊຸມສຸດຍອດອາຊຽນຄັ້ງທີ 15 ຈະຈັດຂຶ້ນຢູ່ໄທ. ກ່ອນຈະຈັດກອງປະຊຸມ, ທ່ານສຸລິນ ພິດສຸວັນ, ເລຂາທິການໃຫຍ່ອາຊຽນໄດ້ໃຫ້ສຳພາດຕໍ່ນັກຂ່າວCRIກ່ຽວກັບສະພາບ ການກໍ່ສ້າງເຂດການຄ້າເສລີຈີນ-ອາຊຽນ. ທ່ານສຸລິນກ່າວວ່າ, ການສ້າງເຂດການຄ້າເສລີຈີນ-ອາຊຽນແມ່ນມີຜົນປະໂຫຍດສອງຝ່າຍ.

ວັນທີ 15 ສີງຫານີ້, ໃນກອງປະຊຸມລັດຖະມົນຕີການຄ້າຈີນ-ອາຊຽນຄັ້ງທີ່ 8 ທີ່ຈັດຂຶ້ນຢູ່ບາງກອກຂອງໄທ, ຈີນແລະ 10 ປະເທດສະມາຊິກອາຊຽນໄດ້ເຊັນ" ສັນຍາການລົງທຶນ"ຂອງເຂດການຄ້າເສລີຈີນ-ອາຊຽນ. ນີ້ໝາຍຄວາມວ່າສອງຝ່າຍໄດ້ສຳເລັດການເຈລະຈາຕົ້ນຕໍຂອງສັນຍາເຂດການຄ້າເສລີຈີນ-ອາຊຽນ, ເຂດການຄ້າເສລີຈະສ້າງສຳເລັດຢ່າງຮອບດ້ານໃນປີ 2010 ຕາມເວລາກຳນົດ. ທ່ານສຸລິນກ່າວວ່າ, ການກໍ່ສ້າງເຂດການຄ້າເສລີປັດຈຸບັນໄດ້ເຂົ້າສູ່ໄລຍະສຸດທ້າຍແລ້ວ, ການຮ່ວມມືດ້ານເສດຖະກິດລະຫວ່າງຈີນກັບອາຊຽນພວມນັບມື້ນັບໃກ້ຊິດກັນ.

"ຈີນໄດ້ກາຍເປັນຄູ່ການຄ້າໃຫຍ່ອັນດັບ 3 ຂອງອາຊຽນຮອງຈາກຍີ່ປຸ່ນແລະສະຫະພາບເອີລົບ. ຍອດມູນຄ່າການຄ້າລະຫວ່າງຈີນກັບອາຊຽນໄດ້ເພີ່ມຂຶ້ນປະມານ 30% ຕໍ່ປີ, ປະເທດສະມາຊິກອາຊຽນຕ່າງໆລ້ວນແຕ່ຮູ້ສຶກເພິ່ງພໍໃຈຕໍ່ການຮ່ວມມືແລະການເຕີບໂຕຂອງການຄ້າກັບຈີນ."

ທ່ານສຸລິນກ່າວວ່າ, ພາຍໃຕ້ສະພາບການທີ່ເກີດວິກິດການການເງິນໂລກ, ການສ້າງເຂດການຄ້າເສລີສຳເລັດແມ່ນມີຜົນດີຕໍ່ການຊ່ອຍຊູຍູ້ໜຸນກັນລະຫວ່າງຈີນກັບອາຊຽນ, ຈະເພີ່ມຄວາມສາມາດດ້ານການຕໍ່ຕ້ານຜົນກະທົບຈາກພາຍນອກແລະແກ້ໄຂວິກິດການການເງິນຂອງສອງຝ່າຍ.

"ຄຽງຄູ່ກັບຈີນກາຍເປັນອົງກອນເສດຖະກິດໃຫຍ່ອັນດັບ 3 ຂອງໂລກ,ການຮ່ວມມືແລະການພົວພັນທີ່ແໜ້ນແຟ້ນກວ່າເກົ່າລະຫວ່າງຈີນກັບອາຊຽນຈະເພີ່ມບົດບາດຂອງພວກຂ້າພະເຈົ້າທີ່ມີຕໍ່ເສດຖະກິດໂລກ.ຕົ້ນທຶນຂອງຜະລິດຕະພັນພວກຂ້າພະເຈົ້າຈະຫຼຸດລົງ,ການສົ່ງອອກຜະລິດຕະພັນຈະມີປະສິດທິພາບສູງກວ່າເກົ່າ.ອາຊຽນຈະສະໜອງຕະຫຼາດທີ່ກວ້າງຂວາງໃຫ້ຈີນ,ຊັບພະຍາກອນໃນອາຊຽນຈະໃຫ້ການສະໜັບສະໜູນອັນແຂງແຮງແກ່ການພັດທະນາອຸດສາຫະກຳຂອງຈີນ,ສ່ວນວິທະຍາສາດເຕັກໂນໂລຊີແລະແຮງງານທີ່ລາຄາຕ່ຳລະມີເຕັກນິກສູງຂອງຈີນແມ່ນສິ່ງທີ່ບັນດາປະເທດອາຊຽນຕ້ອງການໃນການພັດທະນາອຸດສາຫະກຳ.ອາດເວົ້າໄດ້ວ່າ,ເສດຖະກິດສອງຝ່າຍແມ່ນຊ່ວຍຊູຍູ້ໜູນກັນ."

ທ່ານສຸລິນ ພິດສຸວັນບອກນັກຂ່າວວ່າ,ຜົນປະໂຫຍດໂດຍກົງທີ່ສຸດທີ່ເຂດການຄ້າເສລີນຳມາໃຫ້ຈີນແລະອາຊຽນນັ້ນກໍຄືໄດ້ຫຼຸດອຸປະສັກທາງການຄ້າໃຫ້ຕ່ຳລົງ.ພ້ອມກັນນັ້ນ,ຍັງໝາຍຄວາມວ່າ,ວິສາຫະກິດທັງໝົດໃນເຂດການຄ້າເສລີຈະຮັບການທົດສອບຈາກຕະຫຼາດ,ເຄົາລົບຫຼັກການທີ່ຜູ້ໃດເຂັ້ມແຂງຜູ້ນັ້ນຊະນະ. ທ່ານສຸລິນເຫັນວ່າ,ການສ້າງເຂດການຄ້າເສລີແມ່ນທ່າອຽງຫຼັກ,ວິສາຫະກິດຂອງປະເທດຕ່າງໆລ້ວນແຕ່ຄວນກຽມພ້ອມ.

"ການສ້າງເຂດການຄ້າເສລີໃຫ້ສຳເລັດຜົນຈະເຮັດໃຫ້ມີການປັບປຸງ,ຈະສ້າງຜົນກະທົບຕໍ່ຂະແໜງການຈຳນວນໜຶ່ງທີ່ຂາດກຳລັງແຂ່ງຂັນ.ແຕ່ລັດຖະບານຈະຊ່ວຍຂະແໜງການເຫຼົ່ານີ້ດຳເນີນການປັບປຸງແລະປະຕິຮູບໃນໄລຍະຫັນປ່ຽນດັ່ງກ່າວ.ນີ້ແມ່ນສິ່ງທີ່ວິສາຫະກິດຂອງຈີນແລະຂອງບັນດາປະເທດອາຊຽນຕ້ອງປະເຊີນ,ຍັງແມ່ນພາກສ່ວນໜຶ່ງຂອງເສດຖະກິດພາກພື້ນເຊື່ອມໂຍງເຂົ້າກັນ."

ທ່ານສຸລິນຍັງກ່າວວ່າ,ການສ້າງເຂດການຄ້າເສລີໃຫ້ສຳເລັດຜົນຈະສ້າງຜົນປະໂຫຍດແທ້ຈິງໃຫ້ແກ່ປະຊາຊົນທີ່ຢູ່ພາກພື້ນແຫ່ງນີ້.ຈາກນີ້ 2 ເດືອນປາຍ,ຜະລິດຕະພັນ 90% ຂຶ້ນໄປຂອງຈີນແລະອາຊຽນຈະປອດພາສີ.ປະຊາຊົນທີ່ຢູ່ໃນເຂດການຄ້າເສລີຈະສາມາດຊື້ສິນຄ້າຂອງປະເທດຕ່າງໆໃນເຂດການຄ້າເສລີຢ່າງສະດວກກວ່າເກົ່າແລະດ້ວຍລາຄາຕ່ຳກວ່າເກົ່າ.ໃນທົ່ວເຂດການຄ້າເສລີ,ການຈໍລະຈອນຂອງແຮງງານ,ວັດຖຸແລະທຶນຈະໄວກວ່າເກົ່າ,ການໄປມາຫາສູ່ກັນລະຫວ່າງປະເທດຕ່າງໆກໍ່ຈະແໜ້ນແຟ້ນຂຶ້ນກວ່າເກົ່າ.

ຂ່າວ-ບົດທີ່ກ່ຽວຂ້ອງ

ຄຳເຫັນ