|
|
||
ເຊຈີ່ຊຽນ ນັກຮ້ອງນ້ອງໃໝ່ຂອງວົງການເພງສະໄໝນິຍົມແຜ່ນດິນໃຫຍ່ຈີນສູ່ຟັງ. ປີ2005,ເຊຈື່ຊຽນໄດ້ພົ້ນເດັ່ນຂຶ້ນຈາກລາຍການປະກວດນັກຮ້ອງທາງໂທລະພາບ,ຕໍ່ມາ,ລາວໄດ້ສ້າງຜົນສຳເລັດດີເດັ່ນໃນວົງການເພງໂດຍອາໄສອາລະບ້ຳທີ່ໃສ່ຊື່ຂອງຕົນ,ມີຍອດຈຳໜ່າຍສູງທັງໄດ້ຮັບຄວາມນິຍົມຊົມຊອບຫຼາຍ.ສ່ວນຄວາມສາມາດຂອງເຊຈື່ຊຽນກໍ່ໄດ້ຮັບການຢືນຢັນຈາກຜົນງານເພງທີ່ລາວແຕ່ງເອງຄືເພງ ຫິມະຕົກໃນໃຈ.ຈົນຮອດປັດຈຸບັນ,ເພງນີ້ກໍ່ຍັງຢູ່ໃນອັນດັບສູງຂອງ ການຈັດອັນດັບເພງດັງຈີນສະໄໝນິຍົມແລະການຈຳໜ່າຍສຽງໂທລະສັບມືຖື.
ເດືອນກໍລະກົດປີ2007,ເຊຈື່ຊຽນໄດ້ອອກອາລະບ້ຳຊຸດທີສອງທີ່ມີຊື່ວ່າ ເຈົ້າຍັງສະບາຍດີບໍ່? ອັນໄດ້ສະແດງໃຫ້ເຫັນ ສະເໜ່ຂອງເຊຈື່ຊຽນໃນການຮ້ອງເພງແລະແຕ່ງເນື້ອຮ້ອງທຳນອງເພງອີກ.
ເພງຊູຣິສ(Zurich)ໃນເມື່ອກ່ອນ ທີ່ຮ້ອງໂດຍເຊຈື່ຊຽນ. ສຽງເລີ່ມຕົ້ນຂອງເພງທີ່ເປັນສຽງແກພື້ນເມືອງສະກອດແລນໄດ້ນຳພາຜູ່ຟັງໄປສູ່ປະເທດເອີລົບທີ່ສວຍງາມ.ຈັງຫວະທີ່ມີເອກະລັກເອີລົບໄດ້ວາດພາບຄວາມອາໄລອາວອນເຖິງໄລຍະທີ່ຮຽນຢູ່ຊູແອັດເມື່ອຫຼາຍປີກ່ອນຂອງເຊຈີ່ຊຽນ.ໄປພ້ອມໆກັບດົນຕີທີ່ອອນຊອນໃຈ,ພວກເຮົາມາພ້ອມກັນກ້າວເຂົ້າສູ່ຕົວເມືອງທີ່ງຽບສະຫງົບ,ພ້ອມກັນຫວນຄືນຄວາມຮັກໄວໜຸ່ມທີ່ໂຣແມນຕິກຕອນຢູ່ເມືອງຊູຣີສຂອງເຊຈື່ຊຽນ.
ປີ2006,ອາລະບ້ຳຊຸດທຳອິດຂອງເຊຈື່ຊຽນຂາຍດີທີ່ສຸດ,ອັນໄດ້ເຮັດໃຫ້ລາວມີຊື່ສຽງຂຶ້ນຢ່າງວ່ອງໄວ.ຄຳເຊີນຖ່າຍທຳສະປັອດໂຄສະນາສິນຄ້າແລະລາງວັນດົນຕີຕ່າງໆ,ບໍ່ພຽງແຕ່ນຳເອົາຄວາມມ່ວນຊື່ນແລະຄວາມຫຍຸ້ງນຳວຽກງານຫຼວງຫຼາຍມາໃຫ້ແກ່ເຊຈື່ຊຽນເທົ່ານັ້ນ,ແຕ່ມັນຍັງໄດ້ນຳເອົາຄວາມກົດດັນທີ່ບໍ່ເຄີຍມີມາກ່ອນມາໃຫ້ແກ່ລາວ.ຈະແຕ່ງເພງທີ່ມ່ວນກວ່າເກົ່າແນວໃດ?ຜະລິດອາລະບ້ຳຊຸດທີສອງໃຫ້ດີແນວໃດ? ນີ້ໄດ້ກາຍເປັນບັນຫາໜັກໃຈທີ່ສຸດສຳລັບເຊຈື່ຊຽນ.ເຄີຍມີໄລຍະໜຶ່ງ,ພາລະດ້ານຈິດໃຈອັນໜັກໜ່ວງນີ້ເຮັດໃຫ້ລາວຈົນກິນບໍ່ແຊບນອນບໍ່ຫຼັບ,ບໍ່ມີສະມາທິແຕ່ງເນື້ອຮ້ອງ ທຳນອງເພງ,ເປັນເວລາດົນສົມຄວນກໍ່ບໍ່ສາມາດຜະລິດຜົນງານເພງທີ່ດີໄດ້.ເມື່ອຄິດຄັກໆແລ້ວ,ເຊຈື່ຊຽນຈິ່ງຕັດສິນໃຈນຳເອົາຜົນງານແລະແຮງກົດດັນວາງໄວ້ຢູ່ບ່ອນໜຶ່ງ,ແລ້ວເລີ່ມຕົ້ນແຕ່ຫົວທີຄືນໃໝ່.ໃນເວລາທີ່ບໍ່ຄິດແຕ່ແຕ່ງເພງເພື່ອໃຫ້ດີກວ່າເກົ່ານັ້ນ,ແຮງບັນດານໃຈໄດ້ປະກົດຂຶ້ນໃນສະໝອງຢ່າງບໍ່ຂາດສາຍ,ຜົນງານເພງທີ່ເຊຈີ່ຊຽນແຕ່ງນັ້ນຍິ່ງຕິດແທດຕົວຈິງແລະຊາບຊຶ້ງໃຈກວ່າເກົ່າ.ຕໍ່ໄປຈະໃຫ້ຟັງເພງທີ່ເຊຈື່ຊຽນແຕ່ງເນື້ອຮ້ອງ ທຳນອງເພງເອງຄື ເພງ ຕັດສິນຄວາມຮັກ .ທຳນອງr&b ທີ່ສະບາຍອາລົມທັງມີບັນຍາກາດຊຶ້ງໆເສົ້າໆ,ເນື້ອຮ້ອງທີ່ງ່າຍໆໄດ້ບັນລະຍາຍຄວາມໂດດດ່ຽວປ່ຽວພອຍ ພາຍຫຼັງແຍກທາງກັນ.
ໃນອາລະບ້ຳເຈົ້າຍັງສະບາຍດີບໍ່? ເກືອບໝົດທຸກຜົນງານເພງລ້ວນແຕ່ແມ່ນເຊຈີ່ຊຽນເປັນຜູ່ແຕ່ງເນື້ອຮ້ອງແລະທຳນອງເພງ.ໃນດ້ານທຳນອງເພງ,ນອກຈາກr&bທີ່ຕົນເອງຖະນັດແລ້ວ,ເຊຈື່ຊຽນຍັງໄດ້ທົດລອງແນວເພງແບບສະບາຍອາລົມແລະເພງຮິບຮັອບ,ໃນດ້ານການຄຸມສຽງຮ້ອງແລະໃສ່ອາລົມ,ເຊຈື່ຊຽນເຮັດໄດ້ດີຫຼາຍເມື່ອທຽບກັບເມື່ອກ່ອນ.
ທີ່ທ່ານພວມຟັງຢູ່ນີ້ແມ່ນເພງ ທີ່ແຕ່ງໂດຍເຊຈີ່ຊຽນຄືເພງເຈົ້າຍັງສະບາຍດີບໍ່?.ໃນເວລາທີ່ຄວາມຮັກທີ່ອົບອຸ່ນແລະຈິງໃຈໃກ້ຈະບິນຈາກໄປ,ຄົນເຮົາມັກສະແດງອຸກອັ່ງຮ້ອນຮົນເຈັບປວດໃຈ.ແຕ່ໃນສຽງເພງຂອງເຊຈື່ຊຽນ,ຜູ່ຟັງຊ້ຳພັດສຳຜັດກັບການຖະໜຸຖະໜອມຄວາມຊົງຈຳທີ່ດີໆແລະຄວາມອວຍພອນຕໍ່ທີ່ຮັກໃນອະດີດ.ອັນນີ້ກໍ່ສະແດງໃຫ້ເຫັນວ່າຜູ່ຮ້ອງມີຄວາມເຂົ້າໃຈອັນເລິກເຊິ່ງຕໍ່ຄວາມຮັກ.
ຕໍ່ໄປຈະໃຫ້ຟັງເພງ ຖິ້ມແພ່ມົນ ເພງໃນອາລະບ້ຳຊຸດໃໝ່ຂອງເຊຈື່ຊຽນ.ຖິ້ມແພມົນ ແມ່ນເກມເດັກນ້ອຍຊະນິດໜຶ່ງຢູ່ຈີນ.ເດັກນ້ອຍຫຼາຍຄົນນັ່ງອ້ອມເປັນວົງ,ໃຫ້ຜູ່ໜຶ່ງແລ່ນອ້ອມວົງແລະຖິ້ມແພມົນຢູ່ຫຼັງຂອງຜູ່ຮ່ວມວົງຜູ່ໃດຜູ່ໜຶ່ງ.ຜູ່ທີ່ຮູ້ຕົວວ່າໄດ້ຜ້າ ກໍ່ຈະລຸກຂຶ້ນໄລ່ຜູ່ຖິ້ມແພມົນ,ຖ້າແລ່ນທັນກ່ອນລາວແລ່ນອ້ອມວົງແລ້ວນັ່ງລົງບ່ອນເກົ່າ,ກໍຖືວ່າຊະນະ.ໃນເວລາຫຼິ້ນເກມນີ້,ພວກເດັກນ້ອຍຍັງຮ້ອງເພງເດັກທີ່ຊື່ວ່າ ຖິ້ມແພມົນໄປພ້ອມ.ສ່ວນເພງຖິ້ມແພ່ມົນ ຂອງເຊຈື່ຊຽນກໍ່ແມ່ນຮຽບຮຽງດັດແປງມາຈາກເພງເດັກທີ່ຄົນຈີນໃຜໆກໍ່ຮູ້ຈັກກັນ.ຈັງຫວະທີ່ອົບອຸ່ນພາໃຫ້ຄົນຫວນຄືນເຖິງຊີວິດໃນໄວເດັກທີ່ສວຍງາມ.
ອີກເພງໜຶ່ງຂອງເຊຈື່ຊຽນຄື ເພງຫິມະຕົກອີກແລ້ວ,ເພງນີ້ແມ່ນເພງຕໍ່ເນື່ອງຂອງເພງຫິມະຕົກໃນໃຈ ເພງໃນອາລະບ້ຳຊຸດທຳອິດຂອງເຊຈື່ຊຽນ.ປີ2006,ເພງ ຫິມະຕົກໃນໃຈໄດ້ຮັບຄວາມນິຍົມຊົມຊອບຈາກແຟນເພງທັງຫຼາຍ,ແລະຍັງໄດ້ຮັບລາງວັນ10ເພງດັງtop10ທີ່ໄດ້ຮັບຄວາມນິຍົມສູງສຸດປະຈຳປີ2006.ໂດຍອາໄສ ເພງນີ້,ເຊຈີ່ຊຽນຊິງໄດ້ລາງວັນນັກຮ້ອງຊາຍທີ່ໄດ້ຮັບຄວາມນິຍົມສູງສຸດໃນພິທີມອບລາງວັນດົນຕີຫຼາຍໆເທື່ອໃນປີນັ້ນ.ສະນັ້ນ,ໃນອາລະບ້ຳຊຸດໃໝ່,ເຊຈີ່ຊຽນໄດ້ແຕ່ງເພງ"ຫິມະຕົກອີກແລ້ວ"ເພື່ອຕອບແທນບຸນຄຸນການສະໜັບສະໜູນຂອງແຟນເພງ.ຕອນທີ່ເພງນີ້ຫາກໍ່ປະກົດຢູ່ເທິງອິນເຕີເນັດເປັນເທື່ອທຳອິດ,ພາຍໃນບໍ່ເທົ່າໃດອາທິດກໍ່ຂຶ້ນຄອງອັນດັບທີຫ້າຂອງການຈັດ10ອັນດັບເພງດັງຈີນສະໄໝນິຍົມ.ອັນໄດ້ພິສູດອີກເທື່ອໜຶ່ງໃຫ້ເຫັນຄວາມສາມາດແລະອິດທິພົນຂອງເຊຈື່ຊຽນໃນວົງການເພງຈີນ.
© China Radio International.CRI. All Rights Reserved. 16A Shijingshan Road, Beijing, China. 100040 |