 |
|
|
|||
| |
 |
|
||||||
 |
||
|
||
|
||
|
||
|
||
|
ສະບາຍດີທ່ານຜູ້ຟັງ, ເຖິງເວລານີ້ທຸກໆວັນພຸດ, ແສງແກ້ວກໍ່ໄດ້ນຳເອົາລາຍການດົນຕີໃນແຜ່ນຟິມມາພົບກັບທ່ານເປັນປະຈຳ. ມື້ນີ້, ແສງແກ້ວຈະເລົ່າເຖິງລະຄອນໂທລະພາບຫຼາຍເລື່ອງກ່ຽວກັບການຕໍ່ຕ້ານສາຍລັບຂອງຝ່າຍສັດຕູກ່ອນແລະຫຼັງການປົດປ່ອຍປະເທດຈີນ.
ລະຄອນໂທລະພາບ"ໜ່ວຍສາຍລັບເລກ 5 ແມ່ນເລື່ອງນັກສືບຕໍ່ຕ້ານຍີ່ປຸ່ນທີ່ມີເລື່ອງຈິງເປັນເບື້ອງຫຼັງ, ເຊິ່ງໄດ້ວາດພາບພາຍຫຼັງ"ເຫດການຂົວລູໂກ່ວເມື່ອປີ 1937 , ນາງສະມາຊິກໃຕ້ດິນຂອງພັກກອມມູນິດຈີນກັບຊາວໜຸ່ມຮັກຊາດ 4 ຄົນທີ່ກັບມາຈາກຕ່າງປະເທດ ປະກອບເປັນ"ໜ່ວຍສາຍລັບເລກ 5"ຢ່າງລັບໆ, ເພື່ອສູ້ກັບນັກສືບຍີ່ປຸ້ນ ອົງການນັກສືບຂອງກອງບັນຊາການສາລະວັດທະຫານຍີ່ປຸ່ນແລະອົງການສາຍລັບຂອງລັດຖະບານຫຸ່ນວ່າງຈິ່ງເວີ້ຍດ້ວຍສະຕິປັນຍາແລະຄວາມກ້າຫານ. ເພງເອກກ່ອນຟ້າສະຫວ່າງ ຍິ່ງໄດ້ສະແດງໃຫ້ເຫັນລູກຫຼານວິລະຊົນທີ່ມີສະຕິປັນຍາແລະຄວາມກ້າຫານເຫຼົ່ານີ້ຢ່າງມີຊີວິດຊີວາ:
ເນື້ອເພງມີຄວາມໝາຍວ່າ: ທາສີດຳໃສ່ໜ້າ, ເພື່ອບັງພາງຕົວເອງ, ໃຫ້ແສງໄຟນິອອນກາຍເປັນຊຸດປອມຕົວ, ກ່ອນຟ້າສະຫວ່າງ, ຂ້ອຍກັ້ນໃຈ, ລີ້ຢູ່ໃນຫົວໃຈຂອງສັດຕູ. ສຸດທີ່ຮັກ, ເຈົ້າຢ່າໂສກເສົ້າເລີຍ, ກ່ອນຈະຈາກໄປບໍ່ມີເວລາສັ່ງລາ, ຂໍໃຫ້ຄວາມສະຫງົບຂອງບ້ານເມືອງບອກຄວາມແທ້ຈິງໃຫ້ເຈົ້າຮູ້. ສຸດທີ່ຮັກ, ເຈົ້າຢ່າໂສກເສົ້າເດີ້, ຂໍຈົ່ງຍິ້ມໃສ່ແດ່ເພື່ອເພິ່ມຄວາມກ້າຫານແກ່ຂ້ອຍ, ຈອບຍິງປືນຈາກດ້ານຫຼັງໃສ່ບ່ອນທີ່ຄຽດແຄ້ນ, ແສງຕາເວັນຈາກເສັ້ນຂອບຟ້າຈະປຸກຄວາມຝັນໃຫ້ຕື່ນ.
ທ່ານຜູ້ຟັງ, ທີ່ຟັງມານັ້ນແມ່ນເພງທີ່ມີຊື່ດຽວກັນກັບລະຄອນໂທລະພາບເລື່ອງວິລະຊົນ. ພໍ່ແມ່ຂອງສອງເອື້ອຍນ້ອງເຊ້ຍຊີງກັບເຊ້ຍຢູແມ່ນສະມາຊິກພັກໃຕ້ດິນ. ໃນເວລາສົງຄາມຕໍ່ຕ້ານຍີ່ປຸ່ນຈະໄດ້ຮັບໄຊຊະນະ, ອົງການຂ່າວລັບຂອງພັກກົກມີນຕັງໄດ້ລັກພາຕົວເຊ້ຍຢູຜູ້ເປັນນ້ອງໄປ, ເຮັດໃຫ້ສອງເອື້ອຍນ້ອງຕ້ອງພາກຈາກກັນ.
ທ້າຍຊຸມປີ 1950, ເຊ້ຍຊີງຖືກໜ່ວຍພັກສົ່ງໄປເຮັດວຽກຢູ່ຮົງກົງ. ໃນເວລາຊົ້ງສຽວທ່າວ ຜົວຂອງນາງຄົບຫາກັບສາຍລັບໄຕ້ຫວັນນັ້ນ, ໄດ້ຖືກສາຍລັບຕິດຕາມ. ເພື່ອຮັກສາຄວາມປອດໄພ, ໜ່ວຍພັກຕົກລົງໃຫ້ນາງເຊ້ຍຊີງກັບຜົວເມືອແຜ່ນດິນໃຫຍ່ນຳກັນ. ແຕ່ໃນເວລາຜ່ານດ່ານ, ສາຍລັບໄຕ້ຫວັນທີ່ປ່ວງບ້າສ້າງຄວາມວຸ້ນວາຍ, ຍິງໃສ່ຊົ້ງສຽວທ່າວຈົນຕາຍ. ເຊ້ຍຊີງເບີ່ງຜົວເສຍຊີວິດໄປໃນອ້ອມອົກຕົນເອງ, ແຕ່ບໍ່ສາມາດເຮັດຫຍັງໄດ້.
ເມື່ອກັບເມືອຮອດກວາງໂຈວ, ເຊ້ຍຊີງຂໍໄປເຮັດວຽກຢູ່ກົມປ້ອງກັນຄວາມສະຫງົບ. ຢູ່ໃນໂຮງຮຽນອະນຸບານຂອງລູກສາວ, ນາງໄດ້ພົບເຫີເມີຍ ຄູສອນລູກສາວທີ່ຫາກໍ່ສັບຊ້ອນມາ. ໜ້າຕາແລະວາດຍິ້ມຂອງເຫີເມີຍ, ເຮັດໃຫ້ເຊ້ຍຊີງຮູ້ສຶກວ່ານາງອາດຈະແມ່ນເຊ້ຍຢູ ນ້ອງສາວຂອງຕົນທີ່ຫາຍສາບສູນໄປຫຼາຍປີ. ແຕ່ຊົ້ງທ່າວ ພໍ່ປູ່ຂອງນາງທີ່ເຄີຍເຮັດວຽກກັບພໍ່ແມ່ຂອງນາງ ພັດບໍ່ເຫັນດີນຳຄວາມຄິດຂອງເຊ້ຍຊິງ, ເຫັນວ່າ, ເຊ້ຍຢູຖືກສາຍລັບພັກກົກມີນຕັງຂ້າຕາຍດົນແລ້ວ, ເຫີເມີຍບໍ່ອາດແມ່ນນ້ອງສາວຂອງເຊ້ຍຊີງ. ໃນຂະນະນີ້, ຄວາມລັບຂອງລູກສອນໄຟນຳວິຖີ DH ທີ່ໂຮງງານ 326 ຮັບຜິດຊອບຄົ້ນຄວ້າຜະລິດນັ້ນຖືກນັກສືບໄຕ້ຫວັນລັກໄປ, ຜູ້ນຳຂອງກົມປ້ອງກັນຄວາມສະຫງົບໄດ້ສັ່ງໃຫ້ທຳລາຍກໍລະນີນີ້ຢ່າງວ່ອງໄວ. ພາຍໃຕ້ການນຳພາຂອງໂຈ່ວຕ້ານຽນ ຫົວໜ້າພະແນກ, ເຊ້ຍຊີງໄດ້ເຂົ້າຮ່ວມການຕໍ່ສູ້ກັບນັກສືບສັດຕູ. ຜ່ານການສືບສວນວິເຄາະຢ່າງລະອຽດຮອບຄອບ, ເຊ້ຍຊີງກັບສະຫາຍໃນໜ່ວຍງານໄດ້ຈັບສັດຕູທີ່ລີ້ຊ່ອນໃນທີ່ສຸດ, ແລະຍາດເອົາເອກະສານລັບຄືນມາ. ແຕ່ບໍ່ເປັນຈັ່ງບຸນ, ເຊ້ຍຊີງປະກົດເຫັນວ່າ, ເຫີເມີຍ ໜຶ່ງໃນສາຍລັບສັດຕູແມ່ນເຊ້ຍຢູ ນ້ອງສາວຄີງໆຂອງຕົນແທ້ໆ. ໃນປີນັ້ນ, ເຊ້ຍຢູຖືກອົງການຂ່າວລັບຂອງພັກກົກມີນຕັງລັກພາຕົວໄປໄຕ້ຫວັນ, ທັງຖືກຝຶກໃຫ້ເປັນສາຍລັບແລ້ວສົ່ງກັບເມື່ອແຜ່ນດິນໃຫຍ່. ເຊີນຟັງເພງດອກໄມ້ຝາແຝດ, ຂັບຮ້ອງໂດຍນາງຈ່ຽງຊ່ານ ນາງເອກທີ່ສະແດງເປັນເຊ້ຍຊີງ.
ລະຄອນໂທລະພາບເລື່ອງຄຳສາບານທີ່ມິດງຽບ ໄດ້ເລົ່າເລື່ອງທີ່ເກີດຂຶ້ນໃນລະດູໜາວຂອງຊຸມປີ 1960. ຜູ້ຊ່ຽວຊານເຄື່ອງຈັກແມ່ແຮງກ່ຳປັ່ນທີ່ອາໄສຢູ່ທະວີບເອີລົບ, ຜ່ານຮົງກົງກັບເມື່ອປະເທດເພື່ອຊ່ອຍກອງທັບເຮືອສ້າງກ່ຳປັ່ນດຳນ້ຳແບບໃໝ່, ພັດເກືອບຖືກສາຍລັບໄຕ້ຫວັນລອບຄາດຕະກຳ. ສະນັ້ນ, ການທົດສອບປັນຍາແລະຄວາມກ້າຫານໄດ້ດຳເນີນຢູ່ໃຕ້ສະພາບທີ່ຕ່າງຝ່າຍຕ່າງເຮັດໜ້າເສີຍໆຄືບໍ່ມີຫຍັງເກີດຂຶ້ນ. ສີຈືເຟີ່ງ ຜູ້ຊ່ຽວຊານຕ້ານນັກສືບຂອງຝ່າຍເຮົາພ້ອມກັນກັບລານເມີຍສີນ ແລະໂລ້ຈ້ານ ສະມາຊິກໜ່ວຍງານຂອງເພີ່ນ ໄດ້ມ້າງກົນອຸບາຍແຮ້ວຂອງສັດຕູເທື່ອແລ້ວເທື່ອອີກ ດ້ວຍຄວາມຫຼັກແຫຼມແລະຄວາມກ້າຫານທີ່ລື່ນໝູ່. ໃຊ້ຍຸດທະວິທີແລະເລ່ຫຼ່ຽມຕ້ານນັກສືບຕ່າງໆ, ສຸດທ້າຍໄດ້ຄົ້ນພົບສາຍລັບໄຕ້ຫວັນທີ່ລີ້ຊ່ອນຢູ່ພາຍໃນຂອງເຮົາ. ເຊີນຟັງເພງ wei le shui ເພື່ອໃຜ? ເພງປະກອບໃນລະຄອນ.
ເນື້ອເພງມີຢູ່ວ່າ: ຂ້ອຍຮູ້ວ່າເຈົ້າແຫງນໜ້າຂຶ້ນ, ນ້ຳຕາອັ່ງເບົ້າ, ຂ້ອຍຮູ້ວ່າຮອຍຍິ້ມຂອງເຈົ້າໝົ່ນໜອງແລ້ວ, ຢູ່ໃນສາຍລົມ, ສາຍຕາຂອງຂ້ອຍຕິດຕາມເຈົ້າຕະຫຼອດ, ຂ້ອຍບໍ່ຮູ້ວ່າເຈົ້າເຮັດແບບນີ້ເພື່ອໃຜ, ຮູ້ແລ້ວວ່າເຈົ້າຈະບໍ່ຫຼຽວກັບຄືນ, ນ້ຳຕາກໍ່ບໍ່ຕົກ, ຮູ້ແລ້ວວ່າຄວາມເວົ້າຂອງເຈົ້າບໍ່ມີການກິນແໜງ, ຄວາມຄິດຮອດຂອງຂ້ອຍບໍ່ມີວັນຫ່ຽວແຫ້ງຈັກເທື່ອ, ຂ້ອຍບໍ່ຮູ້ວ່າເຈົ້າເຮັດແບບນີ້ເພື່ອໃຜ, ຊວງເອິກຂອງເຈົ້າບໍ່ໃຫ້ຂ້ອຍເອື່ອຍອີງອີກແລ້ວ.
ລະຄອນໂທລະພາບເລື່ອງສຳເນົາດອກເມີຍ ແມ່ນຮຽບຮຽງຕາມເລື່ອງພັກດອກເມີຍ ເຊິ່ງເປັນນະວະນິຍາຍໃນຊຸມປີ 1970, ເລົ່າເລື່ອງໃນໄລຍະຫາກໍ່ສ້າງຕັ້ງປະເທດ, ອົງການສາຍລັບພັກກົກມີນຕັງທີ່ລີ້ຢູ່ນະຄອນຈູງກິ່ງ, ລົງເຟີຍ ພະນັກງານປ້ອງກັນຄວາມສະຫງົບຈີນໄດ້ຕີເຂົ້າອົງການດອກເມີຍ ເຊິ່ງເປັນອົງການສາຍລັບຂອງສັດຕູ, ທັງຕໍ່ສູ້ກັບດອກເມີຍ 5 ດອກທີ່ເປັນສາຍລັບສັດຕູ ຊັ້ນຫົວກະທິນັ້ນດ້ວຍສະຕິປັນຍາແລະຄວາມກ້າຫານ. ເຊີນຟັງເພງຮັກຂ້ອຍເທື່ອທີເທົ່າໃດ ເພງປະກອບໃນລະຄອນ.
ເອົາລະ ທ່ານຜູ້ຟັງ, ລາຍການດົນຕີໃນແຜ່ນຟິມມື້ນີ້ຂໍຈົບລົງທໍ່ນີ້, ຂອບໃຈທ່ານທີ່ຮັບຟັງ, ສະບາຍດີ.
 |
 |
| © China Radio International.CRI. All Rights Reserved. 16A Shijingshan Road, Beijing, China. 100040 |