ຕາມຂ່າວCRI:ກອງປະຊຸມໂກເປັນຮາກກ່ຽວກັບການປ່ຽນແປງຂອງດິນຟ້າອາກາດຈະໄຂຂຶ້ນໃນອາທິດໜ້າ,ບັນຫາການປ່ຽນແປງຂອງດິນຟ້າອາກາດຈະກາຍເປັນຈຸດສຸມຂອງໂລກອີກ.ຫຼາຍປີມານີ້,ລັດຖະບານຈີນເອົາໃຈໃສ່ບັນຫາການປ່ຽນແປງຂອງດິນຟ້າອາກາດແລະການພັດທະນາແບບຍືນຍົງໃນລະດັບສູງຕະຫຼອດມາ,ໃນຂັ້ນຕອນຕ່າງໆຂອງການພັດທະນາ,ລັດຖະບານຈີນໄດ້ວາງເປົ້າໝາຍການຫຼຸດການລະບາຍທີ່ເອົາຈິງເອົາຈັງແລະເປັນໄປໄດ້,ແລະວາງແຜນນະໂຍບາຍທີ່ບັງເກີດຜົນໂດຍອີງຕາມສະພາບຕົວຈິງແຫ່ງຊາດ.
ຫວ່າງມໍ່ໆນີ້,ໜ່ວຍເຄື່ອງຈັກຜະລິດໄຟຟ້າຂອງບໍລິສັດອຸດສາຫະກຳເຄມີຊ່ວງຊື່ໃນເມືອງຈ່າງເຈ່ຍກັງແຂວງຈ່ຽງຊູ່ຂອງຈີນເລີ່ມໝູນເດີນ.ທ່ານຢວນຢ້າເຟີ່ຍ,ຮອງຜູ່ອຳນວຍການໃຫຍ່ຂອງບໍລິສັດບອກນັກຂ່າວວ່າ,ສອງປີມານີ້,ບໍລິສັດໄດ້ລົງທຶນ600ລ້ານຢວນ,ສ້າງລະບົບຮັບເຄື່ອງເສຍເພື່ອໝູນວຽນໃນຕະຫຼອດຂະບວນການຜະລິດ,ເມື່ອມີລະບົບນີ້ແລ້ວ,ໜ່ວຍເຄື່ອງຈັກຜະລິດໄຟຟ້າຂອງບໍລິສັດນີ້ບໍ່ຕ້ອງໃຊ້ພະລັງງານຫຍັງທີ່ມາຈາກທາງນອກ,ມີແຕ່ອາໄສອາຍເສຍທີ່ໄດ້ຮັບຈາກຂະບວນການຜະລິດ,ເພື່ອນຳໃຊ້ຄືນ.ທ່ານກ່າວວ່າ:"ພວກເຮົາໄດ້ເກັບເອົາຄວາມຮ້ອນຂອງອາຍເສດເຫລືອໃນກົດຊຸນເຟີຣິກອາຊິດsulfuric acidຄືນ,ເພາະວ່າຄວາມຮ້ອນເຫລົ່ານີ້ສາມາດຜະລິດໄຟຟ້າ 5 ຫມື່ນກິໂລວັດໂມງ,ເມື່ອເປັນແນວນັ້ນແລ້ວ, ຄາດວ່າພວກເຮົາຈະມີລາຍໄດ້ເພີ່ມ 250 ລ້ານຢວນຕໍ່ປີ.
ທີ່ຈິງແລ້ວ, ຢູ່ຈີນຍັງມີວິສາຫະກິດຢ່າງຫລວງຫລາຍທີ່ເຮັດຄືບໍລິສັດອຸດສາຫະກຳເຄມີຊ່ວງຊື່ທີ່ຜ່ານການປັບປຸງເຕັກນິກແລ້ວຫລຸດການສິ້ນເປືອງພະລັງງານແລະຫລຸດການລະບາຍມົນລະພິດ.ໃນເວລາດົນນານມານີ້, ຈີນໄດ້ທຳຄວາມພະຍາຍາມຢ່າງບໍ່ລົດລະເພື່ອຮັບມືກັບການປ່ຽນແປງຂອງດິນຟ້າອາກດແລະຫລຸດການລະບາຍອາຍພິດເຮືອນແກ້ວ.ປີ 2007,ຈີນໄດ້ປະກາດແຜນການແຫ່ງລັດເພື່ອຮັບມືກັບການປ່ຽນແປງຂອງດິນຟ້າອາກາດ, ໄດ້ວາງຄາດຫມາຍແຫ່ງລັດທີ່ມີການຜູກມັດຄື ນັບແຕ່ປີ2005ຮອດປີ 2010,ຫລຸດປະລິມານສິ້ນເປືອງພະລັງງານຕໍ່ຫົວຫນ່ວຍ GDP ແລະປະລິມານລະບາຍສິ່ງເຊື່ອມພິດສຳຄັນ,ຍົກອັດຕາປົກຄຸມຂອງປ່າໄມ້ແລະອື່ນໆ.ເມື່ອໄດ້ທຳຄວາມພະຍາຍາມມາເປັນເວລາຫລາຍປີແລ້ວ,ຮອດ6ເດືອນຕົ້ນປີນີ້,ຈີນໄດ້ບັນລຸເປົ້າຫມາຍທີ່ປະລິມານສິ້ນເປືອງພະລັງງານຕໍ່ຫົວຫນ່ວຍ GDPຫລຸດຫນ້ອຍກວ່າປີ 2005 13%,ສ່ວນເປົ້າຫມາຍທີ່ຫລຸດລົງ20%ໃນປີ 2010ນັ້ນຄາດວ່າກໍ່ຈະບັນລຸໄດ້.ນີ້ຫມາຍຄວາມວ່າ,ພາຍໃນ 5 ປີ, ປະລິມານລະບາຍກອກບອນດີອອກຊິດຂອງຈີນຈະຫລຸດຫນ້ອຍລົງຫລາຍກວ່າ 1ຕື້500ລ້ານໂຕນ.
ໃນເວລາຫຼຸດການສິ້ນເປືອງພະລັງງານຕໍ່ຫົວຫນ່ວຍGDP ໃຫ້ຫນ້ອຍລົງ, ຈີນຍັງຕັ້ງຫນ້າພັດທະນາພະລັງງານຫມູນວຽນທີ່ລວມທັງພະລັງລົມ,ພະລັງແສງຕາເວັນແລະການຜະລິດໄຟຟ້າດ້ວຍພະລັງນ້ຳ,ປະຈຸບັນ,ອັດຕາທີ່ພະລັງງານຫມູນວຽນຂອງຈີນກວມຍອດພະລັງງານເທື່ອດຽວນັ້ນໄດ້ຈາກ7,5%ໃນ 4 ປີກ່ອນເພີ່ມຂຶ້ນເປັນເກືອບ 9% ໃນປະຈຸບັນ.
ເນື່ອງໃນໂອກາດກອງປະຊຸມໂກເປັນຮາກຂອງສະຫະປະຊາຊາດ ກ່ຽວກັບການປ່ຽນແປງຂອງດິນຟ້າອາກາດ ຈະໄຂຂຶ້ນໃນໄວໆນີ້, ຈີນຍັງໄດ້ວາງເປົ້າຫມາຍຫລຸດການລະບາຍມົນລະພິດຄື:ເມື່ອຮອດປີ 2020,ຫລຸດການລະບາຍກາກບອນດີອອກຊິດຕໍ່ຫົວຫນ່ວຍGDPໃຫ້ຫນ້ອຍກວ່າປີ2005 40-45%.ເປົ້າຫມາຍດັ່ງກ່າວກໍໄດ້ຮັບຄວາມຊົມເຊີຍໂດຍທົ່ວໄປໃນສາກົນ.ເຂົາເຈົ້າກໍ່ເອີ້ນເປົ້າຫມາຍນີ້ເປັນ"ສັນຍານທີ່ດີທີ່ຈີນສົ່ງໃຫ້ປະເທດອື່ນໆ,ນີ້ຈະຂຸກຍູ້ໃຫ້ກອງປະຊຸມໂກເປັນຮາກ ຈະໄດ້ກ້າວເຖິງຂັ້ນມີຄວາມເຫັນທີ່ເປັນເອກະສັນກັນກ່ຽວກັບການປ່ຽນແປງຂອງດິນຟ້າອາກາດໃຫມ່.
ແຕ່ວ່າໃນຖານະທີ່ເປັນປະເທດພວມພັດທະນາປະເທດໜຶ່ງ, ຈີນໄດ້ປະເຊີນກັບຄວາມຫຍຸ້ງຍາກຢ່າງຫຼວງຫຼາຍ ເຊັ່ນມີປະຊາກອນຫຼາຍ,ລະດັບເສດຖະກິດພັດທະນາອ່າວຕ່ຳເປັນຕົ້ນ,ພ້ອມກັນນັ້ນ, ຈີນພວມຢູ່ໄລຍະສຳຄັນແຫ່ງການຫັນເປັນອຸດສາຫະກຳແລະຕົວເມືອງ,ສຳລັບຈີນແລ້ວຢາກບັນລຸເປົ້າໝາຍໃໝ່ດ້ານການຫຼຸດການລະບາຍມົນລະພິດແມ່ນຍາກຫຼາຍ,ແຕ່ຈີນກ່າວວ່າຈະທຳຄວາມພະຍາຍາມຢ່າງສຸດຂີດເພື່ອບັນລຸເປົ້າໝາຍດັ່ງກ່າວ.ທ່ານເຊ້ຍເຈີ້ນຮວາ, ຮອງປະທານຄະນະກຳມະການພັດທະນາແລະປະຕິຮູບແຫ່ງລັດຈີນກ່າວວ່າ:"ນີ້ແມ່ນການກະທຳທີ່ເປັນເຈົ້າການທີ່ຈີນປະຕິບັດຕາມສະພາບຕົວຈິງແຫ່ງຊາດຂອງຈີນ, ກໍແມ່ນຄວາມພະຍາຍາມຢ່າງໃຫຍ່ຫຼວງທີ່ຈີນເຮັດເພື່ອຮັບມືກັບການປ່ຽນແປງຂອງດິນຟ້າອາກາດ, ເຊິ່ງໄດ້ສະແດງໃຫ້ເຫັນທ່າທີທີ່ມີຄວາມຮັບຜິດຊອບຢ່າງຕັ້ງໜ້າຂອງຈີນໃນດ້ານການຮັບມືກັບການປ່ຽນແປງຂອງດິນຟ້າອາກາດ. ເຖິງວ່າບັນລຸເປົ້າໝາຍດັ່ງກ່າວຈະຕ້ອງທຳຄວາມພະຍາຍາມອັນຫຍຸ້ງຍາກລຳບາກກໍຕາມ, ແຕ່ຄວາມຕັດສິນໃຈຂອງຈີນທີ່ຈະບັນລຸເປົ້າໝາຍດັ່ງກ່າວຈະບໍ່ຫວັ່ນໄຫວຄອນແຄນຢ່າງເດັດຂາດ,ພວກຂ້າພະເຈົ້າຈະອອກແຮງຢ່າງສຸດຂີດເພື່ອວາງແຜນນະໂຍບາຍແລະມີການກະທຳຕົວຈິງຢ່າງເໝາະສົມ, ທຳຄວາມພະຍາຍາມຢ່າງບໍ່ຢຸດຢັ້ງເພື່ອບັນລຸການພັດທະນາແບບຍືນຍົງແລະຊ່ອຍຮັກສາດິນຟ້າອາກາດຂອງໂລກ."
