ທີ່ນີ້ວິທະຍຸສາກົນແຫ່ງປະເທດຈີນ, ທ່ານຜູ້ຟັງທີ່ເຄົາລົບ, ວັນທີ ９ ທັນວານີ້, ມະ ຫາກຳກິລາອາຊີຕາເວັນອອກສຽງໃຕ້ຫຼືຊີເກມຄັ້ງທີ25ໄດ້ຈັດພິທີໄຂງານຢ່າງໃຫຍ່ໂຕມະໂຫລານຢູ່ນະຄອນຫຼວງວຽງຈັນ, ຄະນະຜູ້ແທນແລະນັກກິລາທີ່ມາຈາກ 11 ປະເທດອາຊີອາຄະເນໄດ້ເຂົ້າຮ່ວມງານກິລາເທື່ອນີ້, ແລະຈະແຂ່ງຂັນໃນທັງໝົດ 28 ປະເທດກິລາ. ຕໍ່ໄປເຊິ່ງຟັງລາຍງານຂອງນັກຂ່າວCRI:
ຊີເກມຄັ້ງທີ 25 ຈັດຂຶ້ນຢູ່ນະຄອນຫຼວງວຽງຈັນຂອງລາວແຕ່ວັນທີ 9 ຫາວັນທີ 18 ທັນວານີ້, ນີ້ກໍແມ່ນລາວເປັນເຈົ້າພາບຊີເກມເປັນຄັ້ງທຳອິດ. ເວລາ 18 ໂມງວັນທີ 9 ທັນວານີ້ຕາມເວລາ, ພິທີໄຂງານຊີເກມໄດ້ເລີ່ມຂຶ້ນຢູ່ສະໜາມກິລາແຫ່ງຊາດຢ່າງຄຶກຄື້ນ. ທ່ານຈູມມະລີ ໄຊຍະສອນ, ປະທານປະເທດລາວ, ທ່ານຫງວຽນເຕີນຢຸງ, ນາຍົກລັດຖະມົນຕີຫວຽດນາມ, ທ່ານຮຸນແຊນ, ນາຍົກກຳປູເຈຍ, ທ່ານເທັນເຊນ, ນາຍົກມຽນມາແລະທ່ານອະພິສິດ ເວດຊາຊີວະ, ນາຍົກໄທໄດ້ເຂົ້າຮ່ວມພິທີໄຂ. ໃນພິທີດັ່ງກ່າວ, ນັກກິລາແລະຄະນະນຳ 5000 ກວ່າຄົນທີມາຈາກໄທ, ຟີລິບປີນ, ມາເລເຊຍ, ລາວ, ຫວຽດນາມ, ມຽນມາ, ສີງກະໂປ, ກຳປູເຈຍ, ອິນໂດເນເຊຍ, ບຼູໄນແລະຕີມໍເລັສເຕໄດ້ເດີນຂະບວນເຂົ້າສູ່ສະໜາມ.
ທ່ານສົມສະຫວາດ ເລັ່ງສະວັດ, ຮອງນາຍົກລັດຖະມົນຕີລາວທັງປະທານຄະນະກຳມະການຈັດຕັ້ງຊີເກມຄັ້ງນີ້ໄດ້ຂຶ້ນກ່າວລາຍງານວ່າ, ປະເທດລາວຮູ້ສຶກມີກຽດຫຼາຍທີ່ໄດ້ຮັບສິດຈັດມະຫາກຳກິລາເທື່ອນີ້, ແລະຂອບໃຈນຳລັດຖະບານປະເທດຕ່າງໆທີ່ໃຫ້ການຊ່ອຍເຫຼືອຢ່າງບໍລິສຸດໃຈໃຫ້ລາວໃນວຽກງານກະກຽມແລະນັກກິລາຂອງປະເທດຕ່າງໆທີ່ມາເຂົ້າຮ່ວມການແຂ່ງຂັນ. ທ່ານກ່າວວ່າ, ລາວຈະພະຍາຍາມສຸດຂີດເພື່ອຈັດງານກິລາເທື່ອນີ້ຢ່າງສຳເລັດຜົນດ້ວຍດີ, ທ່ານກ່າວວ່າ:
"ອັນນີ້ນັບວ່າເປັນຄວາມພາກພູມໃຈອັນສູງສົ່ງແລະເປັນຄວາມເອກອ້າງທະນົງໃຈອັນຊອບທຳຂອງປະຊາຊົນລາວທັງຊາດທີ່ໄດ້ຮັບກຽດແລະໄດ້ຮັບຄວາມໄວ້ວາງໃຈຈາກບັນດາສະມາຊິກສະຫະພັນຊີເກມ.ລັດຖະບານແຫ່ງສປປລາວໄດ້ແຕ່ງຕັ້ງຄະນະກຳມະການຈັດງານມະຫະກຳກິລາຊີເກມຄັ້ງທີ 25 ຂຶ້ນໂດຍການຮ່ວມມືຢ່າງແຫນ້ນແຟ້ນຂອງຄະນະກຳມະການກິລາແຫ່ງຊາດແລະສະຫະພັນກິລາປະເພດຕ່າງໆ,ດຳເນີນການກະກຽມຢ່າງຮອບດ້ານ,ນັບທັດ້ານພື້ນຖານໂຄງລ່າງສຳລັບການແຂ່ງຂັນກິລາປະເພດຕ່າງໆ,ແລະການພັດທະນາຊັບພະຍາກອນມະນຸດທາງດ້ານກິລາ.ພວກເຮົາມີຄວາມປິຕິຊົມຊື່ນເປັນຢ່າງຍິ່ງທີ່ເຫັນວ່າ,ຕະຫລອດໄລຍະທີ່ຜ່ານມາ, ປະຊາຊົນທຸກເຜົ່າ,ທຸກຊັ້ນຄົນ, ທຸກພາກສ່ວນເສດຖະກິດແລະທຸກກຳລັງທັງ ພາກລັດແລະເອກະຊົນໃນທົ່ວປະເທດ,ສຸມສະຕິປັນຍາແລະກຳລັງວັງຊາເຂົ້າໃນການກະກຽມດ້ານຕ່າງໆ, ເພື່ອສຳເລັດງານມະຫະກຳຄັ້ງນີ້,ເຊິ່ງນັບມາເປັນພາລະກຳປະຫວັດສາດອັນຫນຶ່ງຂອງຊາດລາວເຮົາ."
ໃນທ່າມກາງສຽງໄຊໂຍໂຮຮ້ອງໃນສະຫນາມກິລາ, ທ່ານຈູມມະລີ ໄຊຍະສອນ, ປະທານປະເທດລາວໄດ້ປະກາດເປີດງານຊີເກມຢ່າງເປັນທາງການ, ນັກກິລາຂອງປະເທດຕ່າງໆ,ແລະປະຊາຊົນລາວໄດ້ສະເຫລີມສະ ຫລອງການເປີດງານມະຫະກຳຮ່ວມຂອງປະຊາຊົນອາຊີຕາເວັນອອກສຽງໃຕ້ໃນທ່າມກາງບັນຍາກາດມ່ວນຊື່ນ.
"ໃນນາມສາທາລະນະລັດປະຊາທິປະໄຕປະຊາຊົນລາວ,ຂ້າພະເຈົ້າຂໍປະກາດເປີດງານມະຫະກຳກິລາຊີເກມຄັ້ງທີ 25 ຢ່າງເປັນທາງການນັບແຕ່ເວລານີ້ເປັນຕົ້ນໄປ."
ໃນງານກິລາຊີເກມຄັ້ງນີ້,ນອກຈາກມີການແຂ່ງຂັນກິລາປະເພດຂອງໂອລິມປິກແລ້ວ, ຍັງຈັດໃຫ້ມີກັງຟູມາເລເຊຍ,ມວຍໄທແລະການເຕະກະຕໍ້ທີ່ເປັນກິລາດັ້ງເດີມທີ່ມີສີສັນຊົນເຜົ່າໃນອາຄະເນ,ອັນໄດ້ສະແດງໃຫ້ເຫັນຈຸດພິເສດດ້ານກິລາຂອງປະເທດຕ່າງໆໃນອາຊີອາຄະເນ.ການຈັດງານກິລາຊີເກມບໍ່ພຽງແຕ່ມີບົດບາດຊຸກຍູ້ໃຫ້ກິລາຂອງພາກພື້ນນີ້ຂະຫຍາຍຕົວຢ່າງຕັ້ງຫນ້າ, ຍັງສາມາດສັບຊ້ອນແລະຍົກລະດັບຄວາມສາມາດດ້ານກິລາໃຫ້ສູງຂຶ້ນ, ແລະເພີ່ມທະວີການພົວພັນແລະເຂົ້າໃຈເຊິ່ງກັນແລະກັນລະຫວ່າງປະເທດຕ່າງໆໃນອາຊີອາຄະເນ.
