ຕາມຂ່າວສານຊິນຮວາ:ກອງປະຊຸມສະຫະປະຊາຊາດກ່ຽວກັບການປ່ຽນແປງຂອງດິນຟ້າອາກາດທີ່ຈັດຂຶ້ນໂກເປັນຮາກໄດ້ອັດລົງພາຍຫຼັງການໂຕ້ຖຽງກັນຢ່າງດຸເດືອດ.ແຕ່ວ່າ,ມາຮອດປະຈຸບັນ,ສຽງຂອງກອງປະຊຸມຄັ້ງນີ້ຍັງບໍ່ສຸດສ້ຽງເທື່ອ,ໂດຍສະເພາະແມ່ນຂໍ້ຕົກລົງໂກເປັນຮາກ,ໄດ້ຮັບຄວາມຍ້ອງຍໍສັນລະເສີນຈາກປະເທດແລະອົງການສາກົນຈຳນວນບໍ່ໜ້ອຍ,ທັງແຕ່ກໍພາໃຫ້ບາງປະເທດຮູ້ສຶກບໍ່ພໍໃຈ.ແຕ່ຄວນຮັບຮູ້ວ່າ,ຂໍ້ຕົກລົງໂກເປັນຮາກໄດ້ຍຶດໝັ້ນຫຼັກການຂອງ"ສົນທິສັນຍາຂອບການປ່ຽນແປງຂອງດິນຟ້າອາກາດຂອງສະຫະປະຊາຊາດ"ແລະ"ອະນຸສັນຍາກຽວໂຕ",ເນັ້ນຫຼັກ ການຮັບຜິດຊອບຮ່ວມກັນແລະແຕ່ຮັບຜິດຊອບຕ່າງກັນລະຫວ່າງປະເທດທີ່ພັດທະນາແລ້ວແລະປະເທດພວມພັດທະນາໃນບັນຫາການປ່ຽນແປງຂອງດິນຟ້າອາກາດ,ໄດ້ປົກປັກຮັກສາການໃຊ້"ລະບົບສອງຊ່ອງທາງ"ໃນການຮັບມືກັບການປ່ຽນແປງຂອງດິນຟ້າອາກາດທີ່ເປັນເສັ້ນພື້ນຖານຂອງການເຈລະຈາ,ເຕືອນໃຫ້ປະເທດທີ່ພັດທະນາແລ້ວບັງຄັບຫຼຸດການລະບາຍອາຍພິດເຮືອນແກ້ວແລະສະໜອງການສະໜັບສະໜູນດ້ານເງິນທຶນແລະເຕັກນິກໃຫ້ແກ່ປະເທດພວມພັດທະນາ.ການບັນລຸຂໍ້ຕົກລົງນີ້ແມ່ນຍ້ອນຄວາມພະຍາຍາມຢ່າງບໍ່ລົດລະຂອງປະເທດພວມພັດທະນາທັງຫຼາຍ,ເຊິ່ງລວມທັງຈີນທີ່ຍຶດໝັ້ນຫຼັກການແລະເຕົ້າໂຮມຄວາມເຫັນທີ່ເປັນເອກະສັນກັນ.
ກໍ່ຍ້ອນວ່າເປັນແນວນີ້, ຂໍ້ຕົກລົງໂກເປັນຮາກໄດ້ຮັບການຕີລາຄາສູງຈາກປະຊາຄົມໂລກແລະປະເທດທີ່ພວມພັດທະນາທັງຫລາຍ.ວັນທີ 21 ທັນວານີ້, ທ່ານບານກີມູນ, ເລຂາທິການໃຫຍ່ສະຫະປະຊາຊາດກ່າວວ່າ, ກອງປະຊຸມກ່ຽວກັບການປ່ຽນແປງຂອງດິນຟ້າອາກາດໄດ້ຮັບຜົນສຳເລັດຢ່າງສູງ, ແມ່ນບາດກ້າວສຳຄັນທີ່ກ້າວໄປສູ່ທິດທີ່ຖືກຕ້ອງ,ຂໍ້ຕົກລົງໂກເປັນຮາກໄດ້ສ້າງພື້ນຖານໃຫ້ແກ່ທົ່ວໂລກເຊັນສັນຍາທີ່ຈຳກັດແລະຫລຸດການລະບາຍອາຍພິດເຮືອນແກ້ວທີ່ເປັນຮູບປະທຳສະບັບທຳອິດໃນຕໍ່ຫນ້າ.ວັນທີ 22 ທັນວານນີ້, ອົງການພະລັງງານປະລະມານູສາກົນໄດ້ສະແດງຄວາມຊົມເຊີຍຕໍ່ຂໍ້ຕົກລົງດັ່ງກ່າວ, ໂດຍເຫັນວ່າສັນຍານີ້ໄດ້ໃຫ້ການຊີ້ນຳແກ່ການເຈລະຈາກ່ຽວກັບການປ່ຽນແປງຂອງດິນຟ້າອາກາດໃນບາດກ້າວຕໍ່ໄປ.
ຄັນຊັ້ນ, ຄວາມບໍ່ພໍໃຈຕໍ່ຂໍ້ຕົກລົງໂກເປັນຮາກແມ່ນມາຈາກໃສແທ້?ເມື່ອຫວນຄືນຂະບວນການທີ່ລະອິດລະອ້ຽວຂອງກອງປະຊຸມເທື່ອນີ້, ຫລາຍຝ່າຍກໍ່ເຂົ້າໃຈແລ້ວວ່າ, ຄວາມບໍ່ເຫັນດີຕົ້ນຕໍແມ່ນມາຈາກສອງດ້ານຄື:ດ້ານທີຫນຶ່ງແມ່ນປະເທດທີ່ພັດທະນາແລ້ວຈຳນວນຫນຶ່ງໄດ້ຖືກກອງປະຊຸມເທື່ອນີ້ເປັນໂອກາດໂຍນພັນທະຂອງຕົນໃຫ້ແກ່ຜູ່ອື່ນ, ບັງຄັບໃຫ້ປະເທດທີ່ພວມພັດທະນາແບກຫາບພັນທະທີ່ບໍ່ເຫມາະສົມ, ແຕ່ການເຊັນຂໍ້ຕົກລົງດັ່ງກ່າວໄດ້ທຳລາຍເຈດຈຳນົງນີ້,ສະນັ້ນ, ເຂົ້າເຈົ້າບໍ່ພຽງແຕ່ບໍ່ຮັບຮອງຈຸດດີຂອງຂໍ້ຕົກລົງນີ້,ແຕ່ຍັງກ່າວໂຈມຕີປະເທດທີ່ພວມພັດທະນາທີ່ໄດ້ທຳຄວາມພະຍາຍາມຢ່າງບໍ່ລົດລະຈົນກ້າວເຖິງຂັ້ນເຊັນຂໍ້ຕົກລົງນີ້.ອີກດ້ານຫນຶ່ງ, ປະເທດຈຳນວນຫນຶ່ງຫວັງຢາກໃຫ້ກອງປະຊຸມເທື່ອນີ້ແກ້ໄຂການປ່ຽນແປງຂອງດິນຟ້າອາກາດແລະການພັດທະນາ, ແຕ່ຂໍ້ຕົກລົງໂກເປັນຮາກຕອບສະຫນອງບໍ່ໄດ້ຕາມຄວາມຫວັງຂອງເຂົາເຈົ້າ.
ສິ່ງທີ່ຄວນເຫັນນັ້ນແມ່ນ, ການລະບາຍອາຍພິດເຮືອນແກ້ວກ່ຽວກັບການພັດທະນາເສດຖະກິດແລະລະດັບຊີວິດການເປັນຢູ່ແມ່ນຕິດແທດຕົວຈິງ, ກ່ຽວພັນເຖິງຜົນປະໂຫຍດພື້ນຖານຂອງປະເທດຕ່າງໆ. ສະນັ້ນ, ເສັ້ນທາງທີ່ມະນຸດຮັບມືກັບການປ່ຽນແປງຂອງດິນຟ້າອາກາດບໍ່ເຄີຍສະດວກເລີຍ. ກໍຄືຄວາມເວົ້າຂອງທ່ານອາລີ ທຼິກີ, ປະທານສະມັດຊາໃຫຍ່ສະຫະປະຊາຊາດສະໄໝທີ 64, ການເຊັນ"ຂໍ້ຕົກລົງໂກເປັນຮາກ"ແມ່ນຂີດໝາຍສຳຄັນທີ່ສະແດງໃຫ້ເຫັນວ່າກອງປະຊຸມການປ່ຽນແປງຂອງດິນຟ້າອາກາດຂອງສະຫະປະຊາຊາດໄດ້ຮັບຄວາມຄືບໜ້າ. ເຖິງວ່າບາງປະເທດບໍ່ພໍໃຈປານໃດຕໍ່ໝາກຜົນຂອງກອງປະຊຸມກໍ່ຕາມ, ແຕ່ວ່າພວກເຣົາຕ້ອງເບິ່ງຍັນຫາໝາກຜົນຂອງການປະຊຸມດ້ວຍທ່າທີທີ່ຕິດແທດຕົວຈິງ, ນີ້ແມ່ນໝາກຜົນທີ່ໄດ້ຮັບຫຼັງຈາກການເຈລະຈາດ້ວຍຄວາມລຳບາກຂອງຝ່າຍຕ່າງໆ. ມັນມີຄວາມໝາຍທີ່ຕັ້ງໜ້າຢ່າງແທ້ຈິງ.
ສິ່ງທີ່ສາມາດຄາດໄດ້ນັ້ນກໍຄື, ການເຈລະຈາກ່ຽວກັບການປ່ຽນແປງຂອງດິນຟ້າອາກາດຫຼັງກອງປະຊຸມໂກເປັນຮາກຍິ່ງຈະສັບສົນແລະຫຍຸ້ງຍາກກວ່າເກົ່າ. ແຕ່"ຂໍ້ຕົກລົງໂກເປັນຮາກ"ໄດ້ສະໜອງຈຸດເລີ່ມຕົ້ນໃໝ່ໃຫ້ແກ່ການເຈຈລະຈາກ່ຽວກັບການປ່ຽນແປງຂອງດິນຟ້າອາກາດໂລກຕື່ມອີກ. ຂໍແຕ່ປະເທດຕ່າງໆສາມາດສະແດງຄວາມປາດຖະໜາການເມືອງ, ເອົາໃຈໃສ່ນຳຄວາມສົນໃຈຂອງຜູ້ອື່ນ, ເຕົ້າໂຮມຄວາມຮັບຮູ້ທີ່ຄືກັນຢ່າງວ່ອງໄວແລ້ວ, ກໍສາມາດເລີ່ມຈາກຈຸດເລີ່ມຕົ້ນດັ່ງກ່າວ, ຊອກຫາທາງເສັ້ນໜຶ່ງທີ່ສາມາດຊຸກຍູ້ການເຈລະຈາຢ່າງມີປະສິດທິຜົນ. ເບິ່ງຈາກດ້ານນີ້ແລ້ວ, ຄວາມໝາຍອັນຕັ້ງໜ້າຂອງ"ຂໍ້ຕົກລົງໂກເປັນຮາກ"ແມ່ນປະຕິເສດບໍ່ໄດ້.
