ຈີນແມ່ນປະເທດກະສິກຳໃຫຍ່,ມີປະຊາຊົນຫລາຍກວ່າ 700 ລ້ານຄົນດຳລົງຊີວິດຢູ່ໃນຊົນນະບົດ.ໃນຫລາຍປີມານີ້, ລັດຖະບານຈີນໄດ້ເພີ່ມງົບປະມານເຂົ້າສູ່ດ້ານກະສິກຳແລະຊົນນະບົດທຸກປີ, ເຮັດໃຫ້ກະສິກຳແລະເຂດຊົນນະບົດຂອງຈີນໄດ້ຮັບການພັດທະນາຢ່າງຫລວງຫລາຍ.ໂດຍສະເພາະໃນຂະບວນການຮັບມືກັບວິກິດການການເງິນສາກົນເທື່ອນີ້, ກະສິກຳແລະຊົນນະບົດໄດ້ເສີມຂະຫຍາຍບົດບາດສຳຄັນໃນການຮັກສາຄວາມຫມັ້ນທ່ຽງຂອງເສດຖະກິດຈີນ,ໄດ້ສ້າງພື້ນຖານທີ່ດີໃຫ້ແກ່ຈີນຮັບມືກັບວິດກິດການການເງິນ.
ເລີ່ມແຕ່ປີ 2004 ເປັນຕົ້ນມາ, ເອກະສານສະບັບທຳອິດທີ່ລັດຖະບານຈີນເຜີຍແຜ່ໃນທຸກປີນັ້ນກໍ່ຕ້ອງແມ່ນກ່ຽວພັນກັບການພັດທະນາກະສິກຳແລະຊົນນະບົດ,ເພື່ອສະແດງໃຫ້ເຫັນຄວາມເອົາໃຈໃສ່ຕໍ່ກະສິກຳ, ຊົນນະບົດແລະຊາວກະສິກອນຂອງລັດຖະບານ.ສ່ວນງົບປະມານທີ່ການເງິນສູນກາງຈັດສັນໃຫ້ກະສິກຳແລະຊົນນະບົດນັ້ນກໍ່ເພີ່ມຂຶ້ນທຸກປີ, ຮອດປີ 2009,ໄດ້ບັນລຸເຖິງ 710 ກວ່າຕື້ຢວນເຊິ່ງເປັນສະຖິຕິສູງສຸດໃນປະຫວັດ ສາດ.ງົບປະມານເຫລົ່ານີ້ລວມທັງຄ່າອຸດຫນູນຊາວກະສິກອນ, ງົບປະມານທີ່ໃຊ້ໃນການຜະລິດກະສິກຳ, ການຮັກສາສຸຂະພາບແລະປິ່ນປົວພະຍາດ, ໃນຊົນນະບົດ,ແລະການສ້າງສາພື້ນຖານໂຄງລ່າງຂອງຊົນນະບົດແລະອື່ນໆ.
ປີ 2009, ປະລິມານຜະລິດທັນຍາຫານຂອງຈີນໄດ້ຮັບຜົນເກັບກ່ຽວຢ່າງອຸດົມສົມບູນ,ແລະເພີ່ມຂຶ້ນ 6 ປີລຽນຕິດທີ່ບໍ່ເຄີຍມີມາກ່ອນ.ລາຍໄດ້ຂອງຊາວກະສິກອນກໍ່ສູງກວ່າການຄາດໄວ້, ຄາດວ່າຈະຫລາຍກວ່າ 5 ພັນຢວນສະເລ່ຍຕໍ່ຫົວຄົນ,ເຊິ່ງເພີ່ມຂຶ້ນ 6% ຂຶ້ນໄປ.ທ່ານເຄີ່ປິງເສິງ, ອະທິການບໍດີມະຫາວິທະຍາໄລກະສິກຳຈີນກ່າວວ່າ, ຜົນງານດັ່ງກ່າວແມ່ນຍ້ອນວ່າໃນຫລາຍປີມານີ້,ລັດຖະບານໄດ້ສຸມງົບປະມານໃສ່ຊົນນະບົດ,ອັນມີບົດບາດສຳຄັນທີ່ສຸດໃນການຮັກສາລາຄາສິນຄ້າໃຫ້ຫມັ້ນທ່ຽງ,ສ້າງເງື່ອນໄຂໃຫ້ແກ່ການຮັບມືກັບວິກິດການການເງິນສາກົນ.
"ຂ້າພະເຈົ້າຮູ້ສຶກວ່າກະສິກຳແລະເສດຖະກິດຊົນນະບົດພັດທະນາໄດ້ສ້າງພື້ນຖານທີ່ດີແລະສະໜອງການຮັບປະກັນທີ່ສຳຄັນທີ່ສຸດແກ່ພວກເຮົາຮັບມືກັບວິກິດການການເງິນ.
ທ່ານເວີນເຖ້ຍຈຸ່ນ, ອະທິການບໍດີສະຖາບັນພັດທະນາກະສິກຳແລະຊົນນະບົດຂອງມະຫາວິທະຍາໄລປະຊາຊົນຈີນກ່າວວ່າ, ບົດບາດຂອງກະສິກຳແລະຊົນນະບົດຈີນທີ່ເຮັດໃຫ້ເສດຖະກິດຈີນໝັ້ນທ່ຽງແລະເປັນພື້ນຖານຂອງເສດຖະກິດຈີນຍັງບໍ່ພຽງແຕ່ທໍ່ນີ້. ໃນຕົ້ນປີ2009,ຈີນມີຊາວກະສິກອນທີ່ເຮັດວຽກຢູ່ຕົວເມືອງປະມານ25ລ້ານຄົນຫວ່າງງານຍ້ອນວິກິດການການເງິນ, ຖ້າຢູ່ປະເທດອື່ນອາດຈະເຮັດໃຫ້ສັງຄົມປັ່ນປ່ວນ, ແຕ່ຢູ່ຈີນພັດເປັນບັນຫາທີ່ບໍ່ໃຫຍ່ປານໃດ, ສາຍເຫດກໍຍ້ອນວ່າແມ່ນຢູ່ຊົນນະບົດ.
"ຊາວກະສິກອນທີ່ເຮັດວຽກໃນຕົວເມືອງຍັງມີບ່ອນກັບເມືອຫາວຽກເຮັດລ້ຽງຊີບ.ເວົ້າແບບນີ້ກໍຍ້ອນວ່າ,ດຽວນີ້ຢູ່ຊົນນະບົດ,ມີວຽກຫຼາຍຢ່າງກຳລັງຈະເລີນ,ມີການພັດທະນາຫຼາຍດ້ານ,ສະນັ້ນ,ຊາວກະສິກອນເຫຼົ່ານີ້ກັບເມືອຊົນະບົດ,ບໍ່ຈຳເປັນຕ້ອງໄປເຮັດໄຮ່ໄຖນາ,ເຂົາເຈົ້າສາມາດເຮັດວຽກອື່ນໆຫຼາຍຢ່າງ.ຖ້າສັງເກດເບິ່ງຢ່າງພາວະວິໄສແລ້ວ,ອາດເວົ້າໄດ້ວ່າ,ຈີນສະໜັບສະໜູນກະສິກຳ,ຊົນນະບົດແລະຊາວກະສິກອນແມ່ນໄດ້ເລືອກທິດຂະຫຍາຍຕົວຖືກຕ້ອງແລ້ວ,ໃນວິກິດການທົ່ວໂລກທີ່ໜັກໜ່ວງແບບນີ້,ມັນສາມາດເຮັດໃຫ້ຈີນສືບຕໍ່ພັດທະນາຢ່າງໝັ້ນທ່ຽງ,ນີ້ແມ່ນຄຸນງາມຄວາມດີທີ່ປະຕິເສດບໍ່ໄດ້."
ໃນກອງປະຊຸມວຽກງານຊົນນະບົດສູນກາງທີ່ຫາກໍ່ສິ້ນສຸດລົງຫວ່າງກ່ອນນີ້ບໍ່ດົນ,ລັດຖະ ບານຈີນໄດ້ສະເໜີວ່າຈະສືບຕໍ່ເພີ່ມຄວາມເອົາໃຈໃສ່ນຳບັນຫາກະສິກຳ,ຊົນນະບົດແລະຊາວກະສິກອນ,ແລະໄດ້ສະເໜີຈຸດສຳຄັນ5ຂໍ້ຂອງວຽກງານຊົນນະບົດໃນປີ2010,ເຊິ່ງລວມທັງ:ການຮັບປະກັນການຜະລິດແລະສະໜອງຜະລິດຕະພັນກະສິກຳທີ່ສຳຄັນ,ເປີດກວ້າງຊ່ອງທາງປະກອບອາຊີບໃຫ້ຊາວກະສິກອນແລະຊຸກຍູ້ວຽກງານສາທາລະນະຢູ່ຊົນນະບົດໃຫ້ຂະຫຍາຍຕົວເປັນຕົ້ນ.
ທ່ານເຄີ່ປີງເຊິ່ງ,ອະທິການບໍດີຂອງມະຫາວິທະຍາໄລກະສິກຳຈີນກ່າວວ່າ,ບັນຫາກະສິກຳ,ຊົນນະບົດແລະຊາວກະສິກອນມີບົດບາດພື້ນຖານຕໍ່ຈີນທີ່ເບິ່ງຂ້າມບໍ່ໄດ້ຕະຫຼອດໄປ,ຕ້ອງເພີ່ມການລົງທຶນຕໍ່ໄປ,ແລະເລັ່ງລັດການພັດທະນາ.
