ຕາມຂ່າວCRI,ໃນວັນທີ7ມັງກອນນີ້, ເວທີປຶກສາຫາລືເຂດການຄ້າເສລີຈີນອາຊຽນທີ່ເປັນເຈົ້າພາບຮ່ວມກັນລະຫວ່າງກະຊວງການຄ້າຈີນ, ພາກສ່ວນຮັບຜິດຊອບເສດຖະກິດການຄ້າຂອງປະເທດອາຊຽນ, ກອງເລຂາອາຊຽນແລະອົງການປົກຄອງເຂດປົກຄອງຕົນເອງເຜົ່າຈ້ວງກວາງຊີ, ຈະໄຂຂຶ້ນຢູ່ນະຄອນນານນີງເຂດກວາງຊີ. ຈຸດປະສົງຂອງເວທີປຶກສາຫາລືເທື່ອນີ້ແມ່ນເພື່ອຮ່ວມກັນສະຫຼອງເຂດການຄ້າເສລີຈີນອາຊຽນສ້າງສຳເລັດຕາມເວລາກຳນົດ, ສະຫຼຸບບົດຮຽນຂອງການສ້າງສາເຂດການຄ້າເສລີ, ແລະມຸ້ງໜ້າສູ່ອະນາຄົດອັນດີງາມຂອງການພັດທະນາເຂດການຄ້າເສລີຕື່ມອີກ.
ເວທີປຶກສາຫາລືຄັ້ງນີ້ມີຫົວຂໍ້ວ່າ"ຕ່າງຝ່າຍຕ່າງມີຜົນປະໂຫຍດ, ສ້າງຜົນສຳເລັດອັນສົດໃສ", ຜູ້ຮ່ວມປະຊຸມຈະຫາລືກ່ຽວກັບສາມຫົວຂໍ້, ຄື: "ຈຸດເລີ່ມໃໝ່:ການຄ້າຍົກສູງກຳລັງແຮງຂອງຜະລິດຕະກຳ", "ໂອກາດໃໝ່: ລົງທຶນສ້າງຄວາມຈະເລີນທາງເສດຖະກິດຮ່ວມກັນ", "ໜ້າທີ່ໃໝ່: ສ້າງຈຸດເດັ່ນແຫ່ງການຮ່ວມມືເສດຖະກິດພາກພື້ນ". ນອກຈາກພິທີໄຂງານແລະການກ່າວຄຳປາໄສແລ້ວ, ເວທີປຶກສາຫາລືຍັງຈະຈັດພິທີສະເຫຼີມສະຫຼອງສຳເລັດການສ້າງເຂດການຄ້າເສລີຈີນອາຊຽນ, ພິທີເປີດປ້າຍຂອງເຂດທ່າປອດພາສີເມືອງຊີ່ນໂຈ່ວເຂດກວາງຊີແລະສູນປອດພາສີແລະຈໍລະຈອນສິນຄ້ານະຄອນນານນີງ, ແລະກິດຈະກຳອື່ນໆ.
ຜູ້ນຳຈີນແລະປະເທດອາຊຽນ, ລັດຖະມົນຕີເສດຖະກິດການຄ້າຂອງຈີນແລະສິບປະເທດອາຊຽນ, ຜູ້ຕາງໜ້າອົງການຈັດຕັ້ງສາກົນ, ຜູ້ໄດ້ຮັບລາງວັນໂນເບວສາຂາເສດຖະກິດປີ2007, ແລະນັກວິຊາການອື່ນໆທີ່ມີຊື່ສຽງຂອງຈີນແລະຕ່າງປະເທດ, ຜູ້ຕາງໜ້າທະນາຄານພັດທະນາອາຊີຫຼືADB, 500ບໍລິສັດທີ່ມີຊື່ສຽງຂອງໂລກ, 100ບໍລິສັດທີ່ມີຊື່ສຽງຂອງຈີນ, ເຈົ້າໜ້າທີ່ສະຖາທູດແລະສະຖານກົງສູນຂອງປະເທດອາຊຽນປະຈຳຈີນ, ພະນັກງງານສະຖານທູດແລະສະຖານກົງສູນຂອງຈີນປະຈຳປະເທດອາຊຽນ, ຜູ້ຕາງໜ້າພາກສ່ວນລັດ, ພ້ອມດ້ວຍຜູ້ຕາງໜ້າແຂວງແລະກຳແພງນະຄອນອ້ອມຂ້າງຈະເຂົ້າຮ່ວມກອງປະຊຸມເວທີປຶກສາຫາລື.
