ວັນທີ 7 ມັງກອນນີ້, ເວທີປາໄສເຂດການຄ້າເສລີຈີນອາຊຽນໄດ້ໄຂຂຶ້ນຢູ່ນະຄອນນານນິງ, ເທດສະບານເຂດ ປົກຄອງຕົນເອງເຜົ່າຈວ້ງກວາງ ຊີຈີນ.ແຂກຜູ່ມີກຽດ 400 ກວ່າທ່ານທີ່ເຂົ້າຮ່ວມປະຊຸມໄດ້ປຶກສາຫາລືກັນໂດຍເນັ້ນໃສ່ຫົວຂໍ້ທີ່ວ່າ:"ຕ່າງຝ່າຍຕ່າງມີຜົນປະໂຫຍດ,ສ້າງຄວາມຈະເລີນຮຸ່ງເຮືອງເພີ່ມຂຶ້ນ"ປະກອບຄຳຄິດຄຳເຫັນກ່ຽວກັບການກໍ່ສ້າງແລະການຂະຫຍາຍຕົວຂອງເຂດການຄ້າເສລີໃນອະນາຄົດ.ໃນເວທີປາໄສ,ທ່ານອີ້ສຽວຈຸນ,ລັດຖະມົນຕີຊ່ວຍວ່າການກະຊວງການຄ້າຈີນກ່າວວ່າ, ເຂດການຄ້າເສລີຈີນອາຊຽນໄດ້ວາງລະບຽບການທີ່ໃຫ້ຜົນປະໂຫຍດແກ່ທັງສອງຝ່າຍ,ການສ້າງເຂດການຄ້າເສລີສຳເລັດແມ່ນຈຸດເລີ່ມໃຫມ່ທີ່ໃຫ້ສອງຝ່າຍຂະຫຍາຍການພົວພັນເສດຖະກິດການຄ້າຕື່ມອີກ,ສືບຕໍ່ຊຸກຍູ້ໃຫ້ເສດຖະກິດພາກພື້ນເຊື່ອມໂຍມເຂົ້າກັນ.
ເຂດການຄ້າເສລີຈີນອາຊຽນແມ່ນເຂດການຄ້າເສລີເຂດທຳອິດທີ່ຈີນເຈລະຈາກັບພາຍນອກ, ແລະກໍ່ແມ່ນເຂດການຄ້າເສລີທີ່ປະກອບດ້ວຍປະເທດທີ່ພວມພັດທະນາທີ່ໃຫຍ່ທີ່ສຸດໃນໂລກ,ເຊິ່ງມີປະຊາກອນ 1 ຕື້ 900 ລ້ານຄົນ,GDP ເກືອບບັນລຸ 6 ພັນຕື້ໂດລາແລະລວມຍອດມູນຄ່າການຄ້າ 4500 ຕື້ໂດລາ. ທ່ານອີ້ສ້ຽວຈຸນກ່າວວ່າ, ການສ້າງເຂດການຄ້າເສລີຈີນອາຊຽນສຳເລັດແມ່ນເປັນການສະແດງໃຫ້ເຫັນຢ່າງຈະແຈ້ງທີ່ຈີນສືບຕໍ່ຊຸກຍູ້ການໄຂປະຕູສູ່ພາຍນອກແລະເລັ່ງລັດເຮັດໃຫ້ເສດຖະກິດພາກພື້ນເຊື່ອມໂຍງເຂົ້າກັນ,ເພື່ອໃຫ້ເຂດການຄ້າເສລີສົ່ງຜົນປະໂຫຍດແທ້ຈິງໃຫ້ວິສາຫະກິດແລະປະຊາຊົນສອງທັງສອງຝ່າຍ,ລັດຖະບານຂອງສອງຝ່າຍນອກ ຈາກຄວນປະຕິບັດຕາມພັນທະທີ່ກຳນົດໃນສັນຍາການຄ້າເສລີຢ່າງແທ້ຈິງ,ສືບຕໍ່ເຜີຍແຜ່ຜົນດີຂອງເຂດການຄ້າເສລີແລ້ວ,ຍັງຄວນໃຫ້ການສະຫນັບສະຫນູນດ້ານພື້ນຖານໂຄງລ່າງ,ການຫາທຶນຮອນແລະອື່ນໆ, ຊຸກຍູ້ການຄ້າແລະການລົງທຶນລະຫວ່າງສອງຝ່າຍໃຫ້ສະດວກກວ່າເກົ່າ.ທ່ານເວົ້າວ່າ:
ທ່ານຮວງເມີ້ງຟູ້,ຮອງປະທານສະພາປຶກສາການເມືອງປະຊາຊົນແຫ່ງຊາດຈີນກ່າວວ່າ,ຫຼາຍປີມານີ້,ການຮ່ວມມືລະຫວ່າງຈີນກັບອາຊຽນໄດ້ລົງເລິກກວ່າເກົ່າຢ່າງບໍ່ຢຸດຢັ້ງ,ການແລກປ່ຽນແລະຮ່ວມມືກັນໃນຫຼາຍຂົງເຂດ,ເປັນຕົ້ນວ່າ:ການສຶກສາ,ວັດທະນະທຳແລະການທ່ອງທ່ຽວກໍນັບມື້ນັບຟົດຟື້ນກວ່າເກົ່າ,ການສ້າງເຂດການຄ້າເສລີຈີນອາຊຽນແມ່ນການກະທຳຕົວຈິງຂອງສອງຝ່າຍເພື່ອລົງເລິກການພົວພັນຄູ່ຮ່ວມມືຍຸດທະສາດທີ່ມຸ່ງໜ້າໄປສູ່ສັນຕິພາບແລະຄວາມຈະເລີນນັ້ນຢ່າງບໍ່ຢຸດຢັ້ງ.ກ່ຽວກັບການເຕີບໂຕແລະສ້າງອະນາຄົດຂອງເຂດການຄ້າເສລີ,ທ່ານຮວງເມີ້ງຟູ້ມີຂໍ້ສະເໜີສາມຂໍ້.ທ່ານກ່າວວ່າ: "ອັນທີໜຶ່ງ,ເພີ່ມທະວີການແລກປ່ຽນໃນທຸກລະດັບ,ເພີ່ມຄວາມໄວ້ເນື້ອເຊື່ອໃຈກັນດ້ານການເມືອງ,ລາຍງານ,ປະສານງານແລະແກ້ໄຂບັນຫາຕ່າງໆຢ່າງທັນເວລາ,ອອກແຮງຂະຫຍາຍການໄປມາຫາສູ່ກັນລະຫວ່າງປະຊາຊົນ,ເພີ່ມທະວີມິດຕະພາບທີ່ມີມູນເຊື້ອລະຫວ່າງປະຊາຊົນສອງຝ່າຍ.ອັນທີສອງ,ລົງເລິກການຮ່ວມມືດ້ານເສດຖະກິດການຄ້າ,ເປີດກວ້າງຂະໜາດການຄ້າແລະການລົງທຶນລະຫວ່າງສອງຝ່າຍຢ່າງບໍ່ຢຸດຢັ້ງ,ຕັ້ງໜ້າຊຸກຍູ້ແລະເຂົ້າຮ່ວມການຮ່ວມມືໃນອະນຸພາກພື້ນຕ່າງໆ,ເປັນຕົ້ນວ່າ:ເຂດເຕີບໂຕພາກຕາເວັນອອກຂອງອາຊຽນ,ອະນຸພາກພື້ນແມ່ນ້ຳຂອງ,ແລະບໍລິເວນອ່າວເປີຍປູ້(ຊື່ເກົ່າອ່າວຕົ່ງແກັ໋ງ).ອັນສຸດທ້າຍແມ່ນຊຸກຍູ້ການແລກປ່ຽນດ້ານວັດທະນະທຳ,ດຳເນີນການແລກປ່ຽນແລະຮ່ວມມືກັນໃນຫຼາຍຂົງເຂດສັງຄົມຢ່າງຮອບດ້ານ,ຄື:ເຕັກນິກວິທະຍາສາດ,ການສຶກສາ,ວັດທະນະ ທຳ,ສາທາລະນະສຸກ,ການທ່ອງທ່ຽວ,ແລະການຕ້ານໄພກູ້ໄພເປັນຕົ້ນ,ເຮັດໃຫ້ການພົວພັນຄູ່ຮ່ວມມືຍຸດທະສາດຈີນອາຊຽນມີເນື້ອໃນກວ້າງຂວາງເລິກເຊິ່ງກວ່າເກົ່າ."
"ປັດຈຸບັນ, ຄຽງຄູ່ກັບສະຖານະການເສດຖະກິດດີຂຶ້ນ, ວິສາຫະກິດຂອງຈີນໄດ້ມີຄວາມປາດຖະໜາທີ່ຢາກກ້າວອອກໄປນັ້ນແຮງກ້າກວ່າເກົ່າ, ຄາດວ່າໃນຫຼາຍປີຕໍ່ໜ້າປີ ການລົງທຶນຂອງຈີນຕໍ່ອາຊຽນຈະພັດທະນາໄວກວ່າເກົ່າ. ສອງຝ່າຍຄວນນຳໃຊ້ກອງທຶນຮ່ວມມືການລົງທຶນຈີນ-ອາຊຽນແລະຊັບພະຍາກອນອື່ນໆຢ່າງເຕັມທີ່, ເລັ່ງລັດການກໍ່ສ້າງພື້ນຖານໂຄງລ່າງ, ເພີ່ມທະວີການຕິດຕໍ່ພົວພັນກັນໃນດ້ານຖະໜົນຫົນທາງ, ທາງລົດໄຟ, ການບິນແລະສື່ສານໂທລະຄົມເປັນຕົ້ນ, ເພື່ອຕອບສະໜອງຄວາມຕ້ອງການໃນດ້ານການພົວພັນເສດຖະກິດການຄ້າລະຫວ່າງສອງຝ່າຍໃຫ້ຂະຫຍາຍຕົວຫຼາຍກວ່າເກົ່າ. ບົນພື້ນຖານທີ່ປັບປຸງໝາກຜົນຂອງເຂດການຄ້າເສລີທີ່ມີຢູ່ໃນປັດຈຸບັນໃຫ້ໝັ້ນຄົງ, ຍົກສູງແລະຂະຫຍາຍການພົວພັນເສດຖະກິດການຄ້າລະຫວ່າງສອງຝ່າຍໃນຫຼາຍຂົງເຂດແລະສູງກວ່າເກົ່າ.
ທ່ານຊັນດຣຳ ພຸສປານາທັນ, ຮອງເລຂາທິການໃຫຍ່ອາຊຽນກ່າວວ່າ, ການສ້າງເຂດການຄ້າເສລີຈີນ-ອາຊຽນສຳເລັດບໍ່ພຽງແຕ່ໄດ້ສະໜອງໂອກາດໃຫ້ສອງຝ່າຍປະສານງານກັນພັດທະນາໃນພາກພື້ນ, ຍັງມີຜົນດີຕໍ່ການຫຼຸດຄວາມຫຼຸດໂຕນກັນລະຫວ່າງປະເທດຕ່າງໆ, ຊຸກຍູ້ການຮ່ວມມືການຄ້າແລະການລົງທຶນລະຫວ່າງຊາດ.
"ພວກເຣົາຕ້ອງການທຳຄວາມພະຍາຍາມຫຼາຍກວ່າເກົ່າເພື່ອຫຼຸດກຳແພງການຄ້າໃຫ້ໜ້ອຍລົງຕື່ມອີກ, ປະຕິບັດກົນໄກຄຸ້ມຄອງການຄ້າຂາເຂົ້າຂາອອກໃຫ້ດີກວ່າເກົ່າ, ພ້ອມກັນນັ້ນ, ລັດຖະບານກໍຄວນຕັ້ງໜ້າຊຸກຍູ້ເຮັດໃຫ້ການຄ້າຫັນເປັນແບບເສລີ, ເພີ່ມຄວາມໄວ້ເນື້ອເຊື່ອໃຈກັນ. ເຮັດແນວນີ້ສອງຝ່າຍຈິ່ງຈະໄດ້ຮັບຜົນປະໂຫຍດຫຼາຍກວ່າເກົ່າຈາກເຂດການຄ້າເສລີຈີນ-ອາຊຽນ"
