ຕອນເຊົ້າວັນທີ 8 ມັງກອນນີ້, ເວທີປຶກສາຫາລືກ່ຽວກັບເຂດການຄ້າເສລີຈີນ-ອາຊຽນ ໄດ້ປິດລົງຢູ່ນະຄອນນານນິງ,ເທດສະບານເຂດປົກຄອງຕົນເອງເຜົ່າຈວ້າງກວາງຊີຂອງຈີນ. ເວທີປຶກສາຫາລືເທື່ອນີ້ໄດ້ອອກຖະແຫຼງການໂດຍຊີ້ອອກວ່າ, ການຊຸກຍູ້ໃຫ້ຫັນການຄ້າແລະການລົງທຶນເປັນແບບເສລີ,ຄັດຄ້ານລັດທິປົກປ້ອງການຄ້າແລະການລົງທຶນນັ້ນ ແມ່ນສອດຄ່ອງກັບຜົນປະໂຫຍດພື້ນຖານຂອງປະເທດຕ່າງໆໃນອາຊຽນ. ໃນພາກພື້ນນີ້,ປະເທດຕ່າງໆຄວນພັດທະນາແລະລົງທຶນໃນຕະຫຼາດຂອງກັນຕື່ມອີກ,ສ້າງສະພາບແວດລ້ອມການລົງທຶນທີ່ສະດວກ,ເປີດເຜີຍແລະຍຸດຕິທຳກວ່າເກົ່າ.
ຫຼັງຈາກເຂດການຄ້າເສລີຈີນ-ອາຊຽນໄດ້ເລີ່ມດຳເນີນຢ່າງເປັນທາງການໃນວັນທີ 1 ມັງກອນນີ້ແລ້ວ, ຈີນກັບ 6 ປະເທດ ສະມາຊິກເກົ່າຂອງອາຊຽນຄື:ບຣູໄນ, ຟິລິບປິນ, ອິນໂດເນເຊຍ,ມະເລເຊຍ,ໄທແລະສິງກະໂປ ຈະບໍ່ເກັບພາສີຕໍ່ຜະລິດຕະພັນຫຼາຍກວ່າ 90% . ເມື່ອຮອດປີ 2015, ການຄ້າເສລີລະຫວ່າງຈີນກັບ 4 ປະເທດອາຊຽນໃໝ່:ຫວຽດນາມ,ລາວ,ກຳປູເຈຍແລະມຽນມາກໍ່ຈະບັນລຸລະດັບດຽວກັນ.
ໃນພິທີອັດເວທີປຶກສາຫາລືເທື່ອນີ້,ທ່ານຊາບັສ ພີນາ,ເຈົ້າຫນ້າທີ່ກອງເລຂາອາຊຽນ ກ່າວວ່າ,ປະຈຸບັນ,ກຳແພງພາສີລະຫວ່າງຈີນກັບປະເທດຕ່າງໆໃນອາຊຽນໄດ້ລົບລ້າງແລ້ວ,ແຕ່ປະເທດຕ່າງໆຍັງຕ້ອງຮ່ວມແຮງຮ່ວມໃຈກັນ,ແລະບໍ່ຄວນໄດ້ສ້າງກຳແພງອື່ນທີ່ບໍ່ແມ່ນພາສີເຂົ້າມາແທນ, ເພື່ອສະກັດກັ້ນບໍ່ໃຫ້ເກີດມີປະກົດການລັດທິປົກປ້ອງການຄ້າ.ທ່ານກ່າວວ່າ:"ສິ່ງທີ່ຂ້າພະເຈົ້າຢາກເນັ້ນໜັກແມ່ນ,ພາຍຫຼັງເຂດການຄ້າເສລີສ້າງຕັ້ງຂຶ້ນແລ້ວ,ເຖິງວ່າ ພວກເຮົາຈະໄດ້ຮັບຜົນດີຈາກການບໍ່ຕ້ອງເສຍພາສີ,ແຕ່ກໍຍັງຈະປະສົບການທ້າທາຍຈາກກຳແພງກີດຂວາງອື່ນໆທີ່ບໍ່ແມ່ນພາສີ.ກຳແພງກີດກວາງແບບບໍ່ແມ່ນພາສີກໍມີທັງຕົ້ນທຶນ ທີ່ຕ້ອງເພີ່ມຂຶ້ນຍ້ອນມາດຕະຖານຜະລິດຕະພັນແລະມາດຕະການເຕັກນິກບໍ່ເທົ່າກັນ,ສະ ນັ້ນ,ພວກເຮົາຕ້ອງເອົາໃຈໃສ່ເລື່ອງນີ້ຕື່ມອີກ,ຄືຕ້ອງລະວັງກຳແພງກີດຂວາງທີ່ບໍ່ແມ່ນພາ ສີ."
ທັດສະນະຂອງທ່ານຊາບັສ ພີນາ,ກໍແມ່ນຄວາມເຫັນທົ່ວໄປຂອງຜູ່ເຂົ້າຮ່ວມເວທີປຶກສາຫາລືເຂດການຄ້າເສລີຈີນອາຊຽນຄັ້ງນີ້.ໃນເວລາອ່ານຖະແຫຼງການຂອງເວທີປຶກສາຫາລືໃນພິທີອັດກອງປະຊຸມ,ທ່ານຈ່າງເຄີ້ນີງ,ທີ່ປຶກສາການຄ້າຂອງກົມສາກົນກະຊວງການຄ້າຈີນກ່າວວ່າ,ການຊຸກຍູ້ໃຫ້ການຄ້າລົງທຶນຫັນຢ່າງເສລີ,ຄັດຄ້ານລັດທິປົກປ້ອງການຄ້າແລະການລົງທຶນ,ແມ່ນສອດຄ່ອງກັບຜົນປະໂຫຍດພື້ນຖານຂອງຈີນແລະບັນດາປະເທດອາຊຽນ.
"ປະເທດຕ່າງໆໃນພາກພື້ນຄວນປະຕິບັດຕາມລະບຽບທີ່ໄດ້ຕົກລົງກັນກ່ຽວກັບການຄ້າສິນຄ້າແລະການຄ້າບໍລິການ, ຕັ້ງໜ້າຊຸກຍູ້ໃຫ້ການຄ້າສະດວກກວ່າເກົາ, ເຮັດໃຫ້ນະໂຍບາຍບູລິມະສິດຂອງເຂດການຄ້າເສລີຈີນ-ອາຊຽນປ່ຽນເປັນການກະທຳຕົວຈິງ. ປະເທດຕ່າງໆໃນເຂດການຄ້າຄວນເປີດຕະຫຼາດລົງທຶນເຊິ່ງກັນແລະກັນຕື່ມອີກ, ສ້າງເຂດລົງທຶນທີ່ເພີ່ມຕື່ມຢ່າງບໍ່ມີສິ່ງກີດຂວາງ, ເຮັດໃຫ້ການຮ່ວມມືລົງທຶນກາຍເປັນແມ່ແຮງທີ່ຊຸກຍູ້ໃຫ້ເສດຖະກິດພາກພື້ນເຕີບໂຕ."
ໃນໄລຍະຈັດເວທີປຶກສາຫາລື, ຜູ້ເຂົ້າຮ່ວມກອງປະຊຸມຫຼາຍຄົນສະເໜີວ່າ, ໃນຂະບວນການຮ່ວມມືພາກພື້ນ, ການຮັບຮອງມາດຕະຖານເຕັກນິກເຊິ່ງກັນແລະກັນແມ່ນບັນຫາພົ້ນເດັ່ນທີ່ວິສາຫະກິດສອງຝ່າຍຮ່ວມກັນປະເຊີນ, ຕ້ອງການໃຫ້ລັດຖະບານປະສານງານແລະປັບປຸງໃຫ້ດີຂຶ້ນຢ່າງບໍ່ຢຸດຢັ້ງ. ທ່ານລິມຈົກໂຮຍ, ເຈົ້າໜ້າທີ່ກະຊວງການຕ່າງປະເທດແລະການຄ້າບຼູໄນສະເໜີວ່າ, ປະເທດຕ່າງໆຄວນດຳເນີນການແລກປ່ຽນທີ່ມີຫຼາຍຮູບການ, ຮັບຮອງມາດຕະຖານເຕັກນິກຊຶ່ງກັນແລະກັນ, ເພື່ອລົບລ້າງສິ່ງກີດຂວາງໃນການຮ່ວມມືໃນຕໍ່ໜ້າ. ທ່ານກ່າວວ່າ:
"ປະຈຸບັນເຂດການຄ້າເສລີໄດ້ສ້າງຂຶ້ນແລ້ວ, ນີ້ກໍໝາຍຄວາມວ່າການຫຼຸດພາສີກໍຕ້ອງດຳເນີນແລ້ວ, ພວກເຮົາຈະປຶກສາບັນຫາກັນຢ່າງກວ້າງຂວາງກວ່າເກົ່າ, ເຂດການຄ້າເສລີບໍ່ພຽງແຕ່ໝາຍເຖິງການບໍ່ເກັບພາສີເທົ່ານັ້ນ, ຍັງໝາຍເຖິງການຣ່ວມມືແລະການປຶກສາຫາລືໃນຫຼາຍດ້ານຄືມາດຕະຖານແລະໂຄງປະກອບເປັນຕົ້ນ, ເພື່ອບັນລຸໃຫ້ການຄ້າມີຄວາມເສລີຢ່າງແທ້ຈິງໃນເຂດການຄ້າ."
