ພາຍຫລັງໄຮຕິເກີດເຫດການແຜ່ນດິນໄຫວແລ້ວ, ລັດຖະບານແລະວົງການຕ່າງໆໃນສັງຄົມຈີນໄດ້ຕັ້ງຫນ້າໃຫ້ການຊ່ວຍເຫລືອແກ່ໄຮຕິ.ເຄື່ອງຊ່ວຍເຫລືອສຸກເສີນຊຸດທຳອິດທີ່ລັດຖະບານຈີນສະຫນອງນັ້ນໄດ້ຖືກສົ່ງໄປຮອດນະຄອນຫລວງປັອກໂຕແປຼັງແລ້ວ,ປະຊາຊົນຢູ່ແຫ່ງຕ່າງໆຂອງຈີນກໍ່ພາກັນບໍລິຈາກເງິນແລະເຄື່ອງຂອງໃຫ້ໄຮຕິໂດຍຜ່ານສະພາກາແດງຈີນແລະອົງການຈັດຕັ້ງອື່ນໆ.
ເຄື່ອງຊ່ວຍເຫລືອສຸກເສີນທີ່ລັດຖະບານຈີນສະຫນອງໃຫ້ໄຮຕິນັ້ນໄດ້ຖືກສົ່ງໄປຮອດໄຮຕິໃນຕອນຂ້ອນແຈ້ງວັນທີ 17 ມັງກອນນີ້ຕາມເວລາທ້ອງຖີ່ນ.ຍົນຂົນສົ່ງຂອງບໍລິສັດການບິນພາກໃຕ້ຈີນໄດ້ບັນທຸກເຄື່ອງຊ່ວຍເຫລືອ 90 ໂຕນທີ່ມີມູນຄ່າ 13 ລ້ານຢວນ,ມີທັງຢາປິ່ນປົວພະຍາດ,ອາຫານ,ຕູບຜ້າເຕັ້ນ, ເຄື່ອງນຸ່ງ,ເຄື່ອງກັ່ນນ້ຳສະອາດ,ໄຟຟ້າເຄື່ອນທີ່ແລະເຄື່ອງໃຊ້ອື່ນໆ.ທ້າວໂກອີສຽງ,ນັກຂ່າວວິທະຍຸໄດ້ລາຍງານຂ່າວຈາກແຫ່ງນັ້ນວ່າ:
ເມື່ອໃຊ້ບິນ 20 ກວ່າຊົ່ວໂມງແລ້ວ, ຍົນຂົນສົ່ງພິເສດຂອງບໍລິສັດການບິນພາກໃຕ້ຈີນທີ່ບັນທຸກເຄື່ອງຊ່ວຍເຫລືອມະນຸດສະທຳຊຸດທຳອິດຂອງລັດຖະບານຈີນໄດ້ລົງຈອດຢູ່ສະຫນາມບິນສາກົນນະຄອນຫລວງປັອກໂຕແປຼັງຂອງໄຮຕິ.ເມື່ອໄປຮອດແລ້ວ,ທະຫານຂອງກອງທະຫານຮັກສາສັນຕິພາບຈີນ 20 ກວ່າຄົນແລະທະຫານຮັກສາສັນຕິພາບອາເມລິກາຫລາຍຄົນໄດ້ຊ່ວຍກັນເຄື່ອນຍ້າຍເຄື່ອງຊ່ວຍເຫລືອທີ່ຫນັກ 90 ໂຕນທີ່ມີ ຕູບຜ້າເຕັ້ນ 1000 ເຄື່ອງ, ນ້ຳສະອາດ,ຂະຫນົມ,ຢາປິ່ນປົວພະຍາດລົງຈາກຍົນເພື່ອສົ່ງໄປໃຫ້ລັດຖະບານແລະປະຊາຊົນໄຮຕິ.
ໜ່ວຍກູ້ໄພສາກົນຈີນທີ່ໄດ້ໄປຮອດໄຮຕີກໍພວມປະຕິບັດໜ້າທີ່ກູ້ໄພແລະປິ່ນປົວຢູ່ໄຮຕີມາໄດ້ຫຼາຍມື້ແລ້ວ. ເລີ່ມແຕ່ວັນທີ 14 ມັງກອນນີ້ຕາມເວລາທ້ອງຖິ່ນ, ໜ່ວຍກູ້ໄພສາກົນຈີນກໍໄດ້ກູ້ໄພຢູ່ຕຶກຂອງສຳນັກງານໃຫຍ່ສະຫະປະຊາຊາດປະຈຳໄຮຕີ, ແລະໄດ້ຄົ້ນພົບສົບຂອງທ່ານເຮຕິ ອັນນາບີ,ຜູ້ຕາງໜ້າພິເສດຂອງເລຂາທິການໃຫຍ່ສະຫະປະຊາຊາດ.ສົບຂອງພະນັກງານຈີນ 8 ຄົນທີ່ເສຍຊີວິດກໍໄດ້ຄົ້ນພົບໝົດໃນວັນທີ 17 ມັງກອນນີ້.
ວັນທີ 17 ມັງກອນນີ້ຢູ່ປອັກໂຕແປຼງ, ທ່ານບານກີມູນ, ເລຂາທິການໃຫຍ່ສະຫະປະຊາຊາດໄດ້ສະແດງຄວາມຂອບໃຈນຳໜ່ວຍກູ້ໄພສາກົນຈີນທີ່ໄດ້ໄປຮອດປອັກໂຕແປຼງແລະລົງມືກູ້ໄພຢ່າງວ່ອງໄວພາຍຫຼັງເກີດໄພແຜ່ນດິນໄຫວ.
ວັນທີ 17 ມັງກອນນີ້ຢູ່ທີ່ປັກກິ່ງ,ທ່ານໝຽວຊົງກ່າງ, ຮອງຫົວໜ້າພະແນກກູ້ໄພແຜ່ນດິນໄຫວຂອງກົມແຜ່ນດິນໄຫວຈີນກ່າວວ່າ, ໃນເວລາໜ່ວຍກູ້ໄພສາກົນຈີນໄປຮອດໄຮຕີແລະດຳເນີນວຽກງານກູ້ໄພຢ່າງຕັ້ງໜ້າ,ຈີນຍັງໄດ້ກຽມວັດຖຸແລະເຈົ້າໜ້າທີ່ກູ້ໄພໄວ້ແລ້ວ,ຖ້າມີຄວາມຕ້ອງການເພີ່ມ,ຈີນສາມາດສົ່ງໜ່ວຍແພດຫຼືໜ່ວຍກູ້ໄພໄປໄຮຕີໄດ້ໃນທຸກເວລາ.
ຂະນະດຽວກັນນີ້,ວົງການຕ່າງໆໃນສັງຄົມຈີນກໍໄດ້ບໍລິຈາກເງິນແລະເຄື່ອງຊ່ວຍເຫຼືອໃຫ້ເຂດປະສົບໄພໄຮຕິໂດຍຜ່ານສະພາກາແດງຈີນ.ວັນທີ15ມັງກອນນີ້,ຄູແລະນັກຮຽນ2ພັນກວ່າຄົນຂອງເມືອງມຽນຢາງແຂວງເສສວນທີ່ເປັນເຂດປະສົບໄພອັນໜັກໜ່ວງໃນແຜ່ນດິນໄຫວເວີ້ນສວນປີ2008ໄດ້ຮ່ວມຈິດຮ່ວມໃຈກັນບໍລິຈາກເງິນເຖິງ1ແສນ1ໝື່ນກວ່າຢວນຢ່າງຫ້າວຫັນໃຫ້ໄຮຕິ.ທ່ານຊົງຢວນຫວູ,ຮອງຜູ່ອຳນວຍການບໍດີໂຮງຮຽນມັດທະຍົມອາຊີວະສຶກສາເປີຍສວນເມືອງມຽນຢາງກ່າວວ່າ,ພາຍຫຼັງເຫດການແຜ່ນດິນໄຫວເວີ້ນ ສວນເກີດຂຶ້ນແລ້ວ,ປະຊາຊົນເຂດປະສົບໄພໄດ້ຮັບການຊ່ວຍເຫຼືອຈາກປະຊາຊົນຂອງປະເທດຕ່າງໆໃນໂລກ,ເຂົາເຈົ້າກໍຫວັງສົ່ງຄວາມຮັກແພງແບບນີ້ໄປໃຫ້ໂລກຄືກັນ.ທ່ານຊົງຢວນຫວູກ່າວວ່າ:"ພວກເຮົາຢາກສະແດງຄວາມຮູ້ບຸນຄຸນຂອງພວກເຮົາເອງ,ແລະປະກອບສ່ວນຕາມຄວາມສາມາດຂອງຕົນ."
