ປີ2009ເສດຖະກິດຈີນເພີ່ມຂຶ້ນ8,7%
(GMT+08:00) 2010-01-22 18:00:53 cri
ວັນທີ 21 ມັງກອນນີ້, ກົມສະຖິຕິແຫ່ງຊາດຈີນໄດ້ເຜີຍແຜ່ຕົວເລກສະຖິຕິສະແດງໃຫ້ເຫັນວ່າ,ປີ 2009,ຍອດມູນຄ່າຜະລິດຕະພັນພາຍໃນປະເທດຫລືGDPຂອງຈີນບັນລຸ33500ຕື້ຢວນ,ເພີ່ມຂຶ້ນຫລາຍກວ່າປີ2008 8,7%, ໄດ້ສຳເລັດຫນ້າທີ່ຮັກສາໃຫ້ເສດຖະກິດເຕີບໂຕ 8%ທີ່ລັດຖະບານຈີນກຳນົດໄວ້ໃນຕົ້ນປີກາຍ.ທ່ານມາຈ້ຽນຖາງ,ຫົວຫນ້າກົມສະຖິຕິແຫ່ງຊາດຈີນຄາດວ່າ,ປີນີ້, ເສດຖະກິດຈີນຈະຮັກສາໃຫ້ເຕີບໂຕຢ່າງຫມັ້ນທ່ຽງແລະໄວສົມຄວນ.
ໃນກອງປະຊຸມຂ່າວທີ່ຈັດຂຶ້ນໃນວັນທີ 21 ມັງກອນນີ້, ທ່ານມາຈ້ຽນຖາງ,ຫົວຫນ້າກົມສະຖິຕິແຫ່ງຊາດຈີນກ່າວວ່າ, ເຖິງວ່າຄວາມເຕີບໂຕຄື 8,7% ບໍ່ໄດ້ບັນລຸລະດັບສະເລ່ຍຂອງການເຕີບໂຕທາງເສດຖະກິດນັບແຕ່ດຳເນີນການປະຕິຮູບແລະໄຂປະຕູສູ່ພາຍນອກໃນ 30 ປີມານີ້, ແຕ່ກໍ່ໄດ້ຢືນຢັນວ່າ,ພື້ນຖານເສດຖະກິດຈີນໄດ້ຟື້ນຕົວໄປສູ່ທາງທີ່ດີແລະແຫນ້ນຫນາຂຶ້ນເລື້ອຍໆ,ທ່ານໄດ້ສະຫລຸບຈຸດພິເສດຂອງເສດຖະກິດຈີນໃນປີ2009ວ່າ:"ປີ 2009,ການຜະລິດກະສິກຳຂອງຈີນໄດ້ຂະຫຍາຍຕົວຢ່າງຫມັ້ນທ່ຽງຕໍ່ມາ, ຜົນຜະລິດທັນຍາຫານໄດ້ເພີ່ມຂຶ້ນ 6 ປີລຽນຕິດ;ການຜະລິດທາງອຸດສາຫະກຳກໍ່ຄ່ອຍໆເພີ່ມຫລາຍຂຶ້ນ,ຜົນກຳໄລທີ່ຫລຸດລົງຢ່າງຫລວງຫລາຍກໍ່ຫັນມາເພີ່ມຂຶ້ນ;ການລົງທຶນສືບຕໍ່ເພີ່ມຂຶ້ນຢ່າງວ່ອງໄວ, ການລົງທຶນໃນຂົງເຂດທີ່ກ່ຽວພັນເຖິງຊີວິດການເປັນຢູ່ຂອງປະຊາຊົນກໍ່ເພີ່ມຂຶ້ນໄວເຂົ້າຢ່າງເດັ່ນຊັດ;ການຈຳຫນ່າຍສິນຄ້າໃນຕະຫລາດກໍ່ເພີ່ມຂຶ້ນໄວສົມຄວນຢ່າງຫນັກຫນ້ນ;ລາຄາສິນຄ້າບໍລິໂພກຂອງປະຊາຊົນແລະລາຄາການຜະລິດໃນຫມົດປີເມື່ອທຽວກັບປີກ່ອນແລ້ວແມ່ນຫລຸດຕ່ຳລົງ,ແຕ່ມາຮອດທ້າຍປີກໍ່ຖີບສູງຂຶ້ນ;ລວມຍອດມູນຄ່າການຄ້າຂາເຂົ້າຂາອອກໃນຫມົດປີຫລຸດລົງຫນ້ອຍກວ່າປີກ່ອນ,ເລີ່ມແຕ່ເດືອນພະຈິກເມື່ອທຽບກັບໄລຍະດຽວກັນຂອງປີກ່ອນແລ້ວແມ່ນເພີ່ມຂຶ້ນ;ລາຍໄດ້ຂອງປະຊາຊົນຢູ່ຕົວເມືອງແລະຊົນນະບົດເພີ່ມຂຶ້ນຢ່າງຫນັກແຫນ້ນ,ການປະກອບອາຊີບແມ່ນດີກວ່າທີ່ຄາດໄວ້;ຈຳນວນສະຫນອງເງິນຕາເພີ່ມຂຶ້ນໄວສົມຄວນ, ເງິນກູ້ໃຫມ່ກໍ່ເພີ່ມຂຶ້ນຢ່າງຫລວງຫລາຍ."
ຕົວເລກສະແດງໃຫ້ເຫັນວ່າ,ປີ2009,ການລົງທຶນແລະການບໍລິໂພກສືບຕໍ່ເປັນກຳລັງແຮງທີ່ຊັກນຳການເຕີບໂຕຂອງເສດຖະກິດຈີນ.ເຖິງວ່າລາຄາຜູ່ບໍລິໂພກ ຫຼືCPIຂອງປີ2009ໄດ້ຫຼຸດລົງຕ່ຳກວ່າປີ2008 0,7%ກໍ່ຕາມ,ແຕ່ເລີ່ມແຕ່ເດືອນພະຈິກປີ2009,CPIໄດ້ຖີບສູງຂຶ້ນຫຼາຍກວ່າໄລຍະດຽວກັນຂອງປີ2008ສອງເດືອນລຽນຕິດ.ຍ້ອນປະກົດການນີ້,ນັກວິເຄາະຊີ້ອອກວ່າ,ຖ້າວ່າCPIສືບຕໍ່ຖີບສູງຂຶ້ນ,ຈະພາໃຫ້ມີແຮງກົດດັນທາງໄພເງິນເຟີ້ເພີ່ມຂຶ້ນອີກ.
ກ່ຽວກັບເລື່ອງນີ້,ທ່ານມາຈ້ຽນຖາງວິເຄາະວ່າ,CPIຖີບສູງຂຶ້ນຕົ້ນຕໍແມ່ນຍ້ອນຄ່າໃຊ້ຈ່າຍດ້ານອາຫານແລະເຮືອນຢູ່ຖີບສູງຂຶ້ນ.ອັນນີ້ດ້ານໜຶ່ງໝາຍຄວາມວ່າຈີນໄດ້ຫຼີກ ລຽບບໍ່ໃຫ້ເກີດໄພເງິນຝືດທີ່ເຄີຍວິຕົກກັງວົນມາກ່ອນນັ້ນຢ່າງສຳເລັດຜົນ,ອີກດ້ານໜຶ່ງກໍ່ເຕືອນໃຫ້ລັດຖະບານຈີນຄວນເອົາໃຈໃສ່ໃນລະດັບສູງຕໍ່ທ່ວງທ່າຂະຫຍາຍຕົວຂອງລາຄາສິນຄ້າ.ທ່ານກ່າວວ່າ:"ປີນີ້,ພວກເຮົາຍັງຕ້ອງຜັນຂະຫຍາຍທິດທາງດັດສົມມະຫາພາກທີ່ສູນກາງໄດ້ຕົກລົງແລ້ວຢ່າງຫມັ້ນຫນຽວບໍ່ປ່ຽນແປງ, ຄວນຈັດເອົາການຮັກສາການເຕີບໂຕທາງເສດຖະກິດ ປັບປຸງໂຄງປະກອບ ແລະຄຸ້ມຄອງໄພເງິ້ນເຟີ້ທີ່ຄາດໄວ້ ປະສົມປະສານກັນໃຫ້ດີກວ່າເກົ່າ, ປ້ອງກັນບໍ່ໃຫ້ລາຄາສິນຄ້າສູງຂຶ້ນໄວໂພດ.ເນື່ອງຈາກສະພາບການທົ່ວໄປຂອງການສະຫນອງກັບຄວາມຕ້ອງການ ແລະທັນຍາຫານໄດ້ຮັບຜົນຜະລິດອຸດົມສົມບູນ 6 ປີລຽນຕິດ,ເຊື່ອວ່າ ເມື່ອພວກເຮົາໄດ້ທຳຄວາມພະຍາຍາມແລ້ວ,ລາຄາສິນຄ້າທີ່ສູງຂຶ້ນໃນປີນີ້ ຄວນຈະບໍ່ຮຸນແຮງແລະສາມາດຄວບຄຸມໄດ້."
ເຈົ້າຫນ້າທີ່ຜູ່ນີ້ຍັງຊີ້ອອກວ່າ, ປະຈຸບັນ,ພື້ນຖານທີ່ເສດຖະກິດຟື້ນຕົວຄືນຍັງອ່ອນແອຢູ່, ເສດຖະກິດຢູ່ພາຍໃນປະເທດຈີນທີ່ພວມຫມູນເດີນ ຍັງມີປັດໄຈທີ່ບໍ່ແນ່ນອນບາງຢ່າງ,ຕົວຢ່າງຄື:ແຮງກົດດັນຂອງໄພເງິ້ນເຟິ້ຍ້ອນລາຄາສິນຄ້າສູງຂຶ້ນ,ຂະແຫນງການຈຳນວນຫນື່ງມີຄວາມສາມາດຜະລິດເຫຼືອເຟືອແລະອື່ນໆ.ທ່ານກ່າວວ່າ,ປີນີ້,ຈີນຈະຮັກສາຄວາມຕໍ່ເນື່ອງແລະໝັ້ນທ່ຽງຂອງນະໂຍບາຍເສດຖະກິດມະຫາພາກ,ຍົກຈຸດສຸມແລະຄວາມຄ່ອງແຄ້ວຂອງນະໂຍບາຍໃຫ້ສູງຂຶ້ນ,ຍົກສູງຄຸນນະພາບແລະປະສິດທິພາບຂອງການເຕີບໂຕຂອງເສດຖະກິດຢ່າງບໍ່ຢຸດຢັ້ງ,ເລັ່ງລັດຊຸກຍູ້ໃຫ້ຫັນປ່ຽນຮູບການພັດທະນາເສດຖະກິດແລະປັບປຸງໂຄງປະກອບເສດຖະກິດ. ເມື່ອໄດ້ທຳຄວາມພະຍາຍາມແລ້ວ, ພວກເຮົາເຊື່ອວ່າ,ເສດຖະກິດຈີນໃນປີ 2010 ຈະສືບຕໍ່ຮັກສາການພັດທະນາຢ່າງຫມັ້ນທ່ຽງແລະໄວສົມຄວນ.
