ທີ່ນີ້,ວິທະຍຸສາກົນແຫ່ງປະເທດຈີນ,ສະບາຍດີ,ທ່ານຜູ່ຟັງທີ່ໂຄລົບ, ວັນທີ 17ມີນານີ້,ທະນາຄານໂລກໄດ້ເຜີຍແຜ່ບົດລາຍງານປະຈຳໄຕມາດຂອງ ເສດຖະກິດສະບັບໃຫມ່. ບົດລາຍງານຄາດວ່າ, ປີນີ້, ລວມຍອດຜະລິດຕະພັນພາຍໃນປະເທດຫຼື GDP ຂອງຈີນຈະເພີ່ມຂຶ້ນ 9,5% . ຕໍ່ໄປເຊີນຟັງລາຍລະອຽດກ່ຽວກັບເລື່ອງນີ້:
ບົດລາຍງານຂອງທະນາຄານໂລກຂຽນວ່າ, ເຖິງວ່າເສດຖະກິດຈີນ ພວມຕົກຢູ່ໃນສະພາບທີ່ເສດຖະກິດທົ່ວໂລກຊຸດໂຊມລົງກໍຕາມ,ແຕ່ຍັງສາມາດບັນລຸການເຕີບໂຕ 8,7% ໃນປີ 2009ໄດ້, ແລະໄດ້ຮັກສາທ່າອຽງທີ່ເຕີບໂຕຢ່າງແຂງແຮງໃນ 2 ເດືອນຕົ້ນປີ 2010. ທ່ານລູອິສ ຄູດສ໌,ນັກເສດຖະສາດລະດັບສູງຂອງສຳນັກງານທະນາຄານໂລກປະຈຳຈີນກ່າວວ່າ,ເສດຖະກິດຈີນໄດ້ສະແດງຄວາມເຂັ້ມແຂງອອກຢ່າງພົ້ນເດັ່ນໃນສອງເດືອນຕົ້ນປີນີ້, ນີ້ເຮັດໃຫ້ທະນາຄານໂລກ ເພີ່ມຕົວເລກຄາດຫມາຍຕໍ່ການເຕີບໂຕຂອງເສດຖະກິດຈີນ.ທ່ານກ່າວວ່າ:
"ດ້ານຫນຶ່ງ,ພວກເຮົາໄດ້ເຫັນຈີນຮັກສາທ່າອຽງທີ່ແຂງແຮງໃນການສົ່ງອອກ, ອີກດ້ານຫນຶ່ງ ,ເສດຖະກິດຂອງພາຍໃນປະເທດຈີນຟົດຟື້ນທີ່ສຸດ, ໂດຍສະເພາະແມ່ນໃນສອງເດືອນຕົ້ນປີ 2010, ພວກເຮົາເຫັນຍອດມູນຄ່າສິນຄ້າ ຂາຍຍ່ອຍ ແລະການຜະລິດທາງອຸດສາຫະກຳ ລ້ວນແຕ່ເພີ່ມຂຶ້ນຢ່າງຫຼວງຫຼາຍ, ກໍ່ແມ່ນມີທ່າອຽງນີ້ເອງໃນໄລຍະຕົ້ນປີນີ້, ຈຶ່ງເຮັດໃຫ້ພວກເຮົາເພີ່ມຕົວເລກຄາດຫມາຍຕໍ່ການເຕີບໂຕຂອງເສດຖະກິດຈີນ, ປະຈຸບັນ,ພວກເຮົາຄາດວ່າ, ການເຕີບໂຕຂອງເສດຖະກິດຈີນຈະບັນລຸ 9,5%."
ພ້ອມກັນນັ້ນ, ທະນາຄານໂລກກ່າວວ່າ, ເສດຖະກິດຈີນໄດ້ຜ່ານເງິນເຟີ້ລົບໃນປີ 2009ແລ້ວ, ເງິນເຟີ້ຂອງຈີນໃນປີ 2010 ຈະເພີ່ມຂຶ້ນ, ແຕ່ໃຕ້ສະພາບການທີ່ສາກົນຍັງມີຄວາມສາມາດການຜະລິດເຫຼືອຢູ່ນັ້ນ, ແຮງກົດດັນທີ່ລາຄາສິນຄ້າໂລກແພງຂຶ້ນອາດຈະຖືກສະກັດກັ້ນ,ສະນັ້ນປີນີ້ຈີນອາດຈະບໍ່ມີເງິນເຟີ້ສູງ. ທ່ານລຸຍສ໌ ຄູຈິສເຫັນວ່າ, ນະໂຍບາຍເສດຖະກິດດ້ານມະຫາພາກຂອງຈີນໃນປີນີ້ຈະເຂັ້ມງວດກວ່າປີ 2009. ທ່ານສະເໜີວ່າຈີນຄວນໃຊ້ຫຼັກໝັ້ນຂອງນະໂຍບາຍມະຫາພາກຕ່າງກັບປະເທດອື່ນໆ.
"ເວົ້າຈາກຫຼັກໝັ້ນດ້ານເສດຖະກິດມະຫາພາກ, ຫຼັກໝັ້ນນະໂຍບາຍຂອງຈີນຄວນຕ່າງກັບປະເທດອື່ນ, ເພາະວ່າສະພາບຕົວຈິງຂອງຈີນໃນປະຈຸບັນກໍຕ່າງກັນ, ປະຈຸບັນ, ເສດຖະກິດໃນທົ່ວໂລກຍັງຟື້ນຕົວຊ້າ, ແຕ່ເສດຖະກິດຈີນໄດ້ມີທ່າອຽງທີ່ແຂງແຮງ,ນອກນີ້ຜະລິດຕະພັນໂດຍລວມຂອງຈີນກໍໃກ້ກັບຄວາມສາມາດການຜະລິດທີ່ບົ່ມຊ້ອນ, ກໍໝາຍຄວາມວ່າ, ເບິ່ງຈາກດ້ານເສດຖະກິດໂດຍລວມແລ້ວ,ຄວາມສາມາດການຜະລິດທີ່ເຫຼືອຂອງຈີນບໍ່ຫຼາຍປານໃດ,ສະນັ້ນຫຼັກໝັ້ນນະໂຍບາຍມະຫາພາກຂອງຈີນຄວນຕ່າງກັບປະເທດອື່ນ."
ນອກນີ້,ບົດລາຍງານຂອງທະນາຄານໂລກຍັງຊີ້ອອກວ່າ,ເພື່ອຮັບປະກັນຄວາມໝັ້ນທ່ຽງດ້ານເສດຖະກິດແລະການທະນາຄານ,ຈີນຄວນຫຼຸດຄວາມສ່ຽງດ້ານອະສັງຫາລິມະຊັບ.ທ່ານລູອິສ ຄຸຍເຫັນວ່າ,ການແກ້ໄຂບັນຫາເຮືອນຢູ່ຂອງກຸ່ມຄົນທີ່ມີລາຍໄດ້ຕ່ຳຕ້ອງການໃຫ້ລັດຖະບານແກ້ໄຂໂດຍຜ່ານແຜນການຂອງລັດຖະບານເປັນເວລາຍາວນານ,ຍັງຕ້ອງຄຸ້ມຄອງຄວາມປາຖະໜາຂອງຄົນທັງຫຼາຍທີ່ຢາກຊື້ເຮືອນຢູ່ຕົວເມືອງໃຫຍ່.ທ່ານຍັງກ່າວວ່າ,ຈີນຄວນຫຼຸດການອາໄສຂອງອົງການປົກຄອງທ້ອງຖິ່ນທີ່ມີຕໍ່ລາຍໄດ້ຈາກການ ຂາຍທີ່ດິນ.ບົດລາຍງານທີ່ທະນາຄານໂລກເຜີຍແຜ່ນັ້ນກ່າວເນັ້ນວ່າ,ປະຈຸບັນນີ້,ຈີນພວມກະກຽມແຜນການພັດທະນາ5ປີຊຸດໃໝ່,ເປົ້າໝາຍໃຈກາງແມ່ນສືບຕໍ່ຊຸກຍູ້ໃຫ້ເສດຖະກິດສະໝ່ຳສະເໝີກວ່າເກົ່າ,ຍົກສູງສະມັດຖະພາບ,ຫັນປ່ຽນບົດບາດຂອງລັດຖະບານໃນການພັດທະນາເສດຖະກິດຕື່ມອີກ,ນີ້ຈະສະໜອງຈຸດເຕີບໂຕໃໝ່ທີ່ຕໍ່ເນື່ອງໃຫ້ການພັດທະນາເສດຖະກິດຂອງຈີນໄດ້.
