ການເຈລະຈາຍຸດທະສາດແລະເສດຖະກິດຈີນອາເມລິກາຮອບທີສອງທີ່ໄດ້ຮັບຄວາມສົນໃຈຢ່າງກວ້າງຂວາງນັ້ນໄດ້ໄຂຂຶ້ນຢູ່ນະຄອນຫລວງປັກກິ່ງແລ້ວໃນວັນທີ 24 ພຶດສະພານີ້.ໃນໄລຍະຈັດການເຈລະຈາ,ສອງຝ່າຍຈີນແລະອາເມລິກາຈະລົງເລິກແລກປ່ຽນຄວາມເຫັນຢ່າງກວ້າງຂວາງກ່ຽວກັບບັນຫາຍຸດທະສາດ,ຍາວນານແລະຮອບດ້ານທີ່ກ່ຽວພັນກັບການຂະຫຍາຍການພົວພັນລະຫວ່າງສອງປະເທດ.
ທ່ານຫູຈີນທາວ, ປະທານປະເທດຈີນໄດ້ກ່າວຄຳປາໄສໃນພິທີໄຂການເຈລະຈາເທື່ອນີ້.ທ່ານຫູຈີນທາວຊີ້ອອກວ່າ, ໃນຖານະທີ່ເປັນປະເທດສະມາຊິກຖາວອນຂອງສະຫະປະຊາຊາດ,ຈີນແລະອາເມລິກາແມ່ນປະເທດທີ່ພວມພັດທະນາທີ່ໃຫຍ່ທີສຸດແລະປະເທດທີ່ພັດທະນາແລ້ວທີ່ໃຫຍ່ທີ່ສຸດໃນໂລກ,ບໍ່ວ່າໃນດ້ານການຊຸກຍູ້ໃຫ້ເສດຖະກິດໂລກຟື້ນຕົວຄືນຢ່າງຮອບດ້ານແລະເຕີບໂຕຢ່າງຕໍ່ເນື່ອງ,ຫລືໃນດ້ານການແກ້ໄຂບັນຫາຈຸດສຸມໃນພາກພື້ນ, ຮັບມືກັບການທ້າທາຍໃນທົ່ວໂລກແລະປົກປັກຮັກສາສັນຕິພາບແລະຄວາມປອດໄພຂອງໂລກ,ກໍ່ລ້ວນແຕ່ປະເຊີນກັບບັນຫາຮ່ວມກັນ,ແລະຮັບຜິດຊອບຫນ້າທີ່ທີ່ສຳຄັນ.ທ່ານຫູຈີນທາວຫວັງການເຈລະຈາເທື່ອນີ້ຈະໄດ້ຮັບຫມາກຜົນທີ່ດີ.ທ່ານກ່າວວ່າ:
ການເຈລະຈາເທື່ອນີ້ແມ່ນຈັດຂຶ້ນໃນເວລາທີ່ສຳຄັນທີ່ສະຖານະການການເມືອງເສດຖະກິດໂລກມີການປ່ຽນແປງໃຫມ່, ການພົວພັນຈີນອາເມລິກາພົບກັບໂອກາດໃຫມ່.ການຊຸກຍູ້ໃຫ້ການເຈລະຈາເທື່ອນີ້ໄດ້ຮັບຫມາກຜົນທີ່ດີນັ້ນແມ່ນມີຄວາມຫມາຍສຳຄັນຕໍ່ທັງສອງປະເທດ.ຂໍໃຫ້ສອງຝ່າຍຈົ່ງແລກປ່ຽນປຶກສາຫາລືກັນຢ່າງກົງໄປກົງມາ,ລົງເລິກທຳຄວາມເຂົ້າໃຈກັນ, ເພີ່ມຄວາມໄວ້ເນື້ອເຊື່ອໃຈກັນ,ແລະອະທິບາຍຄວາມຂັດແຍ່ງກັນ ກ່ຽວກັບບັນຫາທີ່ກ່ຽວພັນເຖິງສະພາບການລວມ,ມີລັກສະນະຍຸດທະສາດແລະຍາວນານ,ເພື່ອຊຸກຍູ້ການຮ່ວມມືກັນ.
ທ່ານວາງຊີຊ່ານ, ຮອງນາຍົກລັດຖະມົນຕີຈີນ, ແລະທ່ານໄຕ້ປິງກົວ, ທີ່ປຶກສາແຫ່ງລັດຈີນ, ນາງຮິວລາຣີ ຄຼິນຕັນ, ຊິ່ງເປັນຜູ້ຕາງໜ້າພິເສດຂອງທ່ານບາຣັກ ໂອບາມາ, ປະທານາທິບໍດີອາເມລິກາ, ລັດຖະມົນຕີວ່າການກະຊວງການຕ່າງປະເທດອາເມລິກາແລະທ່ານທີໂມທີ ເກັດສເນີ, ລັດຖະມົນຕີວ່າການກະຊວງການເງິນອາເມລິກາໄດ້ຮ່ວມກັນໄຂ ການເຈລະຈາໃນເທື່ອນີ້.
ໃນພິທີໄຂການເຈລະຈາ, ນາງຮິວລາຣີ ຄຼິນຕັນ, ລັດຖະມົນຕີວ່າການກະຊວງການຕ່າງປະເທດອາເມລິກາທີ່ຮ່ວມເປັນປະທານກັບທ່ານໄຕ້ປິງກົວ, ທີ່ປຶກສາແຫ່ງລັດຈີນໄດ້ກ່າວຄຳປາໄສແລະໄດ້ມອບຄຳເວົ້າຂອງທ່ານບາຣັກ ໂອບາມາ, ປະທານາທິບໍດີອາເມລິກາຕໍ່ພິທີໄຂການເຈລະຈາໃຫ້ແກ່ປະທານຫູຈີນທ່າວໂດຍຕົນເອງ. ໃນຄຳປາໄສຂອງທ່ານໂອບາມາຂຽນວ່າ, ອາເມລິກາຍິນດີຕ້ອນຮັບຈີນກາຍເປັນສະມາຊິກທີ່ເຂັ້ມແຂງ,ຈະເລີນແລະໄດ້ຮັບຜົນສຳເລັດຂອງປະຊາຄົມໂລກ, ຄວາມສຳຄັນຂອງການພົວພັນລະຫວ່າງອາເມລິກາກັບຈີນສາມາດເທົ່າກັບການພົວພັນສອງຝ່າຍຕ່າງໆໃນໂລກໃນສະຕະວັດ 21 . ໃນເວລາກ່າວຄຳປາໄສ, ນາງຄຼິນຕັນກ່າວວ່າ, ອາເມລິກາກັບຈີນເພີ່ມທະວີການຮ່ວມມື, ຮ່ວມກັນແກ້ໄຂບັນຫາທົ່ວໂລກ, ມີຜົນດີຕໍ່ສັນຕິພາບແລະການພັດທະນາຂອງໂລກ.
"ຈີນມີສຸພາສິດຄຳໜຶ່ງວ່າ "ເລືອກທາງໄປຕ່າງກັນແຕ່ໄປຮອດຈຸດໝາຍບ່ອນດຽວ".ຈີນອາເມລິກາມີປະຫວັດສາດທີ່ມີຈຸດພິເສດຂອງໃຜລາວ,ຈີນມີປະຫວັດສາດທີ່ມີອາລິຍະທຳເກົ່າແກ່,ສ່ວນອາເມລິກາແມ່ນປະເທດໄວໜຸ່ມ.ບໍ່ວ່າຈະມີການທ້າທາຍຫຼືມີໂອກາດໃນອະນາ ຄົດ,ຈີນອາເມລິກາກໍ່ຈະຮ່ວມກັນປະເຊີນ.ເຖິງວ່າພວກເຮົາເລືອກເສັ້ນທາງຕ່າງກັນ,ແຕ່ ພວກເຮົາມີຈຸດໝາຍປາຍທາງທີ່ຄືກັນ,ນີ້ກໍຄືບັນຫາທີ່ຈະເຈລະຈາກັນໃນເທື່ອນີ້."
ໃນການເຈລະຈາເສດຖະກິດທີ່ມີຫົວຂໍ້ວ່າ"ຮັບປະກັນການພົວພັນຄູ່ຮ່ວມມືເສດຖະກິດຈີນອາເມລິກາທີ່ພັດທະນາຢ່າງຕໍ່ເນື່ອງແລະຕ່າງຝ່າຍຕ່າງມີຜົນປະໂຫຍດ",ຈີນອາເມລິກາຈະລົງເລິກຫາ ລືກ່ຽວກັບຫຼາຍບັນຫາສຳຄັນ,ຄື:ນະໂຍບາຍເສດຖະກິດມະຫາພາກ,ການຄ້າກັບການລົງ ທຶນ,ຄວາມໝັ້ນທ່ຽງຂອງຕະຫຼາດການທະນາຄານ,ແລະການປະຕິຮູບລະບົບການທະນາຄານສາກົນເປັນຕົ້ນ.ໃນເວລາກ່າວຄຳປາໄສ,ທ່ານເກັດສ໌ເນີ,ລັດຖະ ມົນຕີວ່າການກະຊວງການເງິນອາເມລິກາກ່າວວ່າ,ຜົນປະໂຫຍດຮ່ວມກັນຂອງຈີນອາເມລິກາແມ່ນຄວນພັດທະນາເສດຖະກິດໂລກທີ່ເຂັ້ມແຂງກວ່າເກົ່າແລະມີຄວາມສາມາດສູງກວ່າເກົ່າໃນການຕ້ານຄວາມສ່ຽງ,ເຮັດໃຫ້ການເຕີບໂຕຂອງເສດຖະກິດສະໝ່ຳສະເໝີກັນກວ່າເກົ່າພາຍໃນປະເທດແລະນອກປະເທດ.
ໃນເວລາກ່າວຄຳປາໄສ,ທ່ານວາງຊີຊ່ານ,ຮອງນາຍົກລັດຖະມົນຕີຈີນທີ່ຮ່ວມກັນຈັດການເຈລະຈາເສດຖະກິດກັບທ່ານເກັດສ໌ເນີນັ້ນກ່າວວ່າ,ການພົວພັນດ້ານເສດຖະກິດລະຫວ່າງຈີນກັບອາເມລິກາແມ່ນພື້ນຖານອັນສຳຄັນລະຫວ່າງສອງປະເທດ,ຈີນອາເມລິກາບໍ່ແມ່ຄູ່ແຂ່ງຂັນ,ແຕ່ແມ່ນຄູ່ຮ່ວມມື.
