ວັນທີ 5 ມິຖຸນາແມ່ນວັນສິ່ງແວດລ້ອມຂອງໂລກ, ວັນທີ 3 ມິຖຸນານີ້,ກະຊວງອະນຸລັກສິ່ງແວດລ້ອມຈີນໄດ້ເຜີຍແຜ່"ບົດລາຍງານສະພາບສິ່ງແວດລ້ອມຈີນປີ 2009". ໃນກອງປະຊຸມຖະແຫຼງຂ່າວທີ່ຈັດຂຶ້ນໃນວັນທີ3ມິຖຸນານີ້,ທ່ານຈ່າງລີ້ຈຸ່ນ,ລັດຖະມົນຕີຊ່ວຍວ່າການກະຊວງອະນຸລັກສິ່ງແວດລ້ອມຈີນກ່າວວ່າ,ປີ 2009,ການຫຼຸດການລະບາຍມົນລະພິດຂອງຈີນມີປະສິດທິຜົນດີເກີນຄາດໝາຍຢ່າງເດັ່ນຊັດ,ພາກສ່ວນທີ່ກ່ຽວຂ້ອງຈະເລັ່ງລັດຊຸກຍູ້ປ່ຽນແປງຮູບການພັດທະນາເສດຖະກິດແລະປັບປຸງໂຄງປະກອບເສດຖະກິດໂດຍຜ່ານມາດຕະການເພີ່ມທະວີການປະເມີນຜົນສະທ້ອນຕໍ່ສະພາບແວດລ້ອມແລະເພີ່ມການຕິດຕາມແລະປະຕິບັດກົດໝາຍທາງສະພາບແວດລ້ອມເປັນຕົ້ນ. ຕໍ່ໄປເຊີນຟັງລາຍງານລະອຽດ:
ໃນກອງປະຊຸມຖະແຫຼງຂ່າວ, ທ່ານຈ່າງລີ້ຈຸ່ນ, ລັດຖະມົນຕີຊ່ວຍວ່າການກະຊວງອະນຸລັກສິ່ງແວດລ້ອມຈີນໄດ້ແນະນຳຜົນສຳເລັດຂອງວຽກງານອະນຸລັກສິ່ງແວດລ້ອມຂອງຈີນໃນປີ 2009. ທ່ານກ່າວວ່າ:
"ການຫຼຸດການລະບາຍມົນລະພິດໃນປີກາຍນີ້ໄດ້ຮັບຜົນດີເກີນຄາດໝາຍຢ່າງເດັ່ນຊັດ: ໄດ້ເພີ່ມຄວາມສາມາດບຳບັດນ້ຳເປື້ອນ13ລ້ານ 3ແສນໂຕນຕໍ່ມື້, ເພີ່ມເຄື່ອງຈັກດັງຖ່ານຫີນແຍກທາດມາດຂະໜາດ102ລ້ານກິໂລວັດ. ໃນທົ່ວປະເທດ,ຖ້າທຽບກັບປີ 2005ຄວາມຕ້ອງການອັອກຊິດທາງເຄມີໄດ້ຫຼຸດລົງ9,66%,ການລະບາຍຊຸນເຟີດີອັອກຊິດໄດ້ຫຼຸດລົງ 13,14%,ໄດ້ບັນລຸເປົ້າໝາຍຫຼຸດລະບາຍຊຸນເຟີດີອັອກຊິດໃນ"ແຜນການ5ປີຄັ້ງທີ 11"ກ່ອນເວລາກຳນົດໜຶ່ງປີ, ເປົ້າໝາຍຫຼຸດຄວາມຕ້ອງການອັອກຊິດທາງເຄມີມີຄາດວ່າຈະບັນລຸຄາດໝາຍຕາມເວລາກຳນົດ.
ທ່ານຈ່າງລີ້ຈຸ່ນກ່າວວ່າ, ໃນປີ 2009, ຈີນໄດ້ສຳເລັດການສຳຫຼວດແຫຼ່ງລະບາຍມົນລະພິດທົ່ວປະເທດຄັ້ງທຳອິດ,ໝາກຜົນທີ່ກ່ຽວຂ້ອງແລະການຄົ້ນຄວ້າຍຸດທະສາດມະຫາພາກດ້ານຂອງສິ່ງແວດລ້ອມ, ຈະສ້າງພື້ນຖານທີ່ດີໃຫ້ແກ່ການຊຸກຍູ້ວຽກງານຂອງແຜນການອະນຸລັກສິ່ງແວດລ້ອມໃນ 5 ປີຕໍ່ໜ້າ.
"ປີກາຍນີ້,ການກວດກາແຫຼ່ງສ້າງມົນລະພິດ4ປະເພດໃນທົ່ວປະເທດໄດ້ສຳເລັດຕາມແຜນ ການ,ມີແຫຼ່ງອຸດສາຫະກຳ,ແຫຼ່ງກະສິກຳ,ແຫຼ່ງດຳລົງຊີວິດແລະເຄື່ອງຊຳລະແລະບຳບັດສິ່ງເຊື່ອມພິດຂະໜາດໃຫຍ່5ລ້ານ9ແສນ2ໝື່ນກວ່າແຫ່ງໄດ້ຮັບການກວດກາ,ເຮັດໃຫ້ໄດ້ຮູ້ຈັກສະພາບພື້ນຖານຂອງການລະບາຍມົນລະພິດຂອງປະເທດພວກເຮົາ.ການຄົ້ນຄວ້າຍຸດທະສາດມະຫາພາກດ້ານສິ່ງແວດລ້ອມໄດ້ສຳເລັດໜ້າທີ່ທີ່ກຳນົດໄວ້ລ່ວງໜ້າ,ໄດ້ຮັບໝາກຜົນທີ່ສຳຄັນຕ່າງໆ ເຊັ່ນ:ບົດລາຍງານລວມແລະບົດລາຍງານສະເພາະກ່ຽວກັບການຄົ້ນຄວ້າຍຸດທະສາດ,ແລະວາງຫົວຂໍ້ສຳຄັນຕ່າງໆ ຄື:ສືບຕໍ່ຄົ້ນຄວ້າຊ່ອງທາງໃໝ່ທີ່ອະນຸລັກສິ່ງແວດລ້ອມຂອງຈີນແລະອື່ນໆ."
ແຈ້ງການທີ່ເຜີຍແຜ່ໃນວັນທີ3ມິຖຸນານີ້ຍັງຊີ້ອອກວ່າ,ປະຈຸບັນນີ້,ຈີນຍັງມີບັນຫາສິ່ງແວດລ້ອມຕ່າງໆ ຄື:ສາຍນ້ຳຖືກເຊື່ອມພິດໜັກ,ໜອງນ້ຳບາງບ່ອນກໍມີທາດບາງອັນຫຼາຍເກີນ ຄວາມຕ້ອງການ,ແລະເຂດທະເລໃກ້ຝັ່ງຖືກເຊື່ອມພິດໃນລະດັບໂດຍໜຶ່ງເປັນຕົ້ນ.ສິ່ງທີ່ໜ້າເປັນຫ່ວງທີ່ສຸດແມ່ນ,ໃນໄຕມາດທີໜຶ່ງປີນີ້,ຊຸນເຟີດີອອກຊິດໄດ້ເພີ່ມຂຶ້ນເຊິ່ງເປັນເທື່ອທຳອິດນັບແຕ່ປີ2007ເປັນຕົ້ນມາ,ຄືເພີ່ມຂຶ້ນ1,2%ເມື່ອທຽບໃສ່ໄລຍະດຽວກັນຂອງປີ2009.
ໂດຍອີງຕາມແຜນການທີ່ກ່ຽວຂ້ອງ,ມາຮອດທ້າຍປີນີ້,ຈີນຈະບັນລຸເປົ້າຫມາຍທີ່ຫຼຸດປະລິມານລະບາຍມົນລະພິດຕົ້ນຕໍໃຫ້ຫນ້ອຍລົງ10%.ທ່ານຈັ່ງລີ້ຈຸ່ນກ່າວວ່າ,ພາກ ສ່ວນທີ່ກ່ຽວຂ້ອງ ຈະຖືສຳຄັນໃນການແກ້ໄຂບັນຫາສິ່ງແວດລ້ອມທີ່ ອັນຕະລາຍຮ້າຍແຮງຕໍ່ສຸຂະພາບແຂງແຮງຂອງປະຊາຊົນ,ພະຍາຍາມເຮັດວຽກຫຼຸດການລະບາຍມົນລະພິດໃຫ້ດີ ແລະເພີ່ມການຕິດຕາມກວດກາປະຕິບັດກົດຫມາຍ ດ້ານສິ່ງແວດລ້ອມໃຫ້ຫຼາຍກວ່າເກົ່າ.
ທ່ານກ່າວວ່າ:"ພວກເຮົາຈະພະຍາຍາມໃຫ້ໄດ້ຮັບຜົນສຳເລັດຫຼາຍກວ່າເກົ່າໃນການຫຼຸດການລະ ບາຍມົນລະພິດບົນພື້ນຖານທີ່ບັນລຸເປົ້າຫມາຍທີ່ກຳນົດໄວ້; ໂດຍເພີ່ມການປະເມີນສິ່ງແວດລ້ອມໃຫ້ຫຼາຍຂຶ້ນແລະປັບປຸງມາດຕະຖານໃຫ້ດີຂຶ້ນແລະອື່ນໆ, ເລັ່ງລັດຊຸກຍູ້ໃຫ້ຫັນປ່ຽນຮູບການພັດທະນາເສດຖະກິດແລະປັບປຸງໂຄງປະກອບເສດຖະກິດ;ເພີ່ມການຕິດຕາມກວດກາປະຕິບັດກົດຫມາຍດ້ານສິ່ງແວດລ້ອມ,ການຄຸ້ມຄອງຮັບມື ກັບເຫດການສຸກເສີນແລະຕິດຕາມຄຸ້ມຄອງຄວາມປອດໄພດ້ານນິວເຄຼຍ, ເພື່ອອອກແຮງແກ້ໄຂບັນຫາສິ່ງແວດລ້ອມທີ່ອັນຕະລາຍຮ້າຍແຮງຕໍ່ສຸຂະພາບຂອງປະຊາຊົນ ເຊັ່ນ:ການລະບາຍມົນລະພິດໂລຫະຫນັກແລະອື່ນໆ."
ນອກນີ້,ທ່ານຈັ່ງລີ້ຈຸ່ນຍັງກ່າວວ່າ,ລັດຖະບານຈີນໄດ້ສົ່ງເສີມແລະສະຫນັບສະຫນູນໃຫ້ທົ່ວປວງຊົນເຂົ້າຮ່ວມກິດຈະກຳອະນຸລັກສິ່ງແວດລ້ອມ,ຕໍ່ອົງການຈັດຕັ້ງໃດໆວ່າແຕ່ສອດຄ່ອງກັບຂໍ້ກຳນົດກົດລະບຽບຕ່າງໆ,ພາກສ່ວນອະນຸລັກສິ່ງແວດລ້ອມທຸກຂັ້ນຂອງຈີນລ້ວນແຕ່ຈະໃຫ້ການສະຫນັບສະຫນູນ.
