ທ່ານຫູຈີນທ່າວຈະເດີນທາງໄປການາດາ,ຈີນເອົາໃຈໃສ່ນຳບັນຫາພັດທະນາໃນກອງປະຊຸມສຸດຍອດG20ທີ່ຈະຈັດຂຶ້ນຢູ່ໂຕຣອນໂຕ
(GMT+08:00) 2010-06-23 16:25:52 cri
ຕອນບ່າຍວັນທີ 23 ມິຖຸນານີ້, ທ່ານຫູຈີນທ່າວ, ປະທານປະເທດຈີນຈະເດີນທາງໄປການາດາ, ການຢ້ຽມຢາມເທື່ອນີ້ແມ່ນປະມຸກລັດຈີນຢ້ຽມຢາມການາດາເປັນຄັ້ງທຳອິດໃນຮອບ5ປີ,ນອກຈາກນັ້ນທ່ານຫູຈີນທ່າວຍັງຈະເຂົ້າຮ່ວມກອງປະຊຸມສຸດຍອດຂອງກຸ່ມ20ປະເທດຫຼືG20ຄັ້ງທີ 4 ທີ່ຈັດຂຶ້ນຢູ່ໂຕຣອນໂຕ.
ຫວ່າງກ່ອນນີ້ບໍ່ດົນຢູ່ທີ່ປັກກິ່ງ, ທ່ານຊຸຍທ່ຽນໄຂ, ລັດຖະມົນຕີຊ່ວຍວ່າການກະຊວງການຕ່າງປະເທດຈີນກ່າວວ່າ,ການຢ້ຽມຢາມເທື່ອນີ້ພໍດີແມ່ນຈີນການາດາສ້າງສາຍພົວພັນທາງການທູດຄົບຮອບ40ປີ,ຈິ່ງມີຄວາມໝາຍພິເສດຕໍ່ການຂະຫຍາຍການພົວພັນຂອງສອງປະເທດ:
"ການຢ້ຽມຢາມການາດາຂອງປະທານຫູຈີນທ່າວເທື່ອນີ້ແມ່ນປະມຸກລັດຈີນຢ້ຽມຢາມການາດາເປັນຄັ້ງທຳອິດໃນຮອບ5ປີ, ກໍ່ແມ່ນເຫດການສຳຄັນຂອງການພົວພັນລະຫວ່າງສອງປະເທດໃນເວລາທີ່ຈີນການາດາສ້າງການພົວພັນທາງການທູດຄົບຮອບ40ປີ, ມີຄວາມໝາຍສຳຄັນຕໍ່ການຂະຫຍາຍການພົວພັນລະຫວ່າງຈີນກັບການາດາ.ພວກເຮົາເຊື່ອວ່າພາຍໃຕ້ຄວາມພະຍາຍາມຮ່ວມກັນລະຫວ່າງສອງຝ່າຍ,ການຢ້ຽມຢາມເທື່ອນີ້ຈະໄດ້ຮັບຜົນສຳເລັດຢ່າງເຕັມເມັດເຕັມໜ່ວຍ.ພວກເຮົາຍິນດີຮ່ວມກັນກັບການາດາ,ຖືການຢ້ຽມຢາມຂອງເທື່ອນີ້ເປັນໂອກາດສຳຄັນ,ບົນພື້ນຖານທີ່ເຄົາລົບເຊິ່ງກັນແລະກັນ,ຢູ່ຮ່ວມກັນຢ່າງສະເໝີພາບແລະຕ່າງຝ່າຍຕ່າງມີຜົນປະໂຫຍດ, ເພີ່ມການສົນທະນາ,ການແລກປ່ຽນແລະການຮ່ວມມືຕື່ມອີກ,ຊຸກຍູ້ການພົວພັນລະຫວ່າງຈີນກັບການາດາໃຫ້ໄດ້ຮັບຄວາມຄືບໜ້າສູງກວ່າເກົ່າໃນບາດກ້າວປະຫວັດສາດໃໝ່.
ກອງປະຊຸມສຸດຍອດຄັ້ງທີ4ຂອງກຸ່ມG20ຈະຈັດຂຶ້ນແຕ່ວັນທີ26ຫາວັນທີ27ມິຖຸນານີ້ຢູ່ໂຕ ຣອນໂຕຂອງການາດາ,ທີ່ປະຊຸມຈະລົງເລິກປຶກສາຫາລືສະພາບການເສດຖະກິດຂອງໂລກ,ວິກິດການໜີ້ສິນພາກລັດຂອງເອີລົບ,ການເຕີບໂຕຢ່າງແຂງແຮງ,ຕໍ່ເນື່ອງແລະສະໝ່ຳສະເໝີ,ການປະຕິຮູບອົງການການທະນາຄານສາກົນ,ການຄ້າສາກົນແລະການຕິດຕາມຄຸ້ມຄອງການທະນາຄານສາກົນເປັນຕົ້ນ.ນອກຈາກຜູ່ນຳຂອງປະເທດພາຄີG20ແລ້ວ,ຍັງຈະມີຜູ່ນຳຂອງບາງປະເທດແລະເຂດແຄ້ວນຢູ່ອາຊີ,ອາຟະລິກາແລະເອີລົບ,ພ້ອມດ້ວຍເຈົ້າໜ້າທີ່ຂອງອົງການສາກົນຕ່າງໆ,ເປັນຕົ້ນວ່າ,ສະຫະປະຊາຊາດ,ອົງການກອງທຶນເງິນຕາສາກົນຫຼືIMF,ທະນາຄານໂລກ,ສະພາມົນຕີຄວາມໝັ້ນຄົງດ້ານການເງິນຫຼືFSB,ອົງການການຄ້າໂລກຫຼືWTOແລະອົງ ການແຮງງານສາກົນກໍ່ຈະເຂົ້າຮ່ວມກອງປະຊຸມຄັ້ງນີ້.
ເມື່ອກ່າວເຖິງຄວາມເຫັນຂອງຝ່າຍຈີນທີ່ມີຕໍ່G20ແລະກົນໄກກອງປະຊຸມສຸດຍອດ,ທ່ານຊຸ່ຍທ່ຽນໄຂ,ລັດຖະມົນຕີຊ່ວຍວ່າການກະຊວງການຕ່າງປະເທດຈີນກ່າວວ່າ: "ກອງປະຊຸມສຸດຍອດG20ແມ່ນເວທີທີ່ສຳຄັນແລະມີປະສິດທິຜົນທີ່ປະຊາຄົມໂລກຮ່ວມກັນຮັບມືກັບວິກິດການການເງິນສາກົນແລະເພີ່ມທະວີການຮ່ວມມືທາງເສດຖະກິດສາກົນ.ຜ່ານການທຳຄວາມພະຍາຍາມຂອງຝ່າຍຕ່າງໆ,ກອງປະຊຸມສຸດຍອດສາມຄັ້ງທີ່ຜ່ານມາໄດ້ບັນລຸຄວາມເຫັນທີ່ເປັນເອກະສັນກັນທີ່ສຳຄັນໃນຫຼາຍດ້ານ.ກອງປະຊຸມໂຕຣອນໂຕແມ່ນກອງປະ ຊຸມສຸດຍອດຄັ້ງທຳອິດພາຍຫຼັງກອງປະຊຸມສຸດຍອດG20ກາຍເປັນກົນໄກທີ່ໝັ້ນຄົງແລ້ວ,ມີຄວາມໝາຍທີ່ສືບທອດອັນເກົ່າເຊື່ອມຕໍ່ອັນໃໝ່.ຝ່າຍຈີນຫວັງວ່າ,ກອງປະຊຸມສຸດຍອດໂຕຣອນໂຕຈະຜັນຂະຫຍາຍຄວາມເຫັນທີ່ເປັນເອກະສັນກັນຕ່າງໆຂອງກອງປະຊຸມສຸດຍອດສາມຄັ້ງທີ່ຜ່ານມາຢ່າງຮອບດ້ານແລະແທ້ຈິງ,ປົກປັກຮັກສາສັດທາແລະຖານະບົດບາດຂອງG20,ເຮັດໃຫ້G20ຮັກສາຖານະບົດບາດທີ່ເປັນເວທີສຳຄັນແຫ່ງການຮ່ວມມືສາກົນດ້ານເສດຖະກິດຢ່າງໜຽວແໜ້ນ."
ໃນຖານະເປັນອົງກອນເສດຖະກິດຈະເລີນໃໝ່ທີ່ສຳຄັນທີ່ມີທ່າແຮງບົ່ມ ຊ້ອນຫຼາຍທີ່ສຸດດ້ານການເຕີບໂຕແລະມີຄວາມຊີວິດຊີວາຫຼາຍທີ່ສຸດໃນເສດ ຖະກິດໃນໂລກປະຈຸບັນນີ້,ຈີນມີຄວາມຫວັງຫຼາຍຢ່າງຕໍ່ກອງປະຊຸມຄັ້ງນີ້, ເຊິ່ງລວມທັງ:ເພີ່ມການປະສານງານດ້ານນະໂຍບາຍເສດຖະກິດມະຫາພາກຂອງຝ່າຍຕ່າງໆ,ພະຍາຍາມຊຸກຍູ້ການປະຕິຮູບໂຄຕາຂອງອົງການIMFແລະປະຕິຮູບການຕິດຕາມຄຸ້ມຄອງຕໍ່ການທະນາຄານ,ແລະຄັດຄ້ານລັດທິປົກປ້ອງການຄ້າເປັນຕົ້ນ.ນອກຈາກບັນຫາເສດຖະກິດ,ໃນຖານະທີ່ເປັນປະເທດພວມພັດທະນາທີ່ໃຫຍ່ທີ່ສຸດໃນໂລກ,ຈີນກໍ່ເອົາໃຈໃສ່ພິເສດຕໍ່ບັນຫາການພັດທະນາ,ຫວັງວ່າໃນໄລຍະກອງປະຊຸມສຸດຍອດໂຕຣອນໂຕ,ຮ່ວມກັບສະມາຊິກG20ຈະປຶກສາຫາລືບັນຫາການພັດທະນາ,ສະໜອງການສະ ໜັບສະໜູນຢ່າງແຂງແຮງດ້ານການເມືອງໃຫ້ກອງປະຊຸມລະດັບສູງກ່ຽວກັບເປົ້າໝາຍການພັດທະນາສະຫັດສະວັດຂອງສະຫະປະຊາຊາດທີ່ຈະຈັດຂຶ້ນໃນເດືອນກັນຍາປີນີ້.
