ຕາມຂ່າວCRI:ວັນທີ6ກໍລະກົດນີ້,ກອງປະຊຸມການຮ່ວມມືດ້ານພະລັງງານລະຫວ່າງຈີນກັບສະຫະພາບເອີລົບຫຼືຄັ້ງທີ8ໄດ້ເປີດສາກຢູ່ຫໍແບນຊິກ-ສະຫະພາບເອີລົບຂອງງານວາງ ສະແດງໂລກຊຽງໄຮ້.ທ່ານວັ້ນກ່າງ,ລັດຖະມົນຕີວ່າການກະຊວງວິທະຍາສາດເຕັກໂນໂລຊີຈີນແລະທ່ານກັນເທີ ເອິດທິນເກີ,ກຳມະການດ້ານພະລັງງານຂອງຄະນະກຳມາທິການສະຫະພາບເອີລົບລ້ວນແຕ່ກ່າວວ່າ,ຫວັງຢາກໃຫ້ສອງຝ່າຍເພີ່ມທະວີການຮ່ວມມືໃນຂົງເຂດພະລັງງານ,ໂດຍສະເພາະແມ່ນໃນຂົງເຂດພະລັງງານສະອາດ. ໃນເວລາກ່າວຄຳປາໄສ,ທ່ານວັ້ນກ່າງກ່າວວ່າ,ຈີນສະຫະພາບເອີລົບໃນຖານະເປັນສອງອົງກອນເສດຖະກິດໃຫຍ່ແລະມີບົດບາດສູງຫຼາຍໃນໂລກ,ໄດ້ມີກົນໄກຮ່ວມມືທີ່ສົມບູນສົມຄວນໃນດ້ານນະໂຍບາຍພະລັງງານ,ການຮ່ວມມືດ້ານອຸດສາຫະກຳແລະການແລກປ່ຽນດ້ານວິທະຍາສາດເຕັກໂນໂລຊີ,ສອງຝ່າຍມີພັນທະແລະກໍ່ມີໜ້າທີ່ຮັບຜິດຊອບຮ່ວມກັນໃນການພັດທະນາພະລັງງານສະອາດ,ເພື່ອຮັບມືກັບການປ່ຽນແປງຂອງດິນຟ້າອາກາດ.
"ສະຫະພາບເອີລົບແມ່ນຄູ່ຮ່ວມມືດ້ານວິທະຍາສາດເຕັກໂນໂລຊີທີ່ສຳຄັນທີ່ສຸດຂອງຈີນ. ນັບແຕ່ປີ1998ເປັນຕົ້ນມາ,ໃນກອງປະຊຸມສຸດຍອດຈີນ-EUເອີລົບທຸກຄັ້ງທີ່ຜ່ານ ມາ,ການຮ່ວມມືດ້ານພະລັງງານໄດ້ກາຍເປັນຫົວຂໍ້ສຳຄັນຂອງກອງປະຊຸມນີ້ທີ່ເປັນກົນໄກປຶກສາຫາລືປະຈຳປີລະດັບສູງສຸດ.ຫຼາຍປີມານີ້,ຍັງໄດ້ສ້າງຕັ້ງສູນອົບຮົມການຄຸ້ມຄອງພະລັງງານຈີນເອີລົບ,ແລະດຳເນີນຫຼາຍໂຄງການຮ່ວມມື,ຄື:ໂຄງການພະລັງງານສິ່ງແວດລ້ອມຈີນເອີລົບແລະອື່ນໆ.ປີນີ້,ທ່ານໂຈເຊ ມານູເອວ ບາໂຣໂຊໄດ້ເລີ່ມໂຄງການສູນພະລັງງານສະອາດຈີນເອີລົບໂດຍຕົນເອງ.ການຮ່ວມມືດ້ານພະລັງງານລະຫວ່າງຈີນກັບເອີລົບໄດ້ປະກົດມີທ່າອຽງທີ່ດີທີ່ໝັ້ນຄົງ,ເປັນປົກກະຕິ,ມີຫຼາຍເນື້ອໃນແລະເລິກເຊິ່ງ."
ປີ 2009, ຈີນໄດ້ກາຍເປັນປະເທດໃຫຍ່ອັນດັບທີໜຶ່ງໃນການຜະລິດພະລັງງານແລະປະເທດໃຫຍ່ອັນດັບທີສອງທີ່ບໍລິໂພກພະລັງງານໃນໂລກ. ໃນໂຄງປະກອບບໍລິໂພກພະລັງງານນັ້ນ, ຖ່ານຫີນ ກວມ 70%, ໃນນັ້ນພະລັງງານໄຟຟ້າມີ 80% ແມ່ນຜະລິດຈາກໂຮງໄຟຟ້າຖ່ານຫີນ, ໂຄງປະກອບດັ່ງກ່າວຈະປ່ຽນແປງຕ້ອງໃຊ້ເວລາດົນສົມຄວນ. ທ່ານວ້າງກ່າງກ່າວວ່າ, ຈີນຈະຖອດຖອນແລະຮ່ຳຮຽນບົດຮຽນທີ່ສຳເລັດຜົນຂອງເອີລົບໃນດ້ານເຮັດໃຫ້ໂຄງປະກອບພະລັງງານດີຂຶ້ນແລະເພື່ອເຮັດໃຫ້ມີພະລັງງານຫຼາຍແບບ
"ສະຫະພາບເອີລົບມີທ່າແຮງນຳໜ້າພິເສດໃນເຕັກນິກວິທະຍາສາດພະລັງງານເກົ່າແລະພະລັງງານໃໝ່. ພະລັງລົມ, ພະລັງແສງຕາເວັນແລະພະລັງຄື້ນທະເລເປັນຕົ້ນ, ເຊິ່ງເປັນພະລັງທີ່ເກີດໃໝ່ໄດ້ແລະຂົງເຂດພະລັງງານໃໝ່ລ້ວນແຕ່ໄດ້ພັດທະນາດີສົມຄວນ, ໄດ້ເສີມຂະຫຍາຍບົດບາດຕົວຢ່າງທີ່ດີໃຫ້ແກ່ທົ່ວໂລກ."
ທ່ານກັນເທີ ເອິທິງເກີ, ກຳມະການດ້ານພະລັງງານຂອງຄະນະກຳມາທິການສະຫະພາບເອີລົບກ່າວໃນຄຳປາໄສວ່າ,ພາຍໃນ 20 ກວ່າປີທີ່ຜ່ານມາ, ເອີລົບກັບຈີນໄດ້ຮັບຫມາກຜົນຢ່າງຫລວງຫລາຍໃນການຮ່ວມມືດ້ານພະລັງງານ.ທ່ານກ່າວເນັ້ນວ່າ, ການລົງທຶນໃສ່ພະລັງງານສະອາດກໍ່ແມ່ນການລົງທຶນໃສ່ອະນາຄົດຂອງມວນມະນຸດ,ຈີນແລະເອີລົບຍັງຄວນເພີ່ມທະວີການຮ່ວມມືຕື່ມອີກ,ແລະເພີ່ມງົບປະມານໃຫ້ຫລາຍຂຶ້ນ, ເພື່ອຮັບປະກັນຄວາມປອດໄພດ້ານພະລັງງານໂດຍຜ່ານຄວາມກ້າວຫນ້າຂອງເຕັກນິກ.ທ່ານກ່າວວ່າ:
ແຕ່ກ່ອນ, ພວກເຮົາເຄີຍຜ່ານຜ່າວິກິດການເສດຖະກິດຫລາຍເທື່ອ,ແຕ່ຖ້າຢາກຜ່ານຜ່າວິກິດການພະລັງງານແລະວິກິດການດ້ານດິນຟ້າອາກາດແລ້ວ, ພວກເຮົາກໍ່ບໍ່ມີທາງເລືອກແນວອື່ນ,ເພື່ອພະລັງງານໃນອະນາຄົດ, ພວກເຮົາກໍ່ຄວນເລີ່ມລົງທຶນໃນມື້ນີ້.ບາງຄົນອາດຈະເວົ້າວ່າ, ດຽວນີ້ພວກເຮົາຍັງບໍ່ມີຄວາມສາມາດຫາບແບກທຶນຮອນໃນການປະຕິບັດຍຸດທະສາດພະລັງງານໃຫມ່,ແຕ່ຂ້າພະເຈົ້າຢາກເວົ້າວ່າ, ຖ້າພວກເຮົາບໍ່ລົງມືເຮັດແຕ່ດຽວນີ້, ຜົນຮ້າຍທີ່ຈະຕາມມາໃນອະນາຄົດແມ່ນສິ່ງທີ່ພວກເຮົາຈະຫາບແບກບໍ່ຫລ້ອນ.ມີແຕ່ວິທະຍາສາດທີ່ກ້າວຫນ້າຈິ່ງຈະສາມາດຮັບປະກັນຄວາມປອດໄພດ້ານພະລັງງານຂອງພວກເຮົາ, ເຮັດໃຫ້ພວກເຮົາມີກຳລັງແຂ່ງຂັນຕໍ່ໄປໄດ້.