ອາເມລິກາກ່າວວ່າ,ຈີນບໍ່ແມ່ນປະເທດທີ່ຄອບງຳອັດຕາແລກປ່ຽນ
(GMT+08:00) 2010-07-09 18:02:45 cri
ຕາມຂ່າວCRI:ໃນຕອນບ່າຍວັນທີ8ກໍລະກົດນີ້,ກະຊວງການເງິນອາເມລິກາໄດ້ເຜີຍແຜ່ບົດລາຍງານອັດຕາແລກປ່ຽນປະຈຳເຄິ່ງປີ.ໃນບົດລາຍງານສະບັບນີ້ຂຽນວ່າ,ໃນ6ເດືອນທ້າຍປີ 2009ແລະ6ເດືອນຕົ້ນປີ2010,ຄູ່ການຄ້າຕົ້ນຕໍຂອງອາເມລິກາລ້ວນແຕ່ບໍ່ໄດ້ຄອບງຳອັດຕາແລກປ່ຽນ,ແລະກໍ່ບໍ່ໄດ້ຮັບທ່າແຮງດ້ານການແຂ່ງຂັນທີ່ບໍ່ຖືກຕ້ອງຈາກການ ຄອບງຳອັດຕາແລກປ່ຽນ.ກ່ຽວກັບເລື່ອງນີ້.ກະຊວງການເງິນອາເມລິກາໄດ້ໃຫ້ຄຳຕອບຢ່າງຈະແຈ້ງກ່ຽວກັບບັນຫາອັດຕາແລກປ່ຽນເງິນຢວນທີ່ວ່າ:ຈີນບໍ່ແມ່ນປະເທດທີ່ຄອບງຳອັດຕາແລກ ປ່ຽນ.
ໃນບົດລາຍງານຂອງກະຊວງການເງິນອາເມລິກາຂຽນວ່າ,ໃນປີ2009,ນອກຈາກເບຼຊິນ,ສະພາບການຂາດດຸນດ້ານການຄ້າລະຫວ່າງອາເມລິກາກັບຄູ່ການຄ້າຕົ້ນຕໍປະເທດອື່ນໆລ້ວນແຕ່ມີການຜ່ອນຜັນ.ຂຸມການເງິນຂອງບັນຊີເດີນສະພັດອາເມລິກາຮັກສາຢູ່ລະດັບຕ່ຳສຸດໃນ10ກວ່າປີຜ່ານມາ.ສະນັ້ນ,ໃນໜຶ່ງປີທີ່ຜ່ານມາ,ຄູ່ການຄ້າຕົ້ນຕໍຂອງອາເມລິກາບໍ່ໄດ້ຄອບງຳອັດຕາແລກປ່ຽນລະຫວ່າງເງິນຕາປະເທດຕົນກັບໂດລາສະຫະລັດເພື່ອຍາດແຍ່ງເອົາທ່າແຮງທີ່ບໍ່ຍຸດຕິທຳໃນການຄ້າລະຫວ່າງຊາດ.
ກ່ຽວກັບຂໍ້ສະຫຼຸບນີ້ຂອງກະຊວງການເງິນອາເມລິກາ,ທ່ານແອວເບີດ ເຄຍເດວ,ນັກຄົ້ນ ຄວ້າຜູ່ມີປະສົບການສູງຂອງສະພາມົນຕີອັດລັງຕິກອາເມລິກາ,ທັງເປັນນັກເສດຖະສາດທີ່ມີຊື່ສຽງຕີລາຄາວ່າ,ຂໍ້ມູນແລະຄວາມຈິງຈຳນວນຫຼວງຫຼາຍຢັ້ງຢືນວ່າ,ຈີນບໍ່ສອດຄ່ອງກັບນິຍາມຄວາມໝາຍທີ່ວ່າ"ປະເທດຄອບງຳອັດຕາແລກປ່ຽນ",ສະນັ້ນບົດລາຍງານຂອງກະຊວງການເງິນແມ່ນເວົ້າຖືກກັບຄວາມເປັນຈິງ.
ທ່ານກ່າວວ່າ: "ຂ້າພະເຈົ້າເຫັນວ່າກະຊວງການເງິນຕົກລົງບໍ່ຈັດເອົາຈີນເຂົ້າເປັນປະເທດຄອບງຳອັດຕາແລກປ່ຽນແມ່ນຖືກຕ້ອງແລ້ວ. ພວກເຮົາຮູ້ວ່າ, ການຖົກຖຽງກັນກ່ຽວກັບບັນຫາອັດຕາແລກປ່ຽນແມ່ນເລີ່ມແຕ່ 6 ເດືອນທ້າຍປີກາຍນີ້, ແຕ່ໃນ 6 ເດືອນທ້າຍປີກາຍນີ້, ດຸນການຄ້າທີ່ໄດ້ປຽບຂອງຈີນໄດ້ຫຼຸດລົງ 50%. ສະນັ້ນຈິ່ງເວົ້າຍາກວ່າໃນເວລາທີ່ໄດ້ປຽບດຸນການຄ້າຫຼຸດລົງໄວຊ່ຳນີ້, ຈີນຍັງສາມາດຄອບງຳອັດຕາແລກປ່ຽນເພື່ອໃຫ້ໄດ້ທ່າແຮງໃນການແຂ່ງຂັນທີ່ບໍ່ຍຸຕິທຳ. ສະນັ້ນນັກເສດຖະສາດຂອງກະຊວງການເງິນທັງຫຼາຍບໍ່ສາມາດສະຫຼຸບວ່າຈີນຄອບງຳອັດຕາແລກປ່ຽນໃນ 6 ເດືອນທ້າຍປີກາຍນີ້."
ທີ່ຈິງແລ້ວ, ໃນບັນຫາການເພີ່ມຄວາມອ່ອນໂນ້ມຂອງອັດຕາແລກປ່ຽນເງິນຢວນຂອງຈີນ, ຈີນໄດ້ພະຍາຍາມມາຕະຫຼອດ. ກ່ອນໜ້າທີ່ຈະກອງປະຊຸມສຸດຍອດກຸ່ມ 20 ປະເທດ, ທະນາຄານປະຊາຊົນຈີນປະກາດຈະຊຸກຍູ້ການປະຕິຮູບກົນໄກອັດຕາແລກປ່ຽນເງິນຢວນຕື່ມອີກ. ການກະທຳດັ່ງກ່າວໄດ້ຮັບການຕີລາຄາເປັນຢ່າງດີຈາກວົງການການເມືອງແລະບຸກຄົນລະດັບຄັງປັນຍາຂອງອາເມລິກາ. ທ່ານເກນເນັສ໌ ລິເປີທາ, ຜູ້ຊ່ຽວຊານບັນຫາຈີນ, ອະດີດຫົວໜ້ານະໂຍບາຍອາຊີຂອງທຳນຽບຂາວຂອງສະມາຄົມບຼຸກຄິງສ໌ອາເມລິກາກ່າວວ່າ, ການປະຕິຮູບອັດຕາແລກປ່ຽນເງິນຢວນຂອງຈີນໄດ້ເຮັດໃຫ້ຫຼີກລຽງຄວາມຂັດແຍ່ງກັນດ້ານການຄ້າໂດຍກົງກັບອາເມລິກາ, ກໍໄດ້ເພີ່ມຄວາມໝັ້ນໃຈໃຫ້ຕະຫຼາດ. ທ່ານກ່າວວ່າ:
ຂ້າພະເຈົ້າເຫັນວ່າ, ໃນບັນຫາອັດຕາແລກປ່ຽນເງິນຢວນຈີນ, ຈີນໄດ້ວາງຫລັກມາດຖານພື້ນຖານທີ່ໄດ້ປ່ຽນແປງ,ແລະເລີ່ມປະຕິບັດແລ້ວ.ພວກເຮົາກໍ່ໄດ້ເຫັນແລ້ວວ່າ, ການປະຕິຮູບດັ່ງກ່າວຫລັງຈາກໄດ້ປະກາດແລ້ວ 48 ຊົ່ວໂມງ, ກໍ່ເລີ່ມສົ່ງຜົນສະທ້ອນໄປຍັງຕະຫລາດເງິນຕາຂອງອາຊີ, ແລະສົ່ງຜົນສະທ້ອນເຖິງຄວາມຫມັ້ນໃຈຂອງຜູ່ລົງທຶນ,ເຮັດໃຫ້ເຂົາເຈົ້າຮູ້ສຶກວ່າຈີນສາມາດຊຸກຍູ້ການປະຕິຮູບແທ້,ແລະກໍ່ເຮັດໃຫ້ເຂົາເຈົ້າຮູ້ວ່າຄວາມອາດເປັນໄປໄດ້ທີ່ຈີນກັບອາເມລິກາຈະເກີດສົງຄາມການຄ້າ,ແລະລັດທິປົກປ້ອງການຄ້າແຜ່ລາມອອກໄປນັ້ນໄດ້ຫລຸດຫນ້ອຍລົງຢ່າງຫລວງຫລາຍ,ເຮັດໃຫ້ຄົນທັງຫລາຍມີຄວາມຫມັ້ນໃຈເພີ່ມຂຶ້ນ.
ໃນກອງປະຊຸມຂ່າວທີ່ຈັດຂຶ້ນຫລັງກອງປະຊຸມສຸດຍອດກຸ່ມ 20 ປະເທດທີ່ຈັດຂຶ້ນຢູ່ໂຕລອນໂຕ,ທ່ານບາຣັກ ໂອບາມາ, ປະທານາທິບໍດີອາເມລິກາກໍ່ໄດ້ຍ້ອງຍໍນະໂຍບາຍປະຕິຮູບອັດຕາແລກປ່ຽນເງິນຢວນຂອງຈີນ.ເບິ່ງຈາກບົດລາຍງານຫລ້າສຸດຂອງກະຊວງການເງິນອາເມລິກາ, ບັນຫາອັດຕາແລກປ່ຽນເງິນຢວນຈີນທີ່ເກີດຂຶ້ນຢູ່ອາເມລິການັ້ນໄດ້ແກ້ໄຂແລ້ວຊົ່ວຄາວ.ແຕ່ຄາດວ່າການເຈລະຈາກ່ຽວກັບບັນຫານີ້ຍັງບໍ່ສິ້ນສຸດລົງລົງເທື່ອ.ເມື່ອບົດລາຍງານດັ່ງກ່າວໄດ້ເຜີຍແຜ່ອອກ, ຝ່າຍຮັກສາຄອງເດີມຂອງອາເມລິກາໄດ້ສະແດງຄວາມເສຍດາຍທີ່ສຸດຕໍ່ເລື່ອງນີ້, ແລະຄາດວ່າ, ກຸ່ມການເມືອງດັ່ງກ່າວຍັງຈະສ້າງບັນຫາຕ່າງໆຂຶ້ນອີກກ່ຽວກັບອັດຕາແລກປ່ຽນເງິນຢວນຈີນ.
