ວັນທີ 14 ກໍລະກົດນີ້,ຢູ່ນະຄອນຫລວງປັກກິ່ງ ສະພາບັນດິດວິທະຍາສາດສັງຄົມຈີນໄດ້ເຜີຍແຜ່ບົດລາຍງານກ່ຽວກັບກຳລັງແຂ່ງຂັນຂອງຕົວເມືອງໃນໂລກແຕ່ປີ 2009-2010.ບົດລາຍງານສະແດງໃຫ້ເຫັນວ່າ,ນິວຢັອກ,ລອນດອນ,ໂຕກຽວແມ່ນສາມຕົວເມືອງທີ່ຢູ່ໃນອັນດັບສູງກ່ອນຫມູ່ໃນບັນດາຕົວເມືອງທີ່ມີກຳລັງແຂ່ງຂັນສູງທີ່ສຸດໃນໂລກ.ສ່ວນຮົງກົງ,ຊຽງໄຮ,ໄຕ້ເປ,ປັກກິ່ງ, ເຊີນເຈິ່ນແລະມາກາວຂອງຈີນກໍ່ໄດ້ເຂົ້າຢູ່ໃນ 100 ຕົວເມືອງທີ່ມີກຳລັງແຂ່ງຂັນສູງທີ່ສຸດໃນໂລກ.ນັກວິຊາການຊີ້ອອກວ່າ, ການປັບປຸງການຂີດແບ່ງເຂດແລະບົດບາດຂອງຕົວເມືອງ, ຊຸກຍູ້ຕົວເມືອງພັດທະນາ,ຈະມີຜົນດີຕໍ່ການຍົກລະດັບກຳລັງການແຂ່ງຂັນຂອງຕົວເມືອງຈີນໃຫ້ສູງຂຶ້ນ.
ບົດລາຍງານກ່ຽວກັບກຳລັງແຂ່ງຂັນຂອງຕົວເມືອງໃນໂລກແມ່ນສະພາບັນດິດວິທະຍາສາດສັງຄົມຈີນຮ່ວມມືກັບນັກວິຊາການຂອງຫລາຍໆປະເທດຮ່ວມກັນສ້າງຂຶ້ນ, ໄດ້ເລືອກເອົາ 500 ຕົວເມືອງໃນທົ່ວໂລກ, ອີງໃສ່ຈຳນວນຮ້ອງຂໍຈົດລິຂະສິດ, ການແຈກຢາຍຂອງບໍລິສັດຕ່າງປະເທດ, ຄວາມສາມາດໃນການປະດິດສ້າງ,ການລົງທຶນກັບການຜະລິດແລະອື່ນໆເປັນຕົວເລກຊີ້ວັດເພື່ອແລ້ວວິເຄາະລະດັບຂອງກຳລັງການແຂ່ງຂັນຂອງຕົວເມືອງເຫລົ່ານີ້.
ບົດລາຍງານສະບັບນີ້ຍັງສະແດງໃຫ້ເຫັນວ່າ, ກຳລັງແຂ່ງຂັນຂອງຕົວເມືອງຂອງປະເທດອຸດສຫາະກຳທີ່ຈະເລີນໃຫມ່ເຊິ່ງມີຈີນເປັນຕົວແທນນັ້ນພວມເພີ່ມຂຶ້ນຢ່າງວ່ອງໄວ.ທ່ານນີເຜິງເຟີຍ,ຫົວຫນ້າສູນຄົ້ນຄວ້າຕົວເມືອງກັບກຳລັງການແຂ່ງຂັນຂອງສະພາບັນດິດວິທະຍາສາດສັງຄົມຈີນກ່າວວ່າ,ສະຖານະການກຳລັງແຂ່ງຂັນຂອງຕົວເມືອງໃນໂລກໄດ້ມີການປ່ຽນແປງຢ່າງຈະແຈ້ງ,ກຳລັງແຂ່ງຂັນຂອງຕົວເມືອງຈີນໄດ້ຫຍັບໃກ້ກັບລະດັບຜ້ານກາງຂອງໂລກແລ້ວ.
"ຕົວເມືອງໃຫຍ່ຂອງປະເທດທີ່ພັດທະນາແລ້ວຂອງເອີລົບແລະອາເມລິກາຍັງມີກຳລັງແຂ່ງຂັນສູງສຸດໃນໂລກ, ແຕ່ວ່າກຳລັງແຂ່ງຂັນຂອງຕົວເມືອງໃຫຍ່ຂອງປະເທດແລະພາກພື້ນທີ່ຫັນເປັນອຸດສາຫະກຳໃໝ່ກໍໄດ້ເພີ່ມຂຶ້ນ. ຕົວເມືອງໃຈກາງຈຳນວນໜຶ່ງຂອງຈີນລ້ວນແຕ່ໄດ້ກາຍເປັນຕົວເມືອງທີ່ມີກຳລັງແຂ່ງຂັນສູງໃນໂລກ.ເວົ້າລວມແລ້ວ, ໃນດ້ານກຳລັງແຂ່ງຂັນ,ຕົວເມືອງຂອງຈີນບໍ່ວ່າໃນດ້ານເສດຖະກິດເຕີບໂຕຫຼືວ່າການເພີ່ມຂຶ້ນຂອງກຳລັງແຂ່ງຂັນສັງລວມ,ລ້ວນແຕ່ຢູ່ລະດັບແຖວໜ້າຂອງໂລກ."
ທຽບກັບຕົວເມືອງໃຫຍ່ຂອງເອີລົບແລະອາເມລິກາ, ຕົວເມືອງຂອງຈີນມີທ່າແຮງທີ່ຕົ້ນທຶນແຮງງານຕ່ຳຈະແຈ້ງຫຼາຍ, ຄຸນນະພາບດ້ານຊັບພະຍາກອນມະນຸດເພີ່ມຂຶ້ນຢ່າງຈະແຈ້ງ, ແຕ່ວ່າການພັດທະນາຂອງຕົວເມືອງບໍ່ດຸນດ່ຽງ, ຄວາມສາມາດປະດິດສ້າງວຽກງານບໍລິການລະດັບສູງກໍໄປນຳບໍ່ທັນ, ພ້ອມກັນນັ້ນຍ້ອນການປະກອງຄວາມສາມາດຂອງຕົວເມືອງບໍ່ເໝາະສົມ, ຈິ່ງເຮັດໃຫ້ການຈັດວາງຊັບພະຍາກອນກໍ່ມີສິ່ງກີດຂວາງດ້ານລະບົບ. ຕໍ່ເລື່ອງນີ້, ໃນເວລາຕອບຄຳຖາມຂອງນັກຂ່າວ, ທ່ານຫຼຽນຢູ້ມິງ, ຫົວໜ້າສະຖາບັນຄົ້ນຄວ້າການພັດທະນາຂອງຕົວເມືອງສາກົນຂອງປັກກິ່ງກ່າວວ່າ, ໃນໄລຍະມໍ່ໆມານີ້, ຕົວເມືອງໃຈກາງເຊັ່ນທຽນສິງ, ຈຸ່ງກິ່ງແລະປັກກິ່ງເປັນຕົ້ນໄດ້ປັບປຸງແລະເຮັດໃຫ້ການຂີດແບ່ງເຂດບໍລິຫານແລະປັບປຸງບົດບາດຂອງຕົວເມືອງໃຫ້ດີກວ່າເກົ່າ, ເບິ່ງໃນໄລຍະຍາວແລ້ວ, ຈະມີຜົນດີຕໍ່ການປັບປຸງແລະຍົກກຳລັງແຂ່ງຂັນຂອງຕົວເມືອງຂອງຈີນໃຫ້ດີຂຶ້ນ.
ຜູ່ຊ່ຽວຊານເຫັນວ່າ,ໃນຂະບວນການທີ່ແກ້ໄຂວິກິດການການເງິນທົ່ວໂລກ,ການຂະຫຍາຍຕົວຢ່າງວ່ອງໄວຂອງການຫັນເປັນຕົວເມືອງຂອງຈີນໄດ້ເສີມຂະຫຍາຍບົດບາດສຳຄັນ,ແຕ່ວ່າປະຈຸບັນນີ້,ຢູ່ລະຫວ່າງຕົວເມືອງຕ່າງໆແມ່ນມີການຍາດແຍ່ງຊັບພະຍາກອນຫຼາຍກວ່າການປະສານງານກັນ.ກ່ຽວກັບເລື່ອງນີ້,ທ່ານລຽນຢູ້ມີງເຫັນວ່າ,ໃນການພັດທະນາໃນອະນາຄົດ,ສ້າງຕັ້ງກົນໄກປະສານງານດ້ານການພັດທະນາເຂດຕ່າງໆ,ຊຸກຍູ້ການພັດທະນາຂອງກຸ່ມເມືອງ,ແມ່ນສິ່ງສຳຄັນທີ່ສຸດໃນຂະບວນການພັດທະນາຂອງຈີນ.
ທ່ານກ່າວວ່າ:"ໃນຂະບວນການຫັນເປັນແບບຕົວເມືອງຂອງຈີນ,ທ່າອຽງທີ່ສຳຄັນທີ່ສຸດແມ່ນການປ່ຽນແປງຂອງກຳລັງແຂ່ງຂັນຂອງວົງຕົວເມືອງໃຫຍ່,ນີ້ແມ່ນທິດພັດທະນາຂອງຕົວເມືອງຈີນໃນອະນາຄົດ.ໃນລະບົບຕາໜ່າງເຄືອຂ່າຍ,ກຳລັງແຂ່ງຂັນຕົວຈິງຂອງຕົວເມືອງໜຶ່ງບໍ່ແມ່ນອາໄສແຕ່ເມືອງນີ້ເມືອງດຽວທໍ່ນັ້ນ,ແມ່ນອາໄສກຸ່ມເມືອງ.ສະນັ້ນ,ວົງຕົວເມືອງໃຫຍ່ ຈະເລີນຂຶ້ນມາຈະກາຍເປັນກຳລັງແຂ່ງຂັນອັນສຳຄັນຂອງຕົວເມືອງ."
