ເບິ່ງກອງປະຊຸມລັດຖະມົນຕີການຕ່າງປະເທດອາຊຽນທີ່ຈະໄຂຂຶ້ນໃນໄວໆນີ້
(GMT+08:00) 2010-07-19 16:56:35 cri
ຕາມຂ່າວCRI:ແຕ່ວັນທີ20ກໍລະກົດນີ້ເປັນຕົ້ນໄປ,ກອງປະຊຸມລັດຖະມົນຕີຕ່າງປະເທດອາຊຽນຄັ້ງທີ43,ກອງປະຊຸມລັດຖະມົນຕີຕ່າງປະເທດອາຊຽນບວກ1,ກອງປະຊຸມລັດຖະມົນຕີຕ່າງປະເທດອາຊຽນບວກ3,ກອງປະຊຸມລັດຖະມົນຕີຕ່າງປະເທດເພື່ອກະກຽມໃຫ້ແກ່ກອງປະຊຸມສຸດຍອດອາຊີຕາເວັນອອກພ້ອມດ້ວຍເວທີປຶກສາຫາລືດ້ານການເມືອງແລະຄວາມໝັ້ນຄົງໃນພາກພື້ນອາຊຽນຫຼືARFຈະຈັດຂຶ້ນຢ່າງເປັນລຳດັບຢູ່ນະຄອນຫຼວງຮ່າໂນ້ຍຂອງຫວຽດນາມ.ລັດຖະມົນຕີວ່າການກະຊວງການຕ່າງປະເທດຂອງ10ປະເທດອາຊຽນແລະຂອງປະເທດຄູ່ເຈລະຈາ,ຄື:ຈີນ,ຍີ່ປຸ່ນແລະສ.ເກົາຫຼີເປັນຕົ້ນລ້ວນແຕ່ຈະເຂົ້າຮ່ວມກອງປະຊຸມ.
ກອງປະຊຸມລັດຖະມົນຕີການຕ່າງປະເເທດຕ່າງໆເທື່ອນີ້ມີຫົວຂໍ້ວ່າ"ຈາກວິໃສທັດສູ່ພາກປະຕິບັດ,ກ້າວໄປສູ່ປະຊາຄົມອາຊຽນ".ໃນຫົວຂໍ້ປະຊຸມຕ່າງໆຂອງກອງປະຊຸມເທື່ອນີ້,ມີສາມຫົວຂໍ້ແມ່ນໄດ້ຮັບຄວາມສົນໃຈຫຼາຍທີ່ສຸດ,ຄື:ອັນທີໜຶ່ງ,ກ່ຽວກັບການສ້າງປະຊາຄົມອາຊຽນ.ກົດບັດອາຊຽນເລີ່ມມີຜົນບັງຄັບໃຊ້ແຕ່ເດືອນທັນວາປີ2008ເປັນຕົ້ນມາ,ໄດ້ຕົກ ລົງເປົ້າໝາຍທີ່ສ້າງຕັ້ງປະຊາຄົມອາຊຽນໃນປີ2015.ນີ້ລວມທັງການສ້າງ3ປະຊາຄົມ,ຄື:ປະຊາຄົມການເມືອງຄວາມໝັ້ນຄົງ,ປະຊາຄົມເສດຖະກິດແລະປະຊາຄົມສັງຄົມວັດທະນະທຳ.ການເຊື່ອມໂຍງເຂົ້າກັນກ່ອນອື່ນຕ້ອງການໃຫ້ປະເທດຕ່າງໆບັນລຸການເຊື່ອມເຂົ້າກັນ.ປະຈຸບັນນີ້,ປະເທດຕ່າງໆຂອງອາຊຽນພວມຕັ້ງໜ້າຊຸກຍູ້ການເຊື່ອມໂຍງເຂົ້າກັນດ້ານຖະໜົນແລະທາງລົດໄຟ.
ໃນຂະນະທີ່ກອງປະຊຸມລັດຖະມົນຕີການຕ່າງປະເທດຕ່າງໆໄຂຂຶ້ນ,ກອງປະຊຸມລັດຖະມົນຕີພະລັງງານຂອງອາຊຽນທີ່ພວມຈັດຂຶ້ນຢູ່ດາລັດ ຂອງຫວຽດນາມຈະປຶກສາຫາລືບັນຫາການເຊື່ອມຕໍ່ຂອງຕາໜ່າງໄຟຟ້າ.ສ່ວນການສະໜັບສະໜູນຈາກປະເທດຄູ່ເຈລະຈາ,ຄື:ຈີນ,ຍີ່ປຸ່ນ,ແລະສ.ເກົາຫຼີແລະປະເທດອື່ນໆທີ່ມີຕໍ່ການສ້າງປະຊາຄົມອາຊຽນນັ້ນກໍ່ແມ່ນສຳຄັນທີ່ສຸດ.
ອັນທີສອງ, ການດັດແກ້ເງື່ອນໄຂເຂົ້າຮ່ວມສົນທິສັນຍາໄມຕີຈິດການຮ່ວມມືໃນອາຊີອາຄະເນ. "ສົນທິສັນຍານີ້"ແມ່ນບັນດາປະເທດອາຊຽນລົງນາມໃນກອງປະຊຸມສຸດຍອດອາຊຽນຄັ້ງທຳອິດທີ່ຈັດຂຶ້ນໃນປີ 1976,ຈຸດປະສົງແມ່ນເພື່ອຊຸກຍູ້ໃຫ້ປະຊາຊົນຂອງປະເທດຕ່າງໆຢູ່ພາກພື້ນມີສັນຕິພາບ,ມິດຕະພາບແລະການຮ່ວມມືຢ່າງຍາວນານ, ເພື່ອເພີ່ມທະວີກຳລັງ, ຄວາມປອງດອງກັນແລະຂະຫຍາຍການພົວພັນຢ່າງໃກ້ຊິດ."ປີ 1998,ລັດຖະມົນຕີກະຊວງການຕ່າງປະເທດອາຊຽນໄດ້ເຊັນອະນຸສັນຍາຂອງສົນທິສັນຍາສະບັບດັດແກ້, ເຮັດໃຫ້ປະເທດຢູ່ນອກອາຊີອາຄະເນສາມາດເຂົ້າຮ່ວມສັນທິສັນຍາດັ່ງກ່າວນີ້ໄດ້.ຈີນໄດ້ກາຍເປັນປະເທດທຳອິດຢູ່ນອກອາຊຽນທີ່ເຂົ້າຮ່ວມສົນທິສັນຍານີ້.ປະຈຸບັນປະເທດທີ່ເຂົ້າຮ່ວມສົນທິສັນຍາດັ່ງກ່າວໄດ້ມີ 16 ປະເທດແລ້ວ, .ການດັດແກ້ເທື່ອນີ້ຄາດວ່າຈະອະນຸຍາດໃຫ້ອົງການສາກົນສາມາດເຂົ້າຮ່ວມສົນທິສັນຍາດັ່ງກ່າວໄດ້. ນີ້ໝາຍຄວາມວ່າສະຫະພາບເອີລົບຈະສາມາດເຂົ້າຮ່ວມ"ສົນທິສັນຍາໄມຕີຈິດແລະການຮ່ວມມືໃນອາຊີອາຄະເນ"ໃນຖານະເປັນອົງການສາກົນໄດ້.
ອັນທີສາມກໍ່ແມ່ນບັນຫານິວເຄຼຍຂອງແຫຼມເກົາຫຼີຈະເປັນຈຸດສົນໃຈຂອງເວທີປຶກ ສາຫາລືດ້ານການເມືອງແລະຄວາມຫມັ້ນຄົງໃນພາກພື້ນອາຊຽນ.ເວທີປຶກສາຫາລືດັ່ງກ່າວໄດ້ສ້າງຕັ້ງຂຶ້ນໃນປີ 1994,ປະຈຸບັນ ມີ 27 ປະເທດເຂົ້າເປັນສະມາຊິກ,ແມ່ນຊ່ອງທາງການເຈລະຈາແລະຮ່ວມມືດ້ານການການເມືອງແລະຄວາມຫມັ້ນຄົງຫຼາຍຝ່າຍທາງການທີ່ມີຂະຫນາດໃຫຍ່ທີ່ສຸດແລະມີອິດທິພົນຢ່າງກວ້າງຂວາງທີ່ສຸດໃນພາກພື້ນນີ້. ປະເທດສະມາຊິກຂອງການເຈລະຈາ 6 ຝ່າຍກ່ຽວກັບບັນຫານິວເຄຼຍແຫຼມເກົາຫຼີ ຄື:ຈີນ,ອາເມລິກາ,ຣັດເຊຍ,ຍີ່ປຸ່ນ,ສາທາລະນະລັດເກົາຫຼີແລະສາທາລະນະລັດປະຊາຊົນປະຊາທິປະໄຕເກົາຫຼີລ້ວນແຕ່ແມ່ນປະເທດທີ່ເຂົ້າຮ່ວມເວທີປືກສາຫາລືນີ້,ແລະທ່ານນາງຮິວລາຣີ ຄຼິນຕັນ,ລັດຖະມົນຕີວ່າການກະຊວງການຕ່າງປະເທດອາເມລິກາກັບທ່ານປັກອີຊຸ່ນ,ລັດຖະມົນຕີວ່າການກະຊວງການຕ່າງປະເທດຂອງສາທາລະນະລັດປະຊາຊົນປະຊາທິປະໄຕເກົາຫຼີກໍ່ຕົກລົງເຂົ້າຮ່ວມເວທີປືກສາຫາລືເທື່ອນີ້ແລ້ວ.ຂ່າວແຈ້ງວ່າ,ທ່ານປັກອີຊຸ່ນກັບນາງຮິວລາຣີ ຄຼິນຕັນຈະພົບປະເຈລະຈາກັນ. ໃນຫວ່າງມໍ່ໆມານີ້,ເຈົ້າຫນ້າທີ່ສາທາລະນະລັດເກົາຫຼີກ່າວວ່າ, ທ່ານຢູມຽງຮວນ,ລັດຖະມົນຕີວ່າການກະຊວງການຕ່າງປະເທດແລະການຄ້າຂອງສ.ເກົາຫຼີ ຈະພະຍາຍາມໃຫ້ຜ່ານຖະແຫຼງການສະບັບຫນຶ່ງທີ່ມີຄວາມເວົ້າເຄັ່ງຂຶມໃນເວທີປືກສາຫາລືເທື່ອນີ້,ເພື່ອກ່າວປະນາມສາທາລະ ນະລັດປະຊາຊົນປະຊາທິປະໄຕເກົາຫຼີກ່ຽວກັບເຫດການກຳປັ່ນ"ໂຊນນານ"ຂອງສາທາລະນະລັດເກົາຫຼີຫຼົ້ມ.ກໍ່ເຫັນໄດ້ວ່າ,ເວທີປືກສາຫາລືດ້ານການເມືອງແລະຄວາຫມັ້ນຄົງໃນພາກພື້ນອາຊຽນອາດຈະເປັນການຕໍ່ລອງກັນທາງການທູດລະຫວ່າງສາທາລະນະລັດປະຊາຊົນປະຊາທິປະໄຕເກົາຫຼີກັບສາທາລະນະລັດເກົາຫຼີ.
